WAY2GOD: KA KIPAH HI MANGPA
WAY2GOD: KA KIPAH HI MANGPA
Tunitan a damna hing pia chouh hilou a KIPAAHTHU gen ding hing pia baanah kipaahna puangzaah theinalai a hing koi leh internet tungtawn a gentheina ding plateform hoitah hing siamsah iMangpa Pasian min iphat masa uhi.
Tuni’n genlou-theilou a ka ngaisutte, Pasian thupina di’n WAY2GOD min in genkhiat ka ut hi. Tampen bang dang hilou in WAY2GOD hing kipatkhiat dan leh a ministry tungtawn a Pasian hoina leh A mapuinate genlang ut ihi zaw uhi. WAY2GOD kipatkhiat dan (piankhiat dan) en masa vai.
Kum paisa ah Pasian thu genzaah/thedal utna nasatah in ka nei a, hinanleh bangchi bawl a hoi ahiei chizong theituanlou in hun-le-nite aliamzel hi. Kum-le-hate liamzel nanleh Pasian thu genzaahna leh thedal utna lungtang pen daai/sip (silent) lam manaw sang in atamthei lam leh achiangthei tawp a tanchinpha (gospel) puanzaah ut semsemna lungtang ang lianzaw deudeuta hi. Tambang a phuutna (compulsion), Pasian apat alet sengta ziahin panlaah dan tuamtuam tambang ang piangdohta hi.
Pasian Hagau apan tanchinpha thezaah utna keima ah aliansengta a, lah keima’n alampi ding bangma ka theituanlou ziahin, ka khamkham in internet vel ah Pasian thu kigialte simjel leh print khia in ka deisahte ka hawm zelzelta hi. Hinanleh sepna neilou student ka hi nalai ziahin a sum ding ahahsat ziahin Pasian thu print khiat a deisahte va kawi hawm pen alemthei nawn ta sih hi. Tuazou sotlou in GUPSHUP kichi tulai a dia, WHATSAPP chidandeu in personal leh group bawl a message ki haahtheina khat ang kithangta hi. Tuapen leh Facebook zang in 2008 February kum in WAY2GOD chi min zang in Pasian thu thezaahna/thedalna nasatahin ka na pankheta hi.
WAY2GOD tungtawn a siltup leh ngiim ahileh, Pasian thu tuabaanah atamthei lam a thezaah ding chi ahi. Tamteng baanah Pasian thu a theisiamlou leh buaina neite hilchet bang a uthuai mama mai hi. Tambang a Pasian thu a ihahsatnate uh solve theina tan chiang lunggulna ang piandohtah in Pasian thu theibeh utna leh zil utna lungtang zong ang neisahta hi.
Tambang tup-le-ngiim te pen paizom toutou zelin 2009 tuam lah ah website tungtawn a bang chi bawl ding chi lungtup ang potdohta hi. Website lam toh kisai bangma idea ka neisih a, 2009-2012 sung Pasian hoina zaalin website toh kisai idea themkhat toh WAY2GOD domain/subdomain min zang a website khat run ding kang tumta hi. Hinanleh, sum tampi bei ding ahi ziahin upai umlou chi’n free a website honna te kang try ta hi. Tamnah apoi mama khat ahi leh WAY2GOD.BLOGSPOT.COM leh WAY2GOD.WORDPRESS.COM ana .
Tamziahin, poi kasa mama mai a, WAY2GOD min zang a BLOG ana bawlte koite ahiai chi'n ama pa/nu apat ka ngenkhe ding hi chi lungtup ka neita hi. Hinanleh, USA te numei khat, amin ka theikhellou leh KATHYJOYFUL kichi nu ahi a, a contact didan lampi ka theizotalou ziahin ka min zangin, GOUMUANTHANG.BLOGSPOT.COM chin ka hongta hi. A website etlawm na ding in, a design ding dan zong ka siam sih a, tuathamlou in, a sung a Pasian thu gel zong ka siam tuan sih hi. Hinanleh, ka lunglutna leh phuutna ka neipen akhawl tuamlou ziahin bawlthei dandan in ka zomtouta hi.
Pasian mapuina lamdangtah tang in leh Website lam tungtawn a A tanchinpha thezaahna/thedalna nasatah a sunzom di'n ang phuut kiata toh kiton in tu LOCKDOWN hunsung in Pasian in hunlem hing bawlpia in bangchihma a kinep pha a ka nei nawnlou website piching WAY2GOD.IN ang dinkheta hi. Tualeh apaisa June 1, 2021 ni a LAUNCHED khiat ahita hi. Tamziahin Pasian thupina leh A mapuina kipaah taluat man in genzaahlou theilou a kaki ngaiziahin tam WAY2GOD.IN tungtawn in Pasian a kakipahna ka puangkhia hi.
June 1, 2021 ni a launch khiat a um WAY2GOD.IN tungtawn a Pasian thu lamtuamtuam a, adiah a article te tungtawn a June 2 apat tuni July 2, 2021 tanchiang bangma buaina umlou keei a Mangpa’n Atanchinpha thezaahthei a angkoita man in, TAMBANG VISION HING PIA A TUNIA PLATEFORM HOITAH TOH ABUL ANG PATSAHTA ZIAHIN PASIAN IN THUPINA TANGTA HEN! Tu-le-tu a Pasian thu thezaahna platefomte ahi leh: WAY2GOD.IN (website), WAY2GOD (whatsapp), WAY2GOD (facebook) ahi.
Niteng in atawmpen a article khatbeeh post khiat khu ka siltup ahita a, hinanleh keima’n article deibang a gialzou gigelou ka hi ziahin source tuamtuam apat lakhawm in WHATSAPP group tuamtuam leh, Facebook leh personal contact number tuamtuam ka neite tungtawn in ka thedal zelta hi. Tualeh lawm-le-gual tamtahte kung ah article hing contribute un laigel tungtawn in Pasian nna semkhawm va ui, tu in a plateform hoitah honkhiat a a-umta ziahin pangkhawm vai chi’n lawmte tamtah ka chial hi. Mabanah alemchang hun ah pan hing laahpi ding un i gingta ua, tualeh tu-le-tu in tamtah in ma ang laahpiata ziah un amaute tung ah kipaah mama in ka lungdam thu tam laigel tungtawn in ka puangkhia ahi. Amaute (Article contributor te) koite ahiei chi article ana simjel te’n ithei mama ding uhi. Hinanleh article hung kipatnate amin uh taahlang lei uthuai isat manin bangualzual vai:
- Pastor T. Tunthianmang
- Pastor T. Thanglianmung
- Pastor Dr. Dongzathawng
- Pastor M. Thangboi Zou
- Paolen Tuboi, Ph.D Research Student
- Rev. Jonathan Nehlian
- Rev. H. Thangliankham
- Henzathang Haokip, M.Th
- Pa Suanlyan Tungnung
- Rev. Dr. HC Stephen
- Joseph Doulunlal Samte, BD
- Mercy Manlianvung, Partnership in ministry
- Rev. Awnkhankhup
- Rev. S Kaikhanmang
- Pastor Lamzakai Haokip
- Rev. B Chinzahau
- Mr. Khailunjohn Hangsing, M.Div
- Pastor B Goumuanthang
- Pastor Thangminlun Mangte
- Rev. L. Mangminlun
- Gelkhelkha leh gelkhalou a um zenzen leh kingaisiam vai in hing contact pai mai un tuachi’n kana sudih (correct/update) pai ding hi.
Tu-le-tu in tamteng apat source laah ahi a, amaute tung ah Pasian min in kipahthu ka gen ahi. Tualeh mailam hun ah zong Pasian gam nna sepna ah mapangkhawm ding in kisingsa semsem vai, tuachi’n Mangpa’n ima uh hing puita hen. Tualeh article hi in sil tuamtuam te toh tam website tungtawn a Pasian nna semkhawm ding in nang zong tam message tungtawn in chial na hi a, bang chihlaipou in na hi.
ABOUT ah lut le chin contact link leh email a um ding hi tuate apat bangchihlaipou in nang thuzaah thei hi.
Kipah ing WAY2GOD Admin
Tamteng baanah taimatah/tawmngaitah a article hing na simsah zeelte tung ah zong ka lungdamna mama thu tam WAY2GOD.IN tungtawnin kang puangkhia ahi. Pasian in mit haatna hing pia in na hinna uh Ama a dettah a kibulphu semsem dingin hing gualzawl chiatta hen. Noute tung a ka kipahna diah ahi leh, article te nana sim ban uah, comment hoitah toh exortation nang bawlte uleh nana share sawnte ziah un ka lungdamna a lian semsem hi. Laigialtute leh website adminte chouh khu tuni’n Manggam nna sem ahisih ua, nou ana simte leh, ana share sawnte leh commnet hoitah toh hing hasottute tel a nna semkhawmte ihi uhi. Mangpa hoina ziah ahi man in Mangpa’n thupina tangta hen.
Mailam hun ah, lamtuamtuam ah WAY2GOD.IN content leh category zong zausah (liansah) deudeu leh quality improvement zong tup-le-ngiim a um ahi man in na thumna te uleh lam tuamtuam ah mapangkhawm ding in Pasian min in ikichial uhi.
Article hing contribute tengteng leh tawmngaitah a ana sim a, comment hoitahtah leh share ana bawl sawnte tung ah Pasian hoina nibang taangzingta hen!
No comments