THUDOH 6 of 11 Houbung-a lhagao lam’a vaipo ho mopohna chu ipi pi ham?

AMUN HOUBUNGA LHAGAOVA LAMKAI HO

Dr. Haokhothang Mate

 

 

THUDOH 6 of 11

Amun Houbung-a (Local church-a) lhagao lam’a vaipo ho mopohna ahiloule Lhagao lam’a vaipo ho toh ding le tham ding chu ipi pi ham?

 

Thil khohtah kit khat chu ahileh, Thulhun Thah-in upa ho chu itabang toh ding le mopohna apeh-uvem? Amaho tohding guontohsa kikoi chu ipi pi ham? Pathenin upa ho chu ipi jeh-a houbung ahin peh ham?

 

Aphotchetna kipe ho kholchenna

Amaho Houbunga Aumlonao Ajeh

Hiche thudoh donbutna dinga akhoh pen tah chu upa ho chu ipi tup le doi neija houbung hung kipea ham? Christan ama ho chu ipi jeh-a houbung ahin peh ham? (Ephesians 4:11).

Paulin hiche thudoh hi bailam tah-in donbutna apen ahi: Achinghoi akaihoi  hina le mihil hina thilpeh chang ho hi mithengte pilhinsahna dingle Pathen natohna chule Christa tahsa suhhal-a aum jingna ding ahi (Ephesians 4:12).

Hiche Bible changin asei chu achinghoi le akaihoi chule mihil thepna  thilpeh chang ho hi mithengte pilhinsahna ding ahi. 

II Corinthians 10:18 in jong hiche toh kibang thuhil ahillin ahi; Paul sei dungjuijin hiche thuneina chu kisuhhalna dinga ana kipea ahi. Ephesian 4:12 hi phatah-a ivet leh achinghoi akaihoi hina le mihil hina thilpeh chang ho chu Paulin Pathen natohna chuom chuom leh Christa tahsa kitilkhouna dinga kipea ahi atipoi (KJV); aman asei chu ahileh, achinghoi akaihoi hina le mihil hina thilpeh chang ho chu, “Pathen kin bolna ding leh mithengte ho pilhinsahna ding ahi.” Ahilou leh, NIV in achom lam’a asei banga, “Pathen natohna dinga Pathen mite gottohna ding.”

Ama hon mitheng ho (atahsan ho) chu agottoh diu, hitia gontohsa-a um ho chu Pathen kinbolna leh Christa tahsa kisah dohna dinga mopohna chang ahiuve. Lamchuom khatna sei ding chun, ama ho houbunga aumlonau ajeh chu, Pathen thu ahina banga ahildingu chule tahsan chate hinkhoa ana toh-a apoh dohsah diu hitia chu houbung sunga Pathen na atoh-uva Christa tahsa houbung chu asah doh dingu ahi. Hiche Bible mun hin aseibena-a chun:  Achinghuoi akaihoija pang hon atahsan ho Pathen natohna dinga agon toh dungjuijuva houbung miho khat cheh-in tahsa pumpia chu pathen kin aboluva houbung chu tahsanna-a kipumkhatna le Pathen Chapa hetna  lampanga akhantousah diu, mi kikhan lhit hina le Christa pilhing dung chan phahna ding(v 13), thuhil(v 14) chule hinkho(v 15) dindetna chule Pathen thahat jalla kithokhom-a khat le khat kitilkhoutona lampanga jong khantouna aso doh dingu ahi (v 16).       

Hitia Pathen natohna hi Timothy henga Paul thupeh toh kilhonna, “hettohsah tampi anga keima thuhil najah ho chu tahsan um miho pesonnin, hitia chu amahon jong adang ho ahilsonna dinguvin” (II Timothy 2:2). Hiche hi pastor koitabang hijong leh chepi dinga Bible chang phatah khat ahi. Midang ho Pathen natohna dinga semtoh gontoh ding chu ama ho mopohna ahi.

Titus bung 2 na-ah Paulin hitabang ma chun Titus atilkhouvin ahi. Titus mihil dingin tilkhouna achangin ahi, hitia chu houbung sunga numei leh pasal jousen mijouse chunga pathen kin abolthei dingu ahi (vv.2-5). Houbung sunga upaho leh pastor ho toh ding chu: ama aman aboljou channa Christa sohna tong dinga mi ho semdoh ding chu ahi.

 

Ama ho kiminsahna

Hiche lhagao lampanga vaihom ho kiminsahna hin amopohnau jong aphongdoh-in ahi. Hiche pasal ho hi upa ho (elders), bishop ho chule pastorho jong akitin ahi. Thudoh 2 a kihilchen bangin hiche kiminsahna ho hin anatoh-u jatchuom cheh aphong doh-in ahi. Upaho (elders) kiti hin Judahte synagogue-a konna hung kiladoh thucheng ahin, hiche hin mihil ding le vaipo dinga mopohna kipe ho tina ahi. Bishop kiti chu Greekte dinga avesuija pang kihetna ahi. Chule pastor-mihil tia kiminsahna hin chinghoi kaihoi hina mopohna ho avetsah-in ahi. Hiche kiminsahna hoa konna hung kilang doh chu ahi leh lhagao lam’a vaipo ho toh ding apipen ni aumin ahi: kaihoija vah ding, vaihopma hilding.

 

Kicheh tah thumopna ho chuleh thupeh ho

Hiche chung chang thu hi ivetbe kitna ahileh thulhun thah lekhabu jih hon upa ho chu hiche mopohna tohmolsona dingin thumopna le thupeh ana neijuvin ahi (athuhillu toh kilhonna ahinkhouva anatoh-a jong avetsah diu ahi). Hiche thupeh ho hi akilah khom soh keija ahi leh amaho toh ding apipha jouse chu ahopsoh ahitai. Hiche ho lah-a them khat chu anoija hin hilchenna akineijin ahi.

*Solchah 6:4 hi ivet leh solchah hon Pathen thu lhangsapna leh taona-a phat apeh doh nom jeh-u chun akhoh behseh lou ho chu adang ho ngansena anapeuvin ahi. Hiche Bible changin thil khoh tah khat avetsah chu, Solchah ho lhacha natoh akeh lang khat chu taona ahi. Upa ho chun mihil ahinau toh kilhonna taona-a jong phat aman dingu ahi.

*Paul-in Timothy henga lekha athot masat na-a hin abonnin(pastor lekhathot tia jong kihe ahi ajeh chu hichea atup le adoi pipen chu Pathen natohna chung chang thua thupeh aneinom ahi) aman tahsan dinmun leh thuhil avel vel-in aseiphongin ahi (1:3, 10; 3:2; 4:6, 13, 14, 16; 5:17; etc.). Timothy henga alekhathot anina (1:6, 8, 13; 2:2; etc.), chule Titus henga lekhat athotna-a jong hiche lampang aseikitnin ahi. Upaho chu mihil-a pang diu ahi. Presbyter (upa lom/upa loi) ho chun houbung sunga hitabanga chu Pathen na atoh diu ahi. Hiche hi houbung kigotna dinga Pathen phatsah lampi chu ahi.

 

Ngaidan khat

Hichea pastor ho toh ding kigollha ho toh tulaija pastor ho toh ding kipe ho tampi vetkah dinga thil phatah ahi. Mi kichensahna kin, thivuina kin, chule veng khatna kikhopna hoa taona man le nisih-a kouna chan ho, mikhatnin angailut tah khat pung kal li lang jen lutna hospital-a ki-at ding atoupina-a gatoukhompi, Thursday nilhah seh leh invilna, houbunga kingon ho boipi, khangdong ho camp, choir ho lamkai ding, chapang ho kikhopna, hou-in leitol le akimvel ho hampa lhotheng ding, painting bolding, hou-in semphat ding, suhtheng ding, music leh Sunday school curriculum, hou-in sunga touna table ho leh chair ho goltoh ding, hou-in thil koina-a jucha thang kam ding chule adang dang ho. Hiche ho jouse hi khat cha aphamo aumpoi, ahivangin Pathen ngansena kin thupi pen, “ Pathen lhacha natohna dinga mithengte gottohna ding lampanga asuboi ding aum leh hiche hoa chu kikum lou ding ahi. Pathen ngansena kin khoh tah ho tohdohna dinga imacha akisuhboi sah lou ding ahi.  Hitabang thil hoa chu houbung kibuh lhah lou ding ahi.

Alam khatna seiding chun, miho seina-a aphat seh-a kija jing chu, “Pathen thu vang aseitheipoi ahinvangin Pastor phatah ahi” kiti hi ama leh ama akikal tan ahi. Pastor khat chun athuhil leh athu lhangsap jalla ahoubung mi ho chu pathen natong dinga agon thei lou leh pastor phatah kitithei lou ding ahi, ajeh chu aman alo dinmun ahilou leh panmun dungjuija Pathen ngansena chu asuh bulhit jou lou ahi. Kelngoi ching phatah khat chun akelngoi ho chu an angolsah lou ding hiche sanga chu avah vasetna akaihoi joh ding ahi. 

Also Read

Thudoh 01
Thudoh 02
Thudoh 03
Thudoh 04
Thudoh 05
Thudoh 07
Thudoh 08
Thudoh 09
Thudoh 10
Thudoh 11