RAPTURE A PANGKHALOU TE SILTUOH DING GIMNEI- PART 4
RAPTURE A PANGKHALOU TE SILTUOH DING GIMNEI- PART 4
Rev.Stephen Khupsianlal
Rapture hun a nuasie te lah a ipankha ngei ngei uleh kinepna mawng mawng inei nawn sih ding ua, Pasian thangpainate khu aban ban in ichiem ngal ta ding ua, tualeh kumtawm gawtmun meidiil tanpha a ithuoh tou peh nalai ding uh ahi.
Tu ihunzah uh Hepina Hun a kigen gen Pasian Thu, Khrist a pienthana Thu khu Rapture nua chiengin ahamsa ta ding a, Pasian Thugentu piengtha dihtahte melmu ding koima mupha ahinawn tah lou ding zieh un piengtha ut in kisiana umnanleh chance pen a umlou phiel ahi ta ding hi, tuabangte khu Anti-Christ in doudal ta ding hi.
Tu Hepina Hun a ahing siemtu Pasian sang a khovel nopsahna ding leh minthan na dinga, nahun manphatahte sum leh pai suina, khovel du-amnate leh leitung nopsahnate a nazah zing leh Rapture zou chiengin na hitui luonna, na kaana ahing suoh ta ding ahi.
Zu leh sa khamthei-guithei buoipi pi mai a, na tahsa Pasian Temple khu nasuh nieh nieh leh Rapture zouchieng a na kaana na ding ahi higiep ding hi.
Rapture zouchienga leitung buoizah pai ding ahidan igenta ua, Chiemtena 7 a Gawtna te leh abanban a Pengkul 7 a Gawtna umtou zel dingte zong ina kihil ta uhi. Tuanah abei nai sih a, ahuoisezaw sem Gawtna, tuakhu Pasian Thangpaina Hengkuong 7 leitung mihingte tunga sunbuoh ding a um nalai a, Tribulation Gimthuohna hichiet nanleh Hengkuong 7 te khu the Great Tribulation aki chi tuom ahi.
HENGKUONG SAGI TOH GAWTNA
Kihilna 16:1-2 ah Hengkuong 1na leitung a sunkhiet ahi in 'Gamsa chiemtena (666) neite leh alim be mite tungah himasie nasetah leh kidah huoitah ahing tung ta hi.' Tambang kigawtna khu Egypt mite tunga Mangpa gawtna chi 6na a Chibawh leh Uilutpi toh akibang ahi ( Exodus 9: 8-12).
Anti-Christ in leitungah One World Government tungtawn in thuneipen hina toh vai ahawm ta dinga, ama number 666 latute leh alim betute zousie tungah tam gawtna kidah huoi a um dinga, mi tampi ashi ding ahi. Tami hima nasetah khu moh beilou ahidan Kihilna 16:10-11 in gen hi.
Tulai Covid-19 zieh in leitung buoi chinanlei zong kizen dan leh kikepdan lampi ngaituo thei in a aumthei nalai hamham a, nanleh tam himasie leh kidahhuoi natna pen akep didan mawng mawng a umsih ding ahi.
Hengkuong 2na khu tuipi tunga sunkhieh ahi tah in 'tuipi pen mishi sisan bang a hing suoh ta ahi, tuachin tuipi a um hinna nei zousie a shita uh ahi.' Kihilna 8:8 akhun Pengkul 2na akimut tah a tuipi sisan hing kisuo zieh a hinna neite sethum suo sekhat shibei ahidan zong akimu hi. Nanleh Hengkuong 2na zieh a tuipi sisan kisuo zieh in hinna nei zousie shi ding ahidan gen a, tam khu nasa mama mai hi. Tuipite sisan kisuo sieng ta ding ahizieh in hinna nei tampi ashi ta ding ua, sisan nam leh nga etc sidingte namsiet ding zieh in mihingte nasatah in abuoi ta ding ahi.
Hengkuong 3na khu luidungte leh tuinahte ah sunkhieh ahia, tuate khu sisan ahing kisuo ua, leitungah tuisieng dawn ding mawng mawng muphah ahinawn sih ding ahi.
Rapture masang in piengthalou leitung miten Pasian mite khu ana bawlsie un tampi zong ana that uh ahi. Tam hun akhun Mangpa'n phuba lahna'n tuipi sisan kisuo khu dawn sah ta ding uhi.
Hengkuong 4na khu Ni tungah sunkhiet ahia, tuachin mihingte mei a halgawp theina pieh ahi. Tualeh mihingte khu mei satah a haigaw in a um ua, gawtnate tunga thuneipa Pasian min agensie ua, Ama kunga thupina pe dingin akisia nai tuam sih uhi.
Mihingte khun Nisa vah khu aki poimaw mama ahi. Kihilna 8:12 akhun Ni pen Sethum suo sekhat suhsiet ana hi a, tu in pen Nisa khu huoisezaw sem a suhsat in umta hi.
Leitung a tuipi te leh tuinahte, luinahte khu sisan suosieng tading ahiban ah dawn ding tui vang mama ding ahilai in Nisa khu sasem sem nalai ding ahizieh in achizat huoi mama mai ahi. Tuidu dangta a shi mihing atam mama ding ahi.
Hengkuong 5na khu Gamsa (Anti-Christ) toupha tungah sunkhieh in a um a, Leenggam khu ahing mielta a, tualeh ama un na asah seng zieh un alei uh apet uhi. Pasian agensie ua, akisie tuom sih uhi.
Tam khu leitung pumpi huop mielna genna ahisih a, Gamsa leh athuneikhumna leenggam sungteng huop genna ahi hi. Mangpa'n tambang ma in Egypt mite khu gawtna 9na in ana gawt a (Exodus 10:21-23) tualeh Kihilna 9:2 a Pengkul 5na gawtna tungtawn in lei mite ana gawt masa ahi.
Gamsa lim (Anti-Christ Statue) hei a um ahi diei ichi chieng un, tuakhu Jerusalem Temple sunga um ding ahi. Tam mun khu Anti-Christ vaihawmna munpi khu ahiding ahi.
Mangpa'n Egypt mite tunga gawtna 9na asawl lai in Goshen gam Israelte tenna chilou munzousie amiel suoh ahi. Hengkuong 5na zieh in Gamsa touna Jerusalem a miel dinga, mundangte vang miel suoh lou ding hi. Anti-Christ khu buoi mama ding ahi.
Hengkuong 6na Euphrates luipi tungah sunkhiet ahia, suolam leengte dinga lampi bawl ahi theina dingin tua luituite akang sieng ta ahi.
Tualeh ukeng toh kibang hagau bua 3 dragon kam a kipat leh gamsa kam a kipan leh guolnei tahlou kam a kipat hing pawt uhi. Tamte khu Pasian douding a kuonkhie dawite hàgau ahi uh ahi. Ama un leitung leengte khu Mangpa douding in Armageddon mun a, apui uh ahi.
Tam hun ah Euphrates luipi ahing kang dinga, suolam leengten Mangpa dou dinga ahing peitheina ding uh ahi dinga, tuachin Israel gamsung ahing lut ding uh ahi.
Armageddon chi khu Hebru thumal 'har Megiddo' apat lekhiet ahia, tuakhu Megiddo muol china ahi. Megiddo umzie khu 'sepaite munpi' ahiei 'kithana mun' zong kichi hi. Tuabanah Jezreel Phaijang zong kichi hi. Tam mun ah Anti-Christ toh pangkhawm leitung leeng zousie in a galkap teng uh azawhpi ding ua, Mangpa Jesu'n amaute azou sieng ding uh ahi.
Hengkuong 7na khu huikhuo ah sunkhiet ahi a, tuachin van a kipat leh mangtoupha a kipat in " Bawlzou ahita " chi aw kiza hi.
Tualeh aw te, tunphete leh vanpi gingte ahing um a, zil nasatah ahing linga, tambang zillin nasa leh thupi leitunga mihing a um a kipat a um kha naisih ahi. Tuachin tuikuolkhum gam (island) zousie ataimang ta a, muol leh taangte mu in a umnawn sih ahi.
Ephesa 2:2 khun Setan khu Huikhuo a thuneipa chi in gen hi. Tamna Hengkuong 7na huikhuo a sunkhiet ahi khun Setan thuneina khu zaw ahi ta chi etsahna ahi ta ahi. Huikhuo a aw khun "Zaw ahita" chia ahing phuon toh kizaw in zillin gimneitah leitungah tung ngal ding hi.
Zillin gimneitah khu Gialtang talent 1 (125 Pounds=40 KG) a gih chiet khu mihingte tungah akesuh nalai ding hi. Tambang gawtna khu Egypt mite tungah Mangpa'n gawtna 7na toh agawt ahi ( Exodus 9:22-26).
Tulai hun a bawn gialtang Ahtui (egg size) tang chie akiet mai mai leh inn leh lou, mihing hinna tanpha buoisah ahilai in Tribulation Gialtang keding apat in asuohta tamlou ding ahi.
Mihing a um a kipat umkhanailou zillin gimnei leh huoisie umding zieh in mihing bang za ashi tadiei le? Tam zillin khu munbih khat zillin bang ahisih a, leitung pumpi huop ( universal earthquake ) ahi ding ahi. Gialtang chiet talent 1 a gih kesuh ding khun ana damna lai mi bangza asep lum kia tadiei le? Sim senglou shi ding chi na ahi hi.
Unau deitah Rapture hun a lahtou nahi lou ngei ngei leh na maban khu beidonna leh kaana, kinepna beina ahi ta ding ahi.
Hepina Hun sunga Pasian Thu zahpha a aum pet in ngaisah inlen hagau lam damna nei sawm in. Dachieng hing vaigei ta ding hi.
Mangpa'n hing guolzawl hen🙏
No comments