Huhhingna Abit Dan


HUHHING NA ABIT DAN  (Security of Salvation)
Kaineo Touthang 

HUHHNG NA ahilou le Penthah na abitdan hi Christian khat hina a het dinga poimo tah chu ahi. Huhhing na abitdan het them lou jeh in mitampi a-Christian hinkho khang theilou in alhagao hinkho a-op kai dehduh in ahi. Chule hiche thu hi Christian holah a boina sangloi khat jong ahi. Christian kahie tia itahsan nathu jeng jong kiloi dot dot a um kiti hi jachat natah in kagel in ahi. Ajeh chu mitampin amang thei e tin atah san un, Ka pengthah tai atijou nung’a conset na abol teng apenthah na chu tahsan jou ji talouvin apenthah na mang kit dan in angaito un ahi. Hinlah Bible sunghi phatah a ivet leh Penthah na abit dan mun tampin akimu theiyin, Huhhing na amang kit theiye kitina Bible chang vang khat jong akimupon ahi. Huhhing nahi amang theipoi akiti mana ka Penthah le kanop nop in chon jong leng Vangam ka lut thou thou ding ahinai tia anop nop a chon kit jong tampi aumda pon ahi. Ama ho hi itobang mi hiuva chule ipi ato diu ham Jesun amaho chung chang thu iti asei em ti jong iseikhom diu ahi. 

 Amasan, Penthah nahi aman theilou dan hoilaiya I-mu-uva chule Bible in iti ahil em ti ana veu hite. I-het ding khat uchu Bible hi Pathen haikhum Pathen Lekhabu Theng ahin, chule Bible hi adih mo um louva asunga um jouse hi atheng ahisoh kei in adih soh kei in ahi, ti hi I-lungsung uva I-koi soh kei diuvin ikitem un ahi. Tun Bible chang tampi um jong le ikihil nathei diuvin halkhat kahin tah lang nomin hiche ho chu abanban in anaveu hite: 

I. John 3:16 = “Ajeh chu Pathenin hibanga hi vannoi angailut ahin, koi hijongle ama tahsan chan chu mangthah louva tonsot hin kemlou anei thei nading, Achapa chang khat chu apetan ahi.” 

Bible chang mun tam pia jong “Tonsot hin kemlou” ti hi imu thei u ahi. Hichea kona isei nom uchu ipiham itileh “koi hijongle ama tahsan chan chu mangthah louva tonsot hin kemlou” chu anei ahitan ahi. Chomkhat chonset nabol lou kah in atipon ahi, hiche a tonsot ati hin khatvei itahsan chu tonsot a dinga hinkem lou anei ahitai atina ahi. chule “hinkem lou” kiti thucheng jong hi gel in, ve in, “hinkem lou” tita a ahile iti chu Jesu itahsan jou a ichonset le ipenthah na chu mang ding ham? hinkem thei ati pon ahi. Jesu chu I-Huhhingpu le I-Lengpa dia ikisan a ahile “tonsot hinkem lou” chu kinei ahitai. 

II. John 10:18 = “Khat touvin eilahpeh ding thu ahipoi;” John 10:28 = “Chule Keiman amaho chu tonsot hinkemlou kape ji; chutia chu amaho itih chan a mang thah lou ding ahiuve; chu jongle koiman kakhut’a kona amaho chu eilahpeh lou ding ahi.” 

Hiche teni sunga imu uhin mipengthah khat chu Pathen a ahitan, Pathen a ahiphat chun koiman Pathen khut a kon a alah mang theilou ahitai tichu kicheh tah in eisei peh kit tauvin ahi. Tonsot hin kimlou pepa chu Pathen ahin, tonsot a mangthah talou dia akhut a atuhchah a Lhagao Theng a mohor anam den/khum ahitan ahi. Satan in ijat in chu hen lang puimang kigo hen lang achonset nadin nitin in lhepna amasanga koipeh jeng jong le, Pathen in hiche lhepna ho doujou theina tha chu apeh ding, kahkom le leiset mihem hinan chonset nan lha ji jongle lung kisih a Pakai akouva achonset aphon tei ji ahin, akisih a Pakai koma ngaidam athum teng Pakaiyin angaidam jitan ahi. Satan in Pathen khut a kon in lah mang ding go jing jong le alahpeh jou lou ding ahi. Ajeh chu Pathen in Tahsan chate hi akhut a atuhchah ahitai. Koiham Pakai khut gakeh lha a Acha lhatdam change galamang dinga chu? 

Anoiya Paul in Rome mite henga lekha athot na a asei hi ven kicheh tah in asei kit in ahi. Pathen in “koiman kakhut’a kona amaho chu eilahpeh lou ding ahi.” atihi ahet chet hima ma hi din katahsan in ahi. Hijeh a chu Paul in hangsan tah a hiche leiset a thil le lo, hahsat genthei naho, mibolset na tintang, Vantil pipu hihen lang chungle noiya hijeng jong le Pathen ngailut na toh imachan akhen joulou di chu anasei doh a “det tah a katahsan ahitai” tia anaphon doh ahi. 

III. Romans 8: 35, 38-39 = “(35)Christa ngailut na a kona koiham eikhen dinga? Hesoh gentheile, lungdonna, bolsetna, gilkel, pon beiya um, settona, chemjam, hicheng chun eikhen thei ding ham? (38) Ajeh chu I-Pakaiyu Christa Jesua um Pathen ngailutna kon chun thina, hinna, Vantil, vaipo pipu, tulai thudolla khonung a thun, thuneina, (39) chung le noi, adang thilsem imachan eikhen theilou dingu ahi, tia det tah a katahsan ahitai.”

1 John 2:1= “Kanaote ho, nachonset louna dinguva hicheng hi nahenguva kahinsut ahi. Chule khat tou chonse jeng ta jongle Pa anga eihuva eisei champeh chonphatah Jesu Christa chu inei nauve.” 

Hiche Bible chang ho ivet nauva kona hi Huhhing nahi amang theipoi ti kicheh in muthei in aum in ahi. Eima tahsan cha khat hina a jong Huhhing ichan hi aman theilou ding dan jong hetdoh thei chu ahi. Huhhing na chu amang theiye natile thudoh phabep kahin doh nom in ahi. 
    1. Kapengthah tai nati khah em? 
    2.  Ahile Na penthah na ijat vei naman sah khah tah em? Huhhing na amang theiye natile Na huhhing na Na mansah jing ding vang katahsan in ahi. Ajeh chu mihem koima chonset neilou aumpon ahi (1 John 1:8, 10). 
    3. Chutia Na mansah jing ahitah le ijatvei nathahpen tah em? 
    4. Jesu Christa Cross a athia chonset na atoh chu tonsot a dinga bulhing jou lou ham? 
Mi koiham khat in jong ipen thah le chonset na mong mong kinei lou dan in gel meithei inte, hichu hilou ahi. Chonset kiti hi mipengthah lou ho bou toh ivet chep khah jijeh uva hitia hi isei jiu ahi. I-penthah masanga chonset kibol le Penthah jou a chonset hi akikhehna le ipiti hung um a chule iti kile thuh ham tijong het chet ngai ahi. Hitobang hi hetna lhahsam jeh a jong um thei ahin, abangloi khat chu det tah a pang jong aum kit thouvin ahi. Jesu Christa tailou leiset a mihem a hungpeng tapou chu atheng bukim aum pon ahi. Tahsan chaten vang hiche thenna bukim chu ngah pum a Jesu Christa ahung kilah a thithei lou le chul theilou vouva ikikhel diu ngah jing a um ihiuve. 

A pengthah ten jong chonset na anei nalai un (hichu “nitin chonset” ahi) hinlah hichu tonsot a thipi ding chonset na ahitapon ahi.

1 John 1:8 “Eihon chonsetna kaneipoi, itiuva ahile, eima le eima kilhem lha a ihiu ahi, chule thutah chu ilung sunguva umlou ahi.” 
1 John 1:10 “Eihon chonset na kaneipoi, itiuva ahile Ama (Pathen) chu ijousah-u ahi, chule athu isunguva umlou ahi.” 
Hiche Bible changa kon a imu uchu koima chonset neilou aumpoi ti chu ahi. Ahileh 
    • Mijouse hi damun che ding hitam? 
    • Apengthah ho iti ding hitam? 
    • Ahiloule penthah jou a chonset nabolbol jengthei ahitia nakiphal a ham? 

Ahipon ahi. Mihemte hi tonsot a dinga vanvou a ikikhel kah seuva itahsauva chonset lung iput jinguva chonset bolnom na lungthim inei jing pau asei na ahi. Chule Adam thisan pu ihi nalai jeh u ahi. Adam thisan jaolouva ihin nadingu nikho hung lhung ding ahi chuni tengle chonset kitihi tahsan chate jouse chunga um talou ding ahi. 

Huhhing nahi amang theipoi akiti mana ka Penthah le kanop nop in chon jong leng Vangam ka lut thou thou ding ahinai tia anop nop a chon kit ho hi itobang mi hiuva chule ipi ato diu ham Jesun amaho chung chang thu iti asei em ti anaveu hite. 

Amasapen a hitobanga lunggel miho hi Apengthah lou ho ahiuve katinom in ahi. Ajeh chu apenthah a ahile chonset na jamsan ding lung angaito a Jesus ahuhhingpa lunglam chu ipi ham ti ahol tei ding katahsan in ahi. Kanop nop kabol ding ahi atithei le hitobang lung ahingel doh na alung chu atheng lou ahi hetchet ahijengin ahi. Ahinlah koiham khat chu ana pengthah ham khat nante, apengthah vanga lhagao lam a phatah a ahilthei le atilkhou thei umlou jeh a min apui nale aseipeh ho anamoh tahsan jong um kit nante. Amaho hivang pengthah dih tah chu ahi ule Chonset na neokhat hijong le abol tengule alungsunguva kipa nale lungmon na aneilou diu ahi. Mi apengthah dih tah ho vang chu achonse jom ji pouvin ahi. Pathen deilou abolkhah tengule lung kicholna neithei louvin Pakai kom belin ngaidam athum teiyun ahi. Pengthah ta a chonset bol jom jing ho vang chu Pathen in kouna ahiloule jepna achan jin angaideh louva akigeldoh deh lou le ahinkho alajitan ahi. Ka pengthah e tia chonset na a noptah a kibolbol hohi atam jo apengthah tahtah lou ahiuvin ahi. Ajeh chu chonset na a chun alungmong un alungsung a amale ama jengjong themmo akichan theipon ahi. Hichu Satan a ahina aphotchet ahi. Pakai Jesu Christan “Na Pau Diabol’a kon nahibouvui” tin anaseiyin ahi. Ajeh chu “Na Pau Diabol lunggot chu subulhit dingbou nanomui” tichu kicheh tah in John 8:44 na a imu un ahi. 

Hitia Christian kahi tia anopnop a chon’a, adeideiya hinkho manga, apengthah lou ki penthah sah a chonset tampi bol jongleng vangam kilut thouthou ding tia hinkho mang jing hohin ipi ato diu ham? chule Jesun amaho chung chang thu iti asei em itile 
Matthew 7:21 – 23 na sung a 
21 “Pakai, Pakai eiti chan chu vangama lut ding ahipoi, koi hileh vana um ka-Pa lung lam bolpa bou chu lut ding ahi. 
22 Hini chule mi tamtah-in kajah a, ‘Pakai, Pakai, keihon nangma mina thu kasei louvu ham? Chule nangma mina thilha kano doh louvu ham? Chule nangma mina bolmo kidang kabol louvu ham?’ tia asei dingu ahi. 
23 Hiteng chule keiman amaho chu phongtah a kaseipeh a, ‘keiman nangho ima tih chanin kahekha pouve; vo chonset bolte ho, kakoma konin chemangun,’ kati ding ahi. 

Hitobang Pakai anga hintoh a jahcha tah a Damun jon ding ho hi koiho hidiu ham iti leh Christian kihisah a Pakai mina thil tampi bol ho hi hung hidiu ahipen in ahi. Phatpha Na nei pet hin Na penthah na kikhol chen din Pakai min in temna ikineiyun ahi. Asimdoh jouse Pathen in phatthei boh tahen Ka kipah e.










No comments

Powered by Blogger.