Sabiltung Mah Bangin

Sabiltung Mah Bangin
Pastor T. Tunthianmang

Tangtel: “Endih, na Kumpipa, thunuailut tak in, Sabiltung tung ah, Sabiltungnou ngei tung a tuang in na kiang ah a hongpai, chi in, Zion tanu hilh in,” a chih (Matt. 21: 5). 

Amasapen in I Saptuam News simtute tengteng Vualzou taka Jerusalem a lut I Toupa Jesu Khrist min in Palm Sunday Chibai aw!

Kum paita in Pandemic ziakin ngeina bang in Palm Sunday I zang thei kei uhi. Pathian’ hoih na ziak in tukum in ngeina bang a zang thei nawn a I om man un Pathian’ min phat in a kiang ah kipahthu ka gen hi. Kei a ding in ei lak a Palm Sunday kum 6 ka zat khaklouh nung a ka zatpat nawnna ahihman in kipahhuai kasa mahmah hi. Tuzing in Calvyn Laang thugelh akipan in Vualzou a Jerusalem alut hun a Jesu’n a vanzat Sabiltung akipan in sinlai tamlou sinkhawm leng ka chi hi.

1. Sabiltung mah bang in eite Pathian telte I hi uh. 
Jesun Sabiltung tampi omte’ laka khat (a nou toh) a teltuam mah bang in eite leng mi tampite’ laka Pathian in amah vanzat ding a a hon teltuamte ihi uhi. Jesu, vualzoutak a Jerusalem alut ding kuan a Sabiltung a tel pat/a teltawm ahikei a, Jesu mihing hongsuah ma pek a Pathian in Sabiltung Jesu’ tuanna ding a ana telkholhsa ahita chih I tangtel in a genchiang mahmah hi (Zekariah 9:9). Tel a a omna ding in Sabiltung in Pathian’ lamah hiai ahih, hiai a sem, hichibang in a gamta chih muh ding a om kei hi. Pathian in a tangtawn thilgel a sepkhiak na ding in a deih bang in Jesu’ vanzat ding in Sabiltung ana tel ahi zaw hi. Tuabangmah in, eite leng, I hoihna ziak hi masalou, I pil ziak himasalou, I diktat ziak himasalou, Amah I biak zoh ziak hilou in Pathian in amah deih bang in a vanzat ding in a hon na tel ahi zaw hi: “Nou n’on tel kei ua, ken k’on tel zaw hi, vagah ding leh na gah ua om gige ding in k’on sep hi…” (Johan 15:16). Jesun Sabiltung khat a teltuam mahbang in eite leng tuhun a Pathian vanzat ding, a nnasem ding a telkhiakte ihi uhi. Toupa’ min phat in om hen.

2. Sabiltung mah bang in eite leng Pathian’ thuzoh theih mi ihih ding ahi. 

Sabiltung in Jesu’ thuthu amang a, thumangtak in Jesu apua/atung ah a tuangsak a Jerusalem ah alutpih hi. Sabiltung tuh Jesu’ thuzoh theih ganhing ahi hi. Tuamah bang in eite leng Jesu’ thuzoh theih gingtu/Pathian’ ta ihih ngeingei ding ahi. Himahleh tamveitak Pathian’ sang a thei zaw kisa in, Pathian in a hon zat utleh ei’ chihdandan hon zuih ding bang in I koih kha sek uhi. Lot bang in Pathian I kidekpih khasek uhi. Sodom leh Gomorrah Pathian in a hihsiat ding in suahtakna ding a tangsang lam a khopi taikhiaksan ding in Lot theihsak in om hi. Himahleh Lot in tangsang lam a tai sang in anai zaw Zoar khua lam zot ding in Pathian kidekpih chitchiat hi (Gen. 19:17-22). 

Nu leh pate’n thu khat I gen chiang a, amau’ ngaihdan hon genkhum thei leh bangmah hon genkhumlou a I gen bangbang honzui I tate I koihdan a kibang kholkei hi. Toupan mohpuakna hon piak bangbang thumangtaka a semkhia, Toupa’ thuzoh theih gingtu khat I hih poimoh mahmah hi. Phunphunlou, paulam bawlbawllou, kilepkhiakna ding zongzonglou gingtu ihih ding ahi. Toupan hon zang gige khollou kha ding ahi. Sabiltung leng khatvei ban Jesun a zang nawn chih akitheikei. Zat dia telkhiak ahihlai in Sabiltung in tel a a omna thumangtak a a sepkhiak bang in eite’n leng Toupa’ hontelna thumangtak a semkhe ding in kisa chiat ni.

Palm Sunday zatnuam chiat!!!