SECOND COMING

SECOND COMING 
Rev. Stephen Khupsianlal

Text: Mathiu 24: 27 - 31 

Hundamtu Mangpa Jesu khu khovel a ahing pei masat lai in simmaw huoitah in ahing pei a, nanleh ahing pei kia (niveina) hun chiengin aloupina toh hing pei ding ahi. 

Gingtu khenkhat ten Rapture khu Second Coming bang in ngaituo kha leng ua, tuakhu hilou hi. Rapture khu asisan a tatsate lakhawm ding a ahing peina ahi a, Second Coming pen Anti Christ leh a sepaite sumang ding leh Dawimangpa kokhuh tobei a kum 1000 henden dinga ahing pei na ding khu hizaw hi.

Tuaban ah Second Coming toh kisai ngaidan tuomtuom a um kia a, khenkhat (Post Millenial view ) ten Second Coming pen kum 1000 Leenggam zou chienga hing umpan ding in ngaituo ua, khenkhat kiaten (A-Millenial view) Second Coming pen um tahtahlou ding chi ua, Khrist Messiah hingpei chienga thakhat thu a bangkim beimang sieng ding in gel ua, tualeh khenkhat ten (Pre-Millenial view) Rapture ahing um masa ding a tuazou chieng in Second Coming hing umding hi chi in ngaidan chi 3 um hi. Tam ngadan 3na pen khu eite gintat pen zong ahi.

Rapture akhun asisan a tatsate ahiei hundam tata or gingtu pienthana dihtah neite bou khu meipi lah ah lahtou in aki um ding a Khrist a imu masate athou masa ding uhi. Tuachin van tahsa loupi isil ta ding uhi. Tam Rapture hun khu ami siengthoute bou in thei ding ahizieh in aguh a hing pei ding ahi a, nuasia a umten bangma athei mansih ding ua, kisuimawna nasatah hing um ding ahi (1 Thessalonika 4: 15-17). 

Rapture zou chieng in kum 7 sung gimthuohna huoisetah (Tribulation) ahing tung pai ding hi. Tam kum 7 sung khu Mangpa Jesu Sisan man phulna or phubalahna, Mangpa Ni, Daniel Hapta 70 chinna dinga Hapta nukhieh pen (Daniel 9: 27 ) tangtunna ahita ding hi. Rapture a pangkhalou khovel a nuasia a umte kigawtna huoisetah Tribulation kum 7 abei chieng in Second Coming hing um ngal ta ding hi.

Mathiu 24; 29 , " Gimthuohna nite zou tah chiengin, ni suhmiel in a um ding a, hapi zong avah nawn sih ding hi, van a kipat in aahsite a ke ding a, tualeh van silbawl theinate suhling ahi ding hi." Second Coming khu leitung mizousie in amu ding uh ahi. Rapture hun akhun tatsate bou in amu un athei ua, nanleh Mangpa Jesu a 2vei hingpei hun pen mit zousie in amu ta ding uh ahi. Mathiu 24: 27" Suohlam a tunphe a hing phet a tumlam dong asalvah bang in, Mihing Tapa hing peikia na zong tuabangma ahiding ahi ." 

Tulai a Mobile phone te, Computer te, News Channels te zousie tungtawn ah Second Coming hing tung ding khu gamchin munchin ah Breaking News ahita ding ahi. Second Coming hun chieng in ei Rapture a lahtou a na um ding te leh ginna a mimasate toh tam leitungah iMangpa Jesu toh ihing kumsuh khawm kia ding uh ahi.

I Mangpa Jesu khu i LEADER uh ahi ding a, OLIVE MUOL ah ikumsuh khawm ding uh ahi. Zakariah 14:4 , " Tua ni chiengin suolam a, Jerusalem maingat a um Olive muol tungah, a keng nga in ading ding a..." Tam khu iMangpa Jesu van a akatou laitah en a dingte kung a vansawltah ni ten, _"Nou Galilee mite bang dinga, vanlam en a dingden nahi uoi? Tam Jesu mama nakung ua kipat a, van a puitou a um, van ah akaltou namu bang ngelngel un, Ama ngel hingpei kia ding ahi achi uhi. Tuachin Olive muol achi ua kipat in Jerusalem khuo ah ahing pei kia uhi," (Nasepte 1: 10-12) kichipen hing tangtung ding ahi.

iMangpa Jesu ahingpei kiana Second Coming masang a Tribulation hunkim (Kum thum leh akim masa/kum 7 kimkhat) atun chieng in Danbei a gamtapa Anti Christ khun Israel toh lemna thuhun abawl khu ahing sukeh ding a, ( Daniel 9:27 ) Jerusalem Temple hing kilamtha ding pen akhun Pasian bang in akigen ding a, chichin namchin ama beding in asawl ta ding ahi. 

Tamhun chieng in Israel ten abenuom sih ding ua, Tribulation kum thum leh kim nukhieh lam pen ah Israelten Jerusalem a taisan ding ua, BOZRAH khuo lam ah ava kibumang ding uhi. Tam khuo khu Jerusalem Simlam ah um kichi a, muol leh tang tampi umna mun ahi.

Isai 63: 1 , "Edom a kipat a hing pei, Bozrah khuo a kipat a asandup a kibum puon sil a hingpei, Leeng puon thupitah  toh kalsuon a hing pei koi ahiei? Keima dihtatna thugen a hundam dinga hattah kahi," chi thu kimu hi.

Isai in agen bangin Second Coming chiengin Bozrah khuo a ana kibuding Israelmite Mangpa Jesu'n ava suikhe dinga Ama khu Kros a akilbeh sah lai ua aliemna mah zousie  amu ding ua kisia in asuun ding ua, Mang leh hundampa in apom ta ding uh ahi.

Tuachi'n Mang Jesu'n Danbei a gamtapa Anti Christ leh chiemtena lamdang bawlpa leh a sepaite ukhu khu Armageddon mun ah akidoupi ding a, azou ding a,  mat in a um ta ding ua, amau tegiel khu kaat meidiil ah pailut in umta ding uhi🔥🔥. Adang teng khu Mangpa kam a hing pawt ding namsau toh tha in a umbei ding uh ahi. Tuaban ah atahsate ukhu vate zousie in ane ding uh ahi.

Kihilna 19: 20 ," Tuachin gamsa khu mat in a um ta a, tualeh guolnei tahlou gamsa chiemtena neite leh, alim bete a solna a, amasang a chiemtena lamdang bawlpa zong ama toh matkhawm in a umta a, tamte gelpen kaat meidiil ah ahing a pailut in a umta uhi. Tualeh adangteng pen, tua sakol tunga tuongpa kam a kipat a hing pawt namsau a tha in a umta uhi. Tualeh tungleng vate zousie ama ute sa in agilvata uhi."

Tambang a hing tung ding silte khu piengtha dihtah nahi a Rapture a lahtou a na um khah leh bou Second Coming chieng ni chieng in iMangpa silbawl ding khu eiten jong imu chiet ding uh ahi. Tambang ahing hi  zou chieng in iMangpa'n kum 1000 Leenggam ahing tungding ta ding a, Dawimangpa khu kokhuh tobei ah kum 1000 sung henden in a um ta ding ahi.

Theisiem ding in Mangpa'n hing guolzawl hen🙏