PASIAN' THU-IN KHUAVAK HONG PIA HI

PASIAN' THU-IN KHUAVAK HONG PIA HI
Nisim Manna

𝘽𝙪𝙡𝙥𝙝𝙪𝙝: 𝙏𝙪𝙖 𝙘𝙞𝙖𝙣𝙜𝙞𝙣 𝙅𝙚𝙨𝙪 𝙞𝙣, "𝙈𝙞 𝙠𝙝𝙖𝙩𝙥𝙚𝙪𝙝 𝙞𝙣 𝙢𝙚𝙞 𝙖 𝙠𝙞𝙫𝙖𝙠 𝙝𝙤𝙣𝙜 𝙡𝙖-𝙞𝙣 𝙡𝙖𝙬𝙝 𝙥𝙚𝙪𝙝 𝙠𝙝𝙪𝙝 𝙖, 𝙖𝙝𝙞𝙝 𝙠𝙚𝙞 𝙡𝙚𝙝 𝙡𝙪𝙥𝙣𝙖 𝙣𝙪𝙖𝙞 𝙥𝙚𝙪𝙝𝙖𝙝 𝙠𝙤𝙞𝙝 𝙣𝙜𝙚𝙞 𝙖𝙝𝙞 𝙝𝙞𝙖𝙢? 𝘼 𝙠𝙞𝙢𝙪𝙝 𝙩𝙝𝙚𝙞𝙝𝙣𝙖 𝙙𝙞𝙣𝙜 𝙢𝙚𝙞𝙫𝙖𝙠𝙣𝙖 𝙠𝙝𝙤 𝙨𝙖𝙣𝙜 𝙩𝙪𝙣𝙜𝙖𝙝 𝙠𝙤𝙞𝙝 𝙝𝙞𝙡𝙤 𝙖𝙝𝙞 𝙝𝙞𝙖𝙢?  𝙈𝙖𝙧𝙠𝙖 4:21

Jesu in hih munah meivak mi khatpeuhin a muh theihna dingin kho sang tungah kikoih hi, acih in a gennop in Pasian' thu i nuntakna ah a manphatna a genna ahi hi. Late gelhpa in zong, "Nangma thu pen ka khe adingin meivak hi a, ka lampi adingin khuavak ahi hi," (Late 119:105) na ci hi. Tua mah bangin Jesu in a gennop pen hun khempeuh ah Pasian' thu pen lam hong lak, i khuavak ahi hi, aci ahi hi. Tua Pasian thu ah vakna om kei leh a mial lakah i pukkhin ding uh hi. 

Tua bang hi napi tampite in Pasian thu kithudon lo-in lawh peuh kikhuh-in, lupna nuai peuhah koih tawh kibang takpi in Pasian thu kithei hetlo-in, Pasian thu kimakaih saklo takpi hihang. Tua manin Pasian thu tawh i nuntakzia kituak lo tampi om hi. 

Tua manin tuni in i meivak ahi Pasian thu a sangpen ah koih takpi ni. A mial leitungah meivak in zang in, i lampi adingin lam hong lak dingin Pasian thu zang ni. Tua Pasian thu sun leh zan in a lungngai mi tungah thusim kihilh dinga, a kiseel sim thute kipholak ding hi (Mk.4:22). 

𝐊𝐢-𝐚𝐩𝐧𝐚: 𝐓𝐨𝐩𝐚 𝐚𝐰, 𝐧𝐚𝐧𝐠𝐦𝐚 𝐭𝐡𝐮 𝐤𝐞𝐢 𝐚𝐝𝐢𝐧𝐠𝐢𝐧 𝐦𝐞𝐢𝐯𝐚𝐤 𝐛𝐚𝐧𝐠𝐚 𝐤𝐚 𝐳𝐚𝐭 𝐭𝐡𝐞𝐢𝐡𝐧𝐚 𝐝𝐢𝐧𝐠𝐢𝐧 𝐬𝐮𝐧 𝐥𝐞𝐡 𝐳𝐚𝐧 𝐢𝐧 𝐡𝐨𝐧𝐠 𝐥𝐮𝐧𝐠𝐠𝐮𝐥𝐡 𝐬𝐚𝐤 𝐝𝐢𝐧𝐠𝐢𝐧 𝐉𝐞𝐬𝐮 𝐊𝐡𝐫𝐢𝐬 𝐦𝐢𝐧𝐢𝐧 𝐤𝐨𝐧𝐠 𝐤𝐢-𝐚𝐩 𝐡𝐢. 𝐀𝐦𝐞𝐧!