Lawchinna Lampi

Lawchinna Lampi

Pastor M. Thangboi Zou

Devotional Message, June 1, 2021

Tangtel: Silhoi bawl chimtah sih vai ui, i lungkieh sih nah pouleh a huntah in i at ding hi (Galati 6:9).

Noah Webster kichipa khu ponthaw tahin lekha agielgiel a kum 36 tan tawplou a ahing buoipi khu leitung a laibu minthang ham zilna die kizang Webster’s Dictionary ahing pieng khie hi. Tualeh Thomas Alva Edison in light bulb asiemkhiet nadi’n 10,000 vei sum-le-pai, tha-le-zung senga a man apieh zieh a hing lawching ahi. Mother Teresa in, “Nasem zing khut khu thummi kam sangin asiengzaw hi” achi hi. 

Henry Ford car siempa’n, “Nna nasep tam leh na vang zong pha ding”, achi hi. Innsung kisie ahoina di’a mittui luong a Pasian buon a ngai a, Hattuom sunga halthana atunna di’a thum pawl a up ngai hi. David in Goliath athazaw nadia alawchinna bulpi khu Pasian muong a a kipat ngamna khu ahi. Jerusalem kulbaang sesa siemphatna thuguh khu “ann-ngawl a thumna” ahi. 

Lawchinna kichi pen thakhat thu a hing tung hilou in, kukalna, chitahna leh tawplou a sepna ahi bou hi. Na innsung kisie tung ding na nuom leh Pasian muong in kipan ngam in (I Sam 30:6-8). Solna na puo nuom lou leh thum zingin (Mk. 14:38). Hagau mangthai namat nuom leh kipankhie in (Rom. 10:14). Jesu Khrist toh kizop zing loute lawsam ding uhi. (Jn. 15:6).