Innsung A Kingaihdamna

Innsung A Kingaihdamna

Innsung A Kingaihdamna
Pastor T. Tunthianmang

“Kuapeuh in kua’ tung ah leng thubuai nei hile uchin, kithuakzou chiat in, kingaidam tuah unla, Toupa’n a hon ngaihdam tak bang in kingaidam tuah chiat un” (Kol. 3:13).

Hipi ziaka hinkhua haksa leh lemloutak a hun zang himahlehang June kha tan a Pathian in hon pikai ziakin kipahhuai I sa a Amah min phat in simtute tengteng Nipini Chibai ka hon buk hi!!

Tukha Saptuam’ thupi “Innsung a Kingaihdamna” chih ahihbang in, tuzing in Innsung a kingaihdamna poimoh ahihna tamlou in gen lehang ka chi hi. Bangziak a innsung a kingaihdamna poimoh ahia? Ngaihdamna kichi himhim khelhna toh kisai ahihman in Innsung ah leng tuamah ahi hi-khelhna ziak in innsung a kingaihdamna a poimoh hi. I tangtel Kolosate 3:13 banlam I sim leh Khristian innkuan omdan ding Pathian in a geldan chiangtak in hong kigensuk hi: Zite, Toupa a kilawm hun bangzel a a pasalte uh kiang a kingaihniam ding, pasalte’n a zite uh it a alak ua a hanhat louh ding uh, naupangte’n/tate’n bangkim a nu-le-pate’ thu aman ding uh, nu-le-pate’n a tate uh ahihnuak louh ding uh lunglel khathei ahihman un (Kol. 3:18-21). Kingaihniamna (zi/nu a), itna leh hanhatlouhna (pasal a), thumanna(tate a), hihnuak louh ding (nu-le-pate a). Hiai dan in I innkuan omthei hileh nak nopna’n chia maw…Himahleh, khelhna ziakin Pathian’ geldan bangtakin innkuan omtheilou hi. Pa hi’n, nu hi’n, tate hitaleh kuamah a khiallou/khelhna neilou ki omlou, mohpuakna a banglam hiam chiat a lohsam/hihkhial/chinzouloute kihi hi.

Khrist in Saptuam a it banga pasal in a zi a it ding, a lak ua a hanhat louh ding chih ahihlai in, zi itna tasam, zi itzoulou Pa kihi zaw hi. Hihding a chih (zite it ding) pen hihzoulou, ahihhang a hihlouh ding achih (han hatlouh ding) pen bang hihzou mahmah zel Pa kihi hi. Saptuamte Khrist laka a kingaihniam bang ua zite a pasalte’ lak ua kingaihniam ding chih ahihlai in a zui zoulou nu kihi kha zel hi. Toupa lak, khotang heutute lak, Saptuam heutute lak, milian/milalte’ laka bel kiniamkhiakdan siam mahmah ahihhang a mahni pasalte’ lak a kiniamkhiak haksasa, kiniamkhiak theilou nu kihi zel hi. Pathian’ pahtaklam ahih ziak in tate tuh nu-le-pate’ thuthu a a om ding uh chih ahihlai in nu-le-pa thumang utlou, zahtaklou, mahni utdandan leh hoihsak dandan a hinkhua zang tate kihi hi. Mi pate/nute hiam, teacherte hiam thuman dan siam/zahdan siam mahmah ahihhang a mahni nu/pa thumang utlou/zoulou tate kihi maimah hi. Nu-le-pate’n a tate uh ahihnuak louh ding uh chih ahihlai in, mahni sung a piang/mahni ta ngoihngoih kem siamlou, chiil siamlou, enkol siamlou, thuakzohna tasam khanak in nuaksak a lunglelsak nu-le-pate kihi hi. Khotang leh Saptuam sung mite hiam, midang’ tate phatsiam mahmah, pi siam mahmah ahihhang a mahni innsung a tate huchih thei hetlou pa/nu kihi maimah hi. Naupang dangte thuhilh siam/sinsak siam mahmah ahihhang a mahni tate thuhilh/sinsak theilou nu/pa bang kihi zel hi.

Huaiziakin, Pathian in Khrist a I khelhna, I tatlekna, I chitlouhna, I hoihlouhna tengteng a hon ngaihdamtak bang in innsung ah kingaihdamna poimoh hi. Pa in kiniamkhiak siamlou a zi, zi in amah itzoulou leh han hat a pasal, nu-le-pate’n thumanglou a tate, leh tate’n amaute theisiamlou nu-le-pate I ngaihdam theih ding ahi. Kingaihdam theihlouh ziak in innkuan kisia, nupa kikhen, tate vakmang/pate toh kikhen chih bang omtheih ahihman in tuabang dinmun tunglou ding in I chitzohlouhnate, I tatleknate, I hoihlouhnate ah kingaidamta ni maw... 









No comments

Powered by Blogger.