I Mangpa Pasian a muangte khu mi hampha penpente ahi uhi
WAY2GOD
Leitung pilna leh siamnate ka et vengveng chiangin, mihingte khutsuah hi
ding a zong gintat huailou khophial a thupi tamtah muthei in a um hi.
Mihingte hinna susethei chuh a um thamtham a, hinanleh mihingte hinna hoisah
leh sina pat hinna pethei a um sih hi. Hinanleh iMangpa Jesu'n a sisa
Lazarus khu a hing sah kia hi - Johan 11. Amen!
Tamnah, Lazarus tung a siltung tungtawn in
iMangpa Pasian a muangte khu mi hampha penpen te ahi uh
chi kikum zual vai. Tam article na sim toh kiton in iMangpa'n na hagau hinkhua
hing henglamdang in halthahna hing tunta hen.
America mi laphuah siam, lasah siam, music siam, chiamnui siam,
Aaron Wilburn kichipa tanchin
khu zanni'n ka sim a thupi mama kasa hi. Leitung pumpi a Pasian la minthang
tahtah te khu bangza amaw khat ama lagelte ana hipha hi. Tuate lah ah
Karen Peck in asah 'Four Days Late' khu bangchi dan a ang
phuahkhiat adiai chi kikum zual vai.
Wilburn pen damlouhna ziahin kaalthum lam (almost a month) hospital ah etkol
in a um a, damlam a manaw tuanlou ziahin Doctorte zong a beidong simpanta uhi.
Tuachi'n ama zong achimaw simta mama mai a, zingkaal khat 3AM ding vel in
Johan bung 11 mun sim in Pasian ana buanpanta hi.
(Johan 11 pen iMangpa'n Lazarus a kaithawna ahi )
Tam Johan 11 asimna ah khun Lazarus sizou hinnaleh iMangpa Jesu'n Lazarus haankhuuh apat
hankhia in damsah veve hi chi amu tahin, iMangpa Jesu a ding in bawlmaw bangma
um sih, tuathamlou in bangma akikhel zong a um sih chi a
mukhia a, tuachi'n Mangpa ah a muanngamnate ngaah in 'Four Days Late' chi lah
ang siamdohta hi. Tualeh ama zong hunsotlou in atahsa damlouna apat ang
damkheta hi.
Four Days Late
Lazarus pen si nailou hileh Jesu'n sudam thei kha va chi a gingta ua,
hinanleh tun vang a sizouta a akikhel ahita thamlou in nili (4days) zen a
kikhel ahita achi na zong ahi. Alelam khat ah mihingte theidan in misi khu a
ni 3/4 ni apat amuat panta hi.
Tam in agennop pen ahi leh, Lazarus pen asi ahita a akikheel ahita hi. Thamlou in nili (four days) aliamta a, zong atahsa muat man bawnta va achinopna ahi.
Wilburn in alaphuah 'Four Days Late' khu Karen Peck a sahkhiatsah chouh hilou
in zong a record sahta hi. Pasian malsawmna tangin alaphuah zong tutan in
Mangpa'n naahtah in zang a, ngaichim malah ah tamveipi ngaita nanlei zong i
ngaikhaah teng in ichimul thouden hi. Na ngaikha ngei nailou leh ana ngai in ki
ngaichim theilou hi.
Concert te leh mun tuamtuam a Pasian min a kipawlkhawmna munte ah mite'n 'Four
Days Late' sa ding in chial zel ua, a sahmun mamata ziahin mite'n
Four Days Late la khu nasa chimtai? chi'n adong uhi. Peck in adawnna
ah, "Jesu toh kaki maituah dongin kasa chim sih ding hi" chi'n
adawng hi.
Tuni'n nang-le-kei tahsa a hing ihi ziahin lungkia, thachau, baahsam leh
kingaisiatna hinkhua zatkha abaisam mama mai hi. Pasian thunatongte, Upate,
Pastorte, Missionaryte, Nu Pawl, Khanglai Pawl lamkai leh Hattuam mapuite haat
den ding in bang i ngaituah kha maithei uhi. Hilou ahi, koima ahat i um sih
uhi. Tamna 'Four Days Late' laphuah pa mama zong chimaw leh beidong pum a
hospital a hinkhua azat lai a Pasian muang pum a pan alaah ziah a tambang lahoi
iMangpa'n ama tungtawn a eite ang piah ahizaw hi.
Lungkham leh ngui in na umkha ei? hahsatna liantah nei zong na hi kha maithei
hi (na hahsatna mi'n hing theipilou maithei nalai hi). Ngai vawi sangam aw, I
hahsatna lian penpen sangin zong iMangpa alianzaw hi. I hahsatna te Mangpa
tung ah sepkhe vai (Mangpa ah kingamta vai in ama deidan chouh ah hing tavai
china ahi). Leitung a sil thupi tahtah, mihing bawl hi sih leh kilawm chiphial
ding a lamdang isatte bawlkhia mihingte'n asisa hinsah kiahna tungtang ah bangma thuneina nei sih uhi. Hinanleh iMangpa'n asisate tung ah hinna apethei hi. Tambang thupinate baan ah akikheelsa zong akikheellou a bawlthei pa khu koidang hilou in iMangpa Jesu bou ahi.
Tuni'n iMangpa thupina theisiam apoimaw a, athupina gingta a muang ngam dingin
iMangpa'n ang ngaah zing hi. Hahsatna liantah nei zong ihi maithei a,
tuateziah a hoikiah thei nonlou ding leh Pasian maipha tangzou nonlou ding a kikoikha
zong ihi maithei uhi. Ngai vawi unau, a kikheelsa zong akikheel nailou a bawltheipa Pasian inei uhi. Amen! iMangpa'n Ama muangpum a, ihoilounate kisiahna toh zuan ngam mi khu
pomtaah ginna nei in asim a, aangpom ding leh ngaidam ding leh i sianthoulouna zousiate hing sawpsiang piah ding in gin umtah in iMangpa'n ang ngaah
zing hi.
Kisiahnatoh, Mangpa muang pum a, hinkhothah pan ding lam etna toh Mangpa zuan
zousiate iMangpa'n athupha hing musah chiatta hen. Amen!
No comments