ATHUDOH 7 of 11 Houbung sunga lamkai hon akingensenao kin chu iti lam dolla asuh bulhit dingu ham?
AMUN HOUBUNGA LHAGAOVA LAMKAI HO
Dr. Haokhothang Mate
THUDOH 7
AMUN HOUBUNGA LHAGAOVA LAMKAI HO
Amun Houbung (Local Church) sunga Lhagao lampanga lamkai ho natoh ding dan ahilou leh amahon akingensenao kin chu iti lam dolla asuh bulhit dingu ham?
Pastor khat kingensena chu mithengten Pathen na atohna dinguva agong toh
ahilou leh akhoukhah-a apan ding chu akivetsah tan ahi (Ephesians 4:11-12).
Aman houbung mite lhagao anna (pathen thua) avah ding, alamkai ding, ahil
ding chule avaihop ding ahi. Chule hitia chu aman avetsuina noija umho chu
apui khang teng leh:
- ) amahon Pathen thuhing hetchetna ahin nei diu,
- ) atahsan phondoh hou chu ahinkhouva hung kilang doh ding, chule
- ) Pathen na atoh jom diu ahi.
Ama tup le doi chu hiche hiding ahi chule hiche sanga nemjo hithei lou ding
ahi. Toh ding tham ding dan ho hi Thulhun Thah sun hon ana seitauvin ahi.
Achinghoi akaihoi (pastor) leh mihil khat(teacher) chun amite chu hiche
dinmun channa chu iti ahin puikhang ding ham?
Adonbutna chu: hiltoh thoa achunguva vaihop ding. Mihil hina leh vaipo hina
hi jat chuom chuoma konna tohdoh thei ahi. Hiche tohdoh ding dan chu nia
hopkhan thei ahi:
1). Pastor hon Pathen thudih ho chu athua hiltho keuseh hilouva nitin hinkhoa anatoh-a jong apodoh-u angaijin ahi; Bible thuhil ho chu ahilchet keu hilouva michang cheh hinkho leh houbung hinkhoa Pathen thu dungjuija chon dingin jong thumopna aneijun ahi. Pathen thudih phondoh kiti hi imachan akhel thei lou ahi ajeh chu athua hi hinna (James 1:18, I Peter 1:23) leh hin jing nading (I Peter 2:2) thuguh auma ahi. Pathen thu hilla chule phonjal ding khohsah lou pastor ho chun houbung damtheina ding leh khantouna ding khohsah lou ahiuve. Hijeh-a chu pastor hon pathen thu ahilchen diu chule athuhil ho chu ahinkhouva natoh-a pohdoh ding angaito dingu ahi.
2). Upa hon jong Pathen thun adeisah banga hinkho amanuva miho thumopna aneijuva chule vai apoh diu ahi. Pathen thu dopsangna hinkho leh Pathen thu dungjuija hinkhoa thilsoh ho le dinmun ho chu akimaitopi diu ahi.
Pathen Thuhil
Pathen thuhil kiti hi Pathenni jingkah le mi ho toh kimuto mai maija
kichaithei ahipoi. Hinkho leh phat pehdoh angaijin ahi. Hjeh-a chu pathen
thuhilna le seiphongna ding mun le phat gontohsa-a koi jong chu aphapen
hijeng jong leh hiche seh seh-a chu kichaithei lou ahi. Hiti ho chu akipatna
bou ahi. Akiseisa bang chun mithengte kikhopna-a Pathen thu hillhang chu
akhel ding umlou ahi, ahivangin Pastorpa chu miho khat chang cheh hinkhoa
pathen thu iti kihil leh ga asoh doh ding ham ti lampi ahol doh ding
angaijin ahi.
Pathen thu hilding dan chu chi chuom chuom aumin ahi, in vil ding, japi kikhop khomna jat chuom chuom, miho ainna lhunsah ding (jin dotthem hiding) chule adang dang. Hiche tabang phat pha ho hi hoitah-a iman them’a ahi leh amun leh aphat kitup dinmunna thuhil tabang ahi. Bible thuhil chuom chuom chule aphat dungjuija gamsung thusoh ho Pathen thu toh kitoh-a kihoulim thei ahi. Hiche tabang dinmunna miho chu Bible thuhil dungjuija lunggel dan, hinkhoa thilsoh jouse Bible thuhil dungjuija gelkhanji kihil ahi, ajeh chu tahsan le chonna lam dolla adih pen chu Bible ahi. Bible thuhil dungjuija kihilna chu hiche hi ahi.
Chukit leh hitabang dinmun hoa hi midang khatnin Pathen thu dungjuija hinkho amana alunggel jouse jong Christa seingaina noija apeh lut chu avetsahna peh thei ahi (II Corinthians 10:5). Upa hon amaho hinkhoa Pathen thu dungjuija kisem tohsa ahinao chung chonna Pathen thun apuihoi jing jalluva avetsahna toh kilhonna miho ahil dingu ahi. Hiche jalla chu bou pastorpa chun mitheng ho chu Pathen natong dinga lolhing tah-a asem toh jou ding ahi. Hijeh-a chu Pathen thuhil hi amun le phat gon tohsa dinmun leh gontoh louna-a dinmunna jong Pathen thu hillhang ding hi angaichatna uma ahi (Acts 20:20, 28).
Vaihopna
Vaihopna hi lhangpi leh chang hinkhoa angaicha khat chu ahi. Angaina-a
hiche hi pathen thu chena lhongpi ho chu kimang cha-a mihem boina ho, thudoh
ho chule bolkhel ho chung chang thua thumopna kinei ahi. Kelngoi ching
hina-a pastor hon hahsa jong leh angaichatna aum dungjuija sehgimna thu hoa
jong alamkai dingu ahi. Bible thuhil leh chena lhongpi ho chu dihtah-a jui
ding agottei dingu ahi. Kitah tah-a vaihopna-a hin pathen thuhil ho lhang
phonga phondoh ding angaijin ahi chule japi lah hihan changa hijong
leh tilkhouna, hilchahna chule phosalna ho jong angaijin ahi. Hiche hi
Pathen natong ho adeh-a vaihom ho chule adang ho dinga jong angaicha khat
chu ahi (II Timothy 4:2).
Thu leh la-a vaihopna toh kilhonna angai chatna aum leh thaneina jong poh doh angaijin ahi. Avetsahnan Paul-in jong chonsetna akimaitopi teng leh Pathen thu dungjuija thuchaina nei ding agomasajin ahi (I Corinthians 1:10-13), chule angaichatna aum leh hangsan tah-a phosal ding jong anom thouvin ahi (I Corinthians 4:21). Paul-in I Corinthians 4:14 a asei hi Corinthia mite chu achonset jeh-uva jachatsah ding alungtup ahipoi hiche joh sanga chu phosal-a aboina chu sutlhap ding agot joh ahi. Ahivangin chang 6 a pat 13 sung ivetna ahileh Paulin amaho chu ajachatsah-a, melsa tah-a ajonhou joh-u ahi. Chang 14 hin avetsah chu ahileh avaihopna hihan lang chonset chung chang thu hijong leh akhoh dungjuija khoutah-a um ding jong anomin ahi, ahivangin hiche chu thilpha cheh ahungsona ding le boina sutlhapna ding ahipou leh ati ahi. Achuom jepma sei ding chun upahon vetjui leh hiltho mai mai hilouva khoutah-a phosalna changeija houbung sunga vai ahop dingu angaijin ahi.
Taona
Pastor hina dinga angai khoh khat ahijeng vanga phat seh-a kihaimil jing
khat chu, Solchah 6:4 nan aphongdoh dungjuijin taona hi ahi. Adih tah-in
pathen lhacha natohna akeh lang tabang hi taona ahi. Hiche pathen lhacha
natohna-a phat akeh lang lothei taona-a hi lhacha natoh amoh lang khat ahung
gasona ding jong kingam’a ahi. “Keiho vang taona le pathen thu lhacha-a chu
kapandet jing jeng dingu ahi.” Miho taona thahat jalla natoh ding hi
Pathenin kitepna ahi. Taona khohsah lou pastor chun ama leh amite manthahna
dinga kisa ahi. Taona jalla guilhung ding Pathen kitepna khat chu taona
kimang hih jong leh Pathenin akitepna chu bolnante tia gellou helding ahi.
Pastor pan taona-a apuihoi jing houbung chu anunnom ahiuve.
Hichea hung kilang doh khat chu pastorpa chun amite ho dinga taona aman ding keuseh hilouva amite toh jong taokhom ding ahi. Taona hi pathen lhacha kin ahi keu hilouva pathen lhacha kin adang ho lolhinna dinga akiphamo khat chu ahi. Amite toh ataokhom teng leh pastor khat chun ama leh amite ngaichat ho chu Pathen henga alhut keu hilouva taona angai khoh dan le tao ding dan amite ana toh-a avet sahna ahi. Ama ho chu tao ding dan jong ahil ahi. Chukit leh vanlam khohsahna le thil ijakaija pathenna kingai jing manlut dan jong avetsah ahi. Achom lam’a seiding chun pastorpa chun mithengte chu lhacha natong dinga akhoukhah ahi. Hiche lampanga kihilna hi amichang cheh ding leh houbung tahsa pumpi dinga mantam tah ahi, chule lampi danga hitabang chu kitongdoh thei lou ahi.
Kihambol tah-a natoh
Upa hon lhacha natoh hi ichangei atoh dingu ham ti akihet lou leh upa ho
lhacha natoh chung chang kihoulimna hi chamkim thei lou ding ahi. Colossia
bung khatna-ah Paulin kicheh tah-in aseitan ahi, hichea ama seidan hi mihem
khat pilhing dinmun chan’a (v, 28) hin khoikhahna hi “keima sunga nasatah-a
thilbolthei thahat dungjuija natongah ama” jal ahi (v, 29). Greek thucheng
abul-abal ivetna ahileh akhou cheh-in ahi “thaneina,”
“thohgimna,”thahattah” kiti ho avetsah-in ahi. Pastor khat chun abol ding lom’a Pathen thu akholgilla, taona amanna, miho ahilla, pathen thu alhangsapma miho atilkhouji teng leh alungthim, alunggel leh atahsa cholding ahi. Hiche chu ahung gadoh ding toh kikotna tha leh jung kisheng ahi. Hijeng jong leh man tamtah ahi. Aga soh dinga pathen lhacha natoh chu, abailam ahilou leh agom lam umlou ahi.
Thu lah chom leh thu khumkhana
Pastor ho chun changa hihen lang honna hijong leh guot chuom chuom leh phat jousea taona toh kilhonna vai apoh-uva mihilla pang dingu ahi. Hiche hi lhacha natohna dinga Pathenin gontohsa-a akoi ahitai. Houbunga lolhinna ding lampi dihtah chu hiche hi ahi.
Also Read
Thudoh 01Thudoh 02
Thudoh 03
Thudoh 04
Thudoh 05
Thudoh 06
Thudoh 08
Thudoh 09
Thudoh 10
Thudoh 11
No comments