BURNOUT

BURNOUT

Pastor T. Thanglianmung

Thupatna

A. Burnout genchetna 

Burnout kichi eipau in "kikhin" chin kon let di, ka let fuh na diam ah. Huai omdan ahihleh "a nasepna a khanna ding leh hatzawk na ding lametna nei nawnlou, ahih dingdan le thei nawnlou a bing phutna ahi." 

Burnout tawh kisai suina lam a malatute ahih ua leh - Herbert J. Freudenberger, psychiatrist leh Christina Maslach, psychologist te ahi uhi. Freudenberger in 1974 kum in "burnout" chih thumal ana zang masa hi. Tuhun adia mite ngaihvenpen leh burnout tawh kisai asui chiang ua a pansanpen uh Christina Maslach leh a lawmte laigelhte ahideuh hi. Christina Maslach in burnout kichi lungsimlam tawh kisai ahi a, midang tawh kisaikhakna neite lak a tung ahihban ah huchibang mite a tawldemdum ua (emotional exhaustion), mite mimuhlouhna anei ua (depersonalization), ban ah sepsuah taktak anei kei uh (reduced personal accomplishment) achi hi. A tawldemdum bang I om uhia? Midangte kamsiam a le hou ngap nawnlou a pau khe bukbuk khawng I om uhia? Or semsem napi a hiai kasemsuah a phatuam mahmah e chih di neizou nawnlou bang I om kha uhia? Hiai thumal thum te mah ahi tuni a burnout ihilhchet na dia i pansan dingte.

B. Burnout kuate’n nei.

Mi tawh kisai nasepna, pastoral ministry tel in, company nasepnate, hotel nasepnate leh hospital nasepnate ah semtute burnout in zelsuak nak mahmah ahi. 

I nasepte enkik le hang lungtun huai isa chiat uhia? Feedback a bangbang naza zel a?

Burnout kitheihsuahdan

A. Stress – Lungkham chihna ahi a, hiai ziak in luna, hagawina, chikham, sungna, bp sang leh lungphuhat bang hong om thei ahi. Ahihziak a stress teng burnout chihna hilou ahi, burnout te stress uh chihna ahi. Huchibang a lungkhamtak a om a kingaihtuahtuah I om leh hiai in burnout hon tun thei ahi. Khenkhatte'n stress a neih chiang un kitheihkhem bawl hiam damdawi nek a dam di hiam in a kingaihtuah uh himahleh huchia damthei hilou ahi.

B. Loneliness – Nasepna a tangkhat kisakna a kithang mahmah khat ahi. Tangkhat kisakna in burnout ichih piangsak thei ahi. Huaiban ah nasepha tha-it luat ziak a nupa kar kizopna natawm kiam hiaihiai a hong om thei ahihman in hiaite’n tangkhatna hon puangsak deuhdeuh thei ahi.

C. Spiritual dryness – Khalam a keuna hong om chiang in burnout na'ng nai mahmah chihna ahi. Chi nih in a khentheih hi – khatna ah, khalam a mahni kikepna ngaihsaklou a om ziak a keuna kichi a om hi. Hiaite ahihleh, Laisiangthou sim leh sut peihlouhna, thumna neih peihlouhna, Toupa aw ngaihkhiak manlouhna, leh biakna limsaklouhna ziak khawng a hong suakkhia ahi.

 

D. Depression – Kingaihsiatna chin let ni maw. Mi khenkhat in depression leh burnout a kibang ahi achi uhi, himahleh, kibanglou ahi. Kingaisia ihi chih a kitheihna chu – kipaktheilou a omna, kithalawpna omlou, lametbei kisakna nei, a hoihlou lam ngen kipia, mawh kisakna nei, manbei kisakna om, panpihtu di neilou bang a kingai, ihmut buai, annek buai, chau kisa, gim pahpah, kithah utna nei, nupa kipolhna lam le lunglut zoulou, leh lungluttak a nna septheihlouhna te khawng ahi. Huaiziak a, kingaihsiatna kha a beisak theih dingdan mipil misiamte'n naktak a buaipih uh ahi. Abiktak in, mahni kithahna bang eilak ah le uang mahmah ta ahi.

E. Loss of motivation – Sepnei hingal a kithalawpna nei nawnlou a omna ahi hiai in a gen tuppen. Thathou leh kithalawptak a om theihna ding in I nasep ah lunglut mahmah mi hih angai a, midangte tawh sepkhawmna lunglut a, a khan ding uh I deihsak ahih a ngai a, huaiban ah, midangte hon lametna khen lam tung thei ding a ihih theihtawp suah a pan utna lungtang neih a ngai hi. Nasepna a mahni a le thathawhna om nawnlou himhim chu ki burn-out dia kimanta chihna ahi.

F. Susceptibility to temptation – Khemna a puk pahpah na ahi. Laisiangthou ah khemna hongtun dan chi 3 a om hi – khatna ah, sa utna, nihna ah, mit utna, leh thumna ah, thupi utna ahi (1 Jn. 2:15-17). Sa utna kichi pumpi nopsakna ding ahihnakleh chi a poisak neilou a utdandan a omna ahi. Hiaite'n I pumpi siangthouna di sang a hon nin sak zaw uh ahi. Mit utna te imuhte a kipan a hong kipan ahi a huai imuhte'n thilhoihlou hih ding a hon pilut ahi. Huaiban ah, thupi utna ichih in khawvel mitna, sum leh pai, neih leh lam deihtakna ziak a Pathian sang a poimawh zaw a koihna gen ahi. Mi burnout thei ding dinmun a, a din chiang in hiai te'n zou pahpah sek ahi.

G. Lack of love and disengaged with those they serve – Pathian in hon thupiak poimawh mahmah chu – lungtang tengteng, kha tengteng leh theihna tengteng a Pathian it ding chih ahi (Matt. 22:37-39). Himahleh, itna bei deuhdeuh a, seppihte tawh leh midangte tawh kar ah kigamlat hiaihiai na hong om in a tawp in kimuhdahna hong om hi. Midang tawh nasem khawm theiloute kha a burnout ziak uh hithei ahi chihna ahi.

Burnout hong tungsak theite

A. Polam a kipat a hong tungtheite

1. Role ambiguity – Nasep dingdan kichiantak omlou chihna ahi. Nasep ding om himahleh koi ah bangtan sem thei ding leh bangteng sukha a sem thei ding chih kichiangtanna omlouh ziak in nasep dingdan buaina a om thei hi. Hichibang hong om theihna ziak khenkhatte – khatna ah, sepdi tuamtuam omte ziak a koipen masa ding leh poimawh masa ding chih khentatna kichian a omlouh chiang in hongtung thei. Nihna ah, hiai nna tuamtuam te ziak a lawhchingtak a sem theilou dia kikoihna a om thei hi. Thumna ah, vaihawmna kichian a omlouh ziak in nasep patna ding leh zawhna ding bangpen hiding ahia chih theikhen theilou a sepbuai khak theih ahi.

2. Role conflict – Nasep ding deihdan kituahlouh ziak a haksatna ahi. Hiai bang kituahlouhna na makaite tawh na kikar uah a om thei a, huan ah, na seppihte tawh na kar uah le a om thei hi. Hiai bang kituahlouhna tampi omtheite lak ah mi khat leh khat kar a kituahlouhna in thil poi a sukhapen a kichi hi. 

3. Role overload – Olsen leh Grosch kichiten a suina uah, pastor in saptuamte deihdan sukbuchin sawm a pan a alak chiang in saptuam miten amah a lametna tam nei semsem uh ahi achi hi. Huchi ahihleh chu pastor tung a lametna bei ngeilou ding, pastor in le sem zouzou ngeilou ding chihna ahi. Hichibang mah in nasepna tuamtuam ah le heutute' hiam iseppihte hiam in ei ah lametna bei theilou kibehlap deuhdeuh nei thei uhi. Hiaite'n a tawp ah hon burnout sak thei ahi.

4. Work-family conflict – A zi’n a kiang a, a gen zel chu a ta 4 te tawh kithuahna hun bawl a zatzel ding chih ahi. Himahleh, inn a, a om chiang in le a lungsim inn ah a om kei. Hiai kha sep nei khenkhatte omdan ahi. Huaiziak a hichibang a omna in innkuan pihte tawh kituahlouhna tun a, a tawp a innkuan kekzak a om kha thei ahi.

5. Personal conflict – Hiai kha mimal in ana tuahte genna ahi. I tuah dan a kibangvek kei ding a, a tallang deuhte I en ding uh. Khatna ah, numei pasal kar paktatna. Nihna ah, internet zatdan ahi. Thumna ah, khawtang a kipat a kikoih tuamna ahi. Lina ah, poimawh ngaih masak ding a kibatlouh ziak in kituahlouhna a om thei hi.

B. Sunglam a kipat a hong tungtheite

1. Personality profiles – “Big Five personality” chi a burnout suina ding in, a zang uhi.

• Extraversion personality neite thathou, mite tawh kithuah nuamsa, leh pautamte ahi uh. Amaute tawh saptuam mite kiton thei mah mah uh ahihman a burnout om mengmeng lou ahi.
• Neuroticism personality neite muangchanglou, thukpahpah, leh kim leh pam in zouzou pah te ahi uh. India ah huchibang mite’n burnout kichi nei baih deuh ua theih ahi. 
• Agreeableness personality neiten mi ngaipoimawh uh, a hun bangzel a ki hei thei uh, leh dawhzou uh ahi. Bangteng ah “yes man” luat ziak a, a tawp a gim gawp a burnout chih om thei ahi.
• Conscientiousness personality neite a hinkhua ua a thil tup un thuzawh zou leh mimal a thiltup omte ngaipoimawh uh ahi. 
• Openness personality neite'n amau mimal pilna leh siamna suang uh, midangte tawh kithuah theilou uh ahi.

2. Time management – Nasep ding a tam ziak in day off hiam leave hiam lak ding pammaih sa a khawl sawmlou a nna hahtak a hon sep chiang un a theihlouh kar un gim gawp uh a, burnout kha uh ahi.

3. Age – Kum upat leh naupan thu in le burnout tawh kisai khak na nei uh ahi. Naupang lamte ahih uleh phur tak a nasep kipan uh himahleh a ngaihtuahdan ua a pai louh chiang a lungkia uh a, burnout pah uh ahi. A upa lamte'n ahihleh a hih ding dan lampi ana theita ua, ana hi theithei zaw uh ahi.

4. Spiritual formation – Sep di tamluat ziak hiam pastor te tung ah lametna a let luat ziak hiam in khalam nasepna mangngilh in om thei a huai in burnout tun thei ahi. Amaute’n midangte khalam a, a chawm lai un amau leh amau kichawm kha lou uhi. 

Burnout a kipan kiventheihna leh damkhiat theihna dingte

A. Burnout apan kiven theihna dia pawlpi in ahihtheihte:

1. Social support group neih ding - Social support group a kichih chiang in peer group support, denominational support, leh consultation with pastors chihte a huam kha hi.

1. Peer group support – Hichibang support group ah lunglutna kibang, dinmun kibang, leh kum kikimte a om khawm uhi. Hiai in a tup ahihleh kimukhawm zel ding leh kihanthawn tuah zel ding ahi. Amaute’n ahih theih uh ahihleh – thumkhawmna bang, Bible study neihkhawm chih bang leh nasepnate kikumkhawm a kithuahkhawmna ahi.
2. Denominational support group – Pastor hi in saptuam heutute hita le uh a lawhchin theih na ding un a kep saptuamte tawh kituaktak a semkhawm thei leh saptuamte kithuahpihna ngah mi hih poimawh ahi. Huchibang mah in sepna neiten le hichibang mah a sepna mite tawh a neih uh poimawh ahi.
3. Consultation – Seppihte tawh hiam heutute tawh consultations neihzel ding ahi. Huchilou a kuamah le bangmah dong ngeilou a, a theipen bangmai a nasepna in burnout ding hon naisak ahi.
4. Delegation of tasks – Sep ding kichian omlou, sep ding tamlua,  leh khat leh khat kar a buaina omte hih ven theihna ding in hiai delegation of tasks poimawh mahmah ahi. Huai chu nna hawmsiamna chihna ahi. Nna khatpeuhpeuh lompuak suk in gimpih mahmah chih om thei ahi.

2. Professional training and seminars -  Hiai training or seminarte’n a kim zawsem a sem theidia hon chil ding a I nasepna ah tua sang a kihiam zaw ding chih ngimna ahi. 

3. Availability of study leave – Study leave tungtawn in ei mahmah le I theihna leh siamna kibehlap ding, leh nasepna a ding a kisinsakna hun hi ding ahihman a ki khangtou ding ahi.

B. Burnout apan kiven theih na dia mimal in a hih theihte.

1. Personal assessment – A. G. Schaefer & S. Jacobsen te’n, miteng a ding in amau deihdan chiat in I om theikei ding, huaiziak a hiai personal assessment in bang ihih thei a chih hon hilh ahi achi uhi. Hiai ah theih ding thum a om – khatna ah, sepsuah theihding tup nei in. Nihna ah, amasa ding khenchian masa in. A thumna ah, a kikhek thei leh a kikhek theilou khen chian thei in a kichi hi. Hiai personal assessment tungtawn a I hihtheih lam kitheithei dia huai mah pansan a hiamtak a kizat theih ding ahi.

2. Mentoring – Hiai in khat leh khat hon hih hat a hon chawm ahi. 

3. Self-care – Mahni kikepna lam ngaihpoimawh ding ahi. ihmut khamlouh bang le ei kibawl hisim ahi. Hun zatsiamlouh ziak a ihmut khamlouhna in thildang ihih dingte nawngkaisak thei ahi. Ihmut kham in hun hoihtak in hawm le kizentak a khawsak theih ding ahi. Mahni kikepna ding khenkhatte – nek leh dawn thu bang ah, laibu sim ding telsiamna bang ah, movies I et di telsiamna bang, leh lunglut deuh a hun awl zat dingdan khawng tel siamna in inasepna ah hon panpih mahmah ahi. 

4. Sense of calling – Bangteng a i bah lai in le Pathian tawh I kituahdante, Pathian hon itdante ngaihtuahkik zel theihna in i lungsim hon damsak a hon hanthawn zel ahi. 

5. Stress management – Stress kichi lungkhamna chikhat ahi a, mihingte’n ngeina bang a ituah uh ahi. Huchihlai in I sai siam kei leh ei a ding a buaina kipatna hithei ahi. Stress I neihna ziak a kibangkei ding a, huai stress ineihna pen bangchin en ina dawng a chih kha I ngaihtuahna uah omdia poimawh ahi. 

6. Building healthy relationship – Relationship a hoih leh I lungsim le nuam a kitawldam ahi. “Elijah problem” kichi a om a huai kha relationship a hoihlouh chiang a hong suak ahi. Huaichu lawhsam kisakna ahi. Relationship a hoih leh lawhsam kisaknate bei thei ahi.

7. Spiritual discipline – Hiai in a huamkhak chu – Bible study, thumna, kikhop, annngawlhna, evangelism, thugen ding a kisakkhawlna, leh a dangdang khalam a hon chawm theite genna ahi. 

8. Reshaping expectation – George Barna in a suina a kipan in hiai bang hun a itheih ding lampi li a taklat a om hi – khatna ah, team mentality neih ding ahi. Nihna ah, accountability a om ding ahi. Kimuantuahna ichi hiam aihkeh mawhpuakna kipiaktuahna a om ding ahi. Thumna ah, hun zat siam ding ahi. Leh a lina ah, isepna miten sepkhiat ding theih ahi.

Burn out kichi a thu in tam theikei lele nasep nei mite adia chiklaipeuh a tuahkhak theih ahi. Huaiziak a mi tawh kisaikhakna nei nasepna a semte peuhmah in kivengsiamtak leh theisiam kawmtak a nna sep ding poimawh ahi. Huchi ahihkeileh semtam utlua in tawmchik semkhe zou chih om thei ahi. Mi a burnout chiang ua a hihdam na lam ah hun sawtpi lut ahihman in burnout lou dia kizentak a nna sep ding tup a neih gige ding ahi. @23062021mungte