LESS IS MORE: MORE IS LESS

LESS IS MORE: MORE IS LESS

LESS IS MORE: MORE IS LESS

Pastor Dongza Thawng
Devotional # 51 ( Vol 3)
Fellowship of Thirsty Souls and Hungry Hearts


Thirsty Souls simtute Shalom!

Tuni khu nang ading a ni kipah huai hi ta hen!

Tulai Shillong buai sim in, tate online class a off uhleh nop tah in message gel mai vai. Janni ka laibu ka sunjom thei a ka lung nuam tuam e. Ka SEF article 2na zong jou thei ta ing. 

Tuni thupi Himi phrase pen Robert Browning Poem  1855  a hing ki gen masa pen chi uhi.  A hivang in ahing su lar khu German Architect Mies Van Der Rohe ahi chi uhi.

Amasa in AW Tozer thugen khat toh pan vai: “Sometimes you are going faster when you are not going anywhere; you are moving faster when you are not moving at all; you are learning more when you think you have stopped learning.”

Ama gen dan in hagau hinkhua pen a achang a  masawn nonlou ichi chiang ana ki mansawn jaw a, ga neinonlou ichi chiang ana kiga jaw a, bangma thei be nonlou ichi chiang ki jiltam jaw, bangma sem khelou ichi chiang ana ki semtamjaw a, bangma neilou ikichi chiang ahausa jaw kihi thei a, tahsa dammaw leh hagau liam, hatlou jawngkhal ikichi hun khu i hisel mama lai ana hi thei hi.

Alangkhat lam ah lawching mama, semtam mama, ganei mama, progm full, popular mama, i sepna lamlam paihoi leh bawhpha ichi lai khu a hawmguah ana ki hi thei hi. A lamdang hi Pasian lalgam, Hagau gam ichi chi “kingdom life” ki chi khu mihing et dan, tahsa lam a etdan toh ki bang mongmong lou hi.

Tunia ithupi uh LESS IS MORE in agen ut khu Pasian nasepna ah zongsem tam ikisah a, Pasian gam ading a buai theitop a iki buaisah lai in Pasian in awl pai in, ama keng bul ah dai dide in hun jangtam jaw ding in hing na ngahngah himaithei hi. 

I paunah un “neh tam na ut, leh netawm in.” “Ahpi ki law khu” “thugen tomte chial kit ahi ding” chite ahi. 

Tujing kal ka Bible simna Luke 10:41,42 ah I Mangpa Jesu'n “Martha, Martha” the LORD answered, you are worried and upset about many things, but few things are needed-or ONLY ONE. Mary has chosen what is BETTER, and it will not be taken away from her”(capital mine)

I Mangpa’n Martha nasep hoilou chilou hi. Agen khu Mary in hoijaw (BETTER) a kiteel hi chi ahi. Tunin hattuam vai leh sil tuamtuam i kisah buai vengvung a i hun teng, itha teng ipiah khu selou hi. Ahiin Pasian kipahna pen hilou hi. Ama kengbul a hun jang manlou jen a diangdiang, taitai khu Ama patat lam hi khawllou hi. 

Camp leh crusade leh seminar vel hattuam in inei a, hattuam lamkai or upa kichi apiangthahlou dan miteng in atheisa hinapi ama ki piangthah sah in a vaisai lam leh a nehbawl lam vel a ha pan a angpan chiang koima kipahlou hi. I tate laisim ding a i sawlsawl lai in inn nasem in a buai in kibuaisah leh ikipahna hi khollou hi. Jeremiah 23:21 ah “ka sawllou a tai kawikawi jawlneite” chi in Pasian in patat vawtlou hi. 

A chang ah hagau lam ichi i progm thupi nei leh i kisahbuai nate uh khu Pasian apat sang in eima lungkimna leh i mihing lui ei a um Adam suh taina leh vahkhangna ding leh mihing ngeina sakhuahna hi thei hi. 

Ada huai mama khu tuni ibawl tam pite, isep tampite khu Pasian kung a Paul in agen bang a i hagau lam inn lam khu bupawl leh sing bang maimai a, akangtum thei maimai ahi ding jau huai hi( 1 Cor. 3:12).

David chanchin isim leh ama ading a hapang apang Joabte unau khu tamvei pi David ading in anatna, abuaina suah uhi. David in Jeruiah tapate jiehin tamvei pei guitam in vui ngutngut hi.

Tunia Hattuam a hapang a pang a, ki inn teh sah mama a i pan lai a Hattuam neitu Christ in a hattuam ibahsah, i natsah, iliamsah, a khanding daltu ihi jieh a ninhuai hing sa mama hi jaw maithei hi. Midangte'n a hing nin ahi ding sa in koi ta lei. 

I thupi uh less is more hi jaw hi. youtube sermon, zoom sermon, whatsapp message leh video clip hoi pipi forward bawlte zong bawlbawl hoi mah e. Vanjat hoi mama hi. Ahiin ahing tam seng chiang hing common doh hi. Laibu hi'n, album hi'n, sermon hi'n, article hileh zong thil khu ang niang seng, ang tam seng chiang a value bei sah hi. 

Ka article gel hi'n, ka thugen hileh ka da mama khu ka ha bawl seng jel a atui nateng bei jel hi.

Tunin tamvei pi  nu leh pa te  zong deisah kisa a itate i hil tamna lam in i thugente in meaning nei nonlou hi. Kigen tamseng hi. Pastorte zong a gentamte khu a thugen ki ngainep ut hi.

Rambo movie te ka deina mama khu a tangval pan thu gentamlou hi. Khujieh in Agen te in umjie nei hi.  

I Mangpa’n vaihawm ni chiang in memento bang jat na khawl doh ei, article bang jat na giel doh ei?  laibu bang jat na bawl doh ei? degree bang jat na la doh ei? sermon bang jat na gen ei? Youtube sermon, zoom sermon bang jat na record jou ei? executive in term bang jat na tou ei? Director in mun bangjat ah na tou ei?  album bang jat na bawl doh ei? la bang jat na phuah doh ei? Bible bangjat vei na busua ei? Na hagau mang mat list bang jat na sim doh ei? Hattuam building bang jat na din ei? Maitam bang jat na bawl doh ei? Baptisma bang jat na bawl doh ei? Mi bang jat dansiang leh pindan in na kiteng sah ei? inn bang jat na lan, cari bang jat na lan ei? nau ngeh bang jat na lan ei? suang bang jat na hong ei? whatsapp message ni khat in bang jat na forward jou ei? leh adang dang hing na dong lou hiel ding hi. 

Aman a hingsawl na khu Aman ei ahing siam dan, talent ahing piah dan. personality, temperament ahing piah dan  jir in leh a hing hatna toh kituah in aman ei sep ding gingtu teng khatkhat in hing pia hi. Tuate khu Ama deina banga ( WILL) sem ding, ama hunguat dan, leh style leh method a sem ding chi ahi. Ama loupina ding a hing ding, a lungtup bukim sah ding chite hi jaw hi. Leitung a vaah ding, chi bang a al ding, ama theipi tu a pang ding, ama damna ( healing) khu homkhe ding chi ahi. Tua Ama deibang leh Ama kipahsah a hinna ding in, niteng Ama toh kinai a, Ama lungsim thei a, ama aw ja a nichin hun chin a ama order or direction dungjui  a pai khu poimaw hi.

I septam, i hah sep lam ah ama kipahlou in, ama deibang, ama chidan, ama lungtup bang chet in isem ei chi khu ama kipahna hijaw hi. Kumpi Saul hapan mama na pi Samuel kipahlou hi. Paul zong Saul ahilai in Pasian ading a hapan mama na pi I Mangpa Jesu ading in a mit lai dum su kha hijing hi.

Less is more:Tunin i kam a hing potkhia thumal atamjaw, inasep a tamjaw, i thugen atamjaw, i thupuhna atamjaw, bawlhoi ikisah, genhoi ikisah, semhoi ikisa tampi khu ana genlou, ana bawllou hijaw lei ana hoijaw mama ding tam hi. 

More is less: Sem tam, bawl tam, experience hausa, ga tam, khawl tam, contribution tam kisa a, mite i sim maw lai in ei khu Pasian mit mu a guah leh homguah ihi khah ding jau huai hi. Ajiehpen hagau a sep leh tahsa a sep khu Pasian in hoideu in hing khen ding hi. Nidang lai a Isreael kumpi JEHU khu nasem hoi mama, in ha pang in pang hi. Hinanleh Pasian in sisan sua hat pan chi'n hamsiet hi. 

Pharisai te'n na sem kisa mama, dih kisa mama, siangthou kisa mama in, midangte sang a hoijaw bih in ki koi uhi. Hinanleh Pasian mit mu in a kihdahhuai dan uh Hankhuh ki hong toh kibang namsie ahi uhi. 

Tuniin Pasian in ahing lamet leh ahing ngah khu a buai a buai ding, asem a sem ding, a gim a gim ding, a pang a pang ding hilou in AMA ang sung ah, ama kengbul ah, ama umna ah, a ma biahbuh ah ama toh hun bang jat thaw veng leh dam tah in, daai tah in, ki nawlou in, ama melet na hun in i jang uai ?chi ahi jaw hi.  

Numei or mou nu khu a neh bawl leh a inn sung nasep leh, a tate toh pumbuai a buai ding in a pasal ading a hun nei nonlou, a pasal service bawl ding a gim leh buai sengta, a pasal kipahsahna ding a hun leh tha nei nonlou. A pasal ang tung chiang ana buaipi man nonlou, a neh ding a dawn ding bawlsah man nonlou, a vaikuan ding chia hoi tah a vai ha man nonlou etc chi khu nu pa pai ding dan hilou hi. A pasal toh a kikal fresh nonlou ding a  aki kal uh ki gam la deudeu ding a, a tawp a buaina a maban uh ahi.

Pasal zong a nasep, a neh holna, a office work leh a  football leh a lomte toh buai seng a aji ading a hun nei nonlou, a ji toh dam tah a ki nouna ding hun neinonlou, agim a gim a buai abuai gop, a ji kipahna leh dahna te zong ngai khe man nonlou, sum leh pai leh ana sep ngen toh ahun teng atha teng beisahta, ana sep khu  aji suahta hi. A tate ading hun umnonlou, A ji khu a umpinu khat bang mai hita.  Ama ading a a nasep leh a game khu a pasian suahta hi. Hibang pasal khu a buai ding theisa ahi. Amaban ah hun hoilou in  ngah jingta hi. Hibang ki buaisah, ki gimsah, sum leh pai leh minthanna del del a, a hun, a tha pesiang pasal khu a inn sung kisia ding amaban ahi. 

Nasemlou ding, buailou ding, gimlou ding chi hilou hi. I gen sawm khu Pasian makhel jen a, ama direction la manlou jen a, a ma a pat haatna va la manlou jen a, ama aw ja manlou jen a, ama bemanlou jen a i tai vialvial uh khu ama’n hing ipla hi. Ajiehpen i genjel bang in “Ama ading in bang i sem khia ei ? chi hijaw lou in Ei tungtawn in Aman sem ut hijaw hi”

Hattuam vai leh sakhua na vai a ibuai ding ma uh ahi. Ahiin I Mangpa'n Martha kung a agen bang in tua sang a hoijaw khat um hi. Tuakhu Mary in a teel jaw hi - Jesu kengbul a daidide a, ama thugen ngaikhia leh ama mai en leh ama ngah hithiat a, ama umna um khu I Mangpa deipen ahi.

LESS IS MORE; MORE IS LESS  chi thei pha kia vai!

Mangpa’n atawm khu atam ahidan leh a tam khu a tawm ahidan thei ding in Grace hing pia ta hen!

Topa Thupha! Shalom!

Sunpha! Mangpa’n nitah lam ah zong  Eden huan a ninem lam ava vah lut bang in na inn ah  sunnung leh ni tah lam in zong hing va lut hen lan tua leh  na evening sacrifice hing san sah ta hen!


nexh ah: Un Hurry God









No comments

Powered by Blogger.