2022 Christmas Hun in, Hundampa Jesu Khrist Tuah Di'n Bang Na Chi Ki Singsah Ei?

2022 Christmas Hun in, Hundampa Jesu Khrist Tuah Di'n Bang Na Chi Ki Singsah Ei?
2022 Christmas Hun in, Hundampa Jesu Khrist Tuah Di'n Bang Na Chi Ki Singsah Ei?
WAY2GOD

Damlounate, sinate leh buaina tuamtuamte zia a Christmas hun noptah a zangnuam mama napi zangtheilou mi sangtampi a um lai in, nang leh ke'n kum 2022 Christmas hun thoveng tah a zang thei ding a hunlem i Mangpa'n ang guatsah ziahin, iMangpa'n thupina tangta hen.

I khothei apat in Christmas nuamtah in ina mang zel uhi. Bangpen tah ziah in Christmas nuam nasa ei? Zalen tah a hun i zat ziahin ahiei? Tahsa nopna leh dei-le-ngai tuamtuamte zalen tah a bawltheina hun ahi ziah a nuamsa i ma? Tam laigel i sim hun sung ngeingei in "Christmas bangziah a kizang zel ahia chi in" eima liauliau a di'n kingaisun tha vai...

Mite'n Mangpa houpina a sang(accept) dan ua pan zil vai.

Zechariah tungtawn in:
Baptist-tu Johan (Mt.3:1) pianna pa, Zechariah khu Levi nam apat Siampu khat ahi a, tualeh Aaron haah-le-suan Elizabeth toh kumtamtah ta(child) neilou in a kinung gel uhi. Zechariahte nupa khu Pasian a kituhlut zou mi, midih leh demna bei zong ana kichi hial hi (Lk.1:5-6). Tamte ziah a Pasian mittunnate(lungdampi nupa) hinan uleh atahsa uh a upat(old) mama dong a, lungkelou kei a, ta(child) neitheina ana ngetnget uh iMangpa'n a dawnglou pen aziah um ding in i ngaisun hi. Bangziah ata diai?

Matthew bung 7na in, "Ngen in piah in na um ding" chinanleh, iMangpa'n deina toh lungtang tahtah a ngen mi khu koi ahiei chi a enchian zel leng hi chi athah in geeldoh kia vai. Zechariahte nupa in ginna tungtawn in lungtang tahtah toh chitahzet a ngen ahi ziah un iMangp'n angel Gabrial tungtawn in tapa(Johan) apiah ding thu a hilta hi. Tuaziahin i lungtang zousia toh, ginna toh iMangpa i sui sih leh imu sih ding hi (Deut.4:29-30; Jer.29:13; Mt.22:37).

Tamnah sil lamdang mama khat ahi leh, ana ngetnget uh tapa(child) aki piah phet in, Zechariah in "Kei leh ka zi ta nei ding in ka upa sengta uhi (Lk.1:18)" chin a muanglel ta hi. Tambang MUANLELNA anei ziahin iMangpa'n tambang in agenta hi, "Pasian a di'n a hitheilou bangma a um sih hi (Lk.1:37), hinanleh ka thugen na gintatlou ziah in na hamtheina khah ahi (Lk.1:20)" achi dungzui in azi Elizabeth in tapa, Baptist-tu Johan, ahinkhiah dong in Zechariah khu a hamthei non tasih hi.

Zechariah tung a siltung bang in ei gingtu tamtahte zong ginna toh lungtang tahtah toh ithum ua hinanleh muanlelna te ziahin iMangpa'n ithumnate ang dawng ei? oleh hing dawnglou ama? chi zong phawhpha nonlou in bang i umkha leng uhi. Khenkhat te leuleu lah Ginna leh Lungtang zousia toh Pasian buan sese lou in utut baan nget suh zialzial in, atawpna ah ka thumna Mangpa'n hing dawnglou chi pawl zong tamtah um veve zel. Tuaziahin ginna tungtawn in lungtang zousia toh iMangpa buan vai, lungke sih vai, i nget khu bang e chi chian tah in thei kilkel vai. 

Luke 18 na a tekhinthu khat in, meithai nu'n lungkelou leh khawllou a thukhenna dih a ngetna pen atawptawp in pomsah ahi dungzui in, ei gingtute'n zong muanglellou leh khawllou in iMangpa sui lei i mu ngeingei ding uhi.

Mary tungtawn in:
A lelam khat ah, iMangpa Jesu Khrist khu nungaah siangthou Mary tungtawn a piang ding ahi chia Gabrial in Mary atheisah lai in Mary in, "Ngai in, Mangpa suohnu ka hi, na thu bangin ka tungah tung heh," (Lk.1:38) achi hi. Tamnah Mary in Pasian aw(voice) ana saang dan khu Siampu Zechariah saang dan toh a kibang sih a tuachi'n "Numei lah a hamphanu, Mangpa nu" a suahlawta hi (Lk.1:42,43). 

iMangpa deisahna leh a lunglam tuahtheina ding in:
  1. Zechariahte nupa leh Mary bang a "Pasian deilou bang a hinkhua zatkha ding zau a kiveng gige mi" hi ding apoi maw hi. Tam pen Philipi 2na in agen bang a, gingtute pen Pasian ta ahi ta a hinanleh Pasian ta hilou hileh kilawm zozen a hinkhu zatkha ding utlou ziah a lau leh chituun pum a Pasiantate bang a hinkhua zang ding a iMangpa'n ang hattuamte ihi uh chi ki geelthah kia theilei ut huai isa mama hi.  
  2. Zechariahte nupa bang a ginna toh lungtang tahtah toh te-le-vuai dong a zong lungkelou a Pasian lunglam hawl mi hi dingin leh gingtu gin-um hi ding in iMangpa'n ang lamet gige te ihi uhi.
  3. Pasal toh kipawllou kei a tanei chipen sil umthei mongmong lou hinanleh, iMangpa'n Gabrial tungtawn in asiangthou Mary in Tapa(Jesu) hinkhe ding ahi achi lai in, Mary in lungtang chiimtah toh gingta in pompai hi. Tammabangin, Pasian tapa Jesu Khrist ngei khu Hundamtu-le-Mang a sang nailoute'n tukum 2022 Christmas hun ngei ah, iHundamtu-le-iMangpa ding a sang chiat dingin ki singsah vai. Tualeh Hundamtu-le-Mangpa a sang zousate'n tukum 2022 Christmas khu iMangpa toh ikizopna athahtah a KI-ETCHIAN THAHNA in zat som vai. 

iMangpa'n Revelation 2:4 na ah "Ahivangin na itna masapen na nuasia taah ziahin, tamthu ah demna ka hing nei hi" achi khu na geel doh zeel ei? Leitung ah izi-ita, i-innkuanpite toh ki-itna dihtah leh ki-zopna dihtah nei a hinkhua zat ilunggul bang un iMangpa'n Ama ngeingei toh ki-zopna hing, ki-itna dihtah, ki-pawlhalna nei gige ding in thuahzoutah in ang ngaah zing hi.

Simtu tengteng iMangpa'n athupha hing tangsah chiatta hen. Amen! 








No comments

Powered by Blogger.