Ginna a mihangsan BARNABA
Ginna a mihangsan BARNABA
Bible ah, ginna a mihangsan tampi kisoite laha khat chu Apostol Barnaba ahi. A
pianpih min ahihleh Joseph ahi. Amah ahihleh Kupra a Levi mite lah apat ahi.
Amah ahihleh mihangsantah ahi a, a gam a juah a , a sumteng Pathian natohna a
diingin Apostol te maai ah ahung tawi hi. Bible in mihoih, Hagau
siangthou leh ginna a dimmi achi hi. Lalpa keengbul ah mi tamtah a pui hi
(Silb.11:24).
Amin Barnaba chu Apostolte in a min dia a piah uh ahi. Hu umzia chu “Hasotna
tapa” chihna ahi. Amahin a min toh kituaahin hinkhua amang hi. Gingtu dangte
kithuahpihna diingin thanopna leh lungluutna aneih hi. Amahin apostol Paul chu
Khrist nungjui ginum ahi chih amu a, Jerusalem a apostol dangte kawmah puiin
kimeelhatpina abawl hi.
Apostol dangte leh gingtute in gingtute suhduhdahtu ana hih jiahin apostol
Paul pianthah tungtaang a muangmoh va, hizongleh Barnaba in hangsantah in Paul
a gum hi. Barnaba hasotna jiahin Paul chu Jerusalem ah umin Lalpa minin
hangsantahin tanchin pha a taangkouhpihta hi.
Kupra, Pisidia Antiok, Ikonium leh Lystra te ah Barnaba chu Paul toh kithuahin
tanchinpha a soi uhi. Douna leh suhduhdahna thuah zongleh uh thutah chu a
paipih zing uhi. Kouhtuam a phuhte uh awlawl in a hung khanglian hi. Awlsamtah
in sil himhim ah a lunglawng meimei sih hi. Thunatohna ah Paul toh hung
kikhen in, Barnaba chu John Mark toh Kupra lamah missionary khual vazin uhi.
Barnaba in hinkhua nopsahna taisanin, ji nei zong leh Khrist tanchinpha
natohna akisubuaisah sih hi.
Thunatohna a lungliaplou keei a, aginna toh a bawl teitei a, a kuhkalna jiahin
mi tampite Juda hi inn Jentel hizongleh Khrist kawmah ahung puitung hi. A
kisoidan in a hun tawp lam ah Judate kikhopna mun Synagogue ah thu a soi lai
in mipi muh in martyr in a si a kichi hi.
Unau deihtahte, gingtu dangte a diing in hasottu in na pang diai?
No comments