TOPA IN A KHEEL LUNGSIM

TOPA IN A KHEEL LUNGSIM
Nisim Manna

𝘽𝙪𝙡𝙥𝙝𝙪𝙝: 𝙇𝙪𝙣𝙜𝙨𝙞𝙢 𝙞𝙣 𝙣𝙖 𝙠𝙝𝙚𝙢𝙥𝙚𝙪𝙝 𝙡𝙖𝙠𝙖𝙝 𝙖 𝙠𝙝𝙚𝙢 𝙝𝙖𝙩 𝙥𝙚𝙣 𝙝𝙞 𝙖, 𝙖 𝙠𝙞𝙨𝙞𝙖 𝙥𝙝𝙖 𝙢𝙖𝙝𝙢𝙖𝙝 𝙖𝙝𝙞 𝙝𝙞. 𝙆𝙪𝙖 𝙞𝙣 𝙡𝙪𝙣𝙜𝙨𝙞𝙢 𝙩𝙝𝙚𝙞 𝙯𝙤 𝙙𝙞𝙣𝙜 𝙖𝙝𝙞 𝙝𝙞𝙖𝙢?    𝙅𝙚𝙧𝙚𝙢𝙞𝙖𝙝 𝟏𝟕:9

Tulai huna kigen tam leh i zak tam mahmahte lakah khat in, "𝙣𝙖 𝙡𝙪𝙣𝙜𝙨𝙞𝙢 𝙙𝙚𝙞𝙝𝙣𝙖 𝙯𝙪𝙞 𝙞𝙣," cih ahi hi. Mi tampite thu kihilhna zong himai hi. Ahi zongin tuni i Lai Siangtho bulphuh in i pilvanna ding hong hilh hi. Topa in Jeremiah tungtawnin hong theihsak in lungsim pen a khem hatpen, a kisiapen ahihna hong hilh hi. Mihingte lungsim pen mawhna leh a maanlo thukhensatna lamah kihei nuam ahih manin David bangin Topa tungah lungsim siangtho hong guatna dingin i nget ding kisam hi (Late 51:10).

Mi tampite lungsim kikheelna omlopi in a gamtatzia uh kipuahpha uh hi. Tua pen Pasian deihna hilo hi. Gamtatzia kipuahphatna kici pen pualam a kilangkhia mimal hatna leh hanciamna ah kinga hi a, ahi zongin lungsim kikheelna kici pen sunglam panin hong kipan Pasian hatna tungah kingakna ahi hi. Tua manin lungsim kikheelna omlopi a gamtatzia kipuahphatna in sawt hong khom lo a, ahi zongin lungsim kikheelna tungtawn in gamtatzia kikhekna pen kip hi. Tua pen Pasian deih ahi hi. Tua manin tuni in ei lungsim deihna a zui hilo in Topa hong kheelsak lungsim deihna i zuih theihna dingin Topa tungah ki-ap ni. 

𝐊𝐢-𝐚𝐩𝐧𝐚 : 𝐓𝐨𝐩𝐚 𝐚𝐰, 𝐥𝐮𝐧𝐠𝐬𝐢𝐦 𝐚 𝐬𝐢𝐭 𝐭𝐞𝐥𝐩𝐚 𝐧𝐚 𝐡𝐢𝐡 𝐦𝐚𝐡 𝐛𝐚𝐧𝐠𝐢𝐧 𝐤𝐚 𝐬𝐮𝐧𝐠𝐚𝐡 𝐥𝐮𝐧𝐠𝐬𝐢𝐦 𝐬𝐢𝐚𝐧𝐠𝐭𝐡𝐨 𝐡𝐨𝐧𝐠 𝐩𝐢𝐚𝐧𝐠𝐬𝐚𝐤 𝐢𝐧𝐥𝐚 𝐚 𝐭𝐡𝐚𝐤 𝐚𝐦𝐚𝐧 𝐧𝐠𝐚𝐢𝐡𝐬𝐮𝐭𝐧𝐚 𝐤𝐚 𝐬𝐮𝐧𝐠𝐚𝐡 𝐡𝐨𝐧𝐠 𝐠𝐮𝐚𝐧 𝐢𝐧. 𝐉𝐞𝐬𝐮 𝐊𝐡𝐫𝐢𝐬 𝐦𝐢𝐧 𝐢𝐧 𝐤𝐨𝐧𝐠 𝐤𝐢-𝐚𝐩 𝐡𝐢. 𝐀𝐦𝐞𝐧!