THUDOH 11 of 11 Amun Houbung (Local Church) mi ho mopohna ahilou leh atoh dingu ipi ham?


AMUN HOUBUNGA LHAGAOVA LAMKAI HO
Dr. Haokhothang Mate
 
 
THUDOH 11 of 11

Amun Houbung (Local Church) mi ho mopohna ahilou leh atoh dingu ipi ham?

 

Upa tohmun aumdan leh achelhah ding dan kholchenna inei tauvin ahi. Hiche chungchang thu khumkhana dingin hiche toh kikotna houbung mipi ho mopohna jong vetlou akhoh tan ahi. Thulhun Thah-in lhagaova vaipo ho chung changa  houbung henga thupeh kichen tah-a apeh chu imutauvin ahi: hepina nei tah-a bol ding, gelsang ding, ngailut ding (I Thessalonians 5:12-13), jabol ding (I Timothy 5:17), sum le paiya panpi ding (I Timothy 5:17; I Corinthians 9:4-14), geldoh ding, nungjui ding, asei ngai ding chule anoija kun ding ahi (Hebrews 13:7 and 17). Upa ho thuneina tahlangna ding deina chun hiche thupeh ho kholchenna chu ana kineitai, hijeng jong leh houbung pumpi dimunna konna hiche ho chu avella vetkit dingin alhatan ahi. Hiche thupeh ho hi houbung upa ho henga kipe ahipoi, ahin upa ho vaipohna noija um houbung mite ho henga kipe thupeh joh ahi, chule upa hon houbung mite boldinga adeisah-u aumin ahi.  

Eiho khang kiseingai louna le kichamsahna lah-a hin hiche tabang thupeh ho hi aphat toh kitoh lou, kijui hih jong leh khoh lou ahilou leh lunglut umlou khatnin akigel gam tan ahi. Hijeng jong leh Pathenin amite ho chu thanom tah-a Bible dungjuiya lhagaova vaipo ho lamkaina, thuneina chule vetsuina noija ngailutna lentah le kipa jingna lungput chule ama ho jabolna neipum’a aum dingu chu angeh nalaijin ahi. Alang khatnah hiche hin upa ho jong mopohna lentah apeuvin ahi: amahon jong amopohnau kihetpum’a Pathenin apeh-u thuneina sunga chu houbung alamkai dingu ahi. Hiche ho jousen ahiding monga agel chu pastor-elder ho jong hitabanga chu hing dingu, lamkai dingu chule Pathen thu ngai pum’a miho chu thumopna anei  dingu ahi.

Hiche hopsunga hi Christian hon a pastorpau chunga mopohna anei hou chu kipe ahi. Bible dungjui leh pathen ginna pum’a kitah tah-a lhagaova lamkai ho lamkaina  noija chu amoho nopna toh kilhonna kipelut dingu ahi. Elder-pastor hon kitah tah le mopohna lhingset neipum’a houbung alamkaijuva chule ama vetsuina noija um jousen jong ama ho lamkaina chu kitah tah-a ajuiva ahi leh houbung sunga mijousen ahet jingsa boina jatchuom chuom ho jouse hi beiding ahi. Alang nia mopohna kipe ahi chule hiche mopohna kipea chu houbung damtheina ding le Pathen loupina dinga alang nia kitah tah-a atoh doh dingu ngai ahi.

Hiche hin lunggel leh hinkhoa ana toh-a poh doh angaijin ahi. Na elder-pastor ho chu kitah tah-a lamkai hinauvem, pathen thua miho athumop jingu toh kilhonna lamkai hina chu mopohna lhingsetna abol-u hinam? Chuti ahi leh Pathenin ama ho noija kipelut dinga nadeisah chu nagel doh hinam? Ahilouva ahileh “kadei lou leh achuom’a kakichon thei ahi tia nagel ham? Alang khatnah tu dinmunna sei ding chun nahoubunga upa ho chu Pathen thu dungjuiya ahin louva pathen thu jong kitah tah-in ahil lhang pove ti nahet chet leh mun dang khatnah kichon jengin. Ahin hitabang Pathen thua  lamkai ho noija chu lungphatmona lungput nei pum pum’a naum lou ding ahi. Chonna khanna le lhagao lam thua ama ho thumop ngaicha ahi, chule nangin hitabanga upa tohmun hinlo theija hoitah-a pastor-elder tohmunna lhacha natong ho notthapma mohkoi ding chu nagel lou hel ding ahi.    

Nabol khel louna dinga Pathen thu toh naleptoh ding angaijin ahi, ajeh chu nalung thim se le pha hetkhanna lungthim chunga vaihom chu pathen thu bou ahi. Ahivangin, upa ho thunoija naumna dinga Pathen thupeh hin thilkhat avetsah ahi. Thupeh chun Pathen noija lamkaija pang upa ho thunoija um nomna lungput angeh ahi. Ama ho thumop chu gelkhoh ding ahi. Ama ho thumop chun nahinkho leh nakigel lhahna hoa thununna anei angaijin ahi.   

Upa ho tahsan nungjui (Heb. 13:17) hina dinga houbung chu upa hon thumop thei leh hilthei ahi diu angajin ahi. Hiche hin atahlang nom chu lunglut tah-a thil hetding got ding chule amaho mihilna-a chu kitah tah-a thon louva gajao jing ding ahi. Pastor khat chun changa hihen lang houbung kikhop khomna lah hijong leh kitah tah-a Pathen thu ahillhang lou dinmun chu toh amiten kikhop khomna, thungaina chule kihilna hoa kitah lou tah-a hinkho amanu chu kithakhat ahi. Upa ho mopohna chu pathen thu hil ding ahin houbung mite ho mopohna chu hetnomna le hiltheija aum diu chu ahi. Hiche chung chonna chun, na lungthim se le pha hetna chu pathen thu noija bou kun ding hijong leh Hebrai bung 13:17 a thupeh ho hi thupi tah ahi hiche jeh-a chu hiche lekha sunpa hin ahilchetna ni apeh ahi. 

Lhagao thua vaihom ho thua nun ding leh ama ho thunoija um ding hi thil khoh tah ahi, ajeh chu hiche lamkai ho hi amite ho lhagao hinkho chung chang thua ama ho chung thu kitan ding ahi; “amahon nang ho lhagao ahon jingu ahi, nang ho jeh-a ama ho chung thu kitan ding ahi.” Ama ho thunoija um chu thil khoh tah ahi, ajeh chu hiche tohmun le mopohna hi Pathenin apeh-u ahin chule hiche mopohna jeh-a ama chung thu kitan ding ahi. Hiche thu hin upa ho jouse adilsuh sah ding ahi, ahivangin hiche thua hin houbung mite hon mopohna sang cheh aneiju akihet doh dingu ahi. Upa ho thunoija um hi thupeh ahi ajeh chu upa hon amopohnau kipah tah-a asuhbulhit diu ngai  ahi. Ama hon “lung nomon nachunguvah thu sei leu nang ho dinga khoh ding ahi.” Thua nung lou mite ho chun lunghemna nei lamkai ho asepdoh joh ding chule lolhing tah leh kipah tah-a amite lah-a pathen lhacha na atoh thei lou dingu ahi. Thunoija um hi thupeh ahi toh kilhonna mijouse dinga thilkhoh tah ahi.

Upa ho vaipoh hi nop le da-a kingam ahipon, ahilou hithei lou dinmun khat ahi. Upa hon vai apoh dingu ahi chule houbung mite hon jong sei angaijuva jana apeh dingu ahi. Chule I Thessaloniica 5:13 hin Christianten upa ho angailutna dingu thupeh akipen ahi. Hiche ngailutna kimuna chu I Timothy 5:19 ahin, hiche muna atahsan hon “Upa ho hehsetna chung chang thua ahetoh ni le thum ahilou leh hehse hih-in” ati ahi. Hehsetna chu um lou thei ahipoi, ahin ahetoh le aphotchetna pethei aum lou leh hehsetna thu chu pomlou ding ahi. Upa ho (pastor ho) chu nang ho venbitna noija khosa dingu ahi chule themmona aneipove ti hetsah angaijin ahi; ngailutna chun ama ho chung chang thua aphapen le ahoipen chu ahitheina channa angaito peh dingu ahi.

Hichanna hi kinga hen lang Pastor-elder ho hi ichanna manlu hiuvem ti kingaito leh phachuom dingin kagelkin ahi. Bible-in ngailut ding, jabol ding, musang ding, dannia jabolna peh ding chule ama ho thunoija kun ding thupeh apen ahi. Hiche thupeh jouse hin hiche upa ho hi lhacha na atoh nauva kitah tah ahi diu keu hilouva mi mantam tah jong ahiuve ti avetsah ahi.

Ngaito temin: Hiche upa hoa konin Pathen thu kisei ho ana jahih le chun tunin nangma hoilang nagei dem? Christian jong nahina dem? Ama hon nahilnauva konna Jesu Christa-a konna hung long lha Pathen mihepina hetgilna nahin nei ahi. Amaho ana um lou hileh hiche hetgilna jalla lhagaova kipana le lungmonna chu nanei nadem? Pathenin kitah tah-a nahin vetsuina leh nangaichat jouse nangaito peh thu ama hon nanahil hih leu chamna nei tah-in hinkho namang nadem? Amahon kitah tah-in thumopna nanei hih leu insung hintung dohpa pathenna konin nang hon tua nainsunguva neneiju kipana chu nanei nadiuvem? Hiche ho hi ichanna mantam hitam?  

Lunghemna le puldouna chule boinan nalodim laija tilkhouna le thumopna nahung kipe chu ichanna mantam hitam? Eiho dinga Pathen henga pastor ho taona ichan geija man tam hitam? Hiche phat thei bohna ho jouse hi aman tam dan iti isei dingu hitam? Upa ho hi Pathenin hiche tohgon ho tong doh dinga eihin peh-u ahi. Chule hiti ho hi ingaitoa ahileh amaho mantam dan hi akihetbe cheh cheh-in ahi. Chule ama ho ngailut ding, jabol ding chule anoijuva kun ding thupeh ho hi kipa um tah-a igel ding joh-u ahi. Adih tah mongin hiche lamkai ho hin bolkhel aneijun ahi, abang teng leh bol khel lentah tah jong aneijun ahi. Ahijeng vangin hiche Pathen thilpeh pha ho hi eihon ijaboluva, ingailutuva chuleh anoijuva ikun dingu hi kilom tah hilou ham? Amaho hi Pathenin lhagao lampanga thunei vaihom dinga eihin peh jeh-uva niseh-a ahenga kipathu iseijuva thangvahna ipeh diuva kilom tah hilou ham? Ipi jeh-a icunguva lhagao lam’a lamkai ding le mopo dinga Pathenin eihin peh-u houbung upaho/pastor ho hi imopohnau ikihet lou jeh-u le, iseingailou jehuva lunghem tah, lung genthei tah le lungthim natah-a ikoijiu ham?    

Achaina-in, ama ho manlutah ahi jeh-uva tosot ding le pachat ding kisei hohin elder-pastor ho taopeh nomna nalungthim’a hung kon doh ding ahi (cf. 1Thessalonians 5:25; 2 Thessalonians 3:1). Amaho natoh hi thupi tah ahi, chule amahon phatseh le michang cheh hinkhoa thilsoh ho aboipiu ahi.

Amahon jong nangho taopehna angaichauvin ahi. Amaho dingin taopeh-un. Phatseh-in taopeh jingun. Lunglut tah-in taopeh-un. Amaho ding, nangho ding chule amaho noija umjouse dingin taovun. Hiche Pathen lhacha natoh thupi tah atoh nauva hi kitah tah-a apan jouna dingu leh Pathenin ama loupina dinga aman chah jomjing nadinguvin taopeh jingun.

 

Achaina le chomlam tah-a thu khumkhana

Thulhun thah-in houbung kivaipoh ding chena lhongpi bailam tah-in eilhundoh pehtauvin ahi. Thuneina le vaihopna hi Pathenin hiche mi ho (elder-bishop-pastor ho) ngansena apeh ahi, ahin mitheng ho pilhinsahna dinga honna hihen changa hijong leh taona toh thoa kiphal theng tah-a mi hilding le vaihop ding chu ama ho mopohna ahi. Alang khatna houbung mopohna chu amaho le athuhil-u noija kunkhencha um ding, aseiju ngai ding le jabol ding chu ahi.

Pathen thilboldan chu hiche hi ahi ti akicheh tan ahi. Tulai houbung hon jong hitabang hin aboluve ti akicheh behseh pon ahi. Aluchangin jui dinga apeh chu atahsa-in ahilou leh houbungin ajui lou teng leh hiche jeh-a thilphalou hungsoh doh ho chu houbungin kidang asah lou ding ahi. Aluchangin asei dungjuija houbungin abol teng leh phatthei boh chang ding ahi. Christian hinkho kimanchah le kisinsahna jousea kimu bang chun, changa hihen honna hijong leh Pathen lampi chu adih keu hilouvin akisuhmona imacha umlou ahi.

Pathenin tulaija lhagaova vaipo ho pathen thu hilna ding, Pathen thu lhangsapna ding, taona ding leh vaihopna dingin kiphaltheng chehna, kihambolna le ngailutna toh kilhoninthanopna thah hinpe tahen. Amaho lhacha natohna-a akipumpeh-uva aphotchetna jong thalhingsetna apeh-uva (II Timothy 4:5), kipaman jong malkhoutah-a akisan theina dinguvin Pathenin kithopi tauhen (I Corinthians 3:10-15, I Peter 5:4). Amaho vaihopna noija um mite hon jong lhagaova lamkai ho nung ajuijuva, amaho hina le kiletsahna chule kichamkimsahna ho apailhah-uva, hitabanga lhagaova lamkai hon avetsui diu, pilhinna lam’a apui diu chule pathen lhacha natong dinga agot toh diu angaichatnau akigeldohna dinguvin pathenin kithopi tau hen. Pathenin ahoubung dinga tohgon anei chu hiche hi ahi. Akhang akhanga houbung sunga Jesu Christa jalla hing jing Pathen loupina achanna dingin Pathenin hiche houbung chena lhongpi ho hi ahina banga ijuijouna dingun alungsetna eichan tauhen. Amen!    





































No comments

Powered by Blogger.