JOHAN LAMETNA

JOHAN LAMETNA
Nisim Manna

𝘽𝙪𝙡𝙥𝙝𝙪𝙝: 𝙏𝙪𝙞𝙥𝙝𝙪𝙢𝙥𝙖 𝙅𝙤𝙝𝙖𝙣 𝙞𝙣  𝙩𝙝𝙤𝙣𝙜 𝙨𝙪𝙣𝙜 𝙥𝙖𝙣𝙞𝙣 𝙅𝙚𝙨𝙪' 𝙣𝙖𝙨𝙚𝙥𝙣𝙖𝙩𝙚 𝙖 𝙯𝙖𝙠 𝙘𝙞𝙖𝙣𝙜𝙞𝙣 𝙅𝙚𝙨𝙪 𝙠𝙞𝙖𝙣𝙜𝙖𝙝 𝙖 𝙣𝙪𝙣𝙜𝙯𝙪𝙞𝙩𝙚 𝙨𝙖𝙬𝙡 𝙖, "𝙉𝙖𝙣𝙜 𝙥𝙚𝙣 𝙖 𝙝𝙤𝙣𝙜 𝙥𝙖𝙞 𝙙𝙞𝙣𝙜𝙥𝙖 𝙣𝙖 𝙝𝙞𝙝𝙞𝙖𝙢, 𝙩𝙪𝙖 𝙖𝙝𝙞𝙝 𝙠𝙚𝙞 𝙡𝙚𝙝 𝙖 𝙙𝙖𝙣𝙜 𝙣𝙖 𝙡𝙖𝙢𝙚𝙣 𝙡𝙖𝙞 𝙙𝙞𝙣𝙜 𝙠𝙖 𝙝𝙞 𝙪𝙝 𝙝𝙞𝙖𝙢?" 𝙘𝙞-𝙞𝙣 𝙖 𝙙𝙤𝙣𝙜 𝙨𝙖𝙠 𝙝𝙞. 𝙈𝙖𝙩𝙩𝙝𝙖𝙞 11:2&3

Thonginn mialpi sungah tuiphumpa Johan a khumcip uh hangin Johan lametna khihcip theilo uh hi. Messiah mah lamen tawntung ahih manin a haksatnate in amah puksak zolo hi. Johan ngawng a kitan hangin a nasepna leh a lametna kizom paisuak a, tuni dongin kizom suak lai hi. Messiah hong paita ding cih lametna nei den ahih manin thuak ding leh sih ding zong laulo a, Messiah lampi ding a sialna ah kuamah in khaktan zolo hi. 

Lametna in Johan lawpsak-in, hangsak a, khamuanna zong pia hi. Johan a lametna in hawl ahih manin thuak ding khempeuh zong thuak zo a, a lametna tangtung takpi ahih manin a sih ciangin zong lungkim takin si hi (Matt.14:1-12). Mi khempeuh in lametna kinei ciat napi lametna i ngakna kibang lo thei hi. Tuni in Johan bangin i lametna Topa Jesu Khris tungah nga-in, ama hong kamciamte hong tung takpi ding hi, cih lamet ni. Tua bang lametna in na nuntakna hong mannei sak ding hi. 

𝐊𝐢-𝐚𝐩𝐧𝐚: 𝐓𝐨𝐩𝐚 𝐚𝐰, 𝐧𝐚𝐧𝐠𝐦𝐚 𝐭𝐮𝐧𝐠 𝐥𝐞𝐡 𝐧𝐚 𝐤𝐚𝐦𝐜𝐢𝐚𝐦𝐭𝐞 𝐭𝐮𝐧𝐠𝐚𝐡 𝐤𝐚 𝐥𝐚𝐦𝐞𝐭𝐧𝐚 𝐤𝐨𝐧𝐠 𝐧𝐠𝐚 𝐡𝐢. 𝐍𝐚𝐧𝐠𝐦𝐚 𝐝𝐞𝐢𝐡𝐧𝐚 𝐛𝐚𝐧𝐠𝐢𝐧 𝐡𝐨𝐧𝐠 𝐳𝐚𝐧𝐠 𝐢𝐧. 𝐉𝐞𝐬𝐮 𝐊𝐡𝐫𝐢𝐬 𝐦𝐢𝐧 𝐢𝐧 𝐤𝐨𝐧𝐠 𝐤𝐢-𝐚𝐩 𝐡𝐢. 𝐀𝐦𝐞𝐧!