LEAVE THE CHILDREN ALONE

LEAVE THE CHILDREN ALONE
Pastor Dongza Thawng
Devotional # 50 ( Vol 3)
Fellowship of Thirsty Souls and Hungry Hearts

Thirsty souls simtu jousie Topa Thupha!

Mangpa’n tuni thil lamdang leh thilthah khat na hinkhua ah hing bawlsah ta hen!

Himi Message mawl tah hinanleh a simjousie in Pasian Hagau Siangthou houpina tangchiat ta uhen!

TUNI TOPIC: LEAVE THE CHILDREN ALONE

A paisa  a i gen sa bang in tutung ka inn ki tua un hing gim sah mama. Tun zong sai felding um nalai. Khukal ah itate homework beitheilou buaipi ngai um. Ahiin Pasian hoina phatphat ding a ka bat ahi jing hi. 

Tulai zaansawt chiang in Rev Dino L Touthang sermon leh interview ka ngai a nop kasa a tha hing pia mama hi. Adiah in  Joshua bung 3:4 pansan a “Na Paikhah louna lampi” chi thupi a ama tanchin agente in ka hinna chom mama hi.

Himi Bible chang pansan a Sermon outline khat bawl khia ding khu ka thumna  ahi. Tualeh a interviewna zong ngainop huai mama hi. Kei pen mi thupite tanchin ka sim chiang a thupina leh abawl fuhnate uh sang in kei ma bang a  A chauna, abaana, a na flop nate ua pat in tha ka na la jaw jel hi. Tuate in mihing ahina uh sulang a tua in connection hing nei sah jaw hi. Pu Dino Position thupi leh lian pipi -Director lian tah ahina te tam mama napi a ki ngainiem tah a thugen siamlou a kisahnate in ka lungsim  hing khoi hi.

Khaileh tu in i topic lam ah lut ta vai:

Tutung i topic ding khu LESS IS MORE hinapi tulai thil khat ka vei mama khat um in. Genlou a hitheilou ding in kilang hi. Tua khu : LEAVE THE CHILDREN ALONE chi ahi. Tutung Covid 19 ah naupang te ki jausah mama in school teng kikhah hi. Govt ten kum 10 nuai naupang himhim STAY AT HOME chi in thu suah uhi. Ahiin abuaihuai mama khu eimite pen ki velou a umtheilou, ann ne khawmlou a hi theilou. Bang ORDER khau um nanleh i bawl ngai kibawl vevete hi man in …hite i bawl lai ua i pilvang ding uh ka awlmaw khat hing gen vang. Ei aliante kive tua in, ne khawm dawn khawm ta vei, ahiin I tate adiah in kum chingloute khu LEAVE THEM ALONE PLEASE ka chi ut hi. Ama uh a umum in umsah phot vai, chi ahi. 

I khawlai vahna, i inn vehna naupangte ding nehthei puah teitei, naupangte hatkhiah a pom teitei, a biang uh va tham teitei, va kiss teitei..chite khu tulai ading a poimaw vawtlou ahi chi thei vai. Naupang ngaina, naupang it, a pu uh a uncle uh, auntie uh, a SS teacher uh, a *pastor uh tanpha  bang hina vei hinanleh tulai tah khu tuate bawl hun hilou hi.  I ta neute, i naupang te i it tahtah ua, ama uh hiselna ding i deisah leh a um ua umsah hun ahi. Tua khu amau ua ding a i bawlthei hoipen ahi. 

 Adiah a naungeh thah neite bang a inn ua hing vah mipi hon lah a hing la khia, a ut teng pom sah, nou sah, a kiss toh a biang tham toh kiteh nalai chite khu Haivai, ngolvai hi tulai tah ading a. SAFE LOU hi. Tunia ka advice na lah ut ua, na tate na ittahtah uleh nu leh pa te ka hing hil ut khu: Tulai hun a thilhoi leh bawl ding a ki suanla huai vawtlou chuh nang nalom nagualte toh ki khawlkhawm, ki thua  teitei, ann neh khawm teiteina bawllou leh a shi thei ding, hi thei mamalou na hileh zong khaw sih. Na ut bang in bawl tan. Ahiin hibang progm na bawl chiang na tate room ah khum mang bei in. A hingvah nalawm nagualteng na hah khiahtan room ah potlou in umden sah in. 

Himi ka gen khu ka vaigeita mai thei. Ahiin ki kheel nailou hi. 

Lengla ten zong i visit na naupang teng va hat khiah a nehthei vel ki piah sehsoh, va nou a, va pom sehsoh, va ki mawlpi chite bawl HUN HILOU HI. LEAVE THEM ALONE.. 

Ei a pichingte dudahlou, gihnatlou jieh a khawtheilou, poikhoilou naupangten athuah ding i phallou uh ahi.

Naupang it, a uncle a auntie iki chi a naute it ikichi leh i va buaipilou a, a um bang ua i um sah khu i itna suh latna hoi pen ahi. 

Hun hing hoi van, thilte hing hoi na ven, Tua hun chiang in i umdan ngeina, ibawl pa ngeina te sun jawm kia ta vei. A hiin tu hun khu hun thawveng, hun nop, hun hoi hi naisai lou hi. 

Nang leh kei a lu suun te lai ah i pang kha sia i ngai poimawlou himai thei hi. 

Khujieh in tuhun ading in a koi a koi in mi in i visit chiang anaupang neute khawthei loute : LEAVE THE CHILDREN ALONE chi thupi in nei ta vai. 

Tualeh kideisah mama nanlei zong ki sum hamham na lai vai. Neh ding tah ding i ma a ki lui photphot VOH bang a zial suh paipai poimawlou hi. Tualeh  tualai hun a ding a kideisahna suhlat dan zong pilvang hoi hi.  Bangkim ki theisiamna toh i thuah tou phot ding ahi. Hibang a hoi thumang leh umdan siam a i um uleh hun pha, ni pha hing tung kia na ven. 

Tunia ka gen khu thilthah zong hisih. Kumpi ten avelvel a, agengen sa uh ahi. Hun pha ni hoi  I ngah la leh ki sum, ki veng, ki kemtup phot vai.  Kumpi te thukhamte jui ding in gingtu gilou, Christian thukhel leh paupeng hisih vai.  Gingtu hoi Christian hoi kumpi te’n poimaw hi. A kep hah, a sawihah hagau mi chi um ngeilou hi.

Mangpa’n umdan, hamdan, gamtatdan siam ding in pilna lungtang hing guan chiat ta uhen!

Dam chiat vai!

Shalom!

next ah LESS IS MORE hisah jel ta vai. Mangpan hunpha hing pia ta hen!