AMA KA HAAN DING HI

AMA KA HAAN DING HI
Nisim Manna

Bulphuh: Tuaziahin ka kam ka hum sih dinga, ka lungsim gimna ah thu ka gen ding a, ka hagau gentheina ah ka phun ding hi. Job 7:11.

Nikhat thu-in Job ganhing teng kiguuh sah a, a ganchingte kitha sah a, a tate teng a si siangta chi thu a zah baanah Job a kengtaw apat aluzang tanin a kidahhuai meima in dim nalai a, a zi in sisuh mai in chia ahou vagiap baanah, a lawm thumte'n henep sangsihin na mawhna zia ahi chi'n a mawsah nalaite ziahin Job in thuahzou nawnlou in hing hamkhekhong hi. 

Job in a lungsim a, alungthahna teng leh a lungkimlouna teng Pasian mai ah sungkhia hi. Tampen Job in Pasian a gintat mama ziah ahi hi. Job ma bang in tanglai kumpipa David zong a hinkhua ah lametbei aki sah lai in tambang in agen hi, "Ka gintat ziahin ka gen a, nahpi tahin gimna ka thuah hi" chi'n Late 116:10 ah ana gen hi. Tammabangin Job in zong zong bangchituh a hahsatna thuah hinanleh, Pasian a gintat na a hasuah vawt sih hi. Tua ahiziahin mundang/midang te tung ah a hahsatna tutlou in Pasian kung ah atut zaw hi.

Tuni'n na hinkhua ah hahsatna lianpi na tuahkha maithei hi. Thamlouin, Pasian in hing manghil hita va, ahisihleh, ang gawt hita va na chi hun zong a um khamaithei hi. Hinanleh lungke vawt sin, Laphuah khat in tambang in phuah hi: Jesu haan vang, ka hahsatna teng keima beb in pozou sih vang, tuahileh aman ka vanlompi hing puapi ding hi, thamlouin Aman hing kem tawntung ding hi, chi hi. "Midihtatte akikou chiangun Mangpa'n aza hi, tualeh abuainate ua kipat in ahundoh zel hi" (Late 34:17).

Ki-latkhiatna: Mangpa aw, leitung hahsatna-buaina ka tuah laitahin nangma siang ka'ng bel a, ka hahsatnate na siang a kang tut gige theina ding in Jesu Khrist min in kang ngen hi. Amen!