THAHATLOH HANG ZUI TEITEI IN

THAHATLOH HANG ZUI TEITEI IN
Nisim Manna

Bulphuh: Note' nasepante ka thei hi. Na tha uh a hatloh hangin ka thu zui-in kei tungah na hong cihtakna uh ka thei hi....Maangmuhna 3:8 (Revelation3:8)

Hih thu pen pawlpi sagihte' lakah khat ahi Filadelfia pawlpite tunga laikhak hi. Filadelfia pawlpi pen Jesu in a pahtak pawlpi khat ahi hi. Bang hang hiam cih leh:
    (1) Amaute in a tha uh a hat loh hangin Jesu thu zui-in, 
    (2) Ama tungah citak uh (Jesu taisan lo), na ci hi. Tua manin Jesu in kamciam nih gen-a: 
                (a) Kuamah in a khak zawhloh ding kong amaute mai-ah hon'sa in koihsak ding leh 
                (b) A galte uh amaute khephungah boksak ding, ci hi. 

Maangmuhna kigelh hun pen Khristiante nakpi takin a kilangpan laitak hi a, a upna uh hangin mitampi in bawlsiatna thuak-in sihlawh uh hi. Tua bang hun laitakin Filadelfia pawlpi mite in a suahtakna dingun a upna uh nutsiat ding baih mahmah ding hita se leh amaute citak in Jesu nusia lo uh hi. 

Tua mah bangin eite in zong Covid pulnatna hangin biakinnah kikhopna om thei lo-in, Pasian' thu sangin thudang tampi buaipih ding omta se leh Pasian' thu mah lianbel sakin, eite hong honkhia Jesu nung citak in i zuih nakleh i mai-ah kuamah hong khak zawhloh ding kong hon'sa in i Topa in hong koihsak ding hi. Tua manin na tha a hatloh hang na Topa nungzui teitei in! 

𝐊𝐢-𝐚𝐩𝐧𝐚: 𝐓𝐨𝐩𝐚 𝐚𝐰, 𝐤𝐚 𝐡𝐢𝐡𝐧𝐚 𝐛𝐚𝐧𝐠𝐛𝐚𝐧𝐠 𝐭𝐚𝐰𝐡 𝐧𝐚𝐧𝐠𝐦𝐚 𝐧𝐮𝐧𝐠 𝐜𝐢𝐭𝐚𝐤 𝐢𝐧 𝐤𝐨𝐧𝐠 𝐳𝐮𝐢𝐡 𝐭𝐡𝐞𝐢𝐡𝐧𝐚 𝐝𝐢𝐧𝐠𝐢𝐧 𝐉𝐞𝐬𝐮 𝐊𝐡𝐫𝐢𝐬 𝐦𝐢𝐧 𝐢𝐧 𝐤𝐨𝐧𝐠 𝐤𝐢-𝐚𝐩 𝐡𝐢. 𝐀𝐦𝐞𝐧!