POMTAAH AHI DIAI?

POMTAAH AHI DIAI? - Ps 37
WAY2GOD

Leitung nuntaahna ngaisutpha lechin, dihzou deulou hi veh aw, chithei ding tam mama hi. Aziahpen, Pasian giing mama leh Pasian a dia dihtat tah a hinkhua zang detdet ngaal a hahsatna leh vangsiatna in pumbop hileh kilawm hinkhua zong tampite'n tuahthamta hi. Ahi'n, alelamkhat ah i bil a izaah, i mit a i mu, chiantah a ithei Pasian douna hinkhua zang - negu, tualthat, huhamtah a hinkhua zang, zuouthawhtah a namta leh lepchiana toh kidim hinkhua zang tamtahte bang a dihlouna uh kilangkeilou, mite'n paahtaatna pe nalai, domsang nalai uh, gum nalai uh, thamlouin amaute'n dihloutah a hinkhua lamzawtna uh lamzang toutou hileh kilawm zong tamtah um veve zel hi. Tambang hun ah Pasian a dia gin-um tah a gim-le-tawl khawsalou a hinkho zang mite a di'n tambang thute ziah a kisuhlungkham baisam mama mai hi (v1,7). Tuaziahin, iMangpa'n tambang silhoilou bawl mite ziahin ki lungkham sah sin aziahpen amaute tung a ka vaihawmni hing tung ngeingei ding khu a mulkimhuai a, tungpai ding ahita achi hi (v.2,10,13,17,38). Hinanleh kei hing muang a kei a gin-um mite ka dopsang hun zong ang tung veve ding hi achi hi (v.17,18).

Tambang thutah Mangpa'n kichiantah a ang hilna san ahi leh, tambang silhoilou bawlmite suhmangthang a, a um ni uh tung ngeingei ding tualeh tungpai ding ahi a, tua ni chiangin hampa bangin a vulpai ding uhi - v.2,10,13,17,38 (tambang mite tung a Pasian vaihawmna ding khu suhmangthaina ahi lel hi). Hinanleh, gin-um tah a Mangpa muang a, Mangpa a kinga gige mite pen hahsatna tuah in, panpi ding bei bang nan uleh, i Hundampa Pasian in suuntang lai Nisa bangin a dihtatna uh a tawisang hun ang tung ngeingei ding a, tua ni chiangin Mangpa a dia gin-um tah a kal asuan nate uh simtham hisih nanleh Mangpa'n simthamlou dihtatnate khu kumtawn dai ding in ang pompiahta ding a, kumtawn dai (everlasting) goumanpha a suahsahta ding hi (v.6,18).

iMangpa'n silhoilou bawlte bang a suhmangthang a um dingin ang phal sih a, gin-um tah a Ama a dia dingdet zaw dingin iMangpa'n ang han zaw hi. iMangpa lung i tuahtheina ding uh steps tamlou en zual vai: 

1. iMangpa ah ginna i nei chouh hilou in, silbangkim ah Ama ah muang vai tua di'n iMangpa'n ang dei hi (v.3,5). Silbangkim ah iMangpa i muang ngam tahtah na diai?

2. I hinkhua a i siltuah zousia enpha lei, automatic a kipahna in azui pei siltuah a um a, theisiam hahsa leh thua hahsa isat siltuah zong a um hi. Hinanleh iMangpa'n i siltuah zousia ei a ding a hoi penpen, theipumpum leh deisahna toh ang tuahsah ana hi zaw hi (Phil.1:29). Tuaziahin i siltuah zousia tungtawn a kipahthu geenthei zaw dingin iMangpa'n ang haan hi. Aziahpen, i tung a iMangpa khoheidan zousia kipahtah a pomthei mite tung ah iMangpa akipaah a, tuabang mite lunggul silte khu iMangpa deidan ahitaah ziahin iMangpa'n a lunggul silte uleh adei silte uh ape leng hi (v.4 cf Ps20:4). iMangpa'n deisahtah a sil ang tuahsah zousiah kipaahtah leh lungkimtah in ipomchiat thei na diai? silpoimaw lah ahi ngaal a.

3. I kalsuan dingdan, i khohei dingdan zousiate Mangpa theisah vai tuahileh Ama'n hing lawchingsah ding ahi chi'n muangpou lei, Ama'n i vai zousiah a bawl siang ding hi: Ama hatna toh i zou ding uhi (v.5 cf. Exodus 14:14). (tam in agennop ahi leh i kalsuan dingdan zousia iMangpa theisah lei Ama'n i kalsuanna zousia ang zawsah ding hi). iKalsuanna zousiah ah iMangpa itheisah, ithudot zou gige na di uai? Ama deidandan a khohei di'n na man tai?

4. Tambang kalsuan hun sung in genthei-hahsat, losap-vangsiat leh lungkiat tampi tuah nanlei dai dide pum in, Mangpa'n vai a hawm zing a, silhoilou bawlmite a suhmangthai hun hing tung ding a, tualeh Ama giingmite a dopsang hun hing tung ding ahi chia muangtah a iMangpa timing ngaahzou ding in iMangpa'n deithawtah in ang chial hi (v7). silbangkim ituah in zong dai dide pum a, phunnoilou a Mangpa ngaahzou di'n na man tai? na ki singsah tai? mihingte lampi leh Pasian lampi akibatlou dungzui in, Pasian timing atuam a, ngaah zaw apoimaw hi.

Thamlou in tambang hunsung in (iMangpa timing i ngaah sung un) lunglelna, lungkiatna, burn-out (thuahzounonlou) baan ah dihloutah a kalsuan hinanleh lamzang bang a kilangte enna (evny) zong kituahthei ahiziah in, tambang silhoilou a puilut ihilouna ding un tambang hun hahsa kawmkaal ah lungthahlou leh thangpailou sawm hamham ding in iMangpa'n ei thumop hi (v8). Aziahpen tambang gaaldouna ah thuahzawhna apoimaw mama ziahin lungthahna leh thangpaina neipum in tambang gaaldouna aki zouthei sih hi.

I Mangpa'n v.9 ah tambangin agen hi: "migiloute sattan in a um ding ua, hinanleh Mangpa ngaahte'n gam a lua ding uhi" achi hi. Tuaziahin lungniang tah a sip dide pum a Mangpa vaihawmna pomthei ding leh ngaahzou dingin gingtute iMangpa'n tuni'n ang haan hi. Aziahpen, Mangpa thudonlou mite suhmangthai ni a tung ngeingei ding a ang tungpei ding hi. Tuamabangin Mangpa muang a ngaahzou mite suun nisa vaahlai bang in iMangpa'n a tawisang ni zong a tungpaita ding hi. Tuaziahin Mangpa vaihawm hun ding ithei sih a, Mangpa timing ah hing tung ding ahiziahin ngaahzou ding in Mangpa'n ei haan hi.

Tuaziahin dihloutah a kalsuante akalsuan uh alamzang bang nanleh suhmangthai ahi ding ua, hinanleh Pasian muang a, dihtat tah a kalsuan mite pen a silhoi bawlte uh simtham hisihnanleh iMangpa'n kumtawn dai goumanpha a suahsah ding hi. Na hinkhua a na bawldoh zousia thupilou leh simthamlou hinanleh a pom dingpa Pasian in thupi tah a angpomsah leh a thupi penpen leh aloupi penpen ahi mai hi. iMangpa'n thupitah in ang pomsah na diai chi khu i namtatna zousia ah kidong gige vai.

Simtu zousia Mangpa'n i tanchiat ua dingin mal hing sawmsahta hen.