RAPTURE A PANGKHALOU TE SILTUOH DING GIMNEI- PART 2
RAPTURE A PANGKHALOU TE SILTUOH DING GIMNEI- PART 2
Rev.Stephen Khupsianlal
Rapture hun a nuasia a umkha te khun hamsatna gimneitah tah atuoh tou pai ta ding ua, kisuimawna thupi tah leh lenna/road accidents simsenglou hing umpai ngal ding ten social media teng ah Breaking News hita ding hi. Pasian nasemte or piengthana dihtah neite zousie umnawnlou ding ahitah zieh un koiman hundamna thu or Bible thu hing genpieh thei nawnlou nalai ding hi. Leitung pen buoi chitah in abuoizah ta ding ahi. Tuazieh in hundamna kichien nailou pi a lungmuong kinei kha nahileh ki enchien in unau!!
Tambang a leitung pumpi kinepna neilou kei a ahing pumbuoi tah chieng leh Setan in Anti-Christ khu hing tung ding pai ta ding a, Israel toh kum 7 peace agreement hing siem ding uhi. Namchin in ama ahing tahsang ding ua, lemna leh muonna hing umding kinepna lienpi toh akinem thawn ta ding uhi ( Kihilna 17:17).
Tribulation kum 7 hunsung akhun Anti-Christ khun Sahkhuo (religion), Sepai-galkap (Millitary) leh kivaihawmna (politics) sil te ah thuneipen hina toh vai hawm ding hi ( Daniel 7: 7&24 ). Tribulation kum 7 hunsung a gawtna gimnei mama hing tung dingte khu Mangpa'n Hepi Johan kungah ana musah ahi.
Tam gawtna hing tung dingte khu Hepi Johan in khen 3 in khen hi.
CHIEMTENA SAGI:
Kihilna 6:1-2 akhun chiemtena khatna phel ahing hi ta in Johan in sakol kang khat amu a, tualeh atunga tuongpa'n (Anti-Christ) in thalpi khat atawi a, tualeh akungah manglukhu khat akipie a, ama khu guolzou leh guolzou zel dingin a kuonkhe ta ahi chi amu ahi. Anti-Christ khun Rapture zou chieng in kinepna neilou mihingte kungah kinepna pethei ding bang in akigen dinga namchin lungsim alazou dinga, aguolzou tou zel ding hi.
Verses 3&4 akhun Johan in sakol dang meikuong banga san khat amu a, atunga tuongpa kungah leitunga galmuonna alahmang theina ding leh mite khat leh khat kithatuo sah theina thuneina akipie a, tualeh namsau lienpi zong pieh ahidan mu hi. Anti-Christ khun abul lam in lemna leh muonna tungding ding bang in ana gen nanleh shina leh manna piengsah dingtu ahizaw hi. Tuachin leitung pumpi ah kidouna leh kithatuona huoisetah tah hing um ta ding hi.
Verses 5&6 akhun Johan in sakol vom khat amu a, atunga tuong pan tena tawi hi. Tualeh sil hing lite apat aw khat in mangbu chin khat man khu makhai khat ahia, barli chin thum man khu makhai khat man ahi, tualeh sathau leh uoin pen suse sin achi kaza hi achi hi.
Leitung pumpi a gal kidouna leh kithatuona umding ahizieh in neh leh tah nasatah in ahing tasam ta ding a, tuahun chieng in mikhat in sunpi nitum a anasep man khu ni khat ann neh man ching ham ham ding chi na ahi. Nasem tu khat in nitha alawhkhiet apat a innsungmite avah zou lou ding ahi. Tam hun ah Anti-Christ in khovel economy control ding a, mihausate khun sathau leh uoin kining ching in nei sah ding hi.
Verses 7&8 akhun Johan in sakol daang (pale) khat amu kia a, atunga tuongpa min khu Shina kichi hi. Tualeh ama khu mishikhuo in zui hi . Tualeh amaute kungah namsau toh, kiel toh, shina toh, leitung gam sahangte, that dingin leitung seli suo sekhat tunga thuneina pieh ahidan mu hi.
Leitung ah buoina leh hamsatna pungsem sem ding ahizieh in neh leh tah tahsapna lienpi umding zieh in mi hing se li suo sekhat kiel in shi ding uhi.
Verses 9-11 akhun Johan in Martyr ana shimasa te hinna hagau maitam nuoi a um amu a, khum hagau ten Pasian kunga a sisan man uh phuba lading in angen uhi. Tuanah Mangpa'n martyr a shina tuoh hing um be ding ahidan gen pieh hi.
Verses 12-17 akhun Johan in zil nasatah a kiling amu a, anasat seng ding zieh a muol leh tang leh tuilaisie (island) gam chinteng a umna mun uapat kisuon mang a um ding uh ahidan mu hi.
Tambang gawtna gimnei tahtah te leh chizat huoi tahtah hing tung ding te khu Hepi Johan in Chemtena 7 te aban ban a ahing kiphel na a ana mute khu ahi.
Piengtha dihtah Rapture hun a lahtou a um te'n bangma kituoh kha lou ding hi. Mangpa'n thupina tangta hen🙏
Unaute, tambang sil chizat huoi tah tah Hepi Johan in amu te khu Rapture zou chieng in atah tah in hing um pai ding hi. Gingta in gingtasih leh chin Bible thugen khu tangtung thouthou ding hi.
Tulai khovel akhun Anti-Christ tungding nading in One World Government thu zong nasatah in akigengenta a, a process peitou lellel zel a, Rapture hun pen nai mama ta hi.
Ei ut leh utlou umlou a, Khristian kichi napi a piengthana dihtah neikhalou ihi kha ua, shina ituoh kha uleh Gawtmun ilut ding uh ahi.
Tahsa shina chiem khalou a idamsung hun ua, ipientha dan adih khalou a, Rapture ahing tung hun a nuasie ihi khah ngeingei uleh Tribulation Chiemtena Sagi imaituo ngal ding uh ahi.
Tuazieh in leitung silte sang in mailam hagau dinmun ding buoipi zaw in unau! Leitung a nopsah ding nabuoipi sang in kumtawn a na hagau dinmun ding velchien tha in, tualeh na innsung mite hagau dinmun ding zong buoipi pai in, dachiengin vaigei ta ding hi.
Mangpa'n hing guolzawl hen🙏🙏
No comments