PASIAN MA MITSUAN ZAW VAI

PASIAN MA MITSUAN ZAW VAI
WAY2GOD

Bulphuh: Leitung a sil umte ah hilou in, tunglam a sil umte ah na lungsim uh nga un. Kolossa 3:2

Khat veivei ihinkhua ah hahsatna leh buaina nasatah a ituah hun uh a um zel hi. Tuabang hun ah imuan leh ibel i Pasian kung ah panpina ingen zel leng ua hinanleh ei deihun leh ei deina bang a dawnna imulou chiangin Pasian in ang nuasia hita va, ahilouleh ang gawt hita va, ahilouleh Pasian umtahtahlou hiva chite in iguitam kha leng uhi. Hinanleh tambang hun khu Pasian a i ginna etkhiat hun (ang ki ze-et hun) laitah ahiziahin lungkelou keei in tunglam a um silte lunggulna toh bangchihlai pou a kikhel ngeilou i biah Pasian khu mitzuan zing zaw vai.

Job zong ahinkhua ah, lungkham-sinkham atuah laitah in Pasian in theipha nonlou asah vangin Pasian hoinate theipitu a pang in tambang in a dinpi ngam veve hi:  Pasian hoi in itna toh kidim hi - Job 10:12, Sil bangkim bawlthei leh sil bangkim tung a thunei Pasian ahi - Job 42:2, Pasian in a guatte a tangtung sah zel hi - Job 23:14, Pasian pen ang suata sah ding pa ahi - Job 19:25. Beidong hun a zong Pasian a aginnate mansuahlou a tudet zing leh dinpizing Job in masanglai sang a thupizaw vangpiahna Pasian apat adong zawta hi.

Tamziahin Pasian ginumna i muchian thei a tuazaihin nang zong tuni'n na beidon hun in zong na Mangpa a na ginna hasuah vawt sinlen tunglam a sil umte mitsuan zaw in. Tuni'n na hinkhua hamsa nasa kha maithei hi, hinanleh a zuou ngeilou Pasian in ang taisan sih hi. Pasian pen vaigei bang nanleh a hunlap in nang a dingin a ding zing hi chi manghil vawt sin. V. Raymond Edman in , "Pasian in khovaah lai a agen silte khomial hun ah zong muangla sin" achi pen thudih ahi. Tuaziahin sildang sangin Pasian ma mitsuan zaw vai. 

Ki-latkhiatna: Mangpa aw, buaina-hahsatna tung a thuneipa, ka beidong hun in zong nangma kang mitsuan tawntung theina dingin Jesu Khrist min in kang ki-lan hi. Amen!