Cafe with Kikim Simte

 

Cafe with Kikim Simte
Simtepeople.com

Bang chih mah a I kinep ngei louh uleh I mang a zong I mat khaah ngei louh uh “LELTE CHIBIL AWARD ” chu tukum apan in Simte sung a laasiam te a diing in kotkhah liantah a hung ki hong ta hi. Huchi mah bang in Unau Mizo te deihsah na thil pia (pahtawina thilpiah), Zo tate sung a nam neote lah a lasahsiam, kum teng a award a hawm zeel uh ( Chibil Award) chu Unaunu Kikim Simte in tukum in hu award chu ana sang hi. Kum kiit chiang in hi Award kua’n a sang diai?? chih kholai kihoulimna topic lar tah mai chu ana hita hi! Unaunu Kikim ahihleh tulel in Game village ah a innkote toh khosa ahiva, mi hou pih nuam, maitai leh nuihmeel deuh leh mi thanuam leh mi chitah ahi. A lohchinna kipahpih huai sa in SimtePeople.com in zong chit-chat bol lei hoih diing hive aw chih lunggel ki nei hi.

Huchiin kikim chu ka message a, akiman hun diing a hung hilh a, Huchiin online a interview ka hung pan troih mai uh ahi! Houlimnate hi a nuai a bang ahi-

(LH-Lian Hangluah, KK-Kikim)

LH: Chibai! Kim , SimtePeople.com min in houlim le’ng chi hi ung ei. Tutu in khoi ah na khosa ei chih na hung hilh thei diai?

KK: Chibai..Tu leh tu a chu Imphal a inn kote toh um cih phot di hi….

LH: Panpah mai lei, a hung kitheihna Kikim Simte chih hiveen, na mintah leh na pianna khua, khanletna leh inkuanpihte nang hilh thei diai???

KK: Ka min tah ahihle H Niangneikim Simte. Pianna khua: Lamka. Khanletna mun : Lamka leh Imphal. Inkuanpihte: Kapa min : H Awndou, Kanu H Chiinniang , Unau thum kahi va pasal nih leh numei khat

LH: Nang a bang zahna na hi ei le? na unau dang teng bang a zil/sem lel uh??

KK: Kei anih na, Katung akhat, kanuai a khat, tulel in kanuaia peen Siam in Computer Sc (Engineering) ajil a, ka U in chu bangmah bawl nei tadih lou

LH: Siamzilna lam a bang tan na tung taai le??? Tuma in CDS interview di’n Delhi na hoh chihthu kana za hiau hiau va, na bolhoih na maw na interview chu???

KK: Siam jil nalam ah chu, tutah in Master in Pol Sc. MU (Manipur University) ah kabawl a, .. Ka CDS interview vahoh na chu loh ching lou phot chih d hi ……

LH: Ok! I failure zong lohchinna diing a stepping stone khat hiven maw !!! bang chih apan lasa ana kipan na hiai?? Na lasah te in mahni mimal kipahna a hung tun zeel ei??

KK: Himah ei…… Stepping Stone himei.. .. Pathian in lem asah hun hun chia’n khat hung pe naan te ka chimei !! Lasah lam chu kana kipat na pawl sawm lai vel apat ana kipan kahita.. Lasah lungluut mi khat kana hihjiahin, kenjong theihtawpa Pathian min paahtawi na diingin kana sa hi..

LH: Mi tampi ten Pathian lasa toh zawl lasa a kopva nang bang ngaih daan na nei ei??Zawlla sia nasa ei/hoih nasa ei? bang jiah in ? na hung gen thei diai??

KK: Kei ngaih daan inchu.. Pathian laa toh zawl la sah khawm chu hoih kasa sih hi, ahihvang in zawl laa sia kachih na jong ahituan sih, hitung taang ah chu kei ngaih daan toh mi ngaih daan kibang lou d ahijiah in, opinion jong kape ngam tuansih, ahiin kei geel daan in .. Pathian in talent ahung piah chu Amah a diing mah in kajang jo diing..

LH: Music album bang zah na bol khetai le?? na album masapeen “Hungpuuitu Lalpa” ah bang la nalh na sa pen ei? bang jiahin?

KK: Music Album Solo khat kabawl a, lapawl ah zong ka na tel. “Hungpuuitu Lalpa” ka Album thupi a kajat khu mah ahi ka laa deihpeen. Ajiahchu, hi khovel ah suan diing bangmah kaneih louh lai in jong, ka maa hung puui jingtu Pathian aum a huleh athu khu kei hinkhua toh kituah kasah jiahin , hi laa ka album thupi di’n jong kana jang hi..

LH: Ken zong a thu nalh kana sa mah mah hi!!! Na album bawl “Hungpuuitu Lalpa” khu kua in a produce ahiai le? a track bawl hun vel toh motion picture bawllai veel in buaina na tuah kha ei? na hung share thei diai??

KK: Ka Album hung Produce sah chu ka Pa ahi a, hilejong Pathian lungsiat najaal in ahung deihsah tu te apat injong panpih na tuam tuam kamu hi. Sound track lampang chu, kanaupa siasiam in ahung buai pih deuh taangpi a, motion picture lampang ah chu Rev Pastor H. Soithang in ahung na buai pih nasa mahmah hi, amah hung buaipih najaal in gimna di lawm lawm leh buaina di lawm lawm tuahlou keei in kana jou uhi

LH: Hi na album toh kisai in sum bang zah na seng pha zou ei?? Profit thamching na mu thou viai?? market bang chi nasa ei??

KK: Ahijah chet chu ken jong theising, hijongleh approximate ah chu 40k+ lah veel in kathei. Profit lam ah chu kilawh lawm lawm sih, ahihva ken a profit muh nadiinga kana tup jong ahi tuansih. Market lampang gen talei, alawh lawm lawm diing aum sih

LH: Copy bang zah na bol khe him him ei?? mipite apan bang response na mu ei na album bawl tung tawn in?

KK: Copy 400 lah veel kabawl uhi. Khenkhat in ang kipaah pih mah mah in kathei hi.. …Ahung kipaah pih najiah un encouragement nasatah in ahung piaahbeh in ka mu hi……

LH: Mabaan a album dang bol na tum eile??

KK: Tum sim sim……. Pathian lemsah hun hun himei..

LH: Tukum bul lam in Mizoram a Lelte Award ( Chibil Category) na s’ang chih thu i theichiat va?? hu nominee na hih na heetin bang response na nei ei??

KK: Hi………Chibil Award kana saang mah hi. Nominee kahi chih ang theihsah un limdang kasa. Simte nam neu takhat hijonglei mi heetphaah a ana ki um ichih chiangin Pathian jaal ahi chih akichiang mah mah hi. Mibanga siam hisih jongleng Pathian lungsiatna jaalin mi deihsah na katanga hitanchiang tung kana hizaw hi.

LH: Ka hung kipaahpih tahzet uhi. Aw le, Ei lam sound system bang chi nasa ei?

KK: I sound system te uh midanga toh teh diing in chu hoihlah deuh kasa nalai, hijongleh nidanglai toh teh diing in improve kasa mah mah ta hi. Hite chu sound engineer hoihtah aki neih nailouh jiah hidi’n jong kagingta hi.

LH: Mizo Singer te a khangtou mah mahva, bang jiah peentah diing in na gingta ei?

KK: Gen saau jual talei, Mizo te chu eilam toh teh in lasah himhim jong angai saangva, asiam va huchiangleh lasa te jong amau lam ah atawi saang diaah khol uhi. Alasah taangpi uh i et le western style copy mah mah un kamu. Amau lam ah chu lasah competition jong asanga, huleh a market ujong kivaah naching in alian boh hi. Hujiah nasan tah in jong lasa siam aki behlap tou tou hi. Akhan touh najiah tah u chu hihaw ahi di e kei muh daan in.

LH: Facebook veel a pasal ten nungah te relationship status a theih uut mah bang un, i site uh simtu ten jong thei uut ahiva nang hilh thei diai?

KK: Relationship status !!!! (Nuui symbol)…….. Tu tadih in chu single life ka enjoy laitah chih di hi…………… Hitechu Pathian lemsah daan daan himei maw…..

LH: Album mabaan a na bawl touh jeel kilam en in, na lohchin touh jeel kahung deih sah hi.

KK: Aw, kipaah um e

LH: Na hun manpha tah sep diing dang thulh jeen a na hung piah jiahin kipah um kasa hi.

KK: Aw, keijong kipaah ing e. Interview diing mi asiam achin hujah lah ah kei peentah nang interview va nahun manpha tah uh tawmngai nang suah jiahun kipaah um kasa hi..:)

Bio-data tomkim :

Min         : H. Niangneikim Simte
Pianni     : 21st Oct 1988
Pa Min   : H.Awn Dou Simte
Nu Min  : Chiin Niang
Teenna   : Game Village, Imphal
Edn Qlf. : Tulel a M.A (Pol. Sc), Manipur University
Hobby    : Lasah, Movie Et, Sitcoms, Novels leh Magazines sim.