RAPTURE LEH SECOND COMING
Rev. Stephen Khupsianlal
Khristian gingtute lah akhun Bible in hun nukhieh lam a sil hingtung dingdan agente theibuoi leh lungbuoi tampi ki um hi. Tambang theikhielna umte lah ah ei gingtute khenkhatten i theibuoi mama uh khat khu Rapture leh Second coming thu khu ahi.
Tam khu mi tampiten akibang dan in ngaituo ua, lametna neikhiel ua, khenkhat kia ten Tribulation gimthuohna thuoh kha ding banga ngaisutna nei in Rapture zong Tribulation hun kim lai a hing tung dinga ngaituona neikhiel jong tampi um uhi.
Khenkhat khia ten Bible in Rapture agen khasih hi, tuazieh in gingtu piengthate lahtouna khu umlou ding bang in ngaituo khiel kia uhi. Rapture leh Second Coming hun tuomtuom a tung ding ahidan theikhiel zieh a ngaituona neikhiel a kinepna neikhiel a umzieh in Bible in kichientah a agendan khu theisiem poimaw mama mai hi.
RAPTURE: Rapture chi khu Latin ham in ' Raeptius ' akichi a, Greek ham in ' Harpazo ' kichi hi. Tuakhu ' Lahtou' or 'Lah mang ' ( Caught Up ) chi na ahi. Tam khu Paul in 1 Thessalonika 4:13-18 ah kichientah in agen ahi. Tuaban ah 1 Korinth 15:21 azong genkia hi.
Paul in Rapture hun a sil umding dan agenna akhun van a pengkul gin izah chieng ua ei gingtu piengtha ten imusate imakhellou ding dan uleh Khrist a shisate thou masa ding uh ahidan gen hi. Amau te thawdoh zou chieng a ei hinga na um nalai te toh huikhuo ah Mangpa tuoh dinga amau toh meipi lah a lahtou (Rapture) a umkhawm ding ihidan uh kichien tah in gen hi. Rapture hun a eite khu lahmang a umta ding ihizieh un Kum 7 Tribulation gimthuona huoise kithuoh khalou ding ahi.
Tualeh Paul in Rapture a itahsa ukhu ' Suhlamdang in i um ding uh' achi a, tuami suhlamdang tahsa loupi toh thuom in i um ta ding uh ahi. Tami tahsa suhlamdang a umding khu thoukia iMangpa tahsa loupi toh kibang khu ahi ta ding hi. Tua leh Rapture khu mitphetkal in ahing tung dinga, nuasia a um ten bangma theimanlou ding uhi. Nasepte 8:39-40 akhun Mangpa Hagau in Phillip khu thakhat thu a alahmang dan leh amuten Azotus khuo a ava mukia dan uh kigen hi. Tuakhu mitphet kal a Phillip in Rapture achep lawhna khu ahi.
Tuaban ah Rapture hunkhu banghun a hing um ding ahiei chi koiman agenthei lou ahi. Pa bou in athei ahi. Tulaitah a ihunzah ukhu Hattuom Hun ahiei Hepina Hun zong kichi hi. Tam ihun zah ukhu Rapture hun ah hingbei ta ding hi. Tu Hepina Hun akhun Mangpa'n ei gingtute kungah hundamna thu phuongzah dingin mawpuohna ahing pie hi. Nanleh Rapture hun chiengin Mangpa'n piengtha zousie ahing lamang ta ding hi.
Meikang phelmit (Fire fighters) te khun meikang umchieng in innsung a umte khu hundam sawm in pan la uhi. Tuabang a pan alah lai un lamkaipen (Fire Chief) khun meikuong pen phelguol nawnlou chi athei chiengin fire fighters teng potdoh ding in thu pieh abawl a, tuachin abawn ua ahing pot uh ngai ta hi. Tambang in Mangpa'n piengtha tate hing lamang ta ding hi.
SECOND COMING: Leitunga iMangpa Jesu ahing pei masat hun khu 1st Coming aki chi a, Zekaria 14:2 gen banga Olive muol ah ahing kum ding khu leitung a nivei ahing pei na ding ahizieh in sapham in Second Coming ichi uh ahi. Ahing pei masat leh ahing peikia ding hun kikal akhun Hattuom Hun izang lel lel ua, tam hun khu Rapture chiengin abei ding ahi.
Rapture zaw chiengin kum 7 Tribulation hing umngal ding a, tuazou chiengin Second Coming hing um ta ding ahi. Rapture khu mitphetkal a misiengthoute lahtouna ahia, nuasia a umten bangma muman lou ding uhi. Second Coming hun pen ah mit zousie in mu ding uhi...Michin in amu ding ua, tuachin nam zousie in asuun ding uh ahi ( Mathiu 24:27 ).
Rapture hunding khu koiman athei sih a, nanleh Second Coming pen Tribulation zouchienga hing tung pai ding ahi dan kigen hi (Mathiu 24:29-30). Tam hun chieng in agingtalou zousie inzong ahing mu ta ding ua, ahing gingta ding uhi. Sil poimaw mama khu tuahun chienga na gintat pan sang in Hepina Hun a umpet in ki gintat kin in.
Rapture hun pen iMangpa Jesu piengthate latou a hingpei ding ahia, Second Coming hun akhun piengthate toh van apat hing kumsuh khawm ta ding uhi ( Zekaria 14:5).
Rapture khu piengthate suhlamdang a umhun ahia, Second Coming ah suhlamdangna umlou hi. Rapture khu piengthate van a lahtou hun ahia, Second Coming pen piengthate toh Mangpa leitunga a hing kum hun ahi. Rapture pen piengthate bou toh kisai sil ahia, Second Coming pen michin toh kisaina ahi.
Rapture pen Tribulation masang ahia, Second Coming pen Tribulation zouchieng ding ahi. Rapture ah huikhuo ah ahing pei dinga, Second Coming chiengin Leitung ah hing kum ding hi. Rapture ah Mangpa Mou pui dingin ahing pei dinga, Second Coming chiengin Amou te toh hiñg kum ding hi. Rapture hun khu piengthate bou in athei ding ua, Second Coming pen namchin in athei ding uhi.
Rapture khu Tribulation kipat na ahi dinga, Second Coming pen Kum 1000 Leenggam kipatna hi ding hi. Rapture leh Second Coming pen kibang mawngmawng lou leh hun tuomtuom ahi zieh in khensiem apoimaw mama a, theisiem poimaw mama mai hi.
Theisiem ding in Mangpa'n hing guolzawl hen🙏
No comments