Gamsa Number 666 Tungtaang Kihilna
Gamsa Number 666 Tungtaang Kihilna
Henzathang Haokip, M.Th | 28th June, 2021
B.Goumuanthang (Letdohtu)
Thumapui
Revelation 13 a John in ana genlawh, Gamsa Number (666), tungtaang pen theikhiat zawlou diing thu kiphualguuh ahisih a, ahivanga ledoh dan lampi tuamtuam atam ziah in theikhel abaisam mama ahi. Sildang teng sang a poi kasat mama khat ahi leh, theibu ding hilou ahi chia ngaidan inei ukhuh ahi A buaikaina dangkhat ahileh tam laigel pen a tungzou ata mah, oleh tu lellel a siltung amah, ahisihleh mailam a hing tung tounalai diing amah? Chi ahi. I gennop pentah khu tam ahi chia munkhat mei tuuh sawm ihi sih a, ngaidan tuamtuam umte achiangthei dilam a gen sawm ihi zaw uhi.
The most problem is when we think the writing is incomprehensible.
Gamsa Number 666 Sim Ding Dan
Revelation 13:17-18 dungjui in Gamsa teptena nambat khu 666 hiding ahi. Tua apoimaw pen khu bang chidan a 666 hing piangdoh thei a hiei? Bangchi sim ding ata diei? chi ahi.
Tam itheisiam theina diing un Greek mite leh Hebrew mite number simdan theimasat angaita hi. Greek mite leh Hebrew miten English te bangin atuam in number (eg.1, 2, 3…) chia neilou un A=1, B-2, C=3, chia asim mai uh ahizaw hi. Tamziahin ding china ahita hi. Tekhinna ding in khat bawl sin vai:
Now our aim is to interpret number 666 to alphabet form.
- 666 pen Zagup Somgup leh Gup chia sim ding ahi.
- L- 30 + A-1 + T-300 + E-5 + I-10 + N-50 + O-70 + S-200 = 666.
- Hi a tekhin na ah 666 hing piangtheina pen LATEINO laiteng (word/name) ahi.
Aziahpen Romete’n atheilouna dia John in Hebrew’a, a gel hidin atahsang uhi.
Ken nungah khat ka lungsiat in, ama nu number khu 545 ahi, chi’n aki sun hi.
Rome Lenggam Leh Gamsa Number 666:
Tam laibu pen sawltaah John in Rome vaihawmna nei (nuai) a gingtu tamtahte'n nasatah a gimthuahna athuah uh henepna ding leh hamuanna aneitheina diing ua tamlai ana gel ahi chi ageldan apat in imuthei uhi . Tamte ziahin Rome kumpi lallai in gingtute khun Jesu tahsan na ziahin suhgenthei leh bawlgenthei athuah uhi chi I thei uhi. I gennop pentah u ahi leh, tamte ziah in John in tamlai agel pen Rome lenggam agenna ahi a, khumziahin 666 zong Rome leengte lah ah khat genna hi ding in a ngaisut uhi. Abanban in en toutou vai.
Jesu Khrist zaal a gentheina, hahsatna, gimthuahnate na thuahkhawmpi uh keima, chi’n agial hi (Rev.1:9).
Daniel Lekhabu a Gamsa Lina leh Thupuan Suang a Gamsa Khatna Etkaahna:
Daniel 7 na ah, Daniel in Pasiam mite (Israel) hing dou a, aleenggam hing toupha diing lenggam li Gamsa lim in anamu hi. Tam gamsa lite khu, Humpi bahkai – Babylon, Vompi – Medo-Perisa, Gialbem – Greece, huleh Gamsa gimnei – Rome ahi uhi. Tamna igen diing uh khu a lina Gamsa gimnei – Rome khuh ahi.
Tam Gamsa gimnei lina pen tungtang ngaidan ni a um hi tuate ahi leh: Medo-Persia khat a sim ten Gamsa gimnei lina khu Rome achi uhi’n, Medo-Persia pen atuamtuah ahi chiten Gamsa gimnei lina pen Greece lenggam genna in a geel uhi. Hinanleh Daniel 8:20 na in Kelngawi tal khu kigawm a lenggam khat genna’n azang hi. Tamziahin gamsa gimnei lina pen khu Greece leenggam genna hilou in Rome leenggam kigenna ahi zaw hi.
John leh Daniel in tamthusim agelte un kibatna mama anei uhi. Aziahpen tuipi apat hing potdoh ahi tuahtuah ua, ki sawm (10 horns) nei ahi tuahtuah uhi. John in, Gamsa in lutang sagi anei hi, tuachi’n atung ah kizuahnu atou hi (Rev.17:9). Tamna Kizuahnu khu Rome genna ahi a khumziah in John leh Daniel in amu gamsa pen Rome leenggam genna ahi chi gintaat a umta hi . Tamziahin Kihilna 13 na a gamsa pen Rome leenggam hi ngeingei ding baan ah hi John in ama hunlai a Christian sugenthei Rome vaihomna agenna hi ngei diing ahi.
Number 666 leh Rome Lengte Sakhua tualeh Sumkawlveina Kisamkai dan:
Kihilna13:17 sung i-et leh Gamsa cheptena 666 neiloute’n leitheilou diing tualeh zuahzong zuahtheilou diing chi umzia khu 666 hing kizat chiang in sumkawlveina lamtoh kimatna anei ding ahi china ahi. Tami tungtang itheisiamtheina diing un (1 century) hunlai a Rome mite sumkawlveina leh Rome lengte sakhua paidan tualeh Christiante toh akituahlouna uh et angai hi. Baan et tou vai eleh.
Kihilna 17 in kizuahnu tungthu agen a, atawpnalang v18 na ah leitung a leengte tung a vaihawm khopilian khu Rome ahi a, tuaziahma in sumkawlveina zong ama uh khutnnuai ah akoi uhi. Tuachi'n kizuahnu khu Rome khopi genna ahi a, khumziahin mi koipou sumkawlveina nei zousiah in amanu a uhi. Ahileh koilim (statue) mai a kuun a bia ahita di uai?
Nidanglai 1 BC beikuan leh 1 A.D kipan kuan veel in Rome leenglian mamate’n Pasian ka hi akichi jel ua, mite biah diing in a lim (statue) a tungdoh ua mite abesah jel uhi. Tamziah ma a sumkawlveina Romete khutnuai a um ahitoh kiton in tuahunlaitah a leengte’n a lim (statue) uh tung doh a mite amai ah va uh chi ngaidan um ahi. Tualeh silsui mite leh lekhabu gialte apan aki theidan in, Caesarea longkhawlna mun ah leengliantah Herod in Rome lengte toh kihouna mun biahinn (imperial temple) khat alam a, tualeh Rome gam lutna dia dawngkot (gate) zong ahi ngaal hi. Tamziahin, koipou ma sumkawlvei a hing pei kha taphot tuamun a tun chiang un Rome leengte lim kitungte mai ah kuun teitei diing in a gintat huai hi. Tuabaanah, Ephesus khopi lutna ah Rome lengte aki tung a, koipouma tammun a paikha jousia abohkhup un abia uhi, zong akichi hi.
Tambang igenna ziah uh ahileh itheisiamna diing un, Romete’n sumkawlveina akhutnuai uah akoi ua, tuaziahin koipouma sumkawlvei a paitaphot in Romete hina bang leh demand bang in a Amen (agree) jel uh china ahi. Tampen kizuahnu angkawmpi uh china ahi. Aziahpen tambang in bawllou uh hitaleh van leitheilou diing thamlou in amau vante zong zuahtheilou diing ahi ziah un. Tambang khu huntawplam ah hing um panpan ding a, hinalai diing in agintat huai hi. Tambang ahi John in agel, Gamsa masang a bohkhuplou leh belouten leitheilou diing zong zuahtheilou diing ahi chia 1 Century A.D lai vel a ana gen pen khum hunlai a gingtute dinmun ahi a tuhun leh malam a gingtute dinmun diing zong hing hepeh nalai diing ahi. Tuabang ahita leh Gamsa teptena number 666 neipa khu koi ata diai?
Also here: https://tny.im/3fZTx
Nero-Antichrist ahi chi Pansan a Thuhilna (Nero Redivivus):
Gamsa pen Rome ahi leh 666 neipa khu Rome leengte lah akhat ahi china ahi. Tamziahin mitamtahten toh 666 akituahziahin ama hi diing in a gingta uhi. Akisimdan Nun - 50 + Resh - 200 + Waw - 6 + Nun - 50 + Qoph - 100 + Samech - 60 + Resh – 200 = 666 ahi. Tamziah ahi Bible siam tampite’n Gamsa leh a number 666 pen Rome leh alengpa Nero, Christiante gawtgentheipa, genna hi di’n ana tahsang uhi.
Thamlou in John in tam laibu agel lai in mitamtahte’n Rome lengpa, Nero Kaisar, mama khu hing thoukia diing ahi chin zong a gingta uhi. Tam Nero thokiahna pen “Nero Redivivus” chin aki thei hi. Tampen in Italy apat Jerusalem tunga gaal bawl ding, Rome mi Christa doupa, ama khu Rome lengpa Parthian gam kheellam a taimangpa chi’n agial hi. Tamna jawlnei in a gen pa khu koidang hilou in Rome leengthupi Nero ahi. Suetonius in (1st Cent) lai a, alaigelna ah, leeng Nero a si in agualngai te'n kumbangja ama khat sung a haantung ah paahvui ava the ua, hichin achi uhi: “Leng Nero khu asi sih a khat vei hing thoukia diing ahi tuahun chiang in agal (melma) te ajou diing hi” achi uhi. Tuathamlou in 1st century lai a laigial minthang Dio leh Suetonius ten AD 69 & AD 90 lah vel ah leeng Nero a thoukia ta a, kei ka hi chia ki puang mi a um hi chi’n agial tuahtuah uhi. Tamte ziahin John hunlai a ana umnonlou Nero khu hing um kia di’n mi tamtah in a gingta ua, ama chet ahilou in zong ama hagau mama tahsa dang sung a lut in hing piangkia diing ahi chitan in a gingta uhi. John in tamlai pen hattuam sagite siang a ana thot ahi. Tuaziahin hun hingtung ding genna hilou a, asimtuten ama uh hunlai a Christian te soisahna thuah ahiziah ua, amau hunlai mama a azat ding ua John in athot, tualeh a mengmu(vision) un zong atung ua sil tung te kilang ding in a gintat huai hi. Tambang ahita leh hun hingtung ding ah antichrist leh 666 kigen pen dihlou china ata diai? Tuaziahin atung a gindan kigen pen dihlou ichi taahleh zong Gamsa pen Rome genna ahi chi pen adih veve ahi chi thei vai. Entou nalai vai.
A suahsa ahitaah ziahin a hing suahkia nalai ding hi:
Bible in silkhat agen chiangin, gen ni anei nuam mama hi. Tekhin thu in, Late 22:18 na in “Ka puansilte akihawm ua, ka puanahtual a ding in ai asan uhi” chi khu agialtupa’n ama tanchin agen na hilehzong, Jesu si ni in zong a tangtung hi (John 19:23-24). Tuabangma in Late 34:20 na in “A gute zousia akembit a, khatbeh zong atawng sih diing hi,” chi pen Jesu si ni in a tangtung hi. Tualeh adangdang zong tampi a um hi. Tambangma in John in ama hunlai in Christian te gimthuahna toh kisai in ana gelh hi nanleh mailam hun a muphalou a sil tung ding genna zong ana hi ahi. Aziahpen Gamsa (Gamsa) tungthu kigial munkhenkhat te pen John hunlai a Rome lengvaihawmna ah suhlat in ana umnailou zong a um hi. Theisiamna din Kihilna. 13:5; 11:2-3 na in agen bang in tua Gamsa (antichrist) thaneina ding hunsung pen ha 42 (1260 days) tualeh Gamsa (antichrist) in Israel toh kilemna asiam ding (Dan.9:27) chite a um naisih hi. Khonung a siltung ding ahi leh bang chihchiang in ata diai?
Gamsa number 666 kizatna ding hun:
Gamsa (antichrist) thunei hun ding sung piah ahi, tuapen kumthum leh akim ahi. Tam kumthum leh akim pen gendan tuamtuam tambang in akigen hi: ha 42 (Rev.13:5; 11:2), ni 1260 (Rev.11:2), hunkhat, hun ni, tualeh hun phelkhat (Dan.7:25). Tam pen bang dang hilou in Daniel in a mengmuna ah hapta 70 tuate lah a, atopna kum 7 (70th week) kimkhat, tuapen kum thum leh akim tuah in aki hawm a genna ahi.
Daniel 9:26-27 dungjui in, mengmu hapta 70 te lah a, Jerusalem lamthah ding thupiahpot apat a Jesu pampai ahi dong in hapta 69 aching chet hi. Tualeh Jerusalem kisuhsiat ding chia Jesu'n Palm Sunday ni a Leng bang a Jerusalem alut a, Israel ten ana pampai ni un, na sa mama in kateng toh a ki suhsiat ding agen pen AD 70 in Rome sepaite'n, Titus thuneina nuai ah suhsiat ahita hi (v.26 cf. Luke 19 - talent gentena v11-27). Jesu cross dawn ah asi apat Rapture huntan khu church period or grace period akichi ding a, tuazou phatphat chiang in Daniel mengmu hapta tawpna 70th week umnalaipen akipan ding a tua hun khu tribulation aki chi ding hi. Tam hun chiang in antichrist in mitamtahte toh (Israel tel in) thuhun kiptah (strong agreement) anei ding ua hinanleh antichrist in kum thum leh alang achin chiangin tam kichiamna Israel toh kaal a anei ukhu asuse ding a, sillat kithoina zong atawp sah ding hi. Tam pen 70 AD a siltung pen hilou in tribulation hun a, kumthum leh akim achin chiang a antichrist in ang boldoh pan ding genna ahi zaw hi.
2 Thessalonika 2:3 – 7 in antichrist hing kipuandoh na ding daaltu khat a um hi, tuaziahin ama pa aki laahdoh chiang in antichrist chu ang kilangdoh ta ding hi ana chi hi. Tamnah antichrist kilat ding daaltu kichi pen koidang hilou in Hagau Siangthou kigenna ahi. Tami umzia ahi leh 1 Thessalonika 4:15-17 in agen bang a, misiangthoute laahtou (rapture/caughtup) ahi chiang un, Israel toh kum 7 sung a di'n thuhun (kichiamna) abawlta ding uhi. Tamte ziahin Misiangthoute laahtou ahi masang un antichrist zong ki puangkhe nailou diing baanah, 666 zong ki hawm nailou diing ahi
Ahin hattuam misiangthoute laahtou zou ahi chiang in ama pa (antichrist) hing kilang van, mitamtah toh (Israel tel in) kitamna thuhun hing bol van kum 3 ½ achin chiang in khautah in mizousia in ama abiat diing uh hing chi van tuahun chiangin a utlou zousia gawtgentheina nasatah in hing kipan ta ding hi, tuakhu Jacob thuahna chin Jeremiah in bung 30 nah ana gen hi. Tam antichrist in ama thuneina toh khautah a kum 3 ½ anukhia zo pen hun ang zattah chiang in 666 khu ama lang a pang leh panglou te theikaahna ding in ang zang panta ding hi.
Number 666 kizat dingdan envai:
Gamsa number 666 khu tribulation seni sua a nukhia zopen a zat ding ahita leh, Bible in agen bang a khut toh talpaang a zat ding ahi tahtah na diai? Ahisihleh azat dan lampi tuam deu a zat ahi diai? Bible gen bang chetchet a khut leh talpang a kizang ding ahisihleh zatdan tuam a kizang ding ahi chi zong gen chiang thei ahisih hi. Envai ele.
Bible geldan bangchet a ledohna:
Mi khenkhat in Bible kigel dan bang chetchet a ledoh (literal interpret) ding ahi, tuaziah in 666 pen atahtah a hing ki zang ding baan ah khut ahisihleh talpaang a kitaah ding ahi achi uhi. Tambang miten Daniel mengmu pen 69 week bawn ahi bang chet a tung ahita leh bang dia a 70th week na pen tunglou ding ahiai chi’n Bible in antichrist toh kisai a agente adiah in number 666 hi in, akitaahna ding khut leh talpang ah kitaah ding chi zong aki gel bang chetchet a tangtung din a gingta uhi.
Tambang gindan neiten Kihilna (Revelation) a ki gialte khu khonung a leitung beimasang a sil um ding dan ahi achi uhi. Ahinlah igentasa bang un number 666 pen (geometry rule) zang a simdidan jui a isim leh min tamtah mu khiat thei in a um hi. Eg. Pope, Adolph Hitler (German dictator), Ronald Wilson Reagan (former U.S. President) tualeh adangdang zong antichrist ahi achi uhi. Tambang simdan zop zel ulei tamtah umthei nalai didan in lang hi. Tuate ziahin khut leh talpang a kitaah sese ding ahi chi pen gintaat ahuai seng sih a, zatdan chituam lamdaih ah hing ki zang leh kilawm kasa zaw hi.
Alimguong Etsahna ahi (Symbolic Interpretation):
Ahibang chetchet a letlou a, alimguang etsahna a gel ahi chia pomte in 666 pen talpang leh khut a ki taah tahtah ding hilou in aneitu um ahi chi etsahna ahizaw hi achi uhi. Tambang gindan neiten Revelation a thukigialte abon a chu hilou ahivang a tampi te pen akigen pen kheellam ah, sildang khat genna ahi ut zaw hi achi uhi. Etsahna di’n: Gamsa-lenggam (Rev.13:1-2), kizuahnu – Rome khawpi (Rev.17:7-9), Ki (horn) – lengpa (Rev.17:12), Numei nauvop – (Rev.12:1-2). Tamte ziah in literal interpretation gingtaloute’n 666 pen atung a igen bang un zatdan tuam in ki zang ding in a gingta uhi.
Tam gindan dih hi dia agintathuaina khat ahi leh, Revelation sung a Satan leh anatoh kigialte in Pasian leh anatoh te alimchiin (mimic) ahi. Etsahna di’n: dragon, tui gamsa, lei gamsa (satanic trinity) – Pa, Tapa, Hagau Siangthou (Holy Trinity), sithei khop hial a kisat damdoh kia (Rev.13:12) – Jesu a si a thoukia, van a pat a leitung ah meikuang khesuh – Elijah in van a pat mei a hatkhiat (1 Kings 18:38) leh adang dang ahi. Tualeh 666 talpang leh khut a nam ding chi zong Pasian in atate Hagau a seal anam ding (Eph.1:13) chitoh kibang ahi. Tamte ziahin aki gen bangbang a um chetchet hizolou in silkhat agen utna hizaw in alang hi. Mangpan atate kung a seal abawl ding kigenna te ana ban et vai.
- “I pasian suahte talpang a chiemte na ikoi sieng zou masangsie, leitung leh tuipi ahisihleh singkungte suse sih un,” achi hi (Rev.7:3).
- Amaute khu atalpang ua Pasian chiemtena neilou mite chilou, leitung a hampa ahiei, loupa hing ahiei, ahisihleh singkung mawngmawng suse lou ding a thupieh ahi uhi (Rev.9:4).
- Tuachi’n ka en a, Ngai vawi, Zion muol tung a Belamnou leh mi tulza leh tulsawmli leh tul li ding ka mu a, atalpang chiet uah ama min leh apa min chiet uh aki gial hi (Rev.14:1).
- Amaute’n A mel amu ding ua, a talpang uah A min a tuang ding hi (Rev.22:4).
Tam Bible chang te a kimu ahi leh, mi sugimthei vansolsiang ten asuhkhah lou na di ua, Pasian in amite seal/mark anam, tualeh tam seal/mark khu amin ahi. Tambang mama in Gamsa (antichrist) in zong ama nungjuite vanjuah thei leh vanleithei na ding leh a nungjuilou te apat a bawlsiatna umtheite apat a, avenbit theina ding a 666 toh atepte (mark/seal) ding ahi. Pasian in atate atalpang uah teptena mark anam ding kichi zong atahtah a nam ding ahi sih a zong aki nam sih ding hi. Mangpa’n atate ama a ahi a, ama khutnuai a humbit a, a-um uh etsahna ahi bou hi. Tuziahin, tambang ma in Satan in zong a nungjuite abol ding hi chi gintat a umjo hi, tua ahileh pen atahtah a mark chu um seselou ding in zong alangta hi.
Tam atung a etdan nite I etkaah a ahi leh, anukhia zawpen “Alimguang Etsahna” pen khu alai gialtupa’n a gennop pen hizo ding in agintat huai zaw hi. Tamte ziah a, a kigen zousia a ki gel bangbang (literally) a laahlou ding china hi diahlou ahi. Eg. anitichrist vaihawm sung ding kum thum leh akim (1260 days | 42 months) chia kigen pen literal deu a ledoh thouthou ding ahi. I gennop pen chet ahi leh 666 leh azat dingdan pen akigel bang chetchet a ledohlou ding ichi vang a adang tengteng zong aki gel bangbang a ledohlou ding china hilou ahi. Aki gel bang chetchet a ledoh ding leh ledohlou ding um china ahi. Tamte ziahin igintat uh leh adang dang te zong hithei, alelam ah zong hilou thei china ahi.
Thukhaahna:
Sawltaah John in ama hunlai a, hattuam misiangthoute toh kisai a agel leh ana thot ahi. Gamsa leh a teptena 666 zong gingtute suliing ding leh suse ding a na tong gige Rome leng vaihawmna leh a lengte amau leh amau Pasian a ki tunga miten a biah diing ua thupete genna ahi. Adiahtahin Nero Kaisar, gingtute melma lianpen genna ahi. Tualeh 666 neilou te’n van leitheilou ding, zuahtheilou ding chi zong, sumkawlveina khu Rome te khutnuai a um ahi ziah in, sumkawlvei taphot in Rome leengte’n a lim (statue) atunte uh mai a akun/akhupboh ding ua thupia toh kisai a kigial ahi. Asia minor a hattuam sagi (7) ten 666 pen Jesu hing kum masang a sil tung ding chi'n geel sih va un, amau hunlai a siltung te haw a geel zaw ding uhi.
Tam 666 pen John hun lai a gingtute tung a siltung toh kisai a gel hinanleh, kumtawn Pasian lemgel siamna toh khonung a hing tung ding (Jesu hing pei masang a sil tung ding) genna zong ana hi ahi. Tam, 666 akizat ding hun ahi leh Daniel in ana mulawh, hapta 70 a nunung pen 70th week = 7 years, mun ni a ikhen leh 3 ½ tuah a khen thei, Nidang lai a gingtu masate muda leh doudal Nero Kaisar tobang Rome lenggam apan khat ah ama Pasian bang in mite biah ding in ang ki bawl khe ding hi.
Atung a 666 kizat hun ding igen utoh kiton in, UID (Aadhar Card), Bank A/C, PAN Card, leh adangdang te khu 666 ahi chia igintat pen dihlou ding ahi. Tualeh Manipur CM in Covid Vaccin kikapna certificate neilouten leitheilou ding, juahtheilou ding achite ziah a khu zong 666 hinailou ding ahi.
Also here:
http://e-pao.net/GP.asp?src=17..270621.jun21 OR
https://t.ly/wcvb
Tampen Revelation 13:17 in:
TUACHI'N CHIEMTENA AHIEI, GAMSA MIN AHIEI, AHISIHLEH AMIN NAMBAT AHIEI, NEILOUTE POUMAIN A LEITHEI SIH DING UA, AZUA THEI SIH DING UHI achi pen Manipur CM, N BIREN SINGH kamham toh akibang petmah hi
Tam mailam a siltung ding ahi nalai ziahin bangtobang hi ding adiai chi chiantah in leh hangsantah in aki genthei tadi sih hi. Gendan tuamtuam a um a, tampi ana dihsih hi, tamziahin ahun chiang in itheisiam pan ding uhi. Tam Gamsa teptena (mark of the beast, 666) khu ahoi (Jesu) leh asia (Satan) kaal a gaal (war) beini umlou khu ang theisah jeljel na khat ahi. Gingtute’n hunchin a ituah uh hahsatna, satan to ikaal a gaal, tuakhu Jesu taisan ding a Satan in nichin a ang heem ahi. Thamlou in gingloumite zang in Satan in nichin in Jesu nung ijuina uh suhmualphou ang sawm ahi. Tambang hahsatna tuahnanlei khatvei chiangin itahsan pa uh Jesu tungtawn in hutdamna leh gualzawna bukimtah itang ngei ding uhi chi zong ang theisah hi. Tamte zia mama in Jesu lam a ipanna uh hasuamailou a, Satan gal idou zinglai un lungkelou a ama ikidoupina ding ua kihanthawnna ahizaw hi.
Simtu tengteng tung ah Mangpa’n athupha hing gualzawlta hen.
BIBLIOGRAPHY
Boda, Mark J., and J. G. McConville, eds. Dictionary of the Old Testament Prophets. Downers Grove, Illinois: IVP Academic, 2012.
Aune, David Edward, Bruce Manning Metzger, David A. Hubbard, Glenn W. Barker, and David E. Aune. Revelation 6 - 16. Nachdr. Word Biblical Commentary, [General ed.: Bruce M. Metzger; David A. Hubbard; Glenn W. Barker. Old Testament ed.: John D. W. Watts. New Testament ed.: Ralph P. Martin]; Vol. 52, B. Nashville: Nelson, 2008.
Aune, David Edward, Bruce Manning Metzger, David Allen Hubbard, Glenn W. Barker, and David E. Aune. Revelation 17 - 22. Nachdr. Word Biblical Commentary, [general ed.: Bruce M. Metzger; David A. Hubbard; Glenn W. Barker. Old Testament ed.: John D. W. Watts. New Testament ed.: Ralph P. Martin]; Vol. 52,C. Nashville: Nelson, 2008.
Chadwick, Harold J, and John Foxe. The New Foxe’s Book of Martyrs. North Brunswick, NJ: Bridge-Logos, 1997.
Charles, R. H. A Critical and Exegetical Commentary on the Revelation of St. John: With Introd., Notes, and Indices Also the Greek Text and Engl. Transl.; (in 2 Vol.). 2: ... The International Critical Commentary. Edinburgh: Clark, 1976.
Collins, Adela Yarbro. “The Political Perspective of the Revelation to John.” Journal of Biblical Literature 96, no. 2 (June 1977): 241. https://doi.org/10.2307/3265880.
Cuss, Dominique. Imperial Cult and Honorary Terms in the New Testament: Paradosis Contributions to the History of Early Christian Literature and Theology. Vol. 23. Fribourg: Fribourg University Press, 1974.
Charles, R.H. The Apocrypha and Pseudepigrapha of the Old Testament in English, Forbes & Charles: The Book of the Secrets of Enoch, n.d.
Charlesworth, James H. The Old Testament Pseudepigrapha, 2015.
Deissmann, Adolf. Light from the Ancient East: The New Testament Illustrated by Recently Discovered Texts of the Graeco-Roman World. New and Completely Revised Edition with Eighty-Five Illustrations from the latest German Edition. Grand Rapids: baker Book House, 1965.
Eusebius, Geoffrey Arthur Williamson, and Andrew Louth. The History of the Church from Christ to Constantine. Penguin Classics. London: Penguin Books, 1989.
J. Collins, John. The Apocalyptic Imazination: An Introduction to Jewish Apocalyptic Literature. 2nd Addition. Grand Rapids: William B. Eerdmans Publishing Company, 1998.
Koester, Craig R. Revelation and the End of All Things. Grand Rapids, Mich.: W.B. Eerdmans, 2001.
Kraybill, J. Nelson. Apocalypse and Allegiance: Worship, Politics, and Devotion in the Book of Revelation, 2010. https://www.overdrive.com/search?q=DB8C7BCB-F4B3-4D66-9083-27D1FC9E82E4.
Lupieri, Edmondo. A Commentary on the Apocalypse of John. Grand Rapids: Eerdmans, 2006.
May, David M. “The Empire Strikes Back: The Mark of the Beast in Revelation.” Review & Expositor 106, no. 1 (February 2009): 83–98. https://doi.org/10.1177/003463730910600109.
Naylor, Michael. “The Roman Imperial Cult and Revelation.” Currents in Research 8, no. 2 (February 2010): 207–39. https://doi.org/10.1177/1476993X09349160.
Philo, and Charles Duke Yonge. The Works of Philo: Complete and Unabridged. New updated ed., 6. printing. Peabody, Mass: Hendrickson, 2002.
Plutarch. Plutarch’s Lives, Lysander: With an English Translation by Bernadotte Perrin. Vol. 4. Cambridge: Harvard University Press, 1959.
Price, S.R.F. “Between Man and God: Sacrifice in the Roman Imperial Cult.” JSTOR- Society for the Promotion of Roman Studies, The Journal of Roman Studies, 70 (1980): 28–43.
Rowland, Christopher. The Open Heaven: A Study of Apocalyptic in Judaism and Early Christianity. London: SPCK, 1982.
Suetonius, Robert Graves, and Michael Grant. The Twelve Caesars. Revised ed. Penguin Classics. Harmondsworth; New York [etc.]: Penguin, 1979.
Taylor, Lily Ross. The Divinity of the Roman Emperor. 1st edition. Philadelphia: Porcupine Press, 1975.
No comments