JONAH LUNGPUT
WAY2GOD
Jonah 4:2 - Jonah in tambang in Mangpa kung ah thu agen hi, [Neneveh khawpi a pai dia nang sawl lai a, utlou a Tarshish lam ah ka le taita hi] aziahpen Nang (Mangpa) hepisiam leh khotuosiam Pasian lungthah paipailou leh itna a dim Pasian na hi a, siatna tunlou ding a lunghei Pasian na hi chi ka hing thei hi" achi hi.
Mangpa'n Jonah pen a ziatlam (toward right) a um Assyriate khopi, Neneveh ah kisiah a lei-le-van siam Pasian deidan zui di'n va gen in chi'n a sawl hi. Hinanleh, Jonah pen a veilam (toward left) ah pai dengdeng in Joppa khua apat Tarsish lam zuan in long (ship/tembaw) tung ah ava tuang tadaih mai hi. Bangziah in a hi diai?
Aziahpen, Assyria te khu Pasian deidan toh kikal a nasatah a hinkho zangte leh lungsiatna bei a gamtangte ahi baan uah gaal haat mama zong ahi ua, Israel te a ding a huphul huai mama, bangchihlai pou a susetheitu khat zong ahiziah uh ahi (Israel te leh Assyria te hindan leh gindan kikukal mama ahiziah a kituahlou ding ahi uh theisa ahi). Tamte ziah mama in Jonah in Pasian apat thu amu pen va gen leh kisia ding un Pasian in ngaidam ding ahi chi athei chet mama ziah a, Pasian sawlna anual ahi. Aziahpen Jonah in a lunggeel ah Pasian in Neneveh khopi khu hundamlou in gawt zaw leh achi ziah ahi - Jonah 4:2. Jonah in Pasian thupiah anual ziahin bang a tuah ei?
Jonah in Pasian thupiah a zui utlou ziahin a tuanna tembaw (ship) heehte leh a sung a tuang zousia tung ah lungkham mangbatna atun a, thamlou in anei-alam teng uh ama ziahin tui lah a paimang in a um law hi. Tamtan a kichai ahi sih a, ama (Jonah) ngeingei zong tuililai ah si ngeingei ding a paimang in a um hi. Jonah hinkhua a siltung bangin Pasian thu i zui utlou ziah un i hinkhua in hahsatnate thamlou in sina tanpha ituah lengta uhi. Khenkhatte silou giap in thumanlouna guuh kham in idamsung un si lah hilou, dam lah hilou in hinkhua hahsatah i zang uhi. Bang chi'n damna imu thei ta di uai?
Tunia idamna ding umsun ahi leh Jonah bang a i gitlounate ki muchian a, i hoilounate ziah a thuahtaah ma ka hi chia i tung a sil tungte ahi bangbang a ipomthei aki sam hi. Pasian a kisia a kileehkia na khu idamna uleh Pasian toh ikilepthah kia theina uh lampi umsun ahi (1 Jn.1:9). Tuabang hitaleh Jonah bang a hithei dia gintat huailou nga (fish) tungtawn a damna amu bangin i hinkhua ah hithei ding a igintaatloute tung tawnin zong iMangpa'n ang humhing thei thamtham hi. Jonah kisiahna in bang a tun a?
Jonah in Neneveh khopi lai ah Pasian thupiah: "Kisia na ding ni somli (40days) maimai a umgiapta hi" chia akikouna in Pasian a kisiah tahtah ahi dan a langsah hi. Tuni'n nang leh kei kisia dan toh aki bang ei unau? eilawi pen kisia mama ahi vang a Pasian deilou dante bawl kia veve zel. Tambang kisiahna khu Pasian in pomtaah salou ahi tuaziahin Jonah bangin kisia na i poimaw uhi Pasian pomtaah ihi thei na di'n. Thamlou in Neneveh khomipite zong alian, leengpa apat aneipen tan kisiah a sai-ip puan asil bang ua eite'n zong kisiah a lungsim ikheel tahtah uh angai hi. Aziahpen Neneveh khomite'n tambang aki siahnate ziah un Pasian apat ngaidamna atang uhi. Pasian hina ensuh jual nalai vai.
Jonah in Pasian thu amanlou ziahin tembaw (ship) tung a tuangte tung ah lungkham mangbatna tun a thamlou in aman silaw dehtah hi. Hinanleh aki sia ziahin damna nga a, Pasian thupiah azuitaah man in Pasian thangpaina tang ding atuul atuul a sim Neneveh khomipite'n damna nga uhi. Tuamabang in tuni'n i thumanlouna te ziah un midangte tung leh eima tung ngei ah natna huaisetah itungsah uhi. Hinanleh Jonah bang a kisiahna toh Pasian thu izui leh eima ngei in damna tang in, midangte tung ah damna tuntu leh gualzawlna tuntu isuah ding uhi.
Jonah bang a Pasian lemgeel te izuilou khaahta in zong tuni'n Pasian toh kilem in athupiahte chitahtah in zuipanta vai tuachi'n eima i dam ding a, thamlou in midangte tung a gualzawlna tuntu isuah ding uhi. Mangpa'n simtu tengteng theisiamna hing pe chiat ta hen!
No comments