YOU CAN CARRY YOUR MORNING "REST AND CALMNESS" INTO THE REST OF THE DAY

YOU CAN CARRY YOUR MORNING "REST AND CALMNESS" INTO THE REST OF THE DAY
Pastor Dongzathawng
Devotional # 42 ( vol. 3)
Fellowship of Thirsty Souls and Hungry Hearts

*Thirsty Soul member te i dam chiatna uh maw!

I ki thujah louna uh sawtsimta in. Tulai ka tate assessment/test lai ahijieh in ka lungsim a tawldam sih a. Bangma dang ka ngaitua thei sih hi. Date 9 chia kichai siang ding ahi ua hinanleh ka ngahjou nonsih hi.

Hebrew ham a Jawlnei khu Nabi a kichi a, sap ham in “to bubble up” kichi hi. Tua khu ei ham in” Phul lutlut” chi thei ahi. Tua umjie khu Jawlnei ten Pasian a pat thu amu ua tua khu agen khiah masia uh a lungtung uah phul lutlut in Jeremiah gendan hileh “melkuang ki tum bang” ahi.

Tuama bang in Pasian in message ahing piahte i genkhiahlou leh ei mama kigim hi. Tualeh a tawp chiang Pasian in nung la kiah thei a ei ki sum hi.

Tuajieh in Aw Tozer in laibu a gel toh kisai ah: “The only book that should ever be written is one that flow up from the heart, forced out by the inward pressure” achi bang in I message te uh khu lungtang apat hing ki force khiate ahi. Tualeh Tozer in agen jel na ah koite in laibu agel ding e? achi ajieh point 2na khu “Whether or not the book ever reaches a wide public, still it has to be written if for no other reason than TO RELIEVE an unbearable burden on my heart” chi hi. Laibu article kichite lungtang a kuang, lungtang gihte kisuah khiahna khat ahi.

Khujiehin Tozer gendan in a simte'n adei leh deilou thu tuam (nidanglai jawlneite thugen khu atamjaw in ngai utlou uhi), agente, agelte ading atha jaangna (relief) ahi.

Tuajieh in himi i message khu kei ma agelpa ading a ki relief na hoi mama khat ahi. Tuamabangin Pasian thugen tampi zong ahi. jawlneite'n a lungtang ua apuahgih uh, a phul lutlut leh a ki tumtumte khu a genkhiat chiang un ama uh dam in jaangkhai uhi. Tuabang dan a hi i message uh jong ahi.

A hiin adahuai khat khu tua lungtang a kitumtum leh gihte khu i suakhualou leh tummang kia or Pasian in lakia hi. Tuabang dan ka hi. I gellouna asawt chiangin gel ding a i koi teng zong ana bei hi.

July 5 in ka loinu Hoiching vaccine va ki kap thei khongkhong in kipah huai e.

Tulai kei ading in Zoom meeting leh himi message gel leh phone tungtawn a ki hanthawn, kithumsah khu Pasian nasep danhoipen leh umsun bangta hi.

Tulai tah in ka TV uah Naupangte la audio ka play kawm a ka hing gel ahi. Hi naupang telai in ka hinna hing thousah in, ka inn sung huikhua uh himi message gelna ding in hing bawlsah hi.

Tuni Topic: “You can carry your morning “rest and calmness” into the rest of the day”

Tuni topic khu sawtpi a pat ka gel sawm ahi ta a, hinanleh ka lungsim a kuakua na pi ka suakhiathei sih hi. Hibang a ka ki sahsah lai in kei mama in ka botkeh kha jel a, gel tah in ka ki ngaitua jel sih hi. Hinanleh keima ading leh gingtu keibang a kibawlphat poimaw jingte ading in poimaw kasah jieh in tunin ka hing gial hi. Ka tanu test um jing nalai. Ka loinu Vaccine damdawi jieh in ihh mumu nalai. Ka bawlding tampi um na lai kawmkawm in ka hing suakhia ding hi.

Thirsty Souls sim gige a jing kal thumna leh Pasian toh mimal ahun mankhawm bang ahi theinailou i um nalai leh i article te khu meaning um senglou ding hi.

I genjing mabang in gingtute khu puahgih toh ki dim, lungsim momthaang kai bang a hi niainuai kawm in Jingkal ki thou jel hi. Jaan i mang hoilou, janni tah a i thusie jah teng toh ki thou in, tunia i nasep ding leh i bawl ding thil bangkhai tampi i maban a umte i gel leh adiah a khua hun bang hoilou nalai.. koi Pasian phat malah…* thakham huai ngutngut in, lunglel huai tuntun in, ngaplou leh thada sasa in ilupna tung a pat kikum suh hi.

Ahiin A Hepina jingkal teng a thah I Pasian in bangchi jawnge khat in i tha hing thousah in a ma umna mun, munsiangthou ah hing kai lut teitei hi. Abullam in thum ding zong kithei lou in, ki ham chiai chuai hi. Ih mut suah leh gimsasa in ki khupdin a. Hinaleh Aman hing na ngah in “You can take your time” “no hurry’ chi hileh kilawm in, alang khat ah Hagau Siangthou in i sung lam ah i hagau ang thaw khiah na ding in nasem sem hi.

Tuachiin Ama umna biahbu sung ah awlawl in hing houpi in, hing tham in, i lungsim a buah kai momthaangte hing lakhiah sah in, i lungsim a lungthahna leh puagih a dim khu awlawl in hing suhdam sah in, hing jaang sah hi. Tahsahgih mai hilou a lungsim gihtah a tua biahbu a va lut in, lungkhamna leh jauna dim, lunglelna leh chauna dim, khu tu in awlawl in a banban in hun hing paitoutou in tu in navah tah in i um a, kipahna tui bang in i hinna ah hing pul khia, hing luangletta hi. I hinna hing thou khia in Pasian phatna in i kam hing lua dim hi. Thakhaatna lungsimkhaatna te khu tu in kipahna leh phatna in hing lua in i umna tual lah khu Pasian umna biahbu, Van Angel te kumsuh-kaltouna mun hing suah hi. Hinanleh ina thei kha sih hi. Pasian in ata liangvai leh dangtah aliangvai dan kithei nu/pa khu hing ki pawlpi in, hing ve in, nai 1(one hour) zong pai nailou a lunggimna, a natna, puahgih, jauna leh lungkhamnate khu tu in a geinalam zong theilou khop in mang siang ta hi.

Tahsa leh lungsim gih a tawnjoulou pa/nu khu in tha jaang seng in Sakhi keng bang in munsang pen zong tawmkaanjou ding khop in jaang in a thumna room apat in hing potkhia hi. A mel mialkeeikui leh jiing khiapkhuap nu khu tu in Mosi bang in vah in hing tuam in, amai seel ngai khop in umta hi.

Himi ahi jingkal chianga Pasian toh hun mankhom manphat dan…,ama umna vanailou khah ding a chijat huai dan!

Philip Yancey in Hibang a Pasian toh hun iva mankhawm hun khu hibang in gen hi” "regular prayer helps me to protect inner space, to prevent the outer world from taking over” chi hi. Umjia ahileh jingkal a hibang hun iva man khu ih INNER SPACE va humbit ihi. Ajieh pen i potkhiat chiang a khawvel in tua mun siangthou khu hing luadim sawm in, aning-aning apat in hing buluh ding hi.

Agen jelna ah “ I am entering another world, just as real but invisible, a world that has power to change both me and the world I seem to be retreating from” Philip in agendan in Pasian toh hun mang khawm ding a i thumna room a i lut chiang khawvel dang khat a lut ihi hi. Tua khu Pasian toh eima kipawl khawm a, ama apa hatna, pilna, hoina, leh Vanlam a pat a Hagau lam galtuam (resourse leh re-enforcement) va la hi. Tuana pat a ing potkhiah chiang khawvel Setan vaihomn a khawvel ah hing ki lutkia hi chi ahi.

I Mangpa Jesu zong hun tampi mipi lah apat pot khia in Olive tang leh Gethesmane huan te or munsip lam ah a ngen in Pasian toh hun jang ding in va mang jel hi. “When I pray, it may seem that I am narrowing my world, retreating from the real world into a prayer closet, in Jesus metaphor” chi hi. Philip Yancey in alaibu The Jesus I Never Knew ah “ Living on a planet of free will and rebellion, Jesus often must felt “not at home” At such times he went aside and prayed, as if to BREATHE PURE AIR from a life support system that would give him the strength to continue living on a POLLUTED PLANET” chi hi.

Aw dih na mai e! I Mangpan Jesu khu leitung niin, huikhua niin leh ama ki nualna mun a ang lenlai in tampi vei Van Huikhua va dih in (breadth in), hatna thah vala hi. Tua chilou hi leh mihing hamsietsa, hamsietna leitung a khawsah ngaina umlou ding hi. Ei Ama nungjuite zong ama bawlbang i bawl ngai hi. Hih khawvel gilou, giloupa gam, hagau giloute luakhum, hui niin leh gam bitlou a i khawsah lai in VAN lam apat i life support ding uh nichin hunchin a iva lah uh ngai hi.

Tunia i gen ut khu Himi munsip a Pasian toh iki pawlna hun a Pasian apat tawldamna, damna, kipahna leh hatna i mu khu himi mun a pat a I hing pot chiang, i paina ding, i gamtatna ding khawlvel ah, tua mun a kipahna leh tawldamnate khu hing popot (bring out) theilou a diai? chi ahi. Khumun a Pasian biahbu a, amelhoi i etchimlou leh ama umna ha limnuai a lim leh kipah a i umtheina khu pulam khawvel a jong hing posuah thei a diei? chi ahi. Tuami ahi tuni i TOPIC uh. Philip Yancey in “I corral a few minutes of calm in the morning in the hope that I can carry some part of that calm into the REST OF THE DAY” (capital mine) chi hi. Tua jing kal a Pasian umna mun a damna, leh tawldamna leh kipahna imu khu sunni tum a, i paipaina a puahtheilou ding adiai?

Mi khenkhat thumthum in, bible simsim in, lamlam in, Pasian phatphat in tua a thumna mun apat ang pot doh leh phun kipan, han kipan, lungthah kipan, lunggim kipan, kamsie kipan ngal uhi? Tua pen sil hithei adiai?

Jing kal lungjiin leh puagih kom a sunhun pumpi jang ding pa/nu khu i hamphatna tungtuang ah Pasian Hagau Siangthou nasep jieh in Pasian umna iva nai a, ama toh iva ki pawlthei hamham hi. Tua mun i hun jat jieh in thiltampi hing ki kheel in. I puahgih teng jang in, i lungsim teng dam in, i gimna teng ki tawl dam in tu in maban sun hun mang ding leh phu ding in thathah liklek toh ki um hi. Lungsim kipahna dim in hing ki potkhia hi.

Ahiin igen ut khu tua mun a i kipahna leh damna leh calmness te khu sunni tum a i paipaina, i sepsepna hing polut theilou ding a diai maw? I thumna mun a, abawn a nutsia den mai ding maw? Sunni tum a, i paina, I umna, isepna mun a mi imukhah, i kithuah khah, iki tuahpi, i seppi tampi tua mi theikhalou a, a jingkal puahgih leh natna leh lungthahna teng paisuah a tuateng pua kawm a nasem leh khawsa den ten nang bang a tawldamna dangtaah in jongjong uhi. Aneilou jieh un a paipaina, a suhkhat phot uh nin sah in, subuai uhi.

Tua mi thawm hau, lungtangliam leh gihten damna leh tawldamna lunggulh uhi. Eiten i thumna muna nusia lou in i paipaina ah pua kawikawi lei ama uhte kipanpi thei ding hi.

Tua bang a ijingkal REST leh CALMNESS khu pokawikawi lei I vahna a auto or taxi imu lou chiang jong ki phun seselou ding a, I lomte toh nasep khawm chiagin zong i thu atunlou chiang in zong ki nuah pai lou ding hi. I boss pan hing tuam bawl leh zong ki lung neu tuanlou ding hi. I lomten hing tuam bawl in, hing ning bawl leh zong ama uh sang in attitude hoijaw ki pua veve ding hi. Bazar a dawr ngah pan ang hoi houpilou chiang i ego hing soukhielou ding a, Lamka Nurse gilou nu'n ang housiet leh ki posiam ding hi.

Office ipai chiang clerk nu (Biah inn kai taima isah nun) lungthahsa ang houpi leh zong kipua siem ding hi. Bank a ipai chiang counter a tounun i mel leh ham tuam jieh in leh ama sum valah sah ding bang in, aw khau deu in ang hou leh zong ki theisiam ding hi.

Tualeh I Gari nung lam ah hillou, jirtirlou tangval khat in ang hiat khah sah a , kisuangla hilhel lou a ataimang leh zong ki theisiam ding hi. I ji in a awsie teng in hing huut leh zong apua dan kisiam ding a, ipasal jukham in nitah teng in i Pasian biah jieh in hing phunsansan leh zong athuah dan kithei ding hi. I bazar touna mun khu i gei a Pasianthu gengen nun hing na lua sah leh zong ki sam bawching loi ngailou in dai tahin mundang i juanthei ding hi. I mounun i tapa thujaw in kithua in hing beibei nanleh zong hing phin lungthah joulou ding uhi. I teehpi in i tapa toh kithua in hing ningbawl leh zong ikipahna neukhat zong kiam nonlou hi. I seppi leh i lom ichiten hing ningbawl in hing thangsiet uleh jong ama uh kibah sawm nonlou ding hi. I bawl lamlam flop in, i right hing kilah sahin, maijumna i tuah chiang in zong ki sousang sese nonlou ding hi. Gingloute banga i lungtang hasua a emotionial deu a i hina beijen a kitom leh gamtat ngai nonlou ding hi.

Ajiehpen na jingkal thumna mun a CALMNESS in hing jui in hing cool dawn sah ding hi. Na gintatlou nalametlou sung lam apat in bang ekhat hing ki activate in tua in na emotional leh na ngaituana ana control ding hi. Na jingkal Pasian toh hun na manna a na va thiltuah leh lahkhahte in hing nusialou in sun hun a na poimaw na mun ah tuate ama leh ama in hing ki ACTIVATE ding hi.

Na tate exam saan lai tah, Na phone kisie in, light pailou, Na gas bei ta, Na antang um nonlou, Na sum lah lut nailou, Na bat hing pia ding nun lah a hun chiam juilou, na taneu pen damlou nalai, Na mense kipan chet nalaii, Na umpinu taimang nalai, Na pasal a khualjinna apat lampi a awhden in inn tung theilou, curfew laitah hinalai.. hibang kal ah zong Pasian in jing kal a ang na piah CALMNESS and REST khu na neithei mama ding hi. Tua ahi a lamdang leh amanpha.. Jingkal a Pasian nai ahoi dan…

Pasian in jing kal hun a ama toh iki thua a lungsim tawldamna leh kipahna ahing pia khu sunni tum a, ijat ding, i puah ding a ahing piah ahi.

Henri Nouwen in “Once the solitude of time and space has become a SOLITUDE OF HEART, we will never have to leave that solitude. We will be able to live spiritual life in any place and any time. Thus discipline of solitude enables us to live active lives in the world while remaining always in the presence of the living God’( Cap mine)

Hia hagau mipa'n agen dan chuh Jingkal a Pasian toh iki thuana mun a noptah a ama atoh ikipawltheina khu, tuamun a nusialou a, ing puahden a sunni tum a i umumna i vom den a, i puaden leh i umumna khu munsiangthou, Pasian biahbu ahi mai hi. Tuabang dinmun tan itun chiang mun leh hunkhu thupi nonlou ding hi. Tuabang tan itun chiang “ka jingkal hun,” “ ka thumna mun” chite in vai hawm nonlou ding hi. Mun jousie, hun jousie khu nang ading a HUN SIANGTHOU, MUN SIANGTHOU ahita ding hi.,

Khujienin Kum tampi paita in monk khat Brother Lawrence kichi pan ama hinkhua pat in “practicing the presence of God” chi laibu giel in tuni tanin hagau mi hi ut ten simsim nalai uhi. Aman kuangsil kawm in Pasian toh kithua theina thuguh nei in. Pasian umpina khawvel a koima dang umlou a, Ama leh Pasian mai kithua bang in a hagau hinkhuo mang thei hi.

Ezekiel 11: 16 in “yet I shall be a little sanctuary for them in the countries where they have gone.”  Pasian in amite a umna mun pou uah ama khu biah bu neu khat ahi ding dan gen hi.

Tujingin na puahgih leh na lungsim khawl kipei bang a tawldamlou khu Ama nai in, ama umna a va ki tawldam in, lungdamna leh, tawldamna leh kipahna luanglet va mu ding in i kideisah hi. Tuamai hilou in tua na tawldamna leh kipahnate khu sunnitum a na paipaina pua kawikawi a, mite ading a blessing hithei ding in Pasian in i bawn un simtu teng hing panpita hen!

Shalom Shalom!

Topa Thupha!


next ah : “We cannot get into Narnia the same way every time”