Sahem Number 666 Chungchang Kihilna - Henzathang Haokip M.Th
Tam article Sahem Number 666 Chungchang Kihilna ahi leh Thadou kamham a unaupa Henzathang Haokip (M.Th) in agel ahi. Tam article in a hing tung ding TRIBULATION hun a Anti-Christ in azat ding 666 (Mark of the Beast) tungtang chiantah in agial hi. It is worth reading. Simtu tengteng Mangpa'n theisiamna hing pechiatta hen.
Contact: (Email:thangboi13kip@gmail.com | WhatsApp: +91-8838252101)
Sahem Number 666 Chungchang Kihilna - Henzathang Haokip M.Th
Thumakai
Thuphon 13 sunga kisun sahem melchihna 666 chungthua hin ngaidan le ledoh dan chom chom tampi aum’in ahi. Hijeh a hin hoiche pen hi adihpen ham? tihi hetthem ahahsa lheh in ahi. Bible pumpi sunga hetkhel jeh a boina umpen thuhil ahi kiti leh seikhel hibehseh louding ahi. Hiche chungthua ngaidan chom chom tampi aumtheina jeh hi aledoh dan (interpretive method) jat chom chom aman jeh-u ahi. Chule hiche chungchanga ngaidan dihlou tah khat chu, sahem le a number hi kichat umtah thu kiselguh, van pao’a kisun hetdoh jou hilou hidan’a ngaitona hi ahi. Chukitle hiche chungthua iboinau akhohpen khat chu, Sahem number hi achesa hitam, tuphat a um thilsoh ham, ahilouleh ahunglhung ding thil ham ti ho ahi. hiche kiseina sunga hi let dan kimangho akhoh cheh ni le itih phat-a thilsoh ding kisei ham? ahilou jongleh solchah John’in amaphat laiya houbungho kom’a ipi tupna neiya ajih ham chule tulai christiante ding’a ipi thu eihiltheiyu ham? hetchet ding akul’e. Hiche thu sunpa’n atup chu sahem number 666 hi hiche mong mong ahi ti ahipon, aledoh dan chom chom phabep iseidoh nom’u joh ahi.
Sahem Number 666 Sim Ding Dan
Thuphon 13:17-18 dungjuiyin, sahem melchihna chu amin number (666) hiding ahi. Hichu simtoh (calculate) ding akitin ahi. Hilaiya ihilchet diu chu, amin chu iti number 666 sohdoh theiya chule hichu iti sim ding ham ti ahi.
Hetchet theina ding in, masanglaiya Greek mite le Hebrew mite number simdan hetmasat angaiyin ahi. Greekte le Hebrewte chun number jem tua Englishte’a bang hin achom anei pouvin, a alphabet’u A B C kigol banga chu anumber’u ajong asimtha’u ahi. Vetsahnan, A- 1, B- 2, C- 3 tia asim’u ahi. Hiti chu ahileh, sahem number simding dan chu number 666 hi ABC lekha jem a heidoh ding tina ahi. Hichea hetding khat chu 666 hi gup gup gup (six six six) tia kijih ahipon, jagup le som gup le gup (six hundred sixty-six) tijoh a kijih ahi. Hitia chu Sahem (antichrist) chu koi ham ti holdoh nadia Greek/Hebrew lekha chang’a kijih min (name) chu number jagup le somgup le gup to kitoh em tia simtoh ding tina ahi. Vetsahnan, Min Latinos hi number a isim a igopleh 666 asoh in ahi. Asimdan, L- 30+A-1+T-300+E-5+I-10+N-50+O-70+S-200=666.
Achunga iseiyu min number kisimdan hi “geometry” akitin, John in Rev. 13:18 a “lungthim them’in hiche sahem mohor chu sim hen” tia asei hi achunga iseiyu simdan hi asei hitei dia ginchat ahi. Ajeh chu hichetobang min number a kisim hi, Pompeii khopi lui mun’a songpheng khat a akimudoh in ahi. Hiche songphenga chun “ken nungah khat kalungset in, ama nu number chu 545 ahi” tin akisun in ahi.
Hiche min simdan (method) mangchan mi ijat hamkhat chu antichrist ahitai tin anakisei tan, number 666 to kitoh loijong chu anaum thouvin, hinlah phat ahungche che jin ahilou’u ahung kihedoh kitjin ahi. Ahileh, koi mong mong kiseina hiding ham? Solchah John in hiche thu ajih a chu koi aseina hija? chule athot houbung mihon asim’uva chu koi kiseina ahi tia ahet uvam? Oleh John’in jong ahetlou chule athot houbungmi honjong ahetlou hel’u thu ajih khattou ahidem? Hiche thudoh hohi sunjom uhite.
Rome Lenggam le Sahem Number 666
Solchah John’in Thuphon lekhabu hi Rome vaihopna’n nasatah a Jesu minjal’a suhgentheiya um Christian hon hansanna le lhamonna aneitheina diuva anajih ahi. Hiche hi a lekhabu isimleh hetdohthei ahi. Vetsahnan, John amatah houbung miho henga akiphonna chun, Jesu Christa jala hesoh genthei nathoh khompiu keima John atin ahi (Rev. 1:9). Chule Pergamum houbung mi Antipas chu, Jesu thu ahettohsah jala kithat ahi akitin ahi (Rev. 2:13). Hichea mudohthei chu, chuche phatlaiya Christianho chu Jesu tahsan jala suhgentheiyin aum uve ti ahi. Houbung thusim’in chuche phatlaiya Christiante sugenthei chu Rome mite ahi ti eihil’un ahi. Iseinom’u chu Thuphon hi Christianho melma Rome lengvaihopna douna a John’in ajih ahi ti ahi. Hiti chu ahileh, Rev. 13 na a kimu sahem hi Rome lenggam kiseina ahin, chule number 666 jong hi Rome lengho lah a khat kiseina hitei ding ahi. Hiche thudol aban ban in anaveu hite.
Daniel Lekhabu a Sahem Lina le Thuphon Sunga Sahem Khatna Vetkahna
Daniel 7 na’a Daniel in Pathen mite (Israel) hin douva alenggam hin toupha ding lenggam li sahem lim in anamun ahi. Hiche sahem li ho chu, sakei bahkai- Babylon, savom- Medo-Persea, lutnu- Greece, chule Sahem-gimnei- Rome ahiuvin ahi. hiche ho lah a iseidiu chu ali channa sahem-gimnei hi ahi.
Hiche sahem li channa thudol a hin ngaidan ni aum’in, loikhat in Greece kiseina ahi atin, loikhat in Rome kiseina ahi atiuvin ahi. Greece ahi tiho loichun Media le persea hi lenggam nia asim uva chule alangkhat a Rome ahi tiho loichun lenggam khat Medo-Persea tia asim’u ahi. Hoijoh dihjo ding ham? Daniel 8:20 isimleh Kelngoichal chu Medo-Persea kigom a lenggam khat seinan amangin ahi. Hiche hi adih ahitheina ding khat chu, Sairus II in Astyages median lengpa 550 B.C. kum a ajochun hiche lenggam ni chu lenggam khat in agomkhom in ahi. Iseinom’u chu Daniel in amu lenggam li channa chu Greece hilouvin Rome joh ahi ti ahi.
Thuphon 13 a John in amu sahem twikhanglen’a pat hungpotdoh amun ahi. Hiche sahem hile Daniel in amu sahem ali channa hin kilona tah aneilhon in ahi. Twikhanglen’a kon hungdoh ahilhon in chule anilhon in ki (horn) som cheh aneilhon in ahi. John sahem hin luchang sagi aneiyin, hiche luchang sagi hin mol sagi avetsah in hiche molho chunga chu noti nu tou ahi atin ahi (Rev. 17:9). Hichea noti nu hi Rome khopi kiseina ahin chuti ahileh, John in amu sahem hi Daniel in amuto kibang, hichu Rome lenggam kiseina ahigel lhon e ti tahsan umtah ahi.
Iseinom pen’u chu, John in amu sahem masa hi Rome lenggam seina ahi ti ahi. Hiti chu ahileh, Thuphon 13 a kimu Christa doupa (antichrist/beast) hi John’in ama phatlaiya Christiante sugenthei Rome vaihomna aseina hitei ding ahi.
Number 666 le Rome Lengte Sakho chule Sumkolveina Kisam Kaidan
Thuphon 13:17 sung ivetleh sahem melchihna (666) neilou chun, nehle chah achohtheitah louding chule joh jong ajohthei louding ahi. Hiche umje chu, sahem melchihna a number hung kimang ding hi sumkolveina toh kimatna aneiye ti ahi. Hiche chungchang thu hetthem nading in, kum jabih khat (1st Cent.) laiya Rome mite sumkolveina le Rome lengte sakho kimat dan chule Christiente houto akito louna ho het angaiyin ahi. Hicheho chu anaveu hite.
Rome lengho chu amaho le amaho pathen kahi tin anakiseiyun chule alenggam sunga miho chun pathen khat ahoudiuvin thu anapejiuve tihi chuche phatlaiya lekhajih Josephus, Philo, Pliny chule adang dang hon aseiyun ahi. Chukeu hilouvin, thillui khol mihoa kon in jong hetdoh ahi. Hicheho lah a khat veleu hen, Domitian lengpa (amahi Thuphon kijih phat laiya leng anahi) vaipoh lai chun, Ephesus khopi a chun Rome lengte houna sakho chu anaumtan ahi. Thillui khol hon, Ephesus khopi lailung’a houbuh thupi tah khat sung’a Titus ahilou jongleh Domitian lim (statue) hidia ginchat um meters 8 a sang’a kitung amuvin ahi. Hiche kimudoh in eihilchet’u chu, Rome lengte limho chu mihon anahou uve ti ahi.
Thuphon 17 in vannoi lenghon ajonpiu notinu chungthu aseiyin, chule achaina chang 18 in hiche notinu chu leiset lengho chunga vaihom khopi len ahi ati’n ahi. Bailamtah a hetdoh thei chu, hiche phat laiya khopi, leiset lengho chung’a vaihom chu, Rome khopi ahin ahi. Hichu ahileh, Rome lengte chun hiche phatlaiya vannoi sumkolveina chu amaho khutnoiya akoiyu tina ahi.
Hiche notinu (Rome) hi leiset lengho le leiset chunga cheng hon ajonpiu atin ahi. Hiche hi thugoul atobang (literally) a ledoh ding ahipon, Bible in jonthanhoi ti thuchang hi milimdoi hou seina’a aman ahi (Ezek. 16:15-22; Hosea 3:1-3). Chule notinu hi Rome khopi kiseina ahileh, hichea jonthanhoi kisei hi nu le pa lupkhomna jonthanhoi aseina hilouvin, Rome khopi toh kiveina semkhomho chun Romete milimdoi jong ahouvu tina ahi. Ahileh koi lim (statue) ahou jiu ahidem?
Rome lengte thusim’a kimu dungjuiyin, 1st cent. B.C. kichailam le A.D 1st cent. kipattil laiya Rome lengho chu amaho le amaho pathen kahi tin alim hou anatungdoh uvin miho anakihousah jiuve ti akimun ahi. Rome toh sumkolveina neikhom miho chun Rome lengte lim (statue) anga bohkhup teidiu ahi. Jesu Christa penjou kum jabih khat (A D 1st cent) laiya lekhajih mi Suetonius in Caesar Augustus Puteoli tuikuol kongkaimun’a akholjin chun, Egypt a pat konga hung kitol (sumkolvei mi) ho chun ponkang kivon’in gimnamtui ahal’uvin lengpa chu avahchoiyun, amajal’a hinga chule sumkolveina phatah aneitheiyu ahi tin asam’un ahi. Hiche athilbolu hi Rev. 4:11 a kelngoinou (Jesu) kivahchoina to akilona tah aum in ahi. Chule thillui kholho le lekhabu jihho a kon kihe dungjuiyin, Caesarea kongkaimun a chun Herod lenglen in Rome lengho kihouna mun hou-inn (imperial temple) khat asahpeh in, hichu Rome gambih (province) lutna dia dongkot (gate) jong ahikit in ahi. chuti ahileh hiche kongkaimun’a hung kumlha sumkolvei miho hihen milhamho hijongleh pathen houna insung chu ahin jotpa uva chule Rome lengho lim kitung ang’a chu bohkhup teidiu tina ahi. Rome lengte lim (statue) kihouna mundang khat a kimu chu, Ephesus khopi kailhang mun lutna a chun Rome lengte lim akitung’in, kailhanga che miho chun hiche lim masanga abohkhup teijiuve akitin ahi.
Hicheho jouse iseilonau jehchu ahileh, sumkolvei mihon noti nu (Rome) ajonpiuve kiti chu, sumkolveina’a Rome toh kimatna neijousen Rome lengte lim abohkhup uva ahounau chu kiseina ahin, chule koi hijongleh Rome lengte lim ang’a bohkhuplou le houlou miho chun nehle chah angaikhoh ho chotheilou chule johtheilou ahiuvin ahi. Rome sumkolveina a jaova alengpa lim houlou ding kiti chu thil hitheilou ahi. Hijeh a chu, John in sahem lim masang’a bohkhuplou le houlou hochun chotheilou chule johtheilou ahiuve atihi, 1st cent. A.D. laiya tahsan chate hinkho dinmun aseina ahin chule khonung a Christa tasante dinmun jong hung hiding ahi.
Chutia Thuphon 13 a sahem Christianho melmapa hi Rome lenggam kiseina ahileh, amin number 666 neipa chu koi hiding hitam? Aban’a hin anavejom’u hite.
Nero-Antichrist Ahi tia Pansatna Thuhil (Nero redivus)
Sahem chu Rome lenggam ahileh, amin number neipa chu Rome lengte khat hiteiding tina ahi. Chuti ahileh, 666 chu Rome lengte lah a koipen mintoh kitoh ham? Chutia ibolleh Nero kaisar to akitoh theiyin ahi. Nero kaisar hi Hebrew a akijih leh nrwn qsr ahin, hiche number ho chu isim a igopkhomleh 666 asoh in ahi. Akisim dan chu, Nun - 50 + Resh - 200 + Waw - 6 + Nun - 50 + Qoph - 100 + Samech - 60 + Resh – 200 = 666. Hijeh a chu John in sahem melchihna hichu amin number chule number chu 666 ahi atihi Nero lengpa, Christiante nasahtah a anasugentheipa aseina hitei din Bible them tamtah’in jong atahsan uvin ahi.
Thuphon 17:8 in sahem chu anaumsa tua umtalou chule khonumgle hung umkit ding ahi atin ahi. John in Thuphon ajihphat laiya chun Nero chu hung thoudohkit a aleng touna mun ahung kilokit ding ahi ti thukithang mihon jong atahsan u anaum’in ahi. Hiche hi Nero Redivus (Nero thokitna) ti’n akihe-e. Sibylline Oracles 4:115-139 chun Italy a pat hunga Jerusalem chunga gal bolding, Rome mi Christa doupa, ama chu Rome lengpa Parthian gam khelpeh a jammangpa tin ajih in ahi. Hiche gaothua kisei mipa hi koidang hilouvin Nero lenglen ahi. Kum jabih khat (1st cent.) laiya lekhajih mi Suetonius in ajih dungjuiyin, Nero lenglen thi chun agolngai hon kum ijat hamkhat sung chun alhan chunga pahcha agathe jiuvin chule Nero chu athipoi ama hung kilekit a amelma ho ajoding ahi tin aseijiuve. Chule Sinylline Orcacles in aseibe naa chun, Parthian lengpan athalheng mi Rome a asol in Nero hetjingna chu ajabol diuvin tepna aganeisah e atin ahi. Hiti chun Nero hung kilekit a alaltouna ahunglokit ding ahi ti tahsanna anaum in ahi. Kum jabih khat (1st cent.) laiya lekhajih Dio kitipan A.D 69 vel chun Nero hung thoudoh kitipa kahi ti mi khat anaum e ati. Chule chuche jou kum somni nungin jong Nero thoukit kahi ti mi khat aumkit e tin Suetonius in aseiyin ahi. Hilaiya iseinom pen’u chu, sahem ama chu Aumsa, tua (John phatlaiya) umtalou, khonungle hung umkit ding kisei hi John in Nero aseina hidia tahsan ahi.
Judaten Nero chu thilha lengpa Belial ahi atiuvin ahi (SibOr 3.63-74). Chule Ascension of Isaiah 4:3, 13 na a chun Nero hi thilha lengpan thilse bolna dia amanchah pa tin akisun in ahi. Houbung thusim ivetleh Nero chu Rome lengho lah a Christiante sugenthei masapen in akihen chule amisuh gentheina chu gimnei le melse tah in akihekit in ahi. Hicheho ivetleh Rev. 13 a thilha lengpa (dragon) in athaneina jouse apeh sahem Christa doupa kititoh akibah natah aumkit in ahi. Hicheho jouse jeh hin John in sahem tia ajih hi Nero kaisar hitei dia ginchat ahi. Nero amatah hungkile ding ahilou jongleh alhagao (in the spirit of Nero) a hungding tia tahsanthei ahi.
Solchah John in alekhajih chu chuchelai phat a Asia minor a um houbung sagiho henga anathot ahi. Athujihho hi chuche houbung mihon ato’u boina le hahsatna hotoh kisaiya ajih ahi. chuti chu ahilouleh khonungpeh a hunglhung ding gaothu hobou ajih chu hiche houbung miho dia chu ipia phachom ding ham? Houbung mihon John lekhathot asim’uva chu amaho dinmun kisei ahi tia alah uva, achunga iseihou jouse hi alungmit’uva amudiu tahsan aumlheh in ahi. Achunga kisei jouse hi adihlou khah jongleh John in sahem hi Rome lenggam seina’a aman ahi tivang hi notthap thei ahipon-thudih ahi.
Ahileh, chutia sahem chu chuche phatlaiya thilsoh kiseina ahileh, khonunga hungsoh dia kisei antichrist le anumber 666 hi thujou kisei ham? Ahilou jongle tule khonunga Christianho le 666 in kimatna anei nahlaiyem?
Asohsa Ahitan Hungsohkit Nalai Ding Ahi
Bible’a thilsoh/ahungsoh ding kisei abangkhat hi thumun khat kalval aseina aumin ahi. Vetsahnan, Labu 22:18 na’a kijih, “Kavon jouse akihom’uvin, Kaponsil jouse jong avangpha pha chang hen, tin vang akisantauve” tihi Labu jihpan ama hinkho thu asei hijongleh, Jesu thini jong chun aguilhung in ahi (John 19:23-24). Chutobang machun, 34:20 na’a kijih, “Pakaiyin agu achang jouse avet tup pehin, agu khat cha jong akiheh bongpoi” tijong hi Jesu thi ni chun aguilhungin ahi (John 19:33, 36). Chule Isaiah 7:14 na’a melchihna naosen, nungah khat’a kon hungpeng ding, kisei jong hi, Juda lengpa Ahaz koma Jerusalem galmiho khut’a pehdoh a aumlou ding melchihna’a kipe hijongleh, Matthew 1:23-24 in naosen Jesu pendol kiseina ahi atin ahi. Bible jih hon amaho phat’a thilsohho to kisaiya ajih-u hijeng jongleh, Pathen tonsot thilgontoh dungjuiya chu, khonung’a hunglhung ding thilsohho jong anajaoji ahin ahi.
Chutobang’a chu John’in sahem chungchang thu ajih jong hi ama phatlaiya Rom mite vaihomna noiya Christiante to kisaiya thilsohho ajih hinajeng jongleh, khonunga leiset lenggam kichai kon’a thilsoh ding jong ahoptha ahi. Ajeh chu, sahem chungthu kijih abangkhat hohi john phatlaiya Rome lengvai homna’a chun anasoh naipon ahi. Vetsahnan, Sahem thaneina ding phatsung hi lha 42 hichu ni 1260 ahin (Rev. 13:5; 11:2-3), chule hiche masanga chu sahem’in Israelte to kichamna asemding (Dan. 9:27) tiho asoh naipon ahi. Ahileh, chutia khonung thilsoh dingjong ahinahlai leh itihleh hungsoh ding hitam?
Sahem Number 666 Kimanna Ding Phat
Sahem (antichrist) akiseina jousea athaneina ding phatsung akipen ahi. Hiche aphatsung hi kum thum le akeh (3½) ahi. Kum thumle akeh hi jatchom chom in akiseiyin, hiho chu, lha 42 (Rev. 13:5; 11:2), nikho 1260 (Rev. 11:2), phat khat, phat ni, chule phat kehkhat (Dan. 7:25) ahiuve. Hiche kum thum le akeh hi itihphat kiseina ham tia ikholleh, idang kiseina hilouvin, Daniel hapta som sagi channa, kum sagi, kum thum le akeh a kihom khen, anukhah pa kiseina ahin ahi.
Daniel 9:26-27 dungjuiyin, hapta somgup le ko kichai teng, thao nusapa (Messiah) kipaidoh ding, chule muntheng (Jerusalem Hou-inn) kisumang ding ahi tin akiseiye (v.26). Hichu A.D. 70 a Rome sepai jalamkai Titus in Jerusalem khopi le a hou-inn asuhmang chu aguilhunna ahitai. Chujou leh aman (leng chapa/antichrist) mi tamtah toh hapta khat (kum sagi) sunga dia kitepna asemding ahivang a hapta kimlahle kitepna asuhkeh a kilhaina gantha le thilto ho jong asuhhai ding ahi (v.27). Mi tampin chang 26 le 27 hi achejom danin aseiyuvin ahi. Hinlah, hiche hi adihlouna aum’e. Ajeh chu hapta 69 kichai A.D. 70 a chu muntheng (Jerusalem hou inn) kisumang a, tu nichan a kithah tundoh kitnailou ahi. Chuti ahileh, hapta 70th channa kimlaiya kilhaina le thilto (Jerusalem hou-inn a kibolji) kisumang ding tihi akijom hilouvin khonunga hungsoh ding ahinalaiye tihi kicheh tah-a mudoh thei ahi. Iseinom’u chu, antichrist thaneina phat kipe kum thum le akeh hi Daniel hapta 70th channa kum sagi, kum thum le akeh a kihom khen, anukhahpa ahin, chule hiche hi khonunga hungsoh ding ahinalaiyin ahi.
2 Thessolinica 2:3-7 dungjuiyin, sahem (antichrist) hi ahung kiphondoh louna dia akham/atingden (restrainer) khat um ahi. Hiche akhampa hi akilahdoh doh tengle amachu hung kilangdoh ding ahi. Hilaiya akham kiti hi Lhagao Theng kiseina ahi. Lhagao Theng Christa houbung umpipa chu kiseina ahi. Lhagao Theng kilahdoh ni hi houbung mithengte lahtouva aum nikhou ahin, hichu mithengte lahtou (rapture) tin akihen ahi (1 Thess. 4:15-17). Chuti ahileh, mithengte lahtou masanga antichrist kiphong louding chule number 666 jong kihom nailou ding ahi. Houbung mithengte lahtouva aumjou phatle, Christa-doupa hung kilangdoh intin, Israelte toh kum 7 phatsung adia kitepna asem a, chamndel a khosa diu ahi. Kum thum le akeh alhin teng kitepna asuhkeh a hou-inn sunga ama Pathen’a hung kitung ding, chuteng mi jousen ama ahou nadia thupeh khoutah ahinpeh ding ahi. Chua anomlou jouse ahin suhgenthei ding ahi. Hiche phat hileh number 666 mangcha a amiho ahin melchih ding ahi.
Number 666 Kiman Dingdol Vetchilna
Sahem melchihna 666 hi suhgentheina khonteh (great tribulation) kum thum le akeh nunung sunga kimang ding ahi. Ahileh,666 hi Bible in aseibang chet a hi khut le chalpanga number 666 kitah mong ding hinam? Ahilouleh thil jatchom khat vetsahna (symbolic) ahidem? Hiche thudoh teni hi hiche mong mong hi adih ahi tia donbut hahsa ahivang in, 666 ledoh nadinga lampi ni aumin ahi.
Atobang Chet a Ledohna (Literal Interpretation)
Bible’a akijih thugol bang het a ledoh (literal interpret) ding ahi tihon apomdan’uvin, 666 hi atah tah a hungsoh a chalpang ham khut ham a hung kitah ding ahi atiuvin ahi. Hiche ngaidan pomhon aseiyu chu, John in koichu antichrist ham ti hetdoh nadinga a number 666 simding dan asei (geometry) hin atobang chet a leding angaidan atahlang’in ahi. Chule number hi atah tah a hung kimang ding ahi atiuvin ahi. Chujongleh number 666 neilou hon joh theilou chule cho theilou ding kiti hin, koi chu koimi ahi hettheina melchihna aumding angaisah in ahi. aseikit’u khat chu, antichrist thaneina ding phat kipe lha le nikho jat kiseiho hi atahbeh a hung guilhung ding ahi. Ajeh chu, hiche phat hi Daniel hapta 70 lah a khat vat nalaipa ahin, hapta 69 ho bon atah a aguilhun leh, hapta khat vat nalaipa jong atah a guilhung tei ding ahi. Chutia avaihomna ding phat kisei hi atah ahiding leh, anumber kisei jong atah hiding ahi. Hiche ho jouse jeh a hi 666 hi atahbeh a hungsoh ding le kimang ding ahi tia atahsan’u ahi.
Hiche mudan pomho hi alhangpin Thuphon lekhabu sunga kijih gaothu hohi khonunga tichu leiset kichai kon Jesu hungkit masangjep a sohding thil jeng ahi tiho ahiuvin ahi. Ahinlah iseisa bang’un, thuphon a kijih gaothuho hi leiset kichai kona soh ding thil bou ahipon ahi. Hiche mudan aboina chu, Nero Kaisar min’a Antichrist hung mong ding hinam? chule John in 666 simding dan asei (geometry rule) mangchan mi chom chom hon e.g., Pope, Adolph Hitler (German dictator), Ronald Wilson Reagan (former U.S. president) chule adang dang ho chu antichrist ahi atiuvin ahi. Hiche tobang simdan hi ijom nahlai uleh antichrist dang dang jong ineibe be nahlai diu ahi. Number 666 chalpang ham khut ham a mutheiya ahung kitah ding jong ginchat aumbehseh pon ahi.
Alimgoung Vetsahna Ahi (Symbolic Interpretation)
Hiche ngaidan dungjuiyin number 666 mahor kinam ding kiti hi mi khat’a hina avetsah joh ahi atiuve. Ajeh chu Thuphon sunga thu kijih atamjo hi akijihpa kiseina hilouva thilchom khat joh seina’a kimang ahiuvin ahi. Vetsahnan, Sahem – lenggam (Rev. 13:1-2), Noti nu – Rome khopi (Rev. 17:7-9), Ki (horn) – lengpa (Rev. 17:12), Numei naovop – Israel (Rev. 12:1-2). Thuphon’a lim (figure) kijang adang jouse thilchom koha (symbolic) ahileh 666 jong hito banga chu kimang hiding ahi atiuvin ahi.
Hiche mudan hi adih theina ding ajeh dang khat kit chu, Thuphon sunga satan le anatoh kijih ho hin Pathen le anatoh ho lim atho (mimic) ahi. Vetsahnan, dragon, twi sahem, lei sahem (satanic trinity) – Pa, Chapa, Lhagao Theng (Holy Trinity), thihel’a kisat kiledoh kit (Rev. 13:12) – Jesu athia athokit, van a kona leiya mei lhahsah – Elijah’n van a kon mei akoulhah (1 Kings 18:38) le hettohsah mi ni kam’a kon mei potsah thei (Rev. 11:5) le adang dang ahi. Number 666 mahor kinam ding kiti jeng jong hi Pathen mahor kinam ding (Rev. kiti tobang chet satan in athona ahin ahi). Tahsan chate Pathen in amahor anam ding kiseina mun ho anaveu hite,
“I-Pathen sohte ho chal a melchihna kanam masang seuvin nang hon leiset le tuikhanglen chule thing ho suse hih ta diuvin,” ati (Rev. 7:3).
hule leiset chunga hampa louhing anche dong chule thing khatcha suse louhel’a achal’a Pathen mi melchihna kinamlou mihobou chu nasuhset ding ahi, tia kaseipeh ahiuve (Rev. 9:4).
Chujou chu veuvin, Kelngoinou chu Zion mol chunga chu adin kamun, mi sang jakhat le sang som li le sang li toh ahi; amaho chu achal’uva ama min le a-pa min kisuna ahi (Rev. 14:1).
Chule amhon amai amu dingu, chule achal’uva amin um ding ahi (Rev. 22:4).
Hiche Bible chang hoa kimu chu, mi sugimthei vantil hon asuhkhah louna diuva Pathen’in amite mahor anam, chule hiche mahor chu amin ahin ahi. Hiche tobang chet hin sahem in jong ama nungjui ho kailhang a thilcho thiljoh aboltheina diu le anungjui louho abolset naa kon avenbit theina dia amin number 666 a melchihna asem ding ahi. Pathen melchihna achate chalpanga kinam ding kiti hi atah tah a kinam dingin akisei khapon, chule kinam jong kinam louding ahi. Hiche hi Pathen in achate ama’a ahinau le ama khut noiya huibit a aum nau vetsahna joh ahi. Chuti ahileh hiche tobang maa chu sahem number jong sahem nungjui ho ama’a ahinau le ama ama bolsetna’a kon huibit a aumdiu vetsahna hiding ahi. Satan in Pathen thilbol ho tobang chet abol kijih ahin, Pathen mahor nam atah tah (literal) ahilou ding leh sahem mahor jong atah tah a kinam louding ahi.
Achunga mudan teni hi ivetkah leh, anukhah pa “agoungdan kiseidohna” hi, ajihpa (author) lekhabu kijih dan (writing style), alekhabua kimu hotoh akito jeh in dihjo din ginchat aum jon ahi. Sahem vaihomna ding phat kum thum le kumkeh (1260 day, 42 months) kisei ho ahibang chet a ledoh ding akibol vanga sahem number 666 jong ahibang chet a ledoh tei tei ding angai dehpoi. Ajeh chu, nikho 1260 hi Daniel hapta a 70th channa ahin, hapta 69 ho leiset thusima akisei bangchet a aguilhun a ahileh, hapta nukhah pen avat nalaipa jong hi akisei bang chet-a hung guilhung ding ahi. Achom lam a seidin, nikho 1260 ahibang chet a ledoh ding hi leiset thusim a thil guilhungsa hon atosot u ahin, hijeh a chu hiche hi ahibang chet a akiledoh vanga 666 jong ahibang chet a ledoh tei tei ding angaideh pon ahi. Hijeh a chu 666 hi akidoupi Pathen number/mahor to kitoh a ledoh hi dihthei pen din akilang in ahi.
Ahin, 666 hi atobang chet a bolding ahi itiuleh, a number chu 666 hiding ahin, tulaiya kisei ho banga barcode, microchip ti ho hilou ding 666 mutheiya chalpanga kitah hiding ahi. Khuti louva barcodele microchip tobang ho 666 ahi itiuleh, hichu atobang chet a kiledoh hitalou ahi.
Thukhumkhana
Solchah John in Thuphon hi ama khanga houbung ho koma athot ahin, hiche houbung miho hinkhoa thilsoh hotoh kisaiya anajih ahi. Sahem le amelchihna number 666 jong hi christianho Jesu tahsanna sulong ding le suse dinga natong jing Rome lengvai hopna le alengte ama le ama pathen a kitung a mihon ahou diuva thupeh neiho kiseina ahi. Adehset a Nero kaisar Christianho melma lenpen pa kiseina ahin ahi. Chule sahem melchihna 666 neilou in cho theilou joh theilou ati jong hi Rome toh kijop a sumkolvei miho lengte lim kisem masanga aboh khup teidiuva thupeh um kiseina ahi. Asia minor a um houbung sagi hon hiche 666 chungthu asim’uva chun, leiset kichai kon, Jesu hungkit masang jep a thilsoh ding ahi tipou vintin, amaho hinkhoa thilsoh ho ageldoh diu ahijoi.
Hiche 666 hi Solchah John phatlai Christianho dimun to kisaiya kijih hina jongleh, tonsot Pathen thilgon dungjui in khonung tichu Jesu hungkit masangjep a thilsoh ding jong ahi. Hiche phat hi nikho 1260, lha 42, chule Daniel hapta 70th channa kum 7 akeh nunungpa (kum 3½) tin akihen ahi. Hiche phat kipat masanga hi Rome kumpi, Nero kaisar tobanga Christiante muda le doudal leng khat, Rome lenggam kithah tundoh kit a vaihom ding a hungdoh ding ahi. Ama chun Pathen kahi tia Jerusalem hou-inn a hung kitung ding, ahou dinga miho thu apeh ding, anomlou jouse thi changei gotna ahinpeh ding ahi. Hiche phat hi ahi 666 kimanna ding phat chu.
Chutia 666 kijah nading phat bih aumleh, tulaiya Unique identification (UID) jatchom chom ho 666 ahi kiti hi dihlou ding ahi. Chule 666 akijih bang chet a mutheiya chalpang a ahung kitah ding jong ginchat aumpoi, ajeh chu, akidintepi Pathen mahor akijih bangchet a chalpanga kitah ding ahipon ahi. Hiche melchihna kiseiho hi mi khat apakaipa/apathen’a ahina le ama dia kitah tah a ahinna vetsahna ahijon ahi.
Ijat akisei vangin, khonunga hung lhung ding thilsoh ahi nahlai jeh in hiche mong mong hiding ahi tin hangsan tah in akitithei deh pon ahi. Mi tampin hiche mong mong hi ahitai tin asei jiuvin, hinlah phat ahung che che le ahilou ahung kihedoh jin ahi. Vetsahnan, Lindsey in alekha jih, Late Great Planet Earth a chun “European Common Market” kiloikhomna hi Rev. 17:12 a kisei lenggam som kigom ding ho ahitai atin, hinla tun hiche kiloi khomna hi lenggam som aval kitan ahi. Apha pen chu aphat inga maiyu hiding dan ahitai.
Achainan, Hiche sahem number 666 hin apha (Jesu) le ase (satan) kikah gal tantih neilouva umjing ahina eihil’un ahi. Hiche hi Christianten aphat seh a ito jingu gal jong ahi. Lhagao hinkhoa satan’in niseh in Jesu nung ijuina’u dalha din eilhem jing un ahi. Chule tahsa hinkhoa jong non-christian hon molphousah ding eigong jing un hijeh chun suhgentheina itoh jingun ahi. Ahinlah, sahem number 666 in hiche bou chu eihil’u ahipon, tun genthei jong leuhen galjoupa Pakai Jesu lama pang ihiuvin, nikhat galjona ichan teidiu ti jong eihil un ahi. Hijeh a chu akhon ni geiya Jesu lam a ipannau alhaso loudiu, satan gal idou jinglaiyuva lunglhalouva ama ikidoupina diuva kitil khouna ahin ahi.
BIBLIOGRAPHY
Boda, Mark J., and J. G. McConville, eds. Dictionary of the Old Testament Prophets. Downers Grove, Illinois: IVP Academic, 2012.
Aune, David Edward, Bruce Manning Metzger, David A. Hubbard, Glenn W. Barker, and David E. Aune. Revelation 6 - 16. Nachdr. Word Biblical Commentary, [General ed.: Bruce M. Metzger; David A. Hubbard; Glenn W. Barker. Old Testament ed.: John D. W. Watts. New Testament ed.: Ralph P. Martin]; Vol. 52, B. Nashville: Nelson, 2008.
Aune, David Edward, Bruce Manning Metzger, David Allen Hubbard, Glenn W. Barker, and David E. Aune. Revelation 17 - 22. Nachdr. Word Biblical Commentary, [general ed.: Bruce M. Metzger; David A. Hubbard; Glenn W. Barker. Old Testament ed.: John D. W. Watts. New Testament ed.: Ralph P. Martin]; Vol. 52,C. Nashville: Nelson, 2008.
Chadwick, Harold J, and John Foxe. The New Foxe’s Book of Martyrs. North Brunswick, NJ: Bridge-Logos, 1997.
Charles, R. H. A Critical and Exegetical Commentary on the Revelation of St. John: With Introd., Notes, and Indices Also the Greek Text and Engl. Transl.; (in 2 Vol.). 2: ... The International Critical Commentary. Edinburgh: Clark, 1976.
Collins, Adela Yarbro. “The Political Perspective of the Revelation to John.” Journal of Biblical Literature 96, no. 2 (June 1977): 241. https://doi.org/10.2307/3265880.
Cuss, Dominique. Imperial Cult and Honorary Terms in the New Testament: Paradosis Contributions to the History of Early Christian Literature and Theology. Vol. 23. Fribourg: Fribourg University Press, 1974.
Charles, R.H. The Apocrypha and Pseudepigrapha of the Old Testament in English, Forbes & Charles: The Book of the Secrets of Enoch, n.d.
Charlesworth, James H. The Old Testament Pseudepigrapha, 2015.
Deissmann, Adolf. Light from the Ancient East: The New Testament Illustrated by Recently Discovered Texts of the Graeco-Roman World. New and Completely Revised Edition with Eighty-Five Illustrations from the latest German Edition. Grand Rapids: baker Book House, 1965.
Eusebius, Geoffrey Arthur Williamson, and Andrew Louth. The History of the Church from Christ to Constantine. Penguin Classics. London: Penguin Books, 1989.
J. Collins, John. The Apocalyptic Imazination: An Introduction to Jewish Apocalyptic Literature. 2nd Addition. Grand Rapids: William B. Eerdmans Publishing Company, 1998.
Koester, Craig R. Revelation and the End of All Things. Grand Rapids, Mich.: W.B. Eerdmans, 2001.
Kraybill, J. Nelson. Apocalypse and Allegiance: Worship, Politics, and Devotion in the Book of Revelation, 2010. https://www.overdrive.com/search?q=DB8C7BCB-F4B3-4D66-9083-27D1FC9E82E4.
Lupieri, Edmondo. A Commentary on the Apocalypse of John. Grand Rapids: Eerdmans, 2006.
May, David M. “The Empire Strikes Back: The Mark of the Beast in Revelation.” Review & Expositor 106, no. 1 (February 2009): 83–98. https://doi.org/10.1177/003463730910600109.
Naylor, Michael. “The Roman Imperial Cult and Revelation.” Currents in Research 8, no. 2 (February 2010): 207–39. https://doi.org/10.1177/1476993X09349160.
Philo, and Charles Duke Yonge. The Works of Philo: Complete and Unabridged. New updated ed., 6. printing. Peabody, Mass: Hendrickson, 2002.
Plutarch. Plutarch’s Lives, Lysander: With an English Translation by Bernadotte Perrin. Vol. 4. Cambridge: Harvard University Press, 1959.
Price, S.R.F. “Between Man and God: Sacrifice in the Roman Imperial Cult.” JSTOR- Society for the Promotion of Roman Studies, The Journal of Roman Studies, 70 (1980): 28–43.
Rowland, Christopher. The Open Heaven: A Study of Apocalyptic in Judaism and Early Christianity. London: SPCK, 1982.
Suetonius, Robert Graves, and Michael Grant. The Twelve Caesars. Revised ed. Penguin Classics. Harmondsworth; New York [etc.]: Penguin, 1979.
Taylor, Lily Ross. The Divinity of the Roman Emperor. 1st edition. Philadelphia: Porcupine Press, 1975.
No comments