Leader Vs a Good man

Leader Vs a Good man

Pastor Dr. Dongzathawng

Devotional # 1 (vol 4) 

Fellowship of Thirsty Souls and Hungry Hearts

Sunday nitahpha chivai!

Introduction:

Janni tah in ka ngai mama, ka it mama Upa H.T Lianthang in hing na mualliam san hi. Ama Shillong EOC chairman ahi ban ah Pray For Lamka chairman ahi. Ka lom it Rev Zamlal in ahing nutsia ni in i gam a thummi khat in ahing beisanta chi in thawmhau huai kasa mama hi.

Rev Zamlal jou in Upa H.T Lianthang Pasian in hing pia kia a hinanleh tunin aman jong  hing nusia kia ta hi. Tunin Lamka hing tung van in jing ah vui na thupi tah in Hill town EOC hattuam in nei ding uhi.

Aw na ngai om na lomlom e Upa pu. Kei bang suak ding nang lou ah!

Ka thawm hau ta loi!. Tujaan ka ihmu thei sih hi. Ka ngaitua tua hi. Bang ding a thumna galhang ten hing tai san san’! 

Tuni ka thaneem gop in Biahin jong kai ngaplou in inn mun ah ka ngen in ka suun mai hi. Nitah lam in himi msg ka hing gel hi.

Alang khat ah Kamdouveng ZCBC HQtrs. church compound ah BJP flag kikhai a social media ah viral hi. I thei ding khu: Church leh community hall compound khat um Khom hoilou dan lesson himai hi. Pasian biahna munsiang leh khawvel vaihomna innpi huang  khat a um khawm jel leh mailam ah himi khu nepte hing hi nalai ding hi.

Tu in i topic ah lut ta vai: Leader kichi khu Kei ma mimal define dan in “To make things happen” chi ahi.  Leader hingal a a ma vaihom sung a bangma a bawl dohlou leh leader hilou hi. A hoi hii in asie hileh jong leader etsahna khu thil piang sah hi. 

Donald Trump leader ahidan khu thil piang sah jung jung hi. Koima boldohlou bill pass umsa hinanleh boldoh hingei lou te aman hing bol doh jung jung hi. Leader in thil abol dohna ding in mipi or a team te or even opposition te a jaw ngai hi. Himi A vision a tangtun sah na ding in mi tampi a biahsiam, a mai et, ngai ding hi. Khumi in lungduauina, ki ngainiemna bang tan apoimaw diai? Himi ahi leader ut mama ahivang a koi ma nuai a kun ngaplou, koima biangaplou, koima houpi ngaplou leader te fail na. Leader lou ten ahileh A thu akilah lou leh lungthah, lungkia ngal. Athu la teng toh aguh a, thilguhbawl bawl in atawp a a vaihomna pawh jah.. koiman gingta nonlou.

Leader hoi in ahileh ama vision khu miten adeina ding in kingai niem tah in mite ngaidan la in, mi nuai ah kun jou hi. Mimal a thujaw sawm hi. Tuajou chiang bill ah hing ki pass a, tua chiang thil thah hing piang hi. 

Himi process jui ngaplou in leader a aki patlou ngai hi.... step masa pen ah. America a evangelical christian kichi Trump president ding a deilou khat jong kathei sih hi. Leader leh president lah ah thil bolkhia tam leh hangsan pen lah ah pang jingta ding hi. Hinanleh ama it leh ngai sang ten Trump khu kamsiam, mi hoi, mi pha, mi siangthou, hagau mi chi lam a patah leh it ahi sih uhi. Leader ahina jieh a it uh leh ajatat ahi uhi. Ahia eilam a Trump deilou 1/2 in adei lou jiah ukhu Trump khu Pastor te bang a hagau mi ding leh hoi ding in lam en kha uhi.

Trump dei lou ten Mike Pence (Vice president) khu hoi sa uhi. Ajiehpen Mike Pence khu a hagau mit tuah dan pastor bang hi. Mihoi piangthah leh hagau mi himei thei hi. Ahiin ithei ding khu America ten a president ding un pastor poimaw lou uhi. Leader poimaw jaw uhi. USA president min tuam khat  khu commander in chief ahi.

Commander in chief in galvan leh nuclear secret teng jong ama khut a um ahita. A nam bitna khu ama maw puah ahi ta hi. Winston Churchill in England leh christianity Nazi apat in hunkhia hi. Churchil khu koiman pastor te quality Nei ding in lam en lou hi. Sing nuai mi leader in pastor bangbang quality anei ding chi lei singnuai mi leader um ngeilou ding hi. 

Keima ham kibat pi Zou society ah 1990s lai apat in lamkai ju leh sa a kimawl ning ki tel gop in “Mangpa belampu hoi, ma khiang hoi ka deih uh. Ju leh sa a ki mawl lou, Pasian thei.,,” chi in thum in la in sa uhi.

Atawp in a nephu a ju glass khat vei jong sukha lou, Pasian thei,  pastor ta, piching sunday hil thei, biahinn lam sah thei hing nei uh a, hinanleh atawp lam ah tua athumna bangbang uh quality nei leader pa khu ha dei in hing deilou uhi. Ajiehpen tua ju nehlou leader pa in area tuam ah chauna, hawmthawh huaina tampi nei veve hi.

Tunin Leader toh kisai ah thil 3 en vai:

1) leader ut in “making things happen" na ngaplou leh leader hisawm da mai in. Na line hilou hi. Pu S. Thangkhangin Ngaihte in ZNC gen secy atuh ma in jong JNU campus te ki ling sahjouta hi.

2) Making things happen na ding in mi bang jat keng ah na kun ngap ei.

Mibang jat inn ah ki nuailutna in sa na that ngap ei ? or singpi nadawm ngap ei? Mi bang jat kung ah phone call na bawl ngap ei.? “Ka thu hing selsel te, kei hing doudou pa mudalou in, a inn ah ka lut teitei ding a, ka lam ah ka huai lut tut teitei som ding “ na chi ngap na diai? Tua na hilou leh leadership khu nang ading hilou hi.

( Kei jong himi mama ka ngaplou jieh in hattuam ah leader lam ka tu ut mong mong sih hi.)

Komiti leh thil khat poupou a nang hing against te damdam a, awlawl a thujaw leh huai sawmlou a melma et paipai, dou paipai, tuam et paipai mi na hi leh leadership khu nang line ahi sih chi thei in. 

3) Leader khu atuam ahi a: mihoi, mipha, hagau mi, thummi, thu gensiam, kichi khu atuam hi.

Thummi, mi hoi, hagau, thugen siam, thu hil siam hijiah a leader hoi ding dan a i koi uh pen ngaidan dihlou vawt ahi.

Leader in good man ahuam a, good man in leader huam kha lou hi.

Leader hoi thummi, hagau mi, mi pha huam kha a, mi hoi mipha in leader hoi huam kha lou hi.

Tam khu ikhen siamlou jieh un hattuam leh nam jong ibuai gop uhi.

America pastor khat in Trump thil boldoh thupi tampi  agen jou in Trump kamsiamlou leh a jainem

Lou dan te gen a. Himah hi Trump in “Miss congeniality”  la lou ma ding hi chiin jou hi.

America president hoi pen pen te  aki gen te khu biah inn kai taima, missionary chom a kithang te hilou uhi. Hinanleh leader ahina uah Pasian min in pang det uhi. Eg Lincoln, Reagan. Jimmy Carter khu baptist church Sunday School teacher ahi. Hinanleh tunin liberal leh christian te priniciple dinpilou pen president athei ahi. Good salesman khat khu Sepai te trainer ding in hoilou ding a, depression te counseling siampa khu Ju kham te lah speaker ding in hoi lou ding hi.

Khut gum a nasem sem nu khu spa ading in siam lou ding hi.

Atawpna ding in 

1) Leader hi ut in “making things happen" sahlou na hileh leader na hisih.

2) “Making things happen" na ding a na mi vanjat poimaw ding te na biah ngap lou a, na thu jaw joulou ding leh kipat da vet in.

3). Leader leh mipha ki banglou hi. Mohphat a bangma boldohlou sang in gilou a thil bo doh idei jaw hi.

4).Politics lam ah: lai siam leh mipil danthei jiah a making things happen hisese lou hi.

Hattuam lam ah: 

Thummi, hagau mi , mi pha, mi hoi hijieh a  hattuam leader hoi hisese lou hi.  Pastor ding a hoi pa khu commander in chief adin hoilou mai thei hi. Tualeh Bitterness neimi: mitung a lungkim louna nei, ngaidam theilou, phuba lah ut jing, ngaidamlouna hagau vop jing na hileh leader na tu thei sih ding hi. Na personal vengeance utna in hing ruin ding hi.

Leader in things happen na ding in ama muda, angai dan kibang lou, ama dou, ama sietna ding bawl te jong ama lam ah huai sawm teitei hi (eg. Ab Lincoln). Hitan ngap lou in hattuam hi in politics hileh na kipat vet lou hoi hi. (Ken jong ka joh vot lou khat ahi.) 

Tunin i gam hiin hattuam hileh mi hoi, mi pha, thummi, hagau mi mai hilou in leader who can make things happen i poimaw uhi!

Mangpan tua bang leader te hing pia ta hen!

Topa Thupha!

Shalom!