PAI-INLA SEM IN | LUNGKIA LO IN KINAK KO SEM ZAW IN!

PAI-INLA SEM IN
Nisim Manna

Bulphuh: Tua ahih ciangin amah pai-in Topa' thugen bangin gamta a, Jordan nisuahna lam Kherith lui gei ah om hi. Kumpi masate 17:5

Topa thu tawh kituakin Elijah nungta ahih manin ama huna mite tawh a nuntakna kilamdangpah hi. Tua manin Topa in Elijah kisapna bangin a lamdang takin na huh zel hi. Elijah in Topa thumang ahih manin Topa in thupha pia hi. A zenzen in Elijah in Topa thugen na mang nuamlo bang hi leh bang piang ding hiam? Elijah in Topa thu manglo bang hileh kialpi sung a nek ding mulo ding a, Pasian in ama tungtung in na lamdang bawllo ding a, Karmel muala Baal' kamsangte tawh a kidemna ah guallel ding a, Zarefath khua meigongnu leh a tapa zong nek ding neilo in siding uh hi. A ban gen ding tampi omlai hi. Elijah in Topa thu a man manin amah bek hilo mi tampi in phattuampih in, nuntakloh uh hi. Topa' thuman bangzah takin manpha hihiam! 

Tua mah bangin eite'n zong a baihloh hangin Topa thu i man teitei-na in ei bek hilo in mi tampi in na phattuampih ding hi, cih phawk ni. Eite' sungah Pasian in midangte' na lamdang muh ding (a thupha ding) hong koihsak hi. Elijah bangin Topa thumang-in i kalsuan khiat ciangin midangte in zong ei tungtawn in a ngah dinguh thuphate na ngah thei pan uh hi. Tua manin tuni in Topa in nang sunga hong koih thuphate ama sawlna bangin thumang takin sepkhiatna tawh khahkhia in. Midangte in nang tungtawn in thupha a ngah dinguh hong ngak hi. Pai-inla semin!! 

𝐊𝐢-𝐚𝐩𝐧𝐚: 𝐓𝐨𝐩𝐚 𝐚𝐰, 𝐧𝐚𝐧𝐠𝐦𝐚' 𝐭𝐡𝐮 𝐦𝐚𝐧𝐧𝐚 𝐭𝐚𝐰𝐡 𝐦𝐢𝐝𝐚𝐧𝐠𝐭𝐞 𝐚𝐝𝐢𝐧𝐠𝐢𝐧 𝐭𝐡𝐮𝐩𝐡𝐚 𝐤𝐚 𝐡𝐢𝐡 𝐭𝐡𝐞𝐢𝐡𝐧𝐚 𝐝𝐢𝐧𝐠𝐢𝐧 𝐉𝐞𝐬𝐮 𝐊𝐡𝐫𝐢𝐬 𝐦𝐢𝐧𝐢𝐧 𝐤𝐨𝐧𝐠 𝐤𝐢-𝐚𝐩 𝐡𝐢. 𝐀𝐦𝐞𝐧!

______________________

LUNGKIA LO IN KINAK KO SEM ZAW IN!
Nisim Manna

𝐁𝐮𝐥𝐩𝐡𝐮𝐡:  Tua ciangin mi tampite in a daih na dingin a kham uh hangin amah kinak ko semsem a, "David Tapa aw, kei hong hehpih in!" a ci hi. Marka 10:48 (ZSV)

Bartimai pen mittaw khutdawh a lampi gei khat ah na tuzel hi. Nikhat tua a tutna lampi nawkin Messiah hong paina thu za hi. Bartimai in tua Messiah in ama lunggulhna sepsak thei ding hi cih upna tawh nakpi takin kiko in, " David tapa aw, kei hong hehpih in! " ci hi. Tua ciangin a lamdang takin langpanna na tuak hi. Tua Bartimai lunggulhna a tangtunlohna dingin a langpang, a khamte pen a theih ngeiloh Rom galkapte ahih kei leh thu-umlo Gentail mite hilo-in, amah a huh-a panpih dinga a kilawm Jesu nungzuite ahi hi. Tua mah bangin nang leh kei zong hong langpang, hong dalte pen a tangpi-in mi dangpi hilo in ei hong deihsak dinga i upte mah zong hithei hi. 

Hih bangin i lamet hetlohte panin langpanna i tuah laitakin lungkia-in, kithanem sakin i nasep tawpsan, i upna nusia cih pen a baih mahmah ding hinapi tua bangte in lungdamna hong pia tuan lo hi. Tuate sangin Bartimai bangin hong huh thei ding pa Messiah tungah kinak ko semsem zaw ding hihang. Topa tawh i kizopna midangte bawlin siasak lo ding hihang. Langpanna, gensiatnate hangin kilungkia sak lo-in i Topa mah naih teitei zaw ni. 

𝐊𝐢-𝐚𝐩𝐧𝐚: 𝐓𝐨𝐩𝐚 𝐚𝐰, 𝐤𝐚 𝐧𝐢𝐬𝐢𝐦 𝐤𝐚𝐥𝐬𝐮𝐚𝐧𝐧𝐚 𝐚𝐡 𝐛𝐚𝐧𝐠 𝐭𝐞𝐧𝐠 𝐡𝐨𝐧𝐠 𝐭𝐮𝐧𝐠 𝐳𝐨𝐧𝐠𝐢𝐧 𝐧𝐚𝐧𝐠 𝐛𝐞𝐤 𝐦𝐚𝐡 𝐤𝐨𝐧𝐠 𝐦𝐢𝐭𝐬𝐮𝐚𝐧 𝐭𝐡𝐞𝐢𝐡𝐧𝐚 𝐝𝐢𝐧𝐠𝐢𝐧 𝐉𝐞𝐬𝐮 𝐊𝐡𝐫𝐢𝐬 𝐦𝐢𝐧 𝐢𝐧 𝐤𝐨𝐧𝐠 𝐤𝐢-𝐚𝐩 𝐡𝐢. 𝐀𝐦𝐞𝐧!