THUDOH 1 of 11 - Lhagao thua vaihom leh thanei koi hija ham?
AMUN HOUBUNGA LHAGAOVA LAMKAI HO
Dr. Haokhothang Mate
THUDOH 1 of 11
AMUN HOUBUNGA LHAGAOVA LAMKAI HO
Amun houbunga (local church-a) lhagao thua vaihom ho thu ahilou leh amun houbunga lhagao thua thanei koi hija ham?
Amun houbung lhagaova kilamkai ding chungchang thua amasapena gel ding chu
THANEINA ahilou leh THUNEINA hi ahi. Christan Houbung luchang ahina-a
athua vai apoh hi mijouse kinoptona ahi. Amun houbung khat chu achanga
akivaihopma, akilamkai teng le thuneina chu kon anei ding hitam? Christan
thuneina chu mijouse anapeh ham? Houbung tampi pom dungjuija chu atahsan
jousen Pathen anga mopohna ahiloule thempu hina natoh anei thei cheh-e ti hi
ahi. Tahsa kivaipohna lampangah mikhatnin vote khat aneicheh-in mijouse
akibang cheh-in chule numei pasal jong thakhat ahi ti lungput hin ichangei
ham khatnin houbung sunga lhagaova kilamkaina atong khan ahi. Hichea hung
gadoh lungput chu: Pathenin bou kachunga thu aneitheijin koiman kachunga thu
neitheiponte ti hi ahi.
Tahsan le chonna lampang ahi teng leh eiho khat cheh le Pathen kikah thun ikoidoh-un, amun houbung kilamkaina chungchang thu ahi teng leh atamjo thu thua kikai ding ahi ti hi atamjo lunggel ahi.
Ahile, Christa chun atamjo thu thua vai anapoh ham? Ama lungdei chu atamjo thu thua ana kikai ham? Ahilouva ahile aman amun houbung (local church) sunga lhagaova lamkai ding ho chu alhendoh-a ngansena apeh ham? Hiche thudoh ho hin ikihoulimna dingu thumun atahlangsoh ahitai.
Hiche thumun hi aphotchetna veuhite
Hiche chungchang hi Thulhun Thah-in thumopna le vetsahna toh kilhonna ahil
chu, houbung sunga lhagaova lamkai, vaihom ding le thunei dinga mopohna apeh
mi phabep aumin ahi. Kilamkaina dihlou chule Pathen thu toh kitoh louva
kivaihopna ho chu Christian ten moh pom pom ding ahipoi, ahivangin lhagaova
lamkai dihtah ho nungjui ding seingai ding chule jabol ding hi atahsan jouse
mopohna ahi. Hiche thuneina/ thaneina chu Pakaijin amasan aseijui ho
ngansena ana neijin ahi. Amo ho chu houbung khombul
(Eph. 2: 20; Matt.28:18-19) le Pathen kamchengin
(Eph. 3:5) ana pangun ahi. Ama ho natoh thusei le thilbol ho jouse
chu khonung changeija chepi dinga suhdetna um ahi
(I Corinthians 4:17; 14:37; I Thessalonians 2:13; II Thessalonians
2:15). Tahsan le chondan thua kinel boutamna aum tengle amahon thuchaina anasem
jiu ahi. Ama ho hi Pathenna kona hungkisol Christa thalheng ho chu ahiuve.
Hiche hi Solchah bung 6:1-7 sunga akimun ahi. Solchah hon Jerusalem’a boina
sutlhapna-a amasapenin ananeijun ahi chule lekhathot hoa houbung jousen
achepi ding thuhilna ana neijun chule ajui dinguvin jong thupeh ananeijun
ahi.
Solchah hon amaho phat kichai tengle amaho banga houbung sunga mopohna nei
ding lamkai ho minsahna le amopohna diu chungchang thu thuhil kicheh tah ana
dalhauvin ahi.
Ephesia houbung vaipo ding ho chu “avesuija pang ho”(bishop) tin ana
minsah-un ahi( Solchah 20:28). Lamkai ding ho chu atum beh-a thil peh chang
ho ana hiuve (Rome 12:8).
Greek thucheng “proistemi” (vaihopna piputna) kiti jong hin I
Thessalonians 5:12 a akimun ahi. Hiche hin adoi chu nachunguva lhagao thua
pakai jalla lamkai ho tina ahi. I Timothy 3: 4, 5, chule 12 in asei hi
insunga mipa khat vaihopna thu ahi. Paulin asei chu mi abang khat houbung
sunga thunei vaihopna thilpeh chang aume ti hi ahi.
Hitabangma-a chu I Corinthians 12:28 in asei hi vaihop themna thilpeh chang ahilou leh nei atina ahi. "Governor" (kubernetes) kiti chu kong innei khat sunga lamkai, vaihom chule thunei tina ahi (Solchah 27:11; Revelation 18:17).
- I Corinthians 16:15-16 sunga thupeh chu houbung sunga mi themkhat ho thunoija um ding leh kun ding hi ahi.
- I Thessalonians 5:12-13 sung hin houbung sunga nachunguva ahiloule nachung chang thu-uva vaihopna dinmun nei ho atum beh-a jabolna peh ding angaina thu asei ahi.
- I Timothy 3:5 a hin Paulin insung khatna mipa khat vaihop le houbung sunga upa khat vaihop akibahna thu asei ahi.
- I Timothy 5:17 a thupeh chu phatah-a houbung sunga vaihopna nei ho chu chan nia jabolna (double honor) peh ding ahi.
- Hebrews 13:7, 17, chule 24 ho hin asei chu, amun houbunga lamkai ho chu phatah-a jabol ding chule tahsan thua amaho thunoija kunna jabol-a aseiju ngai ding thu ahi.
Amaho chun vaihopna aneiju toh kilhonna lhagao thua houbung mijouse chunga
mopohna jong aneiju ahi.
Hiche chung changa Hebrew lekhathot jihpa dinmun hi akicheh-in ahi. Hiche Bible chang thum hoa vaipohna thucheng kimang hi Greek paova hegeomai ahi. Thaneina le hetpehna dinmunna kona vaihom tina ahi (cf. Matthew 2:6, 10:18; Luke 2:2; Acts 7:10).
Mi abang khatnin hiche chungchang thua hin nelkalna aneijun thuneina chu
amichang cheh thempu hina-a akingapsah-un ahi. Atahsan chate khat chang cheh
thempu hina natoh le lhagao thua thunei ho/vaipo ho thunoija um hi akikalna
ima aumpoi. Khat chang cheh thempu hina le khat chang cheh pakai hina
akibang poi.
Achaina-in I Peter 5:1-4 sunga hin chinghoi kaihoija pang ho hi Christa thunoija/ ahiloule lamkaina noija um ahiuve ti ahilchenin ahi. Peter-in atahlang nom chu Solchah ho thuneina chu houbung upa ho ana kipehson chung chang thu hi ahi.
Thuchaina
Hichanna ikihoulim nau thu chu; houbung sunga hin thunei ding, jabolna
chang ding, athu ngaija anoijuva kun ding ngai mi them khat aume ti hi ahi.
Mi jouse chamlhat tah-a kitumpoh khang toh vang akitoh poi. Hijeh-a chu
hiche thuhil hi mi atamjon aphat seh-a melse tah-a adoudal jinguva
chule kihetmo sah jengu ahi. Ahivangin, hiche thuhil hi kicheh
tah ahi. Christan houbung luchang hina-a ama noija lamkai dinga alhendoh ho
jalla aman houbung sunga vai apoh jing ahi.
Hiche thuhil hi houbung sunga lamkai ho le milham ho kikah-a kikhanna kikoi
thuhil dihlou chejom sahna jong ahipoi. Thuneina hi Pathen anga chungnunna
dinmun jong ahidehpoi. Numei chu pasal noija kun dinga thupeh aum vanga (I
Timothy 2:9-15), lhagao thua Pathen anga numei le pasal dinmun kibang ahi
(Gal.3:28). Christian jousen dinmun kibangin Pathen angsung kinai thei cheh
jong le lamkai ho thunoija kun ding chu Pathen thupeh ahi.
Ngaidan khat
Tulaija houbung sunga mipi thaneina (democracy) dungjuija kivaipohna thu hi
seilouvin akhoh tai. Pastor vaihopna le mipi vaihopna (democracy) dungjuija
kivaihopna hi anigella Bible dungjui leh mihem chihna dungjuijin sei
ahahsai. Hiche kivaipohna teni hi ania um khom thei lou ding ahi. Mipi
vaihopna (Democracy) dungjuija kivaipohna thu hi olla gelkhom kit dingin
chom khat koidoh-u hite, ahin Pathenin thuneina/vaihopna chu atum beh-a mi
them khat apeh doh tah-a ahile thuneina le vaihopna chu mipi khutna umthei
lou ding tina ahi. Chule mi khat vote khat thun vekit leu hen, koima chan
atum’a mi dang sanga thuneina anei chuom lou tina ahi. Mi jousen thuneina
kibanga anei tina ahi. Houbung sunga thunei-vaihopna hi Pathenin
atumbeh-in mi them khat apedoh-e ti thu hi Thulhun Thah thuhil khoutah khat
ahi. Hiche chu ahileh mijousen thuneina kibangin aneije ti thuhil chu
acham’a akah lhah ahitai.
Mipi vaihopna (Democracy) hi tahsa thua gamsung kivaihopna dingin phalheh nante, ahin houbung kivaipohna dinga ana kipe ahipoi. Christan atum beh-a atundoh/alhendoh lamkai ho jalla houbung avaipoh tilouvin Bible-a houbung kivaipohna ding dang ima akipepoi chule mu jong akimupoi.
Also Read
Thudoh 02Thudoh 03
Thudoh 04
Thudoh 05
Thudoh 06
Thudoh 07
Thudoh 08
Thudoh 09
Thudoh 10
Thudoh 11
No comments