Thuchiam Bawlpa Tawh Um Na Hi Lam Kiphawh In

Thuchiam Bawlpa Tawh Um Na Hi Lam Kiphawh In
Nisim Manna

Bulphuh: Tuachi'n David in akunga ding mite kungah, "Tam Philistin mipa that a Israelte minsietna lamangpa khu banglaw ding adiai? Tami teptanlou Philistin mipi koi ahi phuat a, Pasian hing galkapte tambang a a tawh mawngmawng ahiei? achi hi. 1 Samuel 17:26.

David in Goliath a dou ngamna ding a, aginna hatsahtu tampite lah a khat ahi leh: David in Pasian thuchiamte a thei tinten a, Pasian ah aginna angah ziah a Goliath dou ding a hangsanna nei ahi. Pasian thuchiamte lah ah khat taahkhe vai: "mi koima na masang uah ading ngam sih ding uh..." Danpianina 11:25. David in Goliath pen ginglou mi, Pasian hing belou mi ahi dan theichian mama mai hi. Tambang din mun ah Kumpi Saul leh a galkapte'n Goliath a dou ngamlouna uh ahi leh Pasian thuchiam a ginzolou zia uh ahi. Tampen Hebrew liagialtu in ana gel bung 4 chang 2 na a, "Amaute'n lungdamna thu azaah ma bang un eite'n zong iza uhi hinanleh gintatna toh lungdamna thu a saanglou man un amaute a ding in a phattuamna umlou hi" achi toh kibang lel ahi.

Tuni'n leitung idamsung in gaal dou zing ihi a, igaalte izawzouna ding un Pasian kamchiam/thuchiam kichian tah a ithei uh poimaw masa ahi. Theichian chouh hilou in thuchiam bawl Emanuel Pasian khu eite toh umkhawm zing ahi chi zong thei tawntung vai. Tam thuchiam bawlpa eitoh umkhawm zing ahi chi manghil lou a, athuchiamte tangtung ngeingei ahi chi phawh zing chouh hilou a gingta tinten pum in idamlai ni galsaat saatzom lei igualzou ngei ding a, igaalte apua zungzung uh zong imu ding uhi.  

Ki-latkhiatna: Mangpa aw, na mite a ding a nang kamchiamte gingta tinten a, kamchiam bawltupa nangma toh umkhawm den ka hi lam thei ngitnget ding in Jesu min in kang ki-laan hi.. Amen!