GIVE ONE THING MORE: A GRATEFUL HEART

GIVE ONE THING MORE: A GRATEFUL HEART

GIVE ONE THING MORE: A GRATEFUL HEART
Pastor Dr Dongzathawng 
Devotional # 18 ( Vol 4)
Fellowship of Thirsty Souls n Hungry Hearts


Thirsty souls te I dam chiatna uh maw?
Ki thujah lou na sawt sim ta bang in I gen ut teng zong ana mang bei deh man hi.

Mangpa’n tuni khu nang ading a na lam-et lou thil hoi khat  na mu ni hisah ta hen!

TUNI TOPIC: “GIVE ONE THING MORE: A GRATEFUL HEART.”

Introduction:
Tulai Shillong a guajuh dan chijat huai hi. A buh in kibuh khia thaw hi. Naupang te school kai hun leh lah hunchet ah hing ju jel na lai hi. Hinanleh I tate i itna Jieh in ki jou hi. Jannin bang khat vei mai hilo in 2 vei tah ka pum in ka kawt dildel hi. HInanleh ka tate Neng khat zong a kawt ding uh ka phal sih hi.  Kei a Sinus nei pa ka pum a ka kot ding khaw kasa sia a, ka tate neu khat zong jong akot ding ka ut sih hi.  AKot lou tei tei ding uh khu  ka tup pen ahi. Itna Jieh hi ei. Ei pumtang a kawt sang in i tate neukhat a kawt ua class a vawt asah ding uh ki lung ngai jaw a, I pua sah kha lou eg.  Spare kengmaw ja te Jieh in  ki awi maw nan kidim hi. Tua mi ahi pa Itna, nu it na…

Tu a paisa Sunday khu kei ading a Ni man pha diah ahi. JIngkal lam in Shillong Lutheran Church ah hun ka jang a, anop mama hi. Nitah lam  in Mumbai ZCF te toh ka jang kia a nop sem hi. “Mangpa kipah ing ei. Na pulpit siang thou a ding tah lou hinanleng, ka din chiang a ka ngen a nang nusia den lou a na hepina nang mu sah Jieh in kipah ing! Hibang a Na min Jieh a kei lel tah hing  ngaina a hing chial leh hun manpha hing bawlsah hattuam te gualzawl ta in!”

Tu in thupi ah lut ta vai ele:

Tulai Pasian kung ah ka thumna a tam sim a, hinanleh khat zong ka munai sih hi. Ka dei mama te zong  bang ja tah in thum nanleng piah in ka um sih hi. Atawp in hia atung a 17th Cent. Lai a English Poet George Herbert thugen ka hing sim khah a ka lung muang ta hi:  ”Thou that hast given so much to me, Give me one thing more: A GRATEFUL HEART.” ( Our Daily Bread, 2020)“Mangpa thil tampi sim seng lou na hing Pia ta Thil khat ka nget be hi. KIpah theina, lungkim theina hing pia in” chi ahi. Dih na lawmlawm e!

Nei tam jieh leh i tenna mun environment or circumstance *nop te Jieh a kipah ding hileh *Adam leh Eve ana puh ngei lou ding uh hi a ka chi hi. Ajieh pen perfect environment- adei teng uh kimna mun, Bangma kitahsap umlouna mun Paradise- Van gam neu jaw ah Pasian in umsah hi. Hinanleh kipah nai lou in THEIGA (fruit) DANG khat dei nalai uhi. Theiga hijat neh ding, nehseng lou theiga chikim Pasian in apiah lai in a dang khat dei be nalai uhi. Tua khu mihing te hina dih tah ahi. Tuami khu michin in i lua sawn ua, niteng in ihinna uah  isulang lang uhi.

Isreal te Bangma sep ngailou in Pasian in jingkal teng in Angel te ann, Van ann, MANNA pia hi. Hinanleh lungkim thei tuan lou uhi. ”IF ONLY”!”Aw sa khat vei beh kine kha leh Oh Egypt e ih ann neh te khat vei beh  kineh kia leh..” Chi dan in anei lou lou uh lung gulh uhi.

Khawvel pumpi a Nam thupi pen, nam chin  leh gam chin a mi ten tenna ding a a et la uh… a mu ut uh United State of America ah kum chin in lungtang natna leh lungkhamna natna vei million 19 lam um uhi. 

Tu nai nou May 16 in NEW YORK State a a Buffalo City a super market ah mikhat in thau toh mipi te moh hut in mi 10 Amun ah shi ngal hi. Khovel a I ngai thupi pen uh leh I mu ut uh, iteen utna pen uh- India te diah diahin politicaian hi in,officer hi in, businessmen hiin, film star hi leh adem toh atate uh America a laisim sah, green card  mu sah, citizhen hisah tum in thei tawp sua ua,  Alang khat ah America adem in dem uhi.

Ahiin tunia i gen ut khu environment nop jiah, neh leh tah tui jiah, sum tam Jieh, nop sah Jieh, inn hoi jieh, gari hoi jieh, din mun sang Jieh a kipah ding hileh tunin Eden huan kaan Nuam um lou ding hi. Ahiin himun mama apat Mihing khelna kipatna leh huaise pen hing piang khia hi.

Ahilou leh USA khu  ”Land of maximum opportunity” “An American dream,”  “land of the free, home of the brave” bangkim ki ning chinna mun ahi. Ahi vang in 2020 mai in Amierca a suicide khu mi 46,979 pha  veve hi. 

Khawvel a ama leh ama kithat te study neu khat bawl lei ei India a kingaisang pen  IAS officer tanpha bang jat e khat um a, film star, singer, mi minthang, politician even pastor tanpha suicide in Ahinna kila uhi.

HIte in ahing gen ut  bang?Kipahna leh lungkimna leh lungtaina khu nasep jieh, lawchin jieh, hausat jieh, deitengkim jieh, duthusam tun Jieh, pan mun Jieh, neh tui jieh, gam tam pi mu Jieh te hilou hi. 

KIpahna tah tah khu JESU CHRIST ah um hi. Ahivang in gingtu tampi in Jesu a kipahna khu kibuai pi man lou in, hattuam buai in ki buai hi. Ministry buai in kibuai hi. Jesu kung a nisim a, ama hinna tui a ki dia nou a, Ahinna tui thuuh sem a dawn a, ama mel hoi et a, ama ang sung a kipahna siang thou leh dih tah khu va ki lungtai sah ding hina pi, ki man lou in ikim i pam, i loi i gual te ki en in ama uh lampi jui in Khawvel in ahing piah thei ding sa in adel in Kidel hi.

 Lungnopna kiching, hausatna dihtah Chrsit a um khu ki ngaisah man louin hawm guah del in I hun teng ki su bei hi.  Jeremiah in ka miten thil 2 a bawl khial uh : “My people have committed two sins: They have forsaken me, the spring of living water, and have dug their own cisterns, broken cisterns taht cannot hold water” ( jer 2:13) achi khu ahi. Hinna tuihing Christ nua sia  in Bel tawvang tui khawl thei lou Khawvel loupina a del in del in i del uhi. 

George Mac Donald thugen en kai vai: “Whatever a man does without God, he must fail miserably or succeed more miserably” achi khu  Ngai tua Tham ching hi. Pasian tel lou a lawchinna kichi te khu mangbatna leh gentheina suah thei hi. Lawchinna leh gualzawlna Topa thupha chia I lam pi pi uh khu i thei phah lou in Pasian apat hilou in Melma pa Setan hemna, van jat, leh  hawmguah ana ahi dan hi.

Tunia bang ding a lungkim thei lou, kipah thei lou, mi nei bang nei sawm, mi a eng eng, i nei lou neite thangsie leh dem leh soisel a i hunteng uh i jat bei uh ata diei?

Bangdang Jieh hilou hi. Thil khat inei lou jieh uh ahi. Gualzawlna ngen I nei ua, Pasain thupha nei leh gou ngen inei ua, Hinanleh Ama apat GRATEFUL HEART ina ngen kha sih uhi. Khujieh in bagn teng nei nanlei ikipah thei sih uhi.  Tunia I aam teng, idei teng, mi nei bang nei nanlei inei lou te dei gaw a buai jel jel ding hi jing uhi. 

Kei zong tu mama in thil 3 ka dei mama a lei la ding zong ahi sih a hinanleh ka budget chuh sukha idng hi. Khujieh in dei mama na pi ka dei lou sawm hi.

Tunin I dei lou te toh buai lou a i neisa te kipah dan thei ding poi maw pen pen hi. Tuami ahi ka buai pi tulai. Tunia i thupi uh Pasian in bangteng hing pia in, Inn vum in, dim let in hing pia nanleh ka hunta, ka lungkimta chiding ihi sih uhi. Aban dei bebe Nalai ding. Bei theilou a dei tou tou na lai lai  ding mihing te or gingtute ihi. (Pasian kung a Deina ahing pia te nget nonlou ding china hilou in). I gen ut khu kipah na ding inei te zong mang hil sih vai. Pasian in ineisa te mu theina ahing piah ngai hi.

Naupangte  mela/fair a I jawh pi a  amujou sie adei uh toh kibang ihi. 

Ahiin tunia English poet pa thumna bang e “Mangpa hijat na hing pia ta. Aban ah khat ka dei be  nalai hi. Tua khu KIPAH DAN THEINA LUNGSIM hing pia in” chi a I thum ding uh ahi ta hi.

I kivat u khu bang dang hilou in kipah dan theina lungsim ahi pen hi.

Tunin Pasian kung a I nget ding khu kipah theina hagau ahi. Hileh Pasian in ahing piahsah ahing gualzawlna asim a simseng lou te pi  mu vai in,   kipah i i  lam lam thei ding hi. Koima a va een lou a, koima van va lahsah ngai lou a, koima neisa va guh sah ngai lou,  a ei a teng toh kipah a Pasian phat phat thei ahi. 

Kipah dan theilei tunia i buaipi uh, ishi pi deh dehte uh a pomaw lou ngen ahilam imu ding uhi. 

Thoreau thugen : “A man is rich in proportion to the number of things he can afford to let alone” or “A man is the riches whose pleasure are the cheapest” chi hi. Tunin I kipahna uh man tam thei seng hi. I lungkim na ding uh Aman tam thei seng hi. Baan pha lou in mitampi i mual liam ta uhi. Tualeh kipahna bulpi( tuinah) nua sia in tua kipahna hawm guah del in mitam pi mu lou in mualliam ta uhi.

Tulai kakipahna pen khu Pasian khut bawlsa haichi lou hing te ahi. Tu May tan in chuh  Shillong ah Jawngta bei pan pan ta  a, ane nalai jong um hi.  Ha lui deu in Jawngta bei nai lou in   Singthupi hing tung Chet hi. Aban ah Tuaiteleng bang atui dan thei te adingin koi 5 Star hotel ann ki ngaise lou hi.  Tu in Singthupi zong bei nai lou in KHANGKHU hing dim ngal hi. Amin jong ling uih hinalai. KHangkhu kichi pen nidang lai in mihing neh ding in ka na en sih hi. Ka ji in aneh chiang zong a gei ah ka tou ut sih hi. SIngthupi chuh Ajie Jie um kasa hi. KHangkhu lawmlawm vang inn sung ah kineh da leh ka ut hi. Ahiin tu ha May  apat in khangkhu tui dan ka hing mu doh hi. A dangte ka ne ut non sih hi.  Ajungte khu a al dan Bus a ing pai chiang a Kohima lah a Bawngsa Gaw( dry beaf) plastic neu nou nou a ki tun te toh kibang kasa hi. 

Khangkhu duthei na ka nei thah pen ka kipah mama hi. Tualeh ka ta 3 te,  niteng a  school 3, leh timing 3,  a kava thah, ka valah thei nop kasa hi. Adiah in ka va lah chiang ua kaki mu tua hun uh tua mi moment khu nop kasa mama hi.

I gen ut Khu Khawvel ah midang te nei en en lei  ei nei lou tam ta lua ahidan ki mu sem sem hi. Tualeh ama uh te dem in  phah sawm lei idam sung a phah lou ding tam hi. A hiin ei tantawh a Pasian gualzawlna, Pasian hoina imute khu khat khat in sim lei kipah na ding tam hi. Hausa I kisah na ding tam hi. Tozer in “God, if thou dost never answer another prayer while I live on this earth I will still worship thee as long as I live and in the ages to come for what thou hast done already” achi khu  eithumna zong ahi ta ding hi.  Umjie khu Pasian in tunia apat a thumna khat zong dawng nonlou ding hita leh zong a dawn sa, ang piahsa simseng lou te jieh  in tu leitung dam sung leh kumtawn a zong Pasian phat phat ding ka ta” chi  ahi.

Tuni I thum na neu khat ang ki dawn nai lou Jieh a hun paisa leh tuni tan a simseng lou i thumna adawn leh thum lou jong ahing Piasa  hagau lam  leh tahsa lama Pasian hoina idawn te mang hil a lungkim lou a phun a Pasian tung a hel mai ding maw???

Tunia Pasian in ahing pie tam ta mama hi. Ahing piah ding a idei pen leh poimaw pen khu: ”Ahing Pia sa te Jieh a kipah dan theina lungsim ahi.  Tua bang silpiah Apiah khah te lai ah kei zong tel ut ing ei. Tuate lai a ka ki hel thei na ding in tua bang thilpiah hoi angen te lai ah tel ta vang. Tu mama in ngen vang.

 ”Thou that hast given so much to me, Give me one thing more: A GRATEFUL HEART.”

Mangpa’n kipah dan lungsim hing pia in,  ta kipah thei, gingtu kipah thei ding in hing siam Chiat ta hen Aw! 

Topa Thupha





No comments

Powered by Blogger.