A KIP TAWNTUNG GAH A GAH DING

A KIP TAWNTUNG GAH A GAH DING
Nisim Manna

Bulphuh: Note in kei hong teel lo-in, ke'n note kong teel hi. Kuankhia-in a kip tawntung gah a gah dingin note kong seh zo hi; tua hileh, keima' min tawh na nget peuhpeuh uh hong kipia ding hi. John 15:16 (ZB) 

Topa in a gah bek dingin hong sawllo-a, a kip tawntung gah a gah dingin hong seh hi. Tuhun in khamangthang a tam theipen mat ding kilunggulh in nakpi takin kihanciam ciat hi. Hoih mahmah hi. Ahi zongin tampite nasepzia pen i Topa hong sawlzia tung zolo bang hi. I Topa in minam khempeuh a piangthak ciang bek hilo in ama nungzuite (disciples) i suahsak ding hong sawl hi (Matt. 28:19). Nungzuite i cih pen a piangthak mi ahih banah i Topa tawh kizopna cingtaak a nei mite hi-in a upna uh midangte kiangah a genkhia thei mite genna hi. Tua hi-a nungzuite i cih pen a kip tawntung gah ahi hi. 

Tuhun in nasep lawhcinna i tehna uh khamangthang bangzah man zo cih hi-a, tua manin a nambat (statistics) a khan ding bek kimitsuan-in  kipibawl a, ahi zongin tua a mangthang i matte nungzui suahsak ding kithudonnawn lo tawh kibang hi. Tua hangin tampi tak kikhahsuah kik hi. Tua manin i Topa in a kip tawntung gah i gah ding hong deih ahi hi, cih phawk ni. Tuni in a kip tawntung gah nangmah tung panin gah sakin, midangte in zong a kip tawntung gah a gah theihna dingun hanciampih in. 

𝐊𝐢-𝐚𝐩𝐧𝐚: 𝐓𝐨𝐩𝐚 𝐚𝐰, 𝐭𝐨𝐦𝐧𝐨 𝐬𝐮𝐧𝐠 𝐛𝐞𝐤 𝐡𝐢𝐥𝐨-𝐢𝐧 𝐚 𝐤𝐢𝐩 𝐭𝐚𝐰𝐧𝐭𝐮𝐧𝐠 𝐠𝐚𝐡 𝐤𝐚 𝐠𝐚𝐡𝐤𝐡𝐢𝐚𝐭 𝐭𝐡𝐞𝐢𝐡𝐧𝐚 𝐝𝐢𝐧𝐠𝐢𝐧 𝐓𝐨𝐩𝐚 𝐉𝐞𝐬𝐮 𝐊𝐡𝐫𝐢𝐬 𝐦𝐢𝐧 𝐢𝐧 𝐤𝐨𝐧𝐠 𝐤𝐢-𝐚𝐩 𝐡𝐢. 𝐀𝐦𝐞𝐧!