DOTNA THUPI PEN

DOTNA THUPI PEN
Nisim Manna

𝘽𝙪𝙡𝙥𝙝𝙪𝙝: 𝙅𝙚𝙨𝙪 𝙞𝙣 𝙎𝙞𝙢𝙤𝙣 𝙋𝙞𝙩𝙚𝙧 𝙠𝙞𝙖𝙣𝙜𝙖𝙝, "𝙅𝙤𝙝𝙖𝙣 𝙩𝙖𝙥𝙖 𝙎𝙞𝙢𝙤𝙣 𝙖𝙬, 𝙝𝙞𝙝𝙩𝙚 𝙨𝙖𝙣𝙜𝙞𝙣 𝙣𝙤𝙣𝙜 𝙞𝙩𝙯𝙖𝙬 𝙝𝙞𝙖𝙢?"𝙘𝙞-𝙞𝙣 𝙖 𝙙𝙤𝙣𝙜 𝙝𝙞. 𝘼𝙢𝙖𝙝 𝙞𝙣, "𝙃𝙚, 𝙏𝙤𝙥𝙖 𝙖𝙬, 𝙠𝙤𝙣𝙜 𝙞𝙩 𝙝𝙞, 𝙘𝙞𝙝 𝙣𝙤𝙣𝙜 𝙩𝙝𝙚𝙞 𝙝𝙞, " 𝙖 𝙘𝙞𝙝 𝙘𝙞𝙖𝙣𝙜𝙞𝙣 𝙅𝙚𝙨𝙪, 𝙞𝙣, "𝙆𝙖 𝙩𝙪𝙪𝙣𝙤𝙩𝙚 𝙣𝙖 𝙫𝙖𝙠 𝙞𝙣, 𝙖 𝙘𝙞 𝙝𝙞." 𝙅𝙤𝙝𝙖𝙣 21: 15 (𝙕𝘽) 

Hih thu pen Jesu a Pa kiangah a kilaktohma a nungzuite tawh a hunzat khawn nunung ah a gen ahi hi. Nang bang Jesu munah om hi leteh bang thu na gen tam? Mi tampi lamdang sak dingin Jesu in Peter kiangah a itna thu dong hi. Jesu a kimat nitak in thum vei Piter in Jesu na nial a, tu-in thum vei mah Piter in amah a itna Jesu in dong hi. Jesu a kimatma Piter in Jesu kiangah sihna ciang dongah amah zui ding ahih thu na gen hi (Lk. 22:33). Ahi zongin Piter gamtatna in a Topa sangin ama pumpi ki-itzaw ahihna kimu hi. Tua manin Jesu in Piter kiangah kei nong it hiam cih bekin na dong lo-in hihte sangin nong itzaw hiam? na ci tektek hi. 

Tuni in i Topa Jesu in hih dot nang kiangah zong hong dong hi. Na dangte-midangte khempeuh sangin Jesu na itzaw takpi hiam? I Topa in nang tung panin a theihnop thu-in amah na itpen hiam, cih thu ahi hi. Jesu dotna Piter in thum vei Jesu a itna a genkhitin Jesu in "Hong zui in, "(v.19) na ci hi. Jesu a it takpite in ama singlamteh pua in Jesu nungzui uh hi. Tuni in nang zong Jesu na it takpi leh ama nungzui muanhuai hiding in ki-ap in. 

𝐊𝐢-𝐚𝐩𝐧𝐚: 𝐓𝐨𝐩𝐚 𝐚𝐰, 𝐤𝐚 𝐡𝐮𝐧 𝐛𝐞𝐢𝐬𝐚 𝐚𝐡 𝐤𝐞𝐢 𝐝𝐞𝐢𝐡𝐧𝐚 𝐭𝐡𝐮𝐩𝐢 𝐬𝐚𝐤𝐳𝐚𝐰 𝐢𝐧 𝐧𝐚𝐧𝐠 𝐝𝐞𝐢𝐡𝐧𝐚 𝐤𝐚 𝐧𝐢𝐚𝐥 𝐤𝐡𝐚𝐤𝐧𝐚𝐭𝐞 𝐡𝐨𝐧𝐠 𝐦𝐚𝐢𝐬𝐚𝐤 𝐡𝐢. 𝐓𝐮𝐧𝐢 𝐚 𝐤𝐢𝐩𝐚𝐭𝐢𝐧 𝐥𝐮𝐧𝐠𝐬𝐢𝐦 𝐭𝐚𝐤𝐩𝐢 𝐭𝐚𝐰𝐡 𝐧𝐚𝐧𝐠 𝐡𝐨𝐧𝐠 𝐢𝐭𝐢𝐧, 𝐧𝐚𝐧𝐠 𝐧𝐮𝐧𝐠𝐳𝐮𝐢 𝐦𝐮𝐚𝐧𝐡𝐮𝐚𝐢 𝐡𝐢𝐝𝐢𝐧𝐠 𝐢𝐧 𝐉𝐞𝐬𝐮 𝐊𝐡𝐫𝐢𝐬 𝐦𝐢𝐧𝐢𝐧 𝐤𝐨𝐧𝐠 𝐤𝐢-𝐚𝐩 𝐡𝐢. 𝐀𝐦𝐞𝐧!