“SATISFY US IN THE MORNING”

“SATISFY US IN THE MORNING”
Pastor DongzaThawng
"Fellowship of  Thirsty Souls and Hungry Hearts 
Devotional 48 ( vol 3)

Mangpa Ni Jingmawng pha chivai ele!

TUNI TOPIC: “SATISFY US IN THE MORNING”

Text: “Satisfy us in the morning with your unfailing love, that  we may sing for joy and be glad all our days” Psalms 90:14

Hia morning kichi khu mun dang ah “Early” chi na zong um hi.

Tulai ka umna uh inn tui hamsa in inn thah hawl a ka taitai leh ka gim vawt hi.  Tulai Pasian khutsiam haichi thahte ka mu chiang ka lungkim va ngut hi. Lampi gei chin ah munawnglou jeen in vegetable- ante, loute, theiga chi tuamtuam dim hi. 

Pasian hoina tungtuang in Gawtuai ka du mama lai in, singtang me lah ka du pen khat Singthupi hing tung hi. Nop tah a singthupi ka neh lai in Papaah hing tung kia hi. "Pahpah khel a metui jaw a um na de aw  hichia tui tah a ka neh lai in, Khuainou hing tung kia hi. Tukal paisa mawng mawng neh lam ah atai in ka tai hi. Pasian hoina luanglet ka phatphat chimthei sih hi. 

Hundamna gospel camp ki bawl ding doudal a hoi tah a kithutuah hattuam lamkai hon khatte jieh a ka thajawi ngiingei lai un Pasian in tahsa lam ann tui penpen, i singtangmete uh, 5 star hotel a zong kimulou dingte toh hing heneem or hing kipah sah hi. 

I thupi ah lut ta vai ele:

Tulai himi Bible chang ka ngaitua tua jel hi. Psalm gialtu in jingkal chiangin na hepina tullou toh hing taisah in chi in thum hi.

Sap thupil ah Eat breakfast like a King, Lunch like a Queen, Dinner like begar” chi uhi. Umjieh khu jingkal chiang ann tui pen kumpipa bang in  atui thei pen ne in. Sunn ann ahileh jingkal sang a tuiloudeu lah tui veve Lengnu bang in ne in. Nitah ann ahileh nehding mujou lou khutdaw te bang in tawmnou khat nein chi ahi. 

kum 2/3 paita a,  Scotland ka va pai a, tu tan  ka khiahla pen khu breakfast ahi. Nehthei chi 20 vel ka ne uhi. Mi changkang ten breakfast khu thupi bawl pen uhi. Sappten hot breakfast kichi khu thupi ngai mama uhi A jiehpen jing kal a i neh ahoi leh sun ni tum ading a i tha  a pang ahi. Ei lah a thil hoilou mama khu jing kal a puri neh a ann dulou jeen a um khu thil hoilou vawt ahi.

Thil himhim jingkal hun a bawl khu hoi hi. Keibang ka Bible sim, ka thumna leh ka laigel bawl phot jingkal a ka bawllou phot sunni tum a, bawllou tebang ahi ta hi. Jingkal hun khu manpha mama mai chouh hilou in hun manpha pen ahijieh in  Amanpha pen I Pasian ma in tang leh chi ahi. 

Jingkal a ih ann neh in sunni tum in hing khaang hi. Nagum sem ten jingkal ann aneh hoi lou uleh sunni tum in na semjoulou ding uhi. Khujiehin thagum na semte ading in a jingkal aneh uh ahoi ding poimaw mama uhi. 

Hagau lam ah zong sunni tum a Setan toh ki sat ding, hemna tuamtuam tuah ding, mi tuamtuam toh kithua ding. I natna thei, iliamna thei, i jawina thei, i puhna thei, i lungthahna thei  simsenglou ima ah ana um ding hi. Tuate i phutna ding in jingkal a hoideu a i hagau i charging ngai hi. I battery afull ngai hi. I tahsa pumhoi deu a  i vah angai bangin i hagau zong ann hoitah toh i vah dim ngai hi. Tualou in maban lamsau ah baa in ki paijoulou ding hi. 

Khujiehin Psalm gialtu in jingkal chiang in hing taisah in chi hi.  Bang toh taisah ding? A hepina tullou leh juanglou toh*( UNFAILING LOVE). "

Tulai Jingkal breakfast a dingin serial  chi khat (no sugar added) leh bawngnoi ki mix  ka du mama a, hinanleh hunteng in ka nejou sih hi. Man tam seng hi. Ahiin hagau lam breakfast pen free in i du dandan, i lungtaina tan a neh thei ding in  Van Manna beitheilou, hinn tui kangtheilou I Mangpa JESU um hi.  Ama “unfailing love” Supply a nah beitheilou kangtheilou um hi.  I neh laisia tui deudeu, hum deudeu, chih deudeu hi.

Tua chia A MA a jingkal a hing ki vah dim a, i lungtaina tan a ama toh hun i manjou chiang Pslam gial tu in  "that we may sing for joy and be glad all our days”  chi hi. Hibang ama toh taitah a jingkal hun i man thei chiang in, tua jing kal a  lungkimna, kipahna, leh lungtaina in nusia nonlou in sunni tum in jui den ding hi.  

Philip Yancey in himi ka jingkal a Pasian kung a ka tawldamna leh lungtaina khu sunni tum ka pua kawikawi thei hi chi hi: “I corral a few minutes of calm in the morning in the hope that I can carry some part of that calm into the REST OF THE DAY”  (capital mine) .  Yancey in agen jel na ah jingkal thumna in  khawvel buahna pat in hing humbit hi chi hi: “Regular prayer helps me to protect inner space, to prevent the outer world from taking over”

I Jingkal hagau ann nehin sunni tum in i hagau hing hatsah, hing kep bitsah, hing dam sah in lampi ding ah hing pai sah hi. 

I tangval lai in i ngai leh i it nungah toh iki mu a hun i man khawm khu hun tomnou hinanleh tua iki mu jou chiang in bei mai lou hi. I hun mankhawm sung a, a thugen teng leh umdan teng i mitha leh i bilha ah gingging in bei nonlou in hing juiden  hi. A chang ah ei leh ei zong iki hou hi. Tahsa a um khawm nonlou, ikhen phot kihi ta pi lungsim leh hagau in ki umkhawm nalai bang in hinkhua kimang hi. I mai ah kimu in, i ngaituana teng hing lua hi. I gei a um, i khawlkhawm pi te mang hil jen in hun sawtlou paita a i itnu toh i hun jatdan teng in hing juijui hi. 

Tuachidan ahi jingkal a Pasian toh hun man khawm dan zong. Jingkal a hunnop tah, lungtai tah a Pasain toh kithua na in sunni tum in ama pawlna in hing juijui in hing nusia nonlou hi. Jingkal a hagau lam hoi deu a vahjou nahnah chuh suun chiang in bangma in hing suling nonlou hi. Dana thei, lungthahna thei, lungkiana thei, kana thei, jumna thei, lungkhamna thei, thajawina thei, puana thei na te lai ah zong “ that we may sing for joy and be glad” chi hi ta hi. Ajiehpen i jingkal kipahna leh lungtaina in hing nusialou hi. 

I jingkal hagau lam battery full a i charging in khoimun  a khawvel mial hagau lam  meivah um louna ah zong  khawvah in hing puipui hi. 

Bangding a kipah theilou, bang ding a thilneu in zong hing buaisah paipai, bang ding a nuah paipai, liam paipai, jawi paipai, maimual paipai, lungneu paipai, pua paipai, da paipai, lungkham paipai, he paipai, beidong paipai idiai? Bang ding a hichi dengdel idi uai?"  Bangdang jiah hilou in jingkal a ih breakfast ne a quality ahoi sia ahi.

Zingkal chiang a Pasian ki satisfy sah ding khu sunni tum a ding a  poimaw seng ahi jieh in  Melma pa Setan in theitawp in hing suhbuai sawm hi. Tozer in “Nothing bothers the Devil more than a Christian delighting in God’s presence” chi hi, ( Experiencing the Presence of GOD). Khujieh in Setan in himi hunpha i manlou teitei na ding in puri hotel lam hing juan sahsah in, ahilou leh i mobile ah message adim in hing koisah hi. Ahilou leh hattuam vai tuamtuam ah i buaina ding hing pia hi. Ka pianthah tung lai a ahing suhat mama Billy Graham thugen khat: “Jingkal teng a Bible sim a thumna a hun mangte khu sunni tum dahkal 24 sung Pasian toh  a kikhen sih ding uh” chi hi.

Pasian mi George Mueller in vang ahileh “My greatest desire is set my heart happy and rest in GOD” chi hi. Jingkal chiang a Pasian umna a, ama toh kithua a hagau ki tawldam sah khu misiangthou paimasate'n a ngai poimaw pen ahi. Himi thirsty souls ten zong i gengen pen ahi . 

Pu George Mueller gensah kia vai : The primary business I must attend to every day is to fellowship with my LORD. The first concern is not how much I might serve the LORD, but how my INNER MAN  might be nourished” The Autobiography of George Mueller).

Pasian khu ama ding in bangjat i sem khia, bang teng ibawl khia ei chi ah lunglutlou in bangtan ama aw I ngaikhia, ama toh ikithua a, ama lungsim i hawl a, ama iki pui sah ei chi ah lunglut jaw hi.

Eite  sithunam jen a Pasian nasem ding in, i ji ita, i inn sung zong buaipi manlou, thummanlou, Bible simmanlou, laibu simmanlou, mimal a phatna la zong samanlou, i hagau ann zong nemanlou, ei ma hagau zong kivahmanlou, gam lah a tawldam tah a Pasian toh  va ki thuamanlou, daididia a munsim a hun jangmanlou jen a kinaw tah a, Mang gam nasem chia kibuai sah a, kipeipei vengvung ding in Pasian in hing phut ngeingeilou hi. Hibang a kibuai sahte khu Pasian nasem hilou in eima ki lungkimsah, eima lungkimna ding hawl leh mite patat ding deina toh sem ihi jaw hi. 

I Mangpa Jesu'n Martha leh Mary koi pen apahta jaw ei gen ngailou in ithei hi. Jesun na ga nei ut uleh ha sem in sem in chi lou hi. KEI AH UM JING UN chi hijaw hi ( John 15). Eiten Pasian naa hasep a isep sawm lai un Pasian in eitung tawn in naa sem ut in hing ngahngah hi. Eite ha sep leh hapan khu aman nawngkai sa mama hi. Ei top hunhun Ama kipan thei pan ding hi. I ta neuten na isep chiang hing panpi kisa a ang suhbuai dan uh toh kibang ahi. 

Tozer in agen jel na ah “The Devil does everything possible to keep us busy. As a result, very few of us are even really alone with GOD” ( Met who met GOD) chi hi.

Thupil khat in " Beware of the barrenness of busy life" chi hi. Pastor theising, leader theising, speaker progm hau mamate theising. Mi buai thei na hileh na hinkhua keu ding gawta ding theisa ahi thei in. Ajiehpen ama uhte'n Pasian kung a ki dianouna ding hun neilou uhi. A buai laisie uh Pasian kipah ding sa kha maithei uhi. Ahiin Pasian in Martha kipapi lou hi. Bible ah Pasian in amite ama kung a tawldam ding in avelvel in chial hi.

Pasian nasem, hattuam nasem chia iki buaisah lai in Setan in Pasian toh ki mat ding dalna a hing buai sahsah hijaw ding hi.

Tozer in gen jelna ah: “Twenty minutes on your knees in silence before GOD will sometimes teach you more than you can learn out of books and teach more than you can learn ever in the church” chi hi. ( Delight in GOD). 

“One hour in the presence of the majesty of  GOD is worth more to you now and in eternity than all the preachers, including me, who have ever stood yo to open their Bible”

( Delight in God).

Tozer in tulai a youtube leh whatsapp a sermon ngaingai leh simsimte thei leh bang agen ta diei? Sermon ngaingai, article simsim ding ma ahi.  Ahivang a minute 30 zong Pasian toh mimal a kithuana hun pemama lou. Bange a khiatna?. Setanin Pasian toh i hun man khawm ding dalna in youtube sermon hoi tahtah leh article hoitahtah i mai a  hing umsah himai thei hi. Himi kei article zong na Pasian toh na kipawlna ding hun beisahtu khat ahileh simda mai in. 

Tunia i gen sawm i manta ding iki nem hi. Jingkal chiang lungkim tah leh a lungtaina tan a Pasian toh ki pawl hun nop tah neite ding in sunni tum in buai ngai nonlou hi. Galjousa a room apat hing pot ahi ta hi.  A jingkal hun sim a Pasian apat tawldamna leh kipahna ava tante in juiden ding a nusialou in umpi kawikawi ding hi. Tuachin mi tuamtuam, mi genhah, mibuai huaite lai ah puhtheina, liam theina, lungthah theina, lungkham theina, kaa theina, mangbat theinate lai ah zong kipah tah in Pasian phat thei ding hi.

Tuajieh in atawpna ding in Tozer thu gen : “KEEP YOUR HEART WITH ALL DILIGENCE AND GOD WILL LOOK AFTER THE UNIVERSE” ( Born after Midnight) chi hi. 

Dam tahin, lungmuang tah in, awlawl in jingkal chiangin na hinna na hagau Pasian kung ah ki tawldam sahin, na hagau hoi tah in taisah in, nousah in kivah sah in. Pasian in Van leh lei leh khawtaang leh hattuam te ana enkawlna ding hi… chi ahi.

 Ka bible jil lai a ka la dei mama khat kang tah lang ut hi:

“Early let us seek thy favor

*Early let us do thy will

Blessed LORD and only Savior

With thy love, our bosoms fill

Blessed Jesus Blessed Jesus

Thou has loved us still." 

chi la ngaitua vai.

Jingkal a Pasian a lungtaina del  leh tang te lai ah hing pang sah ta hen!

Topa Thupha !

Shalom !