CHRISTIAN PA/NU AW, BANG SAKHUA NA ZUI AHIEI?

CHRISTIAN PA/NU AW, BANG SAKHUA NA ZUI AHIEI?
WAY2GOD | Jacob 1:19-27

Leitung ah sakhua tamtah a um a, tuate lah ah Khristian sakhua zui mite hinkho zatdan tomkim tahin ngaituakhawm zual lei uthuai isa hi.

A tung a topic heading khu enlacin, akigelkhial bang nasa maithei hi, hinanleh gennoppen ziah a tambang a gel ahizaw hi. Aziahpen Khristian hi ngal a Khristian zong banglou tamtah a um hi, thamlouin Khristian hilou napi Khristian hi dia gintathuai bang a um thei zel hi. Tamte bangziah hidin na gingta ei?

Mihing et in Bible tawi a, biahinn lam zawt gige te, thugensiam, lasahsiam, laam gige, kikhopna teng delzou gige, sum tam pipi thawzoute pen Pasian mi mama in kilang hi. Hinanleh, alelamkhat ah kikhopna lam ah tallang zou khollou, sum tam thawzoulou, leh um niipneepte pen ginumna khat a ginum nan uleh koiman theiphaah in neilou uhi. Tualeh tambang a hausa deu, tallang deute’n genkhat anei uh pen Pasianthu toh kituah beeh sih leh zong hattuam in bangma genngam selou in zui duup jel mai ua, a zawng niipneep Pasian a, atantawh a ginum mamate thugente pen dih leh zong koiman thudonlou in um nuam mama mai hi, hattuam sung, society sung ah ki maipha etna sang mama mai hi.

Tambang pen mihingte sil etdan apat hing piangdoh ahi a, hinanleh Mangpan vang, Athu zaah a zui a hinpi mikhu akipaahpi hi. Aziahpen Mangpa’n Athu zaah a zuituanlou mi khu sakhua mi mama nanleh a sakhuamitna bangmalou (athawn) ahilel hi achi hi. Thamlou in A zaah a zui utlou (zui tuanlou) mi pen ama leh ama kisol ahi, achi nalai hi (Jakob 1:26). Achileh Pasian in sakhomitna khu ahuat adiai? Hizenzenlou hi, Pasian in sakhomitna sang a, poimaw ngaizawh anei hi china ahi zaw hi. Tua Pasian in sakhomitna sang a, adeizawhpen ahileh Athu zaahin thei, tuabaanah nalai chikhuh ahi. Pasianthu ihinpi theina ding in ithei masat angai hi. John in “thutah na thei ding ua, tua thutah in ang suata sah ding hi,” achi hi (Jn.8:32). Pasianthu pen kimtahin leh muanhuaitah in Bible ah kimu hi.

Hinpi

Pasianthu azaahte ahinkhua a hinpi china ahi
i.e not only knowing the word of God but also applied to life (it is the giest)

Gingtu tamtahten Pasianthu ahinpilou ziah un Khristian diing banglou uhi. Amaute pen Khristian kichi ua, Pasianthu tamtah thei ua hinalai uhi. Hinanleh Pasianthu a hinpilou ziah un khenkhat mitmu in Khristian bang nan uleh, Pasian in muchian mama a, thamlou in ginglou mite’n a etmai un zong a theichian mama uhi. Tamte ziahin Khristian hinapi a sakhua dang zui ei gingtute lah ah ki tam mama mai hi. Nang tuate lah ah na telkha mawleh? Achileh sakhua dihtah bang ata diai leh envai. Jakob in sakhua dihtah khu bang chi’n a gial ei: Pasian leh Pa mitmu a, sakhuo biehna sieng leh nieh banglou khu, nubei-pabeite leh meithai-tagate a lungkham mangbat lai ua ve leh heneem baanah leitung damsung a, eimathu OR midang thu hizolou a Pasian thuthu a ki thununtah a hinkhozat leh kikep khu sakhua dihtah ahi ana chi hi. Tuni’n tam thumalte toh ki enthah vai, sakhua dihtah zuikha ihi nai, oleh sakhua dihlou khat zuikha ihizaw ama?

Nialbuloute

Pasianthu pen hichizo ding ahi chi'n genlei eisang a kitheisah zaw
Ki nialpi lei zong zaw gual hilou te ahi uhi

Tuni’n sakhua dihtah zuimi pen amel kilat danzil leh mite mudan-gintatdan bang ahi siah a, Pasianthu ki control sah a, Pasianthu thu a hinkhua zatna khu ahizaw hi chi achiang mama mai hi. Tam laigialtu ahileh Jesu sanggam tinten ahi a, Jesu’n mi 5000 te avaah leh sil mah tampi abawl lai in zong a gingta nai sih hi. Hinanleh a sanggampa Jesu pen Pasian ahi a thamlouin hundamtu zong ahi chi ang theichet phet in gingtu tamtahte sang in pulam kilatdan nangawn in zong a sakhua mizaw a, Pasian etdan (Pasianthu hinpina) lam ah zong a chitah mama a, Jerusalem ah gingtu lamkai lian etton taah mama khat ana hi ahi. Ikiim-ipaam envelvel le chin Khristian sa piangthah sang in ginglou mi piangthahte’n Khrist mel sutna aneizaw uhi. Bangziah hi di’n na gingta ei? Practical mi mama Jakob hingthu hilte apan Jesu meel isut theilouna uh enjual vai:

Jakob

Tam lai gialtu, Jakob, ahi leh English version in James kichi a, amintah khu Jakob ahi zaw hi. Ama khu Jesu nungjui hilou in Jesu pianpi a sanggamte lah a upapen hi nalai dia gintat ahizaw hi. Ama khu Jerusalem a gingtu hattuamte mapui zong ana hi hi.

1. Lungthah paipai lou ding, aziahpen lungthahna in Pasian deilam sang in Pasian deilou lam apiangsah utzaw hi.
2. Eima apat a thu tampi gendoh sang a thu ngaikhiat lam ki thalawp zaw ding.
3. Thu ithei a izaah zousia te khu zui a hinpi ding ahi tua ahisih leh limlang a pianpi meel ki-en in tomlou kaalsung a manghilpei abang giap ding hi. Thamlou thu zaah a theita a zuilou mi khu ama leh ama kisol ahi.
4. Thutah zaah a zuimi in vangphatna, gualzawlna angaah diing hi.
5. Tambang a thutah zaah a hinkhua a zang leh hinpi te pen Sakhua dihtah zui ahi zong achi hi.
6. Tambang a sakhua dih zuimi in panpi ding bei, panpi ngai a um mite apanpi leng uhi achi hi.
7. Tam atung a practical tah a gingtuten izui dia ang thuhil te izuilou chiang ua Jesu meel kisuun thei mamalou hi. Khujiahin ginglou mi, gingtu ang hichiang un chitah ua tuaziahin ama uhten zui tantan ua tuachin ei gingtu chitahlou te sang in gingtu hilou, gingtu a hing ki convert te'n Jesu meelsun zaw thamtham leng uhi.

Pasianthu tamtah thei ziah, biahinn kai gige ziah, Pasian nna sem a nasatah a kizat ziah, leh eima ngaidan leh mite ngaidan a Pasian miitna te inei ziah a Jesu melsutna kinei ahi zenzen sih a, Pasian thute ihinkhua a ihinpi tahtah chiang a Jesu melsutna ki neitheipan ahizaw hi. Tambang a Jesu melsutna khu ahi iMangpa’n sakhua dihtah zuina ana chi khu. Aziahpen, tambang miten Jesu bang in panpi ngai tagate, meithaite, panpi ding neiloute, beidongte, mangthangte, lungsim puagih neite, leh adangdang te lungsimtawng apat panpi nopna toh apanpita ua, tuachin Jesu mel a hinkhua un asuunta hi.

Simtu teng Mangpa’n sakhua dihtah zuithei a iMangpa meel suuntheita di'n hing vangpiah chiat ta hen.