DAWI MANGPA TUNGAH GUALZAWHNA DING

𝗗𝗔𝗪𝗜 𝗠𝗔𝗡𝗚𝗣𝗔 𝗧𝗨𝗡𝗚𝗔𝗛 𝗚𝗨𝗔𝗟𝗭𝗔𝗪𝗛𝗡𝗔 𝗗𝗜𝗡𝗚
Nisim Manna

𝘽𝙪𝙡𝙥𝙝𝙪𝙝: 𝙏𝙪𝙖 𝙖𝙝𝙞𝙝 𝙢𝙖𝙣𝙞𝙣 𝙋𝙖𝙨𝙞𝙖𝙣' 𝙩𝙝𝙪 𝙣𝙖 𝙢𝙖𝙣𝙜 𝙪𝙣. 𝘿𝙖𝙬𝙞 𝙢𝙖𝙣𝙜𝙥𝙖 𝙣𝙖 𝙣𝙞𝙖𝙡 𝙪𝙣. 𝙉𝙞𝙖𝙡 𝙡𝙚 𝙪𝙝𝙘𝙞𝙣 𝙣𝙤 𝙠𝙞𝙖𝙣𝙜 𝙥𝙖𝙣𝙞𝙣 𝙩𝙖𝙞 𝙠𝙝𝙞𝙖 𝙙𝙞𝙣𝙜 𝙝𝙞. 𝙅𝙚𝙞𝙢 4:7

Jeim in hih munah Dawi mangpa tungah i gualzawh theihna ding thunih hong hilh a, tuate in:-

1. Pasian' thu man ding: Jeim  in i Pasian pen hehpihna tawh a kidim Pasian (v.6) ahih manin ama thu mang dingin kipia (ki-ap) ni, a ci ahi hi. Mi kiliansakte lungsim ah Pasian lo-in zong kicing kisa lel uh a, tua bang lungsim a nei mite Pasian in zong nial hi, ci hi (v.6). Ahi zongin a kiniamkhiatte in Pasian tungah kingak ding a kisapna thei uh hi. Tua manin a kiniamkhiat mite Pasian in ama deih dan-a a zat theihna dingin Pasian ukna nuai ah a thu mang dingin kipia khia uh hi. Hih Pasian' thu mang dingin i kipiak khiatna in Dawi mangpa tungah i gualzawh theihna ding a i Lai Siangtho hong hilh ahi hi. 

2. Dawi mangpa nial ding: Dawi mangpa nial ding cih pen nisim-hunsim a nasep ding ahi hi. A hangin amah in mihingte lungsim ah a hoihlo ngaihsutna, lunggulhna hoih lote tawh hong khem den hi. Jesu in zong khemna a tuah lai-in Pasian thu(Lai Siangtho) tawh khemnate na nial hi. Eite in zong Dawi mangpa hong khemnate i nial theihna dingin Lai Siangtho sim-in, i lungsim ah khol-in, i nuntakna ah zangkhia ni. Tua pen i khalam galvan ahi hi. 

𝐊𝐢-𝐚𝐩𝐧𝐚: 𝐓𝐨𝐩𝐚 𝐚𝐰, 𝐃𝐚𝐰𝐢 𝐦𝐚𝐧𝐠𝐩𝐚 𝐭𝐮𝐧𝐠𝐚𝐡 𝐤𝐚 𝐠𝐮𝐚𝐥𝐳𝐚𝐰𝐡 𝐭𝐡𝐞𝐢𝐡𝐧𝐚 𝐝𝐢𝐧𝐠𝐢𝐧 𝐧𝐚𝐧𝐠𝐦𝐚 𝐭𝐡𝐮 𝐡𝐨𝐧𝐠 𝐥𝐮𝐧𝐠𝐠𝐮𝐥𝐡 𝐬𝐚𝐤 𝐢𝐧𝐥𝐚, 𝐧𝐚𝐧𝐠𝐦𝐚 𝐭𝐡𝐮 𝐚 𝐦𝐚𝐧𝐠 𝐝𝐢𝐧𝐠𝐢𝐧 𝐉𝐞𝐬𝐮 𝐊𝐡𝐫𝐢𝐬 𝐦𝐢𝐧 𝐢𝐧 𝐤𝐨𝐧𝐠 𝐤𝐢-𝐚𝐩 𝐡𝐢. 𝐀𝐦𝐞𝐧!