Theichetna leh Kinepna khu Hatna ahi
Theichetna leh Kinepna khu Hatna ahi
B. Goumuanthang
Question leh Answer daan in paisah lei theisiam huai diing in ka gingta hi.
Question khatna diing in: bang ziah a Paul in Thessalonika mite kung a
tamlai a piah a diai? Thessalonika mite’n Paul leh a seppite apat Pasian thu
a za petpet un gamdante banglou tahin tanchinpha khu a pompai ua, Jesu khu
Hundamtu leh Mang in a pompaita uhi. Thamlou in gingloumite tung a Pasian in
A thangpaina a sunbuat masang ngei in Khrist in Ama toh vannuam ah, Pa aang
ah khawldam ding in hing puikia ngeingei ding ahi chi kinepna liantah anei
uhi.
Hinanleh, hunsottah ahi nuah in a-iit a-ngaite utoh shina zaalin ang ki
khen panpanta uhi. Tambang a kikhen nate ziahin Rapture a telkhalou thei ahi
maw chi in a buai panta uhi. Tamte ziahin Paul in rapture tungtaang
hilchetna leh amaute hanthonna in tam laithot tabang in a gial hi. iMangpa’n
(Jesu’n) ei (a misiangthoute) pui in ang pei ngeingei ding a, nang leh kei a
dam nalaite sang in ana mualliam sa te iMangpa toh huikhua a kimu ding in
thou in apaimasa ding uhi. Tuazouchiangin ei a damnalaite ilengtou pan ding
uhi achi hi (1Thess.4). Tamteziah in shina in hing halnanleh lungkham ding a
um sih hi, Pa Pasian in Athangpaina a sunbuat ding (tribulation) hun ma ngei
in iMangpa’n eite ang pui khawm na diing hi. Khuziahin tu a lungkelou kei a
Pasian min a tanchinpha na dinpi ua, na puangzaah bang un pan lazom ding in
kang deisah uhi achi hi. Tamteng baan ah Thessalonika thot nina ah, Rapture
umnailou ahi dan chiantah in agen nalai hi.
Tambang hasotna thute azaahtah un, Thessalonika mite khu thahalna toh a
dimta uhi. Thessalonika mite pataat ahuina uh bang hi di’n na gingta ei?
Amaute’n Pasianthu a zaahtah un, gingta in a pompei ua, milim biahnate,
sildang a ngaithupite ua pan ki hei in Jesu, Hundamtu leh Mang a apompa uh
deidan chouh akalsuan diing in akipekhe ngaal uhi. Tunia iki dotnop khat ahi
leh, nang leh kei in Jesu khu Hundamtu leh Mang a ipom ni apat in Jesu
deidan chouh juita ding in ki henlamdanna (or ki bulpatna) inei ei? Chi ut
ihi. Thessalonika mite’n tambang a kipatkhiatna chouh hilou in Jesu a ding
chouh in a hing uh chi Messedonia gam leh Akaia gam ah miten a testimony uh
agen pia uhi. Nang leh kei toh kikhe mama in ka mu hi. Nang leh kei khat hi
lei miten bang teng a gen zong in ei ma leh eima ki genphat som teitei
maithei ihi.
Thessalonika mite’n tambang a pan a laahna ziah uh khu bang dang ziah hilou
in, thanchinpha azaah ukhu a theichian mama ua, ahinkhua ua din a pomdet ua,
tam aginna uah aki ngahtahtah ziah un (100% rely on their faith), kinepna
liantah anei ua, tam kinepna ziah in a hamuang mama mai ua, tambang hamuanna
tahtah te ziah in a hangsan ua, haatna thuguuh koima piah theilou, gospel
tanchinpha silbawltheina khu anei uhi. Tuni’n tanchinpha khu silbawlthei tah
ahi chi itheichiannai (1 Thess.1:5)?
Thessalonika mite bang a gingtu ihi ua, imuansan uh zong aki bang a, I
Pasian uh zong a kibang a, ikinepna uh zong aki bang hi. Hinanleh amaute toh
eite iki khiatna uh bang na mu ei, tua kikhiatna namu khu ichauna uh ahi a,
khuziahin, Pasian hepina huang sung a I um lai mama un panlathah dingin
ikichial uhi. Hebrew in agel bangin mihing khu khatvei a si ding sesa ahi a,
tuazou khu thukhenna ahi achi khu Pasian gen ahi. Pasian khu a ginumna ang
kilat chiang in mizousia in lamdang asa ding uhi. Tua a hepina a letziah in
mizousia hundam chiat leh kilawm isat hi. Hinanleh Pasian ginumna, thutahna
ang kilatchiang in athukhendan tuahkha zousia a chiza ding uhi.
Ahun kikheel masang in tanchinpha khu theichian ding in ki singsa va,
aziahpen tam theichetna in kinepna ang pia a, tam kinepna in hamuanna, hatna
ang pia hi.
Tam article "Theichetna leh Kinepna khu Hatna ahi" a Mangpa deilam a panla ut zousia, iMangpa'n atup bangbang ua zozouna pechiat ta henla, haat tah leh manphatah a zat hing hita hen.🙏
No comments