TUA LAI MUNAH NA OM HIAM?

TUA LAI MUNAH NA OM HIAM?

Nisim Manna

Bulphuh: Nangmah in lui panin tui na dawn ding hi. Tua lai-ah nangmah hong vak dingin va-akte thu ka pia zo hi, a ci hi. Kumpi Masate 17:4

Pasian in kamsang Elijah tungtawn in Israel kumpi Ahab kiangah hong tung ding kumte ah guah zu lo ding ahih dan gensak hi. Tua ciangin Topa in kamsangpa kiangah Kherith lui-ah kibu dingin sawl a, tua lai-ah tuidawn ding mu in, va-ak in a nek ding pia ding ahih thu zasak hi (v.3&4). Hih munah theih dinga kisam mahmah ahih leh a Topa sawlna munah kamsang Elijah a pai kei leh na lamdang mulo ding cihna hi. Topa huhna pen kamsangpa omna mun ah kipia lo dinga, a Topa sawlna, deihna munah huhna kicing kipiazaw ding cihna hi. 

Tua mah bangin eite zong Pasian in huh ding hong kamciamte ama hong deihna munah i om nak leh i ngah ding hi. Tua manin na nuntakna ah Pasian' vangliatna, ama na lamdang bawlte na muhnop leh Pasian hong deihna leh sawlna munah na om ding thupi hi. Pasian' huhna, ama nasep theihna na muh kei leh na omna mun, na sepna maan lo cihna hiding hi. Mi khatpeuh in a upna kalsuanpih in Pasian' deihna munah om a, Pasian' sawlna a sep nakleh tua mi tungah Pasian' ompihna thupha a kicing kimu ding hi. Pasian' huhna kicing na mu hiam? Pasian' hong sawlna munah na om ta hiam? 

𝐊𝐢-𝐚𝐩𝐧𝐚: 𝐓𝐨𝐩𝐚 𝐚𝐰, 𝐧𝐚𝐧𝐠𝐦𝐚 𝐧𝐨𝐧𝐠 𝐝𝐞𝐢𝐡𝐧𝐚 𝐥𝐞𝐡 𝐬𝐚𝐰𝐥𝐧𝐚 𝐦𝐮𝐧𝐚𝐡 𝐤𝐚 𝐨𝐦 𝐭𝐡𝐞𝐢𝐡𝐧𝐚 𝐝𝐢𝐧𝐠𝐢𝐧 𝐉𝐞𝐬𝐮 𝐊𝐡𝐫𝐢𝐬 𝐦𝐢𝐧𝐢𝐧 𝐤𝐨𝐧𝐠 𝐤𝐢-𝐚𝐩 𝐡𝐢. 𝐀𝐦𝐞𝐧!