Sensitivity to the needs of our Pastors
Sensitivity to the needs of our Pastors
Devotional # 41 ( vol 3)
Fellowship of Thirsty Souls and Hungry Hearts
Thirsty souls simtute jousie Shalom leh Topa Thupha!
Tulai Zoom meeting buai a ka buai leh, ka tate test niteng phial anei uleh tou hiithiat a message gel ding dan um thei lou hi. Tension ngen in ki dim hi. Ahiin tu ha bei kuan thil tampi jouta ka hi chiangIN ki tawl dam kawm leh ka boldoh te lopna in message gel vai. Message gel pen kei ading in Ann tui tah huan toh kibang a hi.
Tuni Shillong guah zu a, lung hel huai jawjen hi.
Tuni Topic: Sensitivity to the needs of our Pastors
Sawtpi apat ka lungsim a um I gam a ka pastor pite thakheel in thu gen ka ut hi. Koima maw sahna leh awimawna ahi sih a hinanleh I gam a pastor family te buaina leh tahsapna i sensitive deu ding uh poimaw kasa hi.
Tuni khu June 29 ahi ta a, I gam a *Pastor 90% ten May halaw kem non lou ding uhi. A tawmjaw in June halaw advance a la zong hita ding uhi. A law lah ni khu a sum bei ni hi jel ding hi. Ha ang thah leh sum bat kipat zong ngai mai thei ta ding hi. Advance a la thei lou hattuam a sem ten sum tampi ba man ta ding uhi. Ann tang dawr, Amul Taza dawr, chini dawr te ah abat uh dim ta ding hi. Jing leh thai ah law hing la uleh atamjaw Bihari pa kung ah lut kia ta ding hi.
Pension te vang ahi leh a law lah ding uleh junhum damdawi man kituah chet ding hi. A val neu khat in a tute nehthei lei sah jou hamham mai thei uhi avang phat uleh.
Ahiin vangphat huai tah in pastor khenkhat hattuam lian leh kichup a sem kha ten vang ha lui law te zong ki khawl kit ket nalai mai thei uhi. Ajangsiam ten.
Pastor sap sap, degree kibang, quality kibang, commitement kibang chiat hinapi anam leh a hattuam sep na ki khaai mah mah hi. I nam leh ih hattuam khang leh khang lou, changkaang leh changkang lou khu i Pastor te ha law, facilty te ah ki muthei mama hi.
Ahiin pastor ten ka thuah lah uleh hamsa kasah pen ukhu halaw tawm leh tuasang a hamsa jaw khat um hi. Tuakhu pastor te ki koih dan attitude hijaw nalai hi.
Nam changkang a semkha te i gensa bang in a commitment thuuh jaw, quality hoijaw chi hisese lou na pi a halaw uh hoi, facillity hoi ban ah mipi jatatna mu nalai uhi.
Kei zong avang pha ka diei a vangsie ka diei pastor ki ngaisaang lou na penpen leh ha law tawm na penpen nam leh hattuam te khat ah kana um kha hi. Adiah in sum leh pai tahsap lam sang in Pastor status (ki koih dan) lam ahi jaw hi ka na thuah la penpen.
Tu lam lam in city te ah hattuam i hing phut sou sou ta ua city lam a semte vang thutuam in koi vai.. a vangpha khat suah ta uhi. Tualeh ZCF te KWS te lah vel a va sem kha pastor te zong a hampha khat in koi vai. Tualeh para church orgn. tuamtuam a semte zong a hampha khat in koi ta vai.
Ahiin i gam a sem, pang vevaw, I Zo gam hun nop leh hun sie a zong pot khelou a pang dette i lungsim ah um hi. Khenkhat potthei ding hinapi potsawmlou ( eg Dr Kh. Khaizakham). Ahiin atamjaw te pot doh na ding zong lampi um kaan loute ahi uhi.
Tunia mipite kung a ka gen ut khu i Zogam tuipaan kai ichi chi uh aning a kawi a tuan leh phang pen te khu I pastor te ahi uhi. Dr ten va gal vil thei ua, nurse te, teacher ten mi a thakhel in mi koi thei ua, pastor ten ki koi thei lou hi. Bialtu MLA , agam jieh a Imphal a din mun lianpi tu leh inn thupi a teng ten khua 50 lah ah khua 5 bang a term sung in apha ding ua, tua te zong Chief guest ding leh SIAL sa toh ana ki vai dawn ding uhi. I nam ngaina leader te leh Student ten buaisietna hun chiang kum tampi hal in khatvei bang va tuan ding ua, tua zong media ah atawtna sang un thupi tahin ki tahlang ding uhi.
Hibang kal ah i pastor te Singtaang dawn, gari tun louna ah zong a va veh mai hilou in ateen in va teen thaw uhi: Pastor te khu village doctor, nurse , teacher leh social worker va suah uhi. Pastor nau suahsah ka thei um hi.
Pastor van tang khat in term khat sung maimai a a khua tot khah teng i gam ngaina leh it kichi a met a met pi lamkai kichi ten a damsung un a tuan jou ding ve aw chii ka challenge ngam hi. ZNC hunlai in pu Thangkhangin Ngaihte in vang ana tuan mah e. Tualeh Election hun chiang in vang ki tuan sousou mah e. Ahiin gamsung land mine tam lai , meitei singnuaimi ten singtang gamteng aluah khum ua, Hausate kibu mang siang, mi chethei teng Imphal leh India khopi lam a ki bu mangsiang-Hibang lai a Zogam a sung ta teng techi lou ju leh va in zong a nutsia lai a nusia theilou a shi leh hinn kal a pangte khu I Pastor law tawm chacha nete ahi uhi.
Ahiin tunia igen sawm khu I gam a Pasian nasemte din mun (plight) i et thah ngai hi. Nidang in khatvei ka geljouta hi. Mizoram te, Nagaland te i chichi ua, en jui sawm lou a, mite felnate gengen mai hun nonlou ahi.
Ahin akipahhuai chuh tu hun in igam a laisiem leh fel mama ten zong pastor nasep khu hing jom panpanta uhi. Ajiehpen govt kham zong hahsa deudeu ta hi. Tualeh pastor te dinmun zong hoi panpan ta hi. Nidang bang hi nonlou hi. Nidang in chuh ahileh pastor na isep leh jawng ding, mi phalou ding, i tate govt school a kai teitei ding, i ji gen thei teitei ding, inu i pa a genthei ban ua genthei toutou ding dan in ana ki ngai sun hi. Jong ahi.
Tulai pen pastor te bawl hoi ding ki tu hun hita, Pastor te bang ka pe thei diai? Pastor te ka bang chi panpi thei diai? Pasian mizatte bang jat vei ann ka ne sah thei diai? Pastor te a tam thei pen a kithum sah kivangbuahsah ding” chite kitu lai ahi ta hi. Ahiin hibang kal ah hattuam leh nam khenkhat 1970s leh 80s lai stage leh mentality toh a pastor te enkawl zong ka thei nalai hi. Tuate vang et mai in zong mi changkang lou te ahi dan ki mu thei ngal hi.
Tulai upa pil, officer upa hagau mi tampi i nei ta ua, pastor te ading in thadam huai mama ta hi. Pastor tawsawn in, thuap ua pastor te tha dawn jaang mama ta uhi. Upa hoi tampi ka mel thei a manpha kasa hi. Ahiin hibang kal ah zong Pastor hattuam tuantual bih, nam leh ham backward bih a um kha ten upa te apat in thuah chi tah in thuah veve uhi. Milah a zong gen ding a jum huai mama upa tampi um veve nalai hi. Pastor te dou chitah a dou, pastor te soisah thei bang a soisah sawm nalai upa zong vangsiet huai tahin um nalai hi.
I gam a pastor sapsap ding in zong avangpha bih um uhi. Tuapen aham leh apau, a hattuam in paw mama hi. Khua khat, veng khat, gam khat sapsap hinapi pastor khat te halaw, facility, ki jatat dan tuam sese in, khat pa a hamsa sese hi. khawkhat, vengkhat, gamkhat sapsap hinapi pastor khat pa a, a halaw , facility leh a mipite, a seppi upate, a LCC te anop in nop a khatpa lah ling leh khau leh tanai bu tuan kha bang sese hi. Tuachidan kibat lou dan pen I soceity et mai a, i nam leh ham leh I hattuam te jil in um hi. Eg “tua namte ahileh tua chi" "Tua bang ham te a pastor uh hichi bawl uh” chi tuh a khenthei in ki um nalaihi.
Officer dept khat a sem khawm sapsap zong khat pa pastor te koi dan leh khat pa et dan sun leh jaan bang hi. Khatpa in pen pastor te jatat ding, hepi ding, a tahsapna pan pi ding : En bawn hasum hijat kikham loua, i pastor pa halaw toh ite leh ei pen Bill Gate kihi mai hi” chi toh a pastor en a, jatat in hepi hi. Ahiin a gei a toupa a lawm pa pen a pastor et dan khu jattuam hi, pastor khu soisah ding, control ding in en hi. Mi kibanglou hi. I gen jel bang in i ham i pau, i khanletna i community in pua hi.
I society uh en vengveng lei Mizoramte, Nagaland te pastor dopsang dan uh copy sawm a pan la zong um a, ahiin a langkhat lam ah khawphou but lou, 1980s lai lungput pua nalai community zong ki um nalai hi. Lamka khua a teng khawm sapsap dingin community nite kizom tinten ahivang in akikal uah kum 50 vel gap um thei nalai hi.
Ahiin tunia igensawm pen khu Koi ten pastor te tahsapna theipih ta ding? Mi khenkhat pastor tetung a ha hiem mama hinapi ama uh inn sung ua pastor khat ang um khah chiangin hing thei khepan uhi. Tunia i pastor te halaw hiin, ki koi dan hiin, a dinmun uh khu i tate khat vei chiang a pastor angpan chiang ua a din mun ding in i deisah diei?
Mi tampi in “pastor ten halaw anei veleh.” kichi hi. Pastor te halaw khu i gensa bang in genda ta vai. A hattuam leh a nam asepna ah kinga hi. Khenkhat ten a ha law tam lou leh zong a mipiten thei siam in a pastor pa uh tasam sahlou in, mualphou sahlou uhi. Khenkhat in ahileh a halaw zong regular lou, a mipiten zong theisiam malah a panpilou toh, soisah thei tawp in soisah na lai uhi.
Hun paisa a pastor ka sepna ah ka in ve na ding cycle neu khat hing lei sah uhi. Nikhat LCC ten thupi tah in commitee ua ka cycle jat dan dihlou leh ka cycle siatsah tung ah action hing lah sawm uhi. Pasal khat in hing panpi lou hileh bang ka suah diei kathei sih hi.
A chang ah I pastor bawl dante pi en veng veng lei Pastor hoi nei taah ina diai? Ahilou leh Pasian in i ki tuahpi pastor hing pia ata diei? chi thei hi.
Miten a pastor pa uh panpi ding ki tu, gift pia ding kitu, a panpi ding aki tu lai un ei te I pastor pa tawlem ding ki tu hilei kilawm hi. I pastor pa i bawl dan khu A NA sem ding a guatpa,thaunu pa, ahing sawlpa, JESU in ama kibawlna in ana sang ta leh bang chiin na ngai diei?
Alang khat ah pastor te zong chijat huai pipi, joker pipi ki um mah e. A ki tuan kawi kawi, pan mun del kawi kawi, law tam na del kawikawi, pension ut lou pawl, Office a tou ut a vote campaign bawl pawl, din mun dei mama a politics bawl pawl, apan mun apat force a police guai a kai khiat ngai phial phial pawl, sum a hiphot leh muan thei mong mong lou pawl, Govt office tung pai pai pawl, business bawl pawl, Singnuaimi te toh ki houthei mama pawl, Mi ji te toh ki guh text text pawl, a flurt a flurt pawl, Numei amu leh ajei a jei pawl, adang a naal anaal pawl, ajuau a juai thei pawl, a houlim chiang a journalist te sang a siam jaw pawl, a kiphat phat pawl, kuvai hai, na jiel tep, ludo kap thei, a chang a peck thei pastor zong um e, network leh marup a kimawl jong um e, hotel a sunni tum a chiah chiah thei pawl, a lung a lungsim neu pawl, akawi a kawi pawl, anuah a nuah bai pawl, a lung a lungtom pawl, numei sie bang a migensie hat pastor leh CNN bang pastor jong um e, pastor tangleen, koi ma toh ki thuah thei lou, ngal khah bang jong um e, pastor hi ngal thu gen thei mong mong lou, thum mi lou nalai, laisim thasie sawn sawn nalai, thu gen kilop mama napi a thugen neh ding um lou, Pasian Hagau in pawl mong mong lou zong um e, Bible thei mama napi a thugen hing mong mong lou jong um kia nalai e. Tualeh pastor chiam nuinui mai, jum maw ja maw zong khawsah lou jong um nalai e, pastor meikhu lian en a, a jawng lamte ngaisah lou zongum e, pastor sum tam na lamlam del a maitam bawl zong um e,…
Ahia igen sa bang a ei lah a sem ding, ha law hiteng law ding, hibang sem ding khu koi te bang i lam et lah? A ki tuah thou veleh… a ma uh hina leh a mipite leh a ha law leh a facility te uh a ki tuah thou hilou? chimai vai.
Aleh tuin a tawp lam tung ta hai. I topic ah lut ta vai in hunsah ta vai.
Paul in Rome bung 15 ah Rome a gingtute kung ah Jerusalem a gingtu kial thuahte ading a panpina angetsah hi. Spiritual Blessing leh Material Blessing toh kisai hibang in gen hi.
Jews ten Gentel te khu Hagau lam gualzawlna pia uhi. Khujieh in Gentel ten jews te kung a Tahsalam gualzawlna a piah ding uh abat uh ahi chidan in gen hi.
Tunia i gen ut khu Hagau lam gualzawlna imu na i pastor te khu en tahsah lam gualzawlna i piah ding khu ibat ahi. Pasian in na pastor pa or pastor te jang in na taten hagau hutdamna mu uhi, or na tate aman hagau ann toh vah hi, lampi dih hil hi. Ahilou leh nang aman hagau ann toh hing vah in na hinkhuo damsah in, jang khai sah hi. Na beidon na chimaw jaan in pastor pa um lou leh bang na suah diei chi thei hi. Ahilou leh pastor te sermon leh laigel te jieh in hagau lam mitvahna tam pi na mu hi.
Hibang a na hagau lam siapa belam pu apat hagau lam phattuam na or blessing tampi na mu bang jel a nang ama tahsap na tahsa lam tahsapna na tuah ding khu na maw puah, na bat ahi. Ha law (tawlop) asang veleh na chi mai thei. Dih ma hi tawlop la ma ahi. Ahiin a tolop lah leh nang expenditure tekah sam in. Hagau lam gualzawlna na munate khu nang tolop piah khah lou zong um tham ding hi.
Ei loi pi abuai huai mama khu pastor pan hagau lam ann a zong ahing vah ding, tahsa lam ann zong ahing piah nalai ding a ki lam en ki bang hi. Pastor mawpuah khu ei tahsap leh ibawl theilou I hagau lam a ahing etkol ding khu ahi. *Alang khat lam ah pastor pa tahsap tahsa lam, sum leh pai khu en i maw puah ding chi ahi. Khujiehin na pastor pa kung lomlom ah sum interest la sin chi ahi. Na pastor pa lomlom kung ah na panpi ngamlou leh zong a met midang a bang in la sin chi ahi. Simple tah a gen in. Na pastor pa lom lom nang metna ding in hemnon sin. Na pastor pa phatna khu advantage in nei sin. Ahilouleh khat vei pastor na panpi jieh in a ki suang la ding khop in um sah sin or hattuam a na dei teng hing genpi hing gum ding in van jat in nei sin. Nang met na ding in na pastor jang sin. Tuasang in panpi da jomai in.
Hia a gen khu en hagau lam gualzawlna i mu na te kung a en tahsalam gualzawlna i pia khu thil ki lom leh Pasian thu hing hildan ahi.
I pastor, eima hattuam pastor te i mualphou sah lou ding, i tuah ding ma ahi. A hin a chang ah i pastor pa, i som a khat ne pa sang in mun dang YouTube amaw leh mundang dang apat in hagau lam gualzawlna i dawn chang tam hi. Mi khenkhat ama pastor a phattuam pi lou pa tung a, a phat a pha in ahivang a hagau lam gualzawlna amuna te ading a bangma bawl sawmlou jong hithei hi.
Nupi khenkhat lah ama pastor ading a ling leh khau bang, bangma blessing hilou khat vei zong a pastor pa ann ne ding a zong chial ngam lou in, ahivang a midang pastor pa ading a bangma itlou, a bung a ki bung zong um jel hi.
Igam ah i du-amna uh a chang ah valsan hi. Rev Sholal khatvei nupi khat in a inn ah han a, lecture dahkal 2 vel bawl khum pi in tua chiin Rs 2 pie hi. Tua jou in “na thumna in hing mang hil sin” chiin vai hah hi. Rev Sholal mi gum chi tah mah: tua pen hithei sih ven. Kang mang hil lou ding leh mang hil thei lou na ding sil lian khat na bawl ngai” chi san hi. Mary in a kum khat law in alei jou hamham thau namtui khu Jesu tung ah bung khia hi. Tuate ahi Gospel ki genna chin himi nu nasep hoi a ki gen jel ding” akichi hi. A kal changin nupi te zong na huaihamna uh uang san hi. Pastor pan nang tate ang mang hil lou ding bang na bawl sah lawmlawm a? Ann khatvei neh sah jieh a tua tantan na demand leh huaiham vai seng hilou? Tua sang in "Pastor pu aw kipah ing, Kang thum pi jel ding aw” chi le chin Pastor pan hing mang hil lou jaw ding hi.
A chang in pastor ten ama tate zong ki thumpi jou lou, a ma tanaute zong thei pha lou phial phial hi. Tuachi bang lai a mi ta teng va mang hil lou ding pen juau ahi. Ahiin Rev Sholal dan a sum du jieh hilouin sum pia tam te mai thum pi ding china hilou in Paul gen danin i pastor ten hagau lam gualzawl na ahing piah leh en tahsa lam guazawlna i piah pen FAIR mama hi. Ka naupa, ka loipa Pastor Seiboi Touthang in tuma deu in ta nei ua hinanleh a whatsapp propic ah ata lim hing tuang sah va ka chi leh Hattuam Bang Board te ekhat toh a group photo uh umsah nalai hi. Ka gen leh ka khel man sih chi hi. Jong ka siam sih chi hi. Hibang ahi pastor te din mun. Pastor ama ta ngeh lim zong a propic a koi man lou pan nang khat vei ann neh sah jieh a ahing mang hil lou ding pen thil val san ahi. Selfish vai ahi. Khusangin pastor ka bawl thei sun kang thumpi hi chilei ei tate Pasian in pastor pa thum pi lou in zong ana kem jaw ding hi. Midang ten ang thumpi sang in midangte thumpi lei Pasian in ei tahsap te hing tua zaw ding hi. Job in alomte ading in a thumsah chiang a gualzawlna teng a le ni in hing kile kia hi.
Ahiin mahni pastor mai phung vuh vuh ding in midang te kung a hagau ann va neh neh ding zong lungsimsiet vai hi. Ei pastor pan i jar teng jou ding in en mi pastor te jar teng jou ding khu fair lou hi.
Tualeh Paul in alai hah nate a kamteng jat “Service to the saints” “ministering to the saints” “Service to God’s people” chi jang tam mama hi. Hattuam masa ten misiangthoute, Pasian mite tahsapna kithuapi, khu ministry thupi tah in ngai uhi.
Adiahin tulai bang YouTube ah Pasian thu gen hoi pipi ingai ua tua ten I hattuam ua i neh khalou uh hagau lam ann tui tah tah toh hing vah uhi. Example in gen talei Rev Dr Kh. Khaizakham YouTube sermon apat in mi a sang a sim ten hagau lam ann mu uhi. Tua ana ngaikhie te khu India leh khawvel mun tuam tuam apat ahi. Ahin pa Kham in tua bang sermon ang gen doh na ding in hun bang jat, tha bang jat a pe diei? Hibang a i phattuam dan uh i gengen lai un khat leh ni beh in Pa Kham khu pension thamtham ta. A penson sum khu a tawm a tawm ahilam ingai tua kha uai? Pa Kham ading gen sah ka hi sih. Miin a retired nung azong ei hagau ann toh hing vah thei thei nalai ahileh eiten khat vei beh tahsalam a gualzawl ding lam ngaituana khat leh ni beh um kha lou i hi di ve aw ka chi ahi jaw. (Pa Kham khu ka maingap man a example a kanei ahi. A hing ngaisiem ka lam en hi)
Eite pen i du-am dan uh. A sermon i phattuam jieh a kipah thugen mai hilou a “ka tate na thumna ah hing manghil sih aw” chi a mawpuahna ki pia sawnsawn nalai hi. Miin gim tah a hagau lam ann tui tah toh ang vah zong kipah thugen a “ka bawlthei sun hing thum pi vang e” ahilou leh khatvei beh Sermon bawl a gim tah a na um jou chia a dawn ding Shark bom khat man ding thot vang chi sang a “hing manghil sin aw na thumna a..” va chi sawnsawn khu du-am huai hi.
Nikum lai in ka mobile lui seng jiehin ka message gel buai a, thumpi ding a ka phuan mai mai leh mi 3 in na account no. hing thot in chiin hing ngen uhi. Hinanleh khat beh ka pe sih hi. Ka ki suang la seng hi. Ahiin tuate khu ka hattuam mi khat zong umlou hi. Thupi ka sa hi. Pasian in koikoi e chi katheilou vang in a gualzawl mama ta ding hi.
Tunin I hattuam pastor te ngaisah lou ding hilou hi. Ahin hagau ann hing pie gim tah a pang i hattuam pualam a pastor te leh a tasam mama a ithei Pasian nasem ei hattuam leh i ham pulam te ngaisah lou king keng a um pen “Pasian inn kuan te” in i et dan neu seng hilou maw?
Himi ka gel laiin nupi khat ka hattuam mi himalah a, ka sermon leh ka laigel khatvei zong sim kha lou, kei apat bangma hagau lam a phattuampi umlou ( ka thum pi chi lou) in gift ka hing thot a, ka pasal business kum kit chiang a khawl ta ding ahi man in kum kit a kang gift ding taang zong ka hing thot khawm hi chi tajen hi. Aw kei hileng kum kit a ka nasepna a khawlleh a thot thei lou ka himai a. Koi man bang ma gen theilou ding hi. Kumkit chiang a ang thot thei nonlou ding tantan thakheel in hing thot sawm hi ta jen hi.
Tunin na pastor nou hattuam a ang bial sung in bang jat vei ann na nesah ei? Bang jat vei a guhin singpi dawnna or bahara ding a sakhau ah na guan sah ei? Bang jat vei na pastor pa surprise in a bank ah sum na thun sah ei? Bang jat vei na pastor te sa seel na khai lut sah ei? bang jat vei haichi thah, me thah, thei ga thah, na pastor tan vou ding in na siit ei? Bang jat vei na pastor maitam thumna sese lou in gift na pia ei? Bang jat vei na pastor te ading dress na lei sah ei? Bang jat vei na pastor pa tate school fee ha khat ading beh na piah sah kha ei? Koikoi in na pastor pa mobile lui dem sahsah sang in athah na gift kha ta uai? Koikoi in na pastor te inn kuan restaurant ah na pui ta uai? Koikoi in na tate scholarship la kipahpina in atuam mongmong in gift na peta uai? Koikoi in na kham mu niin or promotion mu ni or pension mu ni in na pastor te family vang na buahta uai? Aman kumtung tawn a ahing vang buah ahi lam na ngaitua in. Tukum in Delhi a ka hattuam pi lou khat in ka pasal pension ahita a kou inn kuan min in restaurant ana pai un chiin sum angthot a ka tate kipah dandan uh chuh aw!
Tulai chuh a changkaang ngalngal changkaang dan chuh Pasian nasep te gualzawl leng Pasian in hing gualzawl ding chi hoi tah a thei uh mai hilou in Pasian tung a akipahna uh sangseng sengin pastor te tung ah thuh kia uhi. I gam a pastorte mimal a Gari, scooter leisah inn mun pia chi zong um ta hi. Hibang kal ah a backward ngalte lah gen ding bei in backward uhi. Koi gari ki leisah, inn mun kipia lamlam thutuam hileh . Kum 3 sung a, a pastor pa khatvei zong ann nehpi khalou tuh a ngawl leh changkang lou hattuam mial zong um nalai hi.
Pasian in a suahpa chinglou leh tasam ahing koi jieh khu nang ahing muan jieh ahi. Pasian Van leh lei Pasian in a suah Pastor te family sum leh pai toh a gualzawllou hi. Ajiehpen nang tungtawn in gualzawl sawm jaw hi. Khujieh in Pasian in nang nei leh gou toh hing gualzawl ahi jaw. Ama direct in gualzawl leh nang sep ding umlou ding hi. Ahilou leh nang ahing gualzawl ngailou ding hi. Khujieh in tu in nang thupi tahin hing gualzawl jaw hi. Ajiehpen nang nasep nading privilege hamphatna hing pe-ut hi.
Pasian nasemte na gualzawl zaza in Pasian tung a kipah dan na thei leh thei lou kilang ding hi. Tualeh anasemte na hopsawn jil in Pasian gualzawlna na kep tam sem ding leh keplou ding ki nga ding hi.
Ka neu lai in singtang ka inn uah pastor te hing lambang jing ua ka nu leh ka pa in gamla pi apat tui va dom in tuilum toh kisil sah jel uhi. Pastor te ang pai chiang ka kipah uhi ajieh pen ahsa me ki me ding hi. Tuami ga in tunin ka inn sung uah pastor 2 ka um uhi.
Tulai ka church youth Zoom Bible Study a ka text book uh “Heroes of the BIble” geltu Sara K Chandrakumar in gingtute thilpiah dan chi 3 gen a tuate lah a khat khu SugarCane giver chi hi . Tua umjie khu Sugarcane khu atui hing pot na ding in atahtah khu heh guai ngeingei angai hi. Tua zong machine lou a hamsa ahi. Na pastor te Pasian in na etkol ding ahing koisah te kung a na kipah na etsahna na bawl ding chiang in Kawltu tah bang lawm lawm a heh guai ngai sin chi ahi. A dang khat ahileh Honey Comb ahi. Khuaiphaang apat in ahileh vang khuaizu a luang in luankhiah thaw hi. Tuabang dingdan ihi.
Pastor te panpi ding in sum nei hun, sum val hun na ngah leh Pasian in tua hun hing tung sah ngei lou ding hi. Midang ana jang manding hi. A nei te pia ding hilou in a kiphal te piah ding ahijaw hi. Nei dan dan a I piah Pasianin ahing phut hi.
A tahtahin Pasian nasem te i vapiah khu ei leh ei kipia ihi jaw hi. Pasian in Elizah khu Zarephah meithai nu kung a, ava sawl khu Elizah in ann neh nading mu nonlou hilou in Meithai nu leh atapa gilkial a shi ding kisa khu va hun khia ding a sawl hijaw hi. Khuna ding a Meithai nu test a pass ngai hi. Tua khu aneiteng khu GINNA jieh a Pasian jawlnei pa apiah siang ngai hi.
Ka hinkhua a ka thei khat khu Pasian in thil lianpi ahing piahsawm chiang kei apat NGET khat hing nei jel hi? Abraham jong Pasian ama leh ama kipie ut in, tua bang dawngtaah ahi leh ahilou proof nading in a itpen atapa Isaac ngen masa hi.
Tuni'n Pasian sum kemsiam hattuamte, Pastor jatat leh ngaina, hoi bawl inkuante ihi ei? I hileh aman a Pastor tasam chacha jong, ei kung ah hingsawl ding a, atawp chiang in ei a tate apat in a thaunu siampi hoi tah hing piang sah ding hi.
Tunin pastor khat leh ni jummaw, maivunsa, guitamhat, sum ngen ngen um nanleh pastor tamjaw khu a guh a thuah, genlou a thuah ahi uhi. Thugen ding a kuan a bahara nei lou, inkuante nutsia ding ann tang umlou, hospital a operation ding a lutta sum um nailou, tate school admit hun hita sum umlou, Christmas ni tung ding hita sum tuah ding um nailou, taten mi tate neh leh ki mawl na dei gaw va chia mi inte a puilou chite ahi. Tuate tua ding leh supply ding in Pasian a misiangthou te lai ah mi nei jou leh haute umsah hi. Ahiin a buai huai khu ama uh SENSITIViTY tasam nalai uhi.
Pastor te tahsapna sensitive thei te lah a sem kha pastor chu a ham pha mawngmawng ahita. Ahin hibang a SENSITIVITY tasam mai hilou a NEILOU te hattuam leh mipite lah a semkha pastor te vangsie bihlou hi. Ajieh pen ana asep JEHOVAH Pasian in panpi na khoi tah e khat apat in hing tung sah van ahiin avangsie dingkhu a mipite ahi. Pasian hun lem chang pia taankha suah ding ahita uhi.
I gen tamta a, a gente theisiam mama ta va ui maw! Kei ading gen ka hi sih a ka pastor pi te ading a gen ka hi. Mangpa’n i Pastor te tahsap toh kisai a mitmial, bilbing nonlou a SENSITIVE thei ding in i mit uh hing vah sah ta hen!
Hibang a Pasian nasem te tahsapna AWNG HUH thei e Pasian in Van Hausahna teng toh vuh dim ta hen. (Himi msg sau hibang sim suah jou te Mangpan gualzawl ta hen aw!)
Topa Thupha Shalom
No comments