GNFA: Tripura Mission Nnasepna June Report Tomkim

Tripura Mission Nnasepna June Report Tomkim

Amasapen in I Lalpa Jesu Khrist' min in chibai ka hung buuh uhi!

Pathian thupina ding in report tamlou, kipahthu genna ding leh thumpih ding point tamlou ka hung share uhi:

1. Na hung hamteipihna uh leh supportna te uh ziah in mission field a nnasepna paitou thei zel hi.
2. June ha in mission field a positive a hung um ziah in kaal thum vel kikhopna, innvehna leh counselling te ki khawlsan phot hi. June kaal tawp apan covid positive te hung dam veh ua, kipahthu genpihni.
3. Kou zong mission nnasepna vai toh innlam ah ka um na lai ua, lockdown ziah in deih bang in thil a kisai thei sih a, hinanleh innlam a zong a lou thei lou a innvehna, counselling, thumsahna, thillat leh hattuam lamkaite toh kithuah khawmna hun ka zang tou zel uhi. Pathian in hun hoih a hung piah leh  August ha kaal masapen a kiih suh ding in ka kisakhol simta uhi.
4. Emergency a Biahinn ding innlui puahphat ding chi a photo a ka hung taahlat pen uh mission nnasepna awlmoh mah mah te tungtawn in sepsuah ahi ta hi. Kipahthu gen ni.
5. Ka Lawipa Anonto Reang in mission field a gingtute a na enkol a, amah toh kithuzah den in maban kisuan zel hi. Aman zong kouhtuam member te khat hospital a ava puina ah covid positive hung hi a, a zi zong lohsawn hi. Hinanleh Pathian' lungsiatna ziah in kaal nih zoh in hing damsiang pai ta uhi. Kipahthu genpih ni.
6. Naupang te lah a nnasepna zong pai tou zel a, gospel laa sinsahna kinei zel hi. Naupang te ki thalawp thei mah mah ua, Naupang hung tel khenkhat te a nu leh pa te uh Hindu hi nalai uhi. Thumpih ni.
7. Lockdown um ziah in neh leh tah lam ah zong hahsatna kituah lel hi. Hinanle Pathian in Guwahati apan a Heutunu tungtawn in anntang, dal, sathau, chi, chini, singpite chih te gingtu te kung a hawm theih ding ahih dan thu ki za a, kipahthu gen ni. 
8. Unaupa Babujoy Reang leh a zi Sigolti Reang te counseling nahtah in ki neih pih lel lel a, Hagaosiangthou in a lungsim ua nna a sep a, dawi leh kau biahna apan a gingtu a hung suah theihna ding in thumna a phoh ni.
9. Unaunu Sunali Reang (k-17) zong hung damsiang ta a, kipahthu genni.
10. Hindu siampu apan a gingtu hing suah, unaupa Horendra Reang zong Khristian a a hung kipiah ziah in khosung miten gensia in dou le uh zong, ginna lam a khantouh lam a manoh ziah in kipahthu genpih in thumpih tou zel ni.
11. Natna hiileng lah ah Lalpa' kepbitna mission field a gingtuten a muh zel theihna ding un thumpih ni. Tualniam mah mah  leh niteng neh leh tah ding a buai te ahih ziah un.
12. Hagaomangthai te lah a Tanchinhoih genna paitou zel tungtawn a Pathian' lalgam keehlian a a um theih zel na ding in phatuam ngaitah a na hung thumpihna uh ka poimoh mah mah uhi.

Lalpa'n hung malsawm hen!

Khrist aa dia semkhawm

Thang & Ching

Good News For All (GNFA), Tripura

View More Photos

Also Read

July 2021 Report
August 2021 Report
Progress Report
Prayer Request