LUNGKHAMNA TAWH KIPELH THEIHNA DING THUSIM

LUNGKHAMNA TAWH KIPELH THEIHNA DING THUSIM
Nisim Manna

𝘽𝙪𝙡𝙥𝙝𝙪𝙝: 𝙆𝙖𝙢 𝙥𝙖𝙪 𝙖 𝙠𝙞-𝙞𝙥 𝙯𝙤𝙩𝙚, 𝙡𝙪𝙣𝙜𝙠𝙝𝙖𝙢𝙣𝙖 𝙩𝙖𝙬𝙝 𝙠𝙞𝙥𝙚𝙡𝙝 𝙝𝙞. 𝙋𝙖𝙪𝙣𝙖𝙠 21:23

Tuni i bulphuh in i nuntakna ah lungkhamna tawh i kipelh theihna ding thusim hong kihilh a, tua pen: Kam pau ki-ip zawhna hi. Kumpi Nihna 18:13-37 sungah Assiria kumpipa in a kamtaipa tungtawnin Judah kumpi Hezekiah leh a mipihte khempeuh a tosak, a lauthawngsak ciangin Hezekiah pau se lo a, a mipihte zong a pauloh na dingun thupia hi. Tua bangin Judah mite kampau a ki-ip zawhna hangun Assiria kumpipa' kamtaipa in a cih nading theilo-in ciahsan a, a kumpipa kiangah bangmah thupuak ding neilo ahih manin Assiria kumpipa in zong a cihna ding thei tuan lo hi. 

Judah kumpi Hezekiah leh a mite a pauloh ziauna uh pen a pilna uh hi a, tua in khantawn buaina ding tampi tawh akipelh thei ahi uh hi. I Lai Siangtho ah kamtam paute, tampi khial a, pau ip theite mipil hi (Pau.10:19) na ci hi. Thu a thei taktakte in gengen khol lo a, a paupau khollote thu mu taktak hizaw hi (Pau.17:27) na ci hi. Sente paunak khat ah, na hehna ip tentan lecin kum 100 na buai na ding tawh na kipelh hi, ci hi. 

Tua manin tuni in gualzawhna na deih hiam? Na nuntakna ah lungkhamna tawh na kipelh nuam hiam? Na nuntakna ah gualzawhna na deih a, lungkhamna tawh na kipelh nuam takpi leh na kam pau ki-ip in. Na lungsim a om khempeuh mawk gen khiat sawm ken. 

𝐊𝐢-𝐚𝐩𝐧𝐚: 𝐓𝐨𝐩𝐚 𝐚𝐰, 𝐤𝐚𝐦𝐩𝐚𝐮 𝐤𝐚 𝐤𝐢-𝐢𝐩 𝐳𝐚𝐰𝐡𝐧𝐚 𝐝𝐢𝐧𝐠𝐢𝐧 𝐉𝐞𝐬𝐮 𝐊𝐡𝐫𝐢𝐬 𝐦𝐢𝐧 𝐢𝐧 𝐤𝐨𝐧𝐠 𝐤𝐢-𝐚𝐩 𝐡𝐢. 𝐀𝐦𝐞𝐧!