Nu leh Pa Mitlhi Long a Taona leh Panlahna Chate Chung a Alang e

Nu leh Pa Mitlhi Long a Taona leh Panlahna Chate Chung a Alang e

Pastor Dr Dongzathawng

Devotional # 17 (vol 4)

Fellowship of Thirsty Souls and Hungry Hearts

Thirsty Souls member te

Mother’s Day Chibai!

TUNI TOPIC: Nu leh Pa Mitlhi Long a Taona leh Panlahna Chate Chung a Alang e

Text: There is a generation that curses its father, and does not bless their mother” -Proverb 30:11

Her children arise and call her blessed- Proverb 31:28

Tunin nang tapa nang ta nu na nu na vangbuah tai? Na nu kung ah nu hampha nu chiin na hamphat tai?? 

Tuin himi thu ki houlim vai:

Jannin Missionary challenge sau tah igel ta ua, a simsuah jou te patat huai leh mi hampha chivai! A sim thase ten chuh tawm leh jong sim tuan lou. Paulap maimai  hi. Tua mi thada te ading a thirsty souls ki gelh ahisih hi. Taimai tah a sim, tuikang ngah a Ana ngahte ading a kigel ahi. Group tuam tuam ah ki thon a, a sim khollou te ki hah sawmlou hi. 

Tuni Thupi ah lut vai. Tulai David Kakaap la phuah "Sangpen Pakai" ka lungsim ah hing ki lang lang hi. “Khangkhat a um hiin apa a hamsiet uhiin, anu a vangbuah sih uh” chi ahi. 

Abraham Lincolin  anu it mama a ki chiamte in anu agenna sim phot vai: "All that I am or hope to be, I owe to my angel mother’" No man is poor who has a Godly mother”

I topic uh “Nu leh pa mitlhi long a Taona leh Panlahna chate chung ah alang e” chi hi. Tunia nute Genthei tah ah panlahna mittui luang a thumna uh khu tate tung ah kilang hi. 

Khujiehin Lincoln in "Pasian mi nu anei khat koima a jawng a um sih" chi tawp hi. 

Pasian mi nu a neite, hagau mi nu a nei te sum leh pai a hausa teitei ding achina hi seselou hi. Sum leh pai neilou napi Lungsim leh hindan leh Kipahna leh lungkimna leh umdan tawndan lam a hausa achina jong hi thei hi. Ahiin nu Pasian mi numei te  thaselou ua, juau tatlou ua, Pasian in pilna pia, thumthum ua tuajiehin  a tate hinna ding, khankhua ding bol dohjou teitei uhi. Khujieh in tua a sepga uh khu tate tung ah hing kilang teitei hi.

Tunia Pasian mi nu a nei kichi a atate innteng butlou, lawching butlou, gual phalou,  khamthei gui toh awh den, saltang den chi khu Nu Hoi etsahna Hilou hi.

Lincoln in “Tu ka hina na leh mailam a ka hina ding a ka ki nepna tengteng khu Angel bang ka nu jieh chi mawh hi.” Lincoln nu in ama kum 9 in ana shi san ta hi. Hinanleh Lincoln ahinkhua pumpi khu  anu in kum 9 ahi sung in a foundation teng ana siam sahjou in, Amercia te present it huai penpen hi ding a chitna Nei ding in anu inn chi (seed) tampi Naupang Lincoln hinna ah Ana tu sah jou ta hi. 

Tunia ta fel tahtah, pil tahtah, kumpi na sem hiin, Pasian thu lam hileh bangkim a mi lawching ineite khu 90%  Nu hoi Jieh uh ahi.

Tunia thumthum mai, ann ngawl a thumna inn (thumna mual) juanjuan thum nu tampi bang ding a atate hoi khia joulou? Bangding a atate genlou a pasal uh zong joulou? Bangding a inn teng joulou? Bang ding a breaking through tung thei lou??

Lawchinnna leh gualzawlna khu thumna mai ah umlou hi unaute. Tehpi, tehpu tung a moute/nute hoina in teehpi teehpu te apat Pasian in ana kep sah Vangbuahna hiing pei sawn um hi. Tuami khu tehpi leh tehpu te toh kaal hoilou jieh a vangbuahna luangsawn theilou, a block khat umthei hi. Tua mi i suh siang masia thumthum nanleh vangbuahna pei suah/luangsuah theilou khat um hi. Himi ahi ka gen gige: "Moute na pasal tungtawn a luangsawn ding Nu Leh Pa vangbuahna khu a khah tu in pang sin” ka chi gige hi. 

 

Ahin tunia i nu thum mi leh lamlam tampi te khu khaini leh talap addict mama pite jong ahi uhi. Hi themthem zong ki sum joulou, atate uh hoi ding sang a ama uh khaini toh kikhen ding hamsa sa jaw uhi. Ahilou leh thumthum na pi pasal nuai a ki tulut utlou, aluh a luhlul, leh thudei nupi thum pawl lah ah tam ding hi.

Ahilou leh dihtatna  sum leh pai a ginumna, sepna chitahna te  ngaisah mongmonglou a thumna mual juanjuan mai jong tam va. Tuate khu nuhoi kichi theilou hi. Thumna mual jotlou ding, thumlou ding china hilou Ahivang a i thumna khu i hin dan in a back up ngai ahi.

Tuni I gam a mi lian, milal, mi lawching ichite ama un atheisiam leh siamlou, anu apa tung a akipah leh kipahlou thei sing. Ahiin  90% te khu nu leh pa te mittui ga leh kum tampi a nu apa khawsa ul ga ahi uhi. Ahiin abaan a ama uh tate tung a luangsawn ding pen khu ama uh hindan leh umdan ah kinga ta van. Ama uh hitan Atun na ding ua anu apa ten a man tampi ana piah ahi a, tunin ama un Atate ding un aman bang tan in a piajou na ding uai chi ah ah kinga ta ding hi. 

School Hoi, van jat Hoi, gari hoi, Mobile hoite a kinga hilou hi. Hite poimaw nanleh lawchinna ding tah tah pen Nu leh pa apat hing paisawn Pasian vangbuah a kinga ahi.

Khujiehin Lincoln thugen ah lut kia lei Nu hoi neite Pasian it nu nei te jawnglou ding. Gualphalou a um lou ding, khutdaw a umlou ding china ahi. Nu hoi Pasian mi in a tate mi suah ngeingei ding hi.

Susannah Weseley in ta 19 nei hi. Ajawng dandan uh chijat huai hi. Hinanleh atapa John Wesley in Mangkang nam te 18th centuray a a khang uh ahut khiah mai hilou in a nam pumpi uh bol hoi sah in, hausa sah jou hi. DL Moody nu Betsy Holton a pasal si jou a jawng dandan chuh hepi huai hi. Ahiin atapa in Amercian mai Hilou 19th century sung a Pasian mijat pen hing suah a, mi sang tampi hagau leh tahsa in Hausa sah hi.

Umjie khu Pasian mi-nu in Pasian bel kawm a, genthei tah a, mittui leh khawsa ul toh chitah leh dihtatna toh, Silhoi bawl haichi tampi tu kawm a pan alah chiang a lutna innsung bang chi tah a nat leh hamsiet inn sung, bangja tah a naat leh paan kai, bangja tah a jawng leh ngiam hinanleh hing phu tou in hing kheel lam dang hi.

Ruth, a lutna insung khu pasal 3 khat zong dam mual suahlou, shi hun lou a shi,  Pasian hamsiet insung hinanleh gualzawlna inn sung in heidoh sah jou uhi.

I gam a nu thum mi, numei lamkai, Pasian mi kichi a apasal jong joulou, atate zong joulou kham thei toh naat siang, hing doh joulou,  kichite pen nu hoi, Pasian mi, chi teitei theilou hi. Ajiehpen nu hoi  leh hoilou atate tung ah kilang ding hi phot hi. “Atate a kipan uhiin Mi hampha nu” achi ahi ( Proverb 31:28)

Pasian thu I Laisiangthou in ahing gen dan a chuh nu hoi in atate hiin a pasal hileh bawlhoijou, siampha jou, tungding jou chi ahi. Atate leh ah innsung mai hilou in a pasal khanggui tanpha suh lamdang sah jou hi chi ahi.

Tunia tate joulou, pasal jong joulou Pasian mi thum mi chia diangdiangte, lamlamte inn a apaikia ding un, bang e ka bawlkhiel, bang chi ka hia, ka teh pi, ka pasal tung, ka pasal tanau te tung a bang e ka bawl khial chia  a pindan a Pasian Abuan a, a kisuhdih ding uh ahi. Mi lah a hagau mi nu chia mite pata ding dei mama in inn sung a pasalte leh a tehpi leh amounu leh  a pasal lamte adinga dawisie pi bang i gam ah mou hii, tehpi hii leh tam mama hi. I gama hibang numeite khu  Devotion kai taima pen, numei lamkai lian, revival deldel, a lamlamte hi ut uh hi. Alung sim uh lah a siet dandan gen ding bei. Setan in zong “nang nu vang kei hing su minsie vawt chiah” achi thei khop a Gilou  Vengtangin lah ,“hinu apian thah leh koima Piangthah lou um sih va” achi thei a um… hi bang numei veng chin, hattuam chin in ki keem mama hi. Genseselou in ithei Chiat uhi. 

Alangkhat ah Hannah bang a lungtang naa, atate leh a pasal Jieh a kapkap, atehpi leh a pasal lamte, Ahilou leh  Amou nu bawlsietna teng jiah a lungtang kehgop a kapkapte lungkiahna ding gen ka hi sih a, ama uhte hanthawn I hi jaw.

Tunia na mittui luangna, na hasiet a na kaakaa na, na gentheina khatvei chiangin hing gasua ding hi. “Kaana  Guam khu Tuinah putna nang suah sah ding hi.” ( Pslam 84). Tuami lampi ahi Bible a numei thupi leh Christian khangthu a nu thupi ten a jawt uh.

Koi nu, koi mou, koi tehpi, koi pasal, ko ta jong abul kipatna ki bang chiat ahi. Ahiin koi pen Khoi tan tung? Khoi mun a khawl? Khoimun a puuh? Khoi mun  a inkuan te tun pi?  chi khu ama uh response dandan leh ama uh hina ah hing kinga ta ding hi. 

I gensawm pen khu Nu mei hoi in a innten siampha a, a pasal, atate, a teh leh mou leh , a khanggui tan pha bawlphajou hi.

A lutna innsung, a kipatna lungkham huai mama nanleh ama’n hing lamtou hi. Pasian hatna leh thumna toh, mittui toh khawsa ul tampi toh hing phutou in hing siampha hi chi ahi.

Bangchi Pasian mi kisa in lamlam in numei lamkai hinan leh chin natate tung a na nasep ga ang kilah khiah joulou leh um maimaita in. Pasian buanin, nang leh nangki Khual in ki sudih in. Na teehpi kum tampi genthei sah nu or Tehpi na hi leh na mou nu delmang a, na tute taga suah sah nu zong hi Kha va teh…Na mou nu kaa na mittui paap um hi. Na teehpi hasietna mittui paap um hi. Lamka ah numei Hibang  tam hi. Khuo chin, hattuam chin in inei hi. Hibang numei te Pasian in bang chih thum in thum nanleh Pasian in dawnglou ding hi. A kalchiang i thum teitei khu i luhlalna suh latna ahi. Pasian in Joshua kung ah “thumnon sin ding khia in lan na mite su siang in” chi hi( Joshuah 7).

Tu in atawpna ding ah ta lawching kichi tate thei ding:

“Nu leh pa mittui luang a thumna leh panlahna tate tung ah hing kilang hi” Tunia I lawchinna, hitan i tun na tekhu nu leh pa mittui, khawsa leh gentheina ga ihi hi. Mang hil sih vai.

 Sil 2 en vai:

1).Tua teng hing kipatna na nu na bawldan na lungkim natan in nabawl nai?  Na gual zawl nai? Na bawllou leh tuni khu nang Ading a hun pha Pasian in ahing bawl sah ni ahi. A pianna nu hamphat pia tu, vangbuah tu, gualzawl tu tapa na hi nai? Na Hilou a, a kap sahsah, a hasiesah sah tapa na hileh tunia himi na khanggui a pei suah ding hamsiet khu na bei sah or na suhtop ngaita hi. Na nu haan in la ngaidam ngen in la, thupuhna damsung a ding bawl in. Naji nata, na innteen, na khang sawn ding khu na nu na bawl dan ah ki nga ahi. Na nu na hing nu, kipah sahlou pi a, hattuam lamkai, social ading a mi patat huai, mission chairman, hattuam upa na hi thei hi Ahiin na hinkhua leh na khangsawn a peisuah ding vangbuahna A block khat umta hi. Tunin tua mi sufel in, susiangta in. 

2). Aban ah khen khat anu tung a lungthah,lungkimtheilou, te: Ajieh pen anu in apoimaw lai tah a Ana taisan,  angeh lai a ana mou thah san. Ahilou leh midang khut a ana koi, ana nual hithei hi.  Anu it - nawi tui Ana tep kha lou, anu angsung Ana tang khalou, a hinkhua anu etkolna ana taante ading in tunia na phunphun a, na ki ngaitua tua a, na lungthahthah in nang leh na ji leh na tate adiing in silhoilou tampi tung ta hi. Nang liamna khu na tate pie sawn, law sawn non sin. Tunin “let go and release it” chi hun ta hi. Himi in ahing subuai sengta hi. 

Na nu Adam nalai ahileh va pai in lan na ngaidamna va puang khum in, va Gualjawl in. A damnonlou ahileh zong a haan ah va puan khum in. A dam lai ahileh lah thupha pia in, vang buah in.  Aman zong ama story gen ding tampi, tu tan a gen khiahlou nang toh kisai nei ding hi.

 

A tehpi, a pasal, na nite toh kisai tampi a hinn khua sungnung pen a phual dap  a hinkhua pumpi a puah gih leh ling banga  apuah umding hi. Tuate thei le chin ngaidamlou ma lah hepi in na kapkap ding hi.

Aman a hinkhua pumpi in himi genna ding na kung ah chance nei ut in thumthum hi. Gen mannonlou a hing na mualliamsan hita maithei hi.  Khujiehin nang Piangthah Pasian it tapa or tanu in na nu ngaidamna piata in La, na kal uh damsah ta in. 

Hite gel bawl ding in tunin ikichial hi.

Hunsah ta vai: Tuni i thupi khu tunia i lawchinna leh gual zawlna te khu Nu leh pa Mittui luang a thumna leh panlahna tate tung a kilang ahi a. Tualeh nuhoi etsahna khu tate tung ah kimu hi. Tate khamthei guitheih toh ki dim in nu hoi, Pasian mi hitheilou ding hi. Na hina, tahtah na tate tung ah kilang hi mai hi. Ahiin tunia a kilang nailou, nu kapkap nalai, naat dildel nalai, mittui dawndawn nalai, mial nuai a tautau nalai te Mai lam a thupi tah a hing ga khia  ding zong  nu tampi um nalai ding hi. Nang zong tuate lah a khat na hi.

Nu hoi Psaian mi Neite tate khu jawng ngeilou hi. Jawng ichi ching sum leh pai hisese lou hi. Sum leh pai hau mama in Lawm leh gual neilou, mite ngainat leh jatat hi lou, hoina leh phatnna apia sawm ding, a hawmkhiah ding neilou mi hausa tampi um hi.

 

Nu hoi nei te sum leh pai ah hausih naleh thilhoi apiahsawn ding tampi nei uhi. Tuate khu inam ua ding ua ih asset (gou) te ahi uhi. Sum Piah ding neilou napi a ahoina uh tampi piah khiah ding nei veve uhi. Nei leh gou mi piajoulou na pi itna leh khuatuana pia  khiakhia thei uhi.

I Mangpa Jesun mipi 5000 val ann neloute a vah na ding in naupang khat in Nga 5 leh tanghou 2 hing thaw khia hi. Tua mi khu I Mangpa’n  gualzawl in mi 5000 neh kham ding in pungsah hi. Tua naupang leh anu khu mi hausa insung  hikhel khellou ding uhi. Ahivang in mi 5000 te vahn ading in Pasian vanjat suah uhi. Ajiehpen nu Hoi anei jiehin tua naupang in anei penpen piahsawn, hopsawn leh luangkhiat theina lungsim nei hi. Tuami ahi hausatna kichi. 

Tunin nu leh pa te *i tate khu society adinga gualzawlna ahiai? Hamsietna?*Officer lianpi leh hausa na pi koima adia gualjawlna hilou tampi um hi.En  ih jirtir dan ah kinga dinghi. Ei sepga, tuga khu i tate tung a hing kilang ding ahi mai hi. 

Mangpa’n  nu Hoi in hing siamta hen! Mangpan  nu hoi ta ten I nu I vangbuah ding mang hil lou ding in hing panpi ta hen!

Topa Thupha! Shalom Shalom