Gingtu Hinkhua

GINGTU HINKHUA

GINGTU HINKHUA

Rev. L. Mangminlun

Ajiahchu Pathian deihjawng na bawlzoh chiang va, thuchiam chu na muh theihna diing un na  kuhkal uh a ngai hi: "Ajiahchu tomkhat zohchiangin a hung diingpa chu a hung diing a, sawt ahal nawn sih diing hi. Huchiin midihtat chu ginna in a hing diing, hizongleh anungtolh chu ka lungsim in amah ah kipaahna a neihsih diing hi. Hizongleh ei uh chu mangthaai diing a nungtolh haw laha mi ihi sih va, hizongleh hinna huumbit diinga haw lah a mi i hi zaw uhi." (Hebrew 10:36-39)

Awle, i thupi diingun GINGTU HINKHUA chi'n ka hung teeldoh hi. Gingtu chih thumal chu soifiah ngailou in i theihchiat sa uh ahi. Gingtu chih chu Piangthah khat soina'n zong azattheih diing hi. Gingtute'n chu Jesu Khrist a Pathian diing un a gingta va, Amah gingtute diing a mun siamsa "Vaangam" leh Amah gingta uutloute umna mun diing a asiam "gawtmun" a um ngei ahi chih zong a gingta boh uhi. Hichin gingtu vaangam luut diing te'n bawl ding leh bawllouh diing tampi a kineih hi. Lampi sautah asuh leh atou juih diing a um hi. 

Khanglian Diing I Hi:
Khanglian diing in chu i piang masat phot uh angai hi. Huchin ann hoihtah tah: Bible simte, Haamteinate leh Pathian thu ngaikhiaahte khuh i bawl diing uh ahi. I kikhopna mun va hi Bible sim, haamteina leh Pathian thu ngaikhiat te a kim veh hi. Himahleh hi kikhopna ah i hun zat daan ringawt chu ahun tawh sih hi. Spurgeon in chu "I hamtei chiangin Pathian kawmah thu i soi a, ginum tah a Bible i sim chiangin Pathianin in i komvah thu a sawi a; hujiahin Pathian ahamtam jo a pang sah apoimoh hi" ana chi hi. Hujiahin hamtei tam sang in Bible simtam khu Spurgeon in poimoh asa zaw hi. Haamteina chu gingtu thasephaahtawp in zong jingthawh, lupkuan annneeh leh kikhopnate ah a bawlthei a, himahleh Bible chu atum tahtah louhte diingin mawh sim theih ahi sih hi. I Bible simdan suut talei, Pathian in i kawmvah thu a soitam hi gingtaat ahuai khol sih hi. Pathian in i kawmvah thu a soitam theih naangin, huntamzaw petheilei chu: Amah (Lalpa) kawmah zong soi diing i theitam zaw deuh diing uhi. Changkhat toh kumkaai tum gingtu i hih un chu khanglian theilou naungeeh ahingtu nu leh pa te a diing a puaahgih tuntu giap i hi diing uhi. Haamteina taihsan diaahlou a, Bible simtam poimoh daan i theih thah uh apoimawh khop mai hi. 

Haamteina Hinkhua:
Bangchih laipouh in zong haamteina a poimoh zing hi. Pathian gingtu piching khat diingin chu "ka haamtei man sih" achi ringot theih sih hi. Khoimun ah zong, bang hun ah zong haamteina nelhsiahlou a neihzing khu apoimawh hi. Jingkaaltha a Amah khuta kituhluut leh nitaah a kipaahthu geen leh paahtawina piaah alou theilou a koih a hoih hi. Eimah lawhna diing chauh a haamtei khu tawpsan diing ahi. Na nna tohna mun khu na hamtheina mun hi henla, huchi'n na nnasep diing a ki muanna leh hangsanna huleh thanopna thathah ahung guan diing hi. Haamteina mah pibawl ni u awle!

Hahkatna Hinkhua:
Hahkatna khu Lal Jesu'n a ngai poimawh mahmah a, hun nununglam ah hahsatna chinteng hung tung hun ah hahkat tah a pang diing in ahung deihsah hi. Tanchinhoih Luke 21:19 ah "Na thuaah mualsuah zohna un na hinna uh na huumbit diing uh" achi hi. Pathian in hutdamna tang diingin hahkat tah a atawp tanpha thuaah mualsuah diing in ahung deih hi. Hahsatna a let photleh a zoutu a pang a thupi deuhdeuh a, ki paahna zong a lianjaw deuhdeuh hi. Job tanchin i thei chiat uhi. A hausatna vang chauh a fel leh hoih diingin Setan in a gingta hi. Huchi'n Pathian in Setan mangin a beihta a, atate tengteng a beimang a, a gangual tamtah leh a suaah numei leh pasal tengteng zong, a inn leh loute leh a neih a lamte tengteng ataan siangveh boh hi. Hitamahleh, Pathian ah ginum leh hahkattah a atawptan a thuah mualsuaah jiahin a damlai ni ngeei in a hauhsatna a masa a sang a nasa jaw Pasian in a pekiit veh hi.

Pathian thei leh lau kawm a kuhkaltah leh hahkattah a i thuaah leh tu damlai ni ngeei in Pathian hoihna alehtampi'n i mu kiit ngeeingeei diing uhi .

Lungkimna Hinkhua:
Khovel a mi hinkhua eenhuai peenpeen te chu "bangkim a lungkim thei jeel mai mite" ahi ngeei diing uhi. Mi'n Khrist hinkhua a kikoppih theih tahchiangun lungkimtheihna hinkhua ahung neih uhi. Khrist gingtute'n lungtngaihna a tuah chiang un zong "Lal Jesu toh bangkim a loupi, lungngaih tuikinawh kaal ah zong" chi'n Lalpa a phatthei uhi. Pathian in gingtute hi lungngaihnate, hahsat mangbatnate tuaahlou diing in ahung siam sih a, amite/ata deihtahte etkhiahna'n a mang zaw veu hi. Nidang lai in mikhat Pathian gingtu Pathian nikhat khual a zin a, Bible, Bati (candle) leh aatal akhualzinna ah a keng hi. Zaan ah bati ade a, Bible a sim a, zingkaal chiangin a aahtal in a phawng veu hi. Zaan khat chu khota khat ah a vaah luut a, amah a zintun thei naang un a hehpihna uh a va ngeen hi. Koima'n ana zintun uutsih va, haamsia chinteng lohkhum in a na nual jeel uhi. 

Hu Pathianmi pa'n, "Pathian lungsiatna leh dih na'n sil ahoihzawng in apaipih jeel hi," chikawm in daai geilam ajuanta hi.Singbuh nuai beelin ummun a siamta a, a aahtal chu a kawm naih singkung ah atou sah a, Pathian kawmah kipaahthu soi kawm in bati a de vaah a, huchiin a Bible puaah chu a sim panta hi. Huih ahung nunga, a bati chu ahung muutmit sahta daihmai hi. Det kuangkiit na diing zia zaang lah a hita sih hi. Hujiah in imut zaai a leelta mai hi. imupan dehdeh khua ahung mial panta a, khua ahung mial phetin sangaah in a aahtaal ahung lasah kiit hi. Himahleh, "Pathian lungsiatna leh dihnan sil ahoih jawng in apaipih jeel hi," chi'n a ihmut santa hi.

Jingkhua ahung vaah in a thou a, a Bible pom kawmin a tung a hehpihna musah uutloute khua ah ava chiah kiit hi. Zaankaal in misualte'n a khua uh ana luh va, mi amuh tengteng uh chu a that beiveh va, a khua uh zong a haaltum nalai uhi. Pathian mipa'n chu, 'khomite'n a tungah zahngaina ana langsah uleh amah uhte toh a gualin si khawm diing ahih dan leh, a thaumei mitlou in vaah henla, a aahtal zong sangaah in va guuhsahlou in khuangta leh, misualte'n amah zong that khawm diing ahihdan athei in "Pathian lungsiatna leh dih na'n sil a hoi jawngin a paipi jeel hi," chi'n khovaah nuaiah a Bible sim in Pathian kawmah kipathu a soita hi. Hitobang deuhin mite'n iki nep bang un i tungva sil abawl lou maithei uh. hizongleh, hih taangthu tobang a i tungva siltung zousiah Pathian lemguat ahi chih pomsiam lei ei diing a hoihzaw Pathian in ang guatkhol zong ahithei hi. 

Kingaihngiamna Hinkhua: 
Hun bangchih lai a maw in Titanic longlian tanchin a soi veu uh ka thei hi. Tu'n chu a film enlou zong a kitawmta mai thei hi. Khovel mipilte'n  setheilou tobang a, a ngaih uh ahi a, Loupi! nasa! Ngaihsang huai! Mah! Lamdang! Setheilou! Tumtheilou chih ahi. Southampton apat akipatdoh ding un zong, Albert Calwell in longpi sunga luut kawmin captain pa kawm,ah "na lawngpi uh atum thei tahtah sih ding maw?" chin adong malam hi. Hipan chu "Madam, Pathian ngeei in zong a tummangsah thei sih diing hi" chin adawng hi. Huchin England apatin New York lam juanin a kipandohta uhi. Atlantic tuisuahgiat ah April ni 15, 1912 zaan in Pathian inzong a suhtum zohlou diing longpilian chu vuuhkhal a phuut khaah jiahin tuipi nuai ah a tumta! chih i thei uhi. 

Chapouna leh kiletsahna jiahin i mava siatna i tuah ding, mimal, innsung, kouhtuam, pawlpi leh i nam in buaipihlou jiahun mun tamtah i longpilian uh chu a tumta duaiduai mai hi! Siatna tunthei leh tun zou diing a zong i gintaatlouh kichapouhsahna vangin mitamtah in beimang loh uhi. Ei mihing pilna leh heetna'n atawp ahung tunzou diah sih diing chih i thei uh a kiphamoh hi. Hujah in kiletsahna, ki chapounsahna, kipilsahna, dih kisahna, hoih leh fel kisahna, mite muhsitna leh nuaisiahna, simmohna, kideihkhopna, puante i suut khiatva, KINGAIHNGIAMNA  puaan a, iki thuam va Pathian nna i sep uh a poimawh hi. A tawpnapen ah, gingtu hinkhua kal i suannna vah, hehpihna a khanglian jeel a, Amah pawlna hinkhua toh, hahkattah  a, a nung i zuih va, sil bangkim i tuah taphot uh a lemguatna bang a, i ngaih va, i mihing lungsim uh kiletsahna paihkhia a, KINGAIHNGAIMNA HINKHUA toh ginumtah a, a nung ijuih jeel theih na ddin un, Lalpa'n simtu zousiah hung vangpiaah ta hen. Amen!











No comments

Powered by Blogger.