KHRISTIAN MINISTRY

KHRISTIAN MINISTRY
Pastor T. Thanglianmung

Saptuam nasepna a kiza mun mahmah khat chu “Khristian Ministry” chih thumal ahi. Ahuchihlai a, hiai bang genna a chih theilou kia hilou a ngaihtuah kha ngei hetlou Saptuam mite lak bang ah le om kha thei ahi. Khristian michih adi ahihlai a, Laisiangthou zirte leh Saptuam in semtu ding a a lakte bang in sem deuh ding ua lametna a om hi. Huaiziak in Khristian ministry, isepkhiat dingdan leh a poimawhna saulou in sutkhawm le chi in kon gelh hi. Hiai thu theisiam in ahihna bangbang in semsuah thei chiat le, Saptuam hing leh khang ichih a tun theihna ding a leilawn poimawhtak hiding in ka lamen hi.

Ministry ichih chiang in ministerium  kichi Latin pau a kipan a kilakhia ahi a, “sikhate nasepna, mawhpuakna, nasepna, panpihna” chi in a kihilhchian hi. Khristiante’n hiai thu izat chiang un “Nasepna” genna in izang uhi. Huaiziak a “Khristian Ministry” a kichih chiang a “Khristiante nasepna” chihna ahi. Hiai Khristian ministry tungtawn a Pathian phat leh pahtawi a om a, Saptuam a khan ding bangtak a khang a, leitung a mihingte lak ah tanchinhoih genkhiat a om hi ahi. Huai mah chu Thukhunthak hun a Pathian gam nasepna leh Jesu min a midangte tung a nasepna ah i mu thei hi (Matt. 20:28; Mk. 10:45; Johan 13:1-17). Hiaipen tunitan a paitou leh izatlel dan uh ahi.

Khristian ministry ahibangtak a I sepkhiat theihna ding in bangbang ministry a om a, chih itheih masak uh ngai ahi. Isepkhiat theih ministryte chu Kha thilpiakte ahi. Huaite ahihleh kamsang thugen theihna, nasepsakna, sinsakna, hanthawnna, tasamte panpihna, makaihna, zahngaihna, pilna, theihna, ginna, hihdamna, tanchinhoih genna, pastor leh sinsakmi, thillamdang hihtheihna, khate theihkak theihna, pau tuamtuam a thugen theihna, paute hilhchet theihna, leh sawltaklian ahi (Romte 12:6-8, 1 Korinthte 12:8-10 leh Ephesate 4:11). Hiai te theisiam in semkhe le hiai sang a poimawh zaw ding ministry om tuanlou ahi chih itheih ding uh ahi. Himahleh, a tangpi in eite’n hiaite sang in thildang ministry chi in I buaipih zaw ua, huai in Saptuam a khan ding dan bangtak a a khanna ding dal kha hithei ahi. Aziak chu sep ding chiangtak a hong kipia om a, huai sang a ei sep ut zawk lam sep di kizongzong zaw ahihziak in ahi.

Neil T. Anderson in “Becoming a Disciple-Making Church” a, a gelh, “Someone once said that if the Holy Spirit was removed from the church, 95 percent of all the “good” church programs would continue on as scheduled,” kichi kha a dik taktak khak ding lauhuai mahmah ahi. Aziak chu banghiam ichih leh, Laisiangthou in a gen hilou, ei phuahtawm, kilawm leh nalh mahmah Khristian ministry kipaipih nak lawta ahi. Idea neiloute bang ministry a kizenlou chih a om ding bangta? Idea thakthak hongpiang khia himahleh a gahsuah taktak omlou Khristian ministry tampi kipaipih dia gingta kahi. Laisiangthou a chiangtak a I muh Khristian ministry hiai a tung a igente, michih in itan hihtheihna neite himah le hang huaite hou sakna om hia, tulai tawh kituaklou kisa hizaw hia, a zui kitawm deuhdeuh ding bangta ahi. Huai in a gen uttak chu Khasiangthou poimawhna neu deuhdeuhta chihna ahi. Huaiziak a, Khristian ministry lawhching leh gahsuah I sepkhiat theihna ding a Khasiangthou poimawh mahmah, a lou theilou, hinazenpi a, ei mah utdan leh deihdan style a ministry paipihna lianlawta a, Khasiangthou in mun tang zou nawnlou, ahihman a Khasiangthou lou a le Khristian ministry chu paipai thei ding ahi achihna ahi. Huaikha thil phatuam hetlou, a thawnlel a nasepna hong suak ding ahi.

Khristian kichi vek, chih khawng Khristiante lak a tung din kilawm kei chih khawng ei-leh-ei ikimuhdan uh ahi. Bangziak a I Khristian na a tak a muh ding tawm hiam ichih leh, hiai Kha thilpiakte a kisep khiat tawm ziak ahi. Pathian in I nna ding chiangtak a hon hilh lai a en huai sang a smart tak a sep khawng ki ut zaw, mi muh di deuh a sep khawng ki ut zaw, mihingte muhsuah ministry kizui zawta a huaiziak a I Khristian na uh pichinglou leh a minpu lel bang ahi. Ministry khat sem zek le lah social media ah kimuh pahpah, mi hon theihlouh khak kilau theilua a, Pathian in hon thei utlou ana hizaw kha mai diam khawng ka chih hun om ahi.  Pathian in ama sang a en thupina leh pahtawina I tan zawknate khawng hon phungvuh saklou ana himaimah ahihkhak ding ikiven mahmah ding uh ahi. Huaikhawng ziak a, hiai tan kisem a, hichituk a kisem a, a gah muh di le omlou, bangmah phatuam kei chi a khatveivei chiang bang a I lungsim kisual sek ahi. Tuni’n hiai simkha Khristian te tengteng in ministry ei hih theih ding nei chiat ihi chih thei in huai sem khe chiat le, kua a Khristian te enhuai hon sa a, Khristian hih utlou ding, na chi kei maw unau! 300621