JESU HONG DAMSAKNA TECI PANNA DINGIN KICING HI

JESU HONG DAMSAKNA TECI PANNA DINGIN KICING HI

Nisim Manna

“Amah a gamta khial ahih leh ahihloh bangmah ka thei kei hi. Keima theih thu in: Ni dangin mittaw kim lai, tu-in khua ka mu theita hi," ci-in a dawng hi. Johan 9:25 

Hih Lai Siangtho munah Jesu in pianpih mittaw khat a damsakma in, “hih mittawpa' mittawtna pen a kuamah mawhna hang hilo in ama tungah Pasian' vangliatna a kilat theihna ding a mittaw ahi hi, " a cih khit in damsak hi. Ahi zongin tua a damsak ni pen Sabbath ni ahih manin Farisai mite' in a damsakpa Jesu mawhsak nuam uh ahih manin tua mittaw ngeipa kiangah amah a damsak pen kua hi hiam? cih dong uh hi. Tua ciangin mittaw ngeipa in, 'Amah a khial ahih leh hih loh ka thei kei a, ka theih pen ni dangin a mittaw kim lai, tu-in khua ka mu thei ta hi," ci-in dawng hi. 

Hih mittaw ngeipa in Pasian' thuthuk theilo kha ding a, ahi zongin Jesu tawh a kituah khakna tungtawnin a theihna pen Farisai mite sangin Pasian theician zaw hi. Na khempeuh theilo kha mah ding a, ahi zongin ama theihcian lohpi zong gen tuanlo ding hi. Amah kimuanna in a kipilsak mite gen ding theilo in om sak hi. Tua mah bangin nang zong Jesu damsakna na ngah khit leh a phazo ahi hi. Mi dangte in hong telsiam lo phial uh ahih zongin Jesu hong damsakna pen teci muanhuai hikhin hi. Tua manin thahat in, hangsan in la, tuni in midangte kiangah na damna teci pang in. 

𝐊𝐢-𝐚𝐩𝐧𝐚: 𝐓𝐨𝐩𝐚 𝐚𝐰, 𝐡𝐢𝐡 𝐦𝐢𝐭𝐭𝐚𝐰 𝐧𝐠𝐞𝐢𝐩𝐚 𝐛𝐚𝐧𝐠𝐢𝐧 𝐧𝐚𝐧𝐠𝐦𝐚 𝐧𝐨𝐧𝐠 𝐝𝐚𝐦𝐬𝐚𝐤𝐧𝐚 𝐦𝐢𝐝𝐚𝐧𝐠𝐭𝐞 𝐤𝐢𝐚𝐧𝐠𝐚𝐡 𝐭𝐞𝐜𝐢 𝐤𝐚 𝐩𝐚𝐧 𝐳𝐚𝐰𝐡𝐧𝐚 𝐝𝐢𝐧𝐠𝐢𝐧 𝐡𝐨𝐧𝐠 𝐡𝐮𝐡 𝐢𝐧. 𝐉𝐞𝐬𝐮 𝐊𝐡𝐫𝐢𝐬 𝐦𝐢𝐧 𝐢𝐧 𝐤𝐨𝐧𝐠 𝐤𝐢-𝐚𝐩 𝐡𝐢. 𝐀𝐦𝐞𝐧!