Ginna a mihangsan BARNABA

Ginna a mihangsan BARNABA

Bible ah, ginna a mihangsan tampi kisoite laha khat chu Apostol Barnaba ahi. A pianpih min ahihleh Joseph ahi. Amah ahihleh Kupra a Levi mite lah apat ahi. Amah ahihleh mihangsantah ahi a, a gam a juah a , a sumteng Pathian natohna a diingin  Apostol te maai ah ahung tawi hi. Bible in mihoih, Hagau siangthou leh ginna a dimmi achi hi. Lalpa keengbul ah mi tamtah a pui hi (Silb.11:24). 

Amin Barnaba chu Apostolte in a min dia a piah uh ahi. Hu umzia chu “Hasotna tapa” chihna ahi. Amahin a min toh kituaahin hinkhua amang hi. Gingtu dangte kithuahpihna diingin thanopna leh lungluutna aneih hi. Amahin apostol Paul chu Khrist nungjui ginum ahi chih amu a, Jerusalem a apostol dangte kawmah puiin kimeelhatpina abawl hi.

Apostol dangte leh gingtute in gingtute suhduhdahtu ana hih jiahin apostol Paul pianthah tungtaang a muangmoh va, hizongleh Barnaba in hangsantah in Paul a gum hi. Barnaba hasotna jiahin Paul chu Jerusalem ah umin Lalpa minin hangsantahin tanchin pha a taangkouhpihta hi. 

Kupra, Pisidia Antiok, Ikonium leh Lystra te ah Barnaba chu Paul toh kithuahin tanchinpha a soi uhi. Douna leh suhduhdahna thuah zongleh uh thutah chu a paipih zing uhi. Kouhtuam a phuhte uh awlawl in a hung khanglian hi. Awlsamtah in  sil himhim ah a lunglawng meimei sih hi. Thunatohna ah Paul toh hung kikhen in, Barnaba chu John Mark toh Kupra lamah missionary khual vazin uhi. Barnaba in hinkhua nopsahna taisanin, ji nei zong leh Khrist tanchinpha natohna akisubuaisah sih hi.

Thunatohna a lungliaplou keei a, aginna toh a bawl teitei a, a kuhkalna jiahin mi tampite Juda hi inn Jentel hizongleh Khrist kawmah ahung puitung hi. A kisoidan in a hun tawp lam ah Judate kikhopna mun Synagogue ah thu a soi lai in mipi muh in martyr in a si a kichi hi. 

 

Unau deihtahte, gingtu dangte a diing in hasottu in na pang diai?