Na Gennop ua Na Thuman uleh Agam Ga na Ne ding uhi
Na Gennop ua Na Thuman uleh Agam Ga na Ne ding uhi
Pastor Dr Dongzathawng
Devotional # 2( vol 4)
Fellowship of Thirsty Souls n Hungry Hearts
Thirsty soul simtute
Shalom Topa Thupha!!
I dam chiat uh maw! Mangpa'n tuni khu lungsim tahsa leh hagau a na dam ni hing hisah ta hen!
Text
Luke 24: 25 - “How foolish you are, and how slow to believe all that the prophets have spoken!”
Jannin ka tapa school offline in kai pan ta hi. Ka va thah a nitah in kava la hi. School jou a katate school park a kimawl ka et chuh ka dam huaihuai hi. Nop asah dan uh..
Tu in jong va thah jou in prayer walk kawm in cathedral huang ah himi msg ka hing gel hi. Pasian in mipil, misiam, mi fel talented sang in mi gennop sui hi. Tamveipi i pilna leh bawltheina jiehin ki gen hah hi. Idea ki hau seng in Pasian apat pilna ki poimawlou ki sa khajel hi.
Pastor pension, upa pension tan chiang tung theita “gen hah nalai” ki um hi. Dr Ginlianlal in “upa deuh deuh kol hah deuhdeuh” achi nal kasa hi. Pasian Mi jatte khu a gennop te ahi. “David ka lungtang bang pua pa” achi jieh khu Davih khu Pasian in gennop sa mama hiding hi.
Abaraham “ka lawmpa” chi in puang top hi. Abraham gennop dan Pasian chi ahinah leh gentamlou in jui himai hi. A in agam nusia. Atapa tanpha laan ngam hi. Pasian ading a mi gen nop ten thil thupi pi ama uh tungtawn in Pasian in sem khia jung jung hi.
Ahiin Agen hah jong um veve hi. Kumpi Saul khu abul lam a gennop mama hinapi hing gen hah mai hilou in luhlulhna in dim a atawp in shi law hi. Jonah genhah jiehin ama ma in thuah law hi. Mi khenkhat agen hahna te abeina ding in Pasian in satkham, satguai ngiingei hi.
Pasian in Canaan gam a agam gate: i sepgimlou Inn hoi te, huan te, theiga te, tui kul te abai sa in hing koi sah hi. Hinanpi i gen hah leh i thuman lou jieh in ki tang kha lou hi. Canaan gam ah Egypt hinkhua ki mang hi. Thiljousie or gualzawlna jousie Pasian in a mu dingdan, alah ding dan, ajat ding dan, a kep ding dan, ajek dingdan, a hun amun siam sa in nei veh hi.
Tamveipi a gualzawlna ki deina pi tua a rules and norms te ki jui peilou in ki gen hah in gualzawlna nop tah i jou ding lai te iki buh gamna leh i manthaina ki suah sah hi. Mi genhahte toh ki deal khah gimhuai hi. Mou dopna vai a inkuan hoi toh ki sukhate thawveng in jaang khai hi. Thubuai la buai hun a inkuan gilou toh kisuh khah buai huai tajen hi.
Office a sap gennop toh ki tuah kha hamphat huai hi. Damlou chiang a Lamka damdawi inn nurse gilou duty toh ki suh kha pen i natna sang in nurse nu gitlouna gu ki natpi jaw hi. Akal chiang in pastor hagau mi ki chi te sang in khawvelmi Pasian gingloute toh ki deal khah chitah jaw in hepina leh theisiam tam jaw bang uhi. Ajiehpen Pastor leh missionary tanpha gen hah mama, sum thei mama, deal hah mama, mi gam hat mama, rate sang mama, gen hah mama ki tam hi.
Hattuam a mi gen hah upa nei kha hattuam khu hattuam vangsie ahi . Hattuam in masawn ding khan ding sangin tua upa kumluipa nuah ding venna in bang ma bol thei lou in um thei uhi. Inn sung a tehpi gen hah, mou gen hah, ta gen hah ten Pasian gualzawlna a gamga ineh ding hing dal hi.
Hattuam komiti ah mi gen hah a um chiang bailam tah a sai ding thil neu nou jong a ham sa seng in Himalaya tang kal toh kibang hi. Simple tah chai suh ding khu gen buai buai thei uhi. Mi genhahte'n hattuam buai sah uhi. Khujieh in hattuam hisel thei lou in liam liam hi.
Pasian in i sep tam, isep hat, i sepgimte sang in i gennop hing mu ut jaw hi. Ajiehpen tamveipi gim tah a i sep te khu Ama ading in suh siet a, phelkhiah a bawlthah kia ngai tam hi (to undo and re-do). I ta neu ten fel kisa ang panpi chiang ang subuai uh ahilam thei lou uhi.
Tamvei pi hattuam a hat mama nupi ten bang ma bol lou in ki le kia in a tehpi Or apasal te uh hoi deu in jen uleh inn sung pai hoi in hattuam damjaw mai thei hi.
Gennop ichi chiang nasem sem ding gal dou dou ding china hilou hi. Joshua sepai te ading in Jericho kulpi bang puhsahna ding in bulu a satchip ding hilou in daidide a ni 7 vial ding hijaw hi. Gennop lou uleh hibang strategy khu “War Plan” ading a thulah lou ahi. Ahin agen nopna un a namsau uh lam kha lou in kulpi puh sah uhi.
Unau te tamveipi ibol theina,i siamna leh i sep hat na sang in i gennop leh thumanna in sem tam in ga nei tam jaw hi. Tamveipi Martha bang a kibuai sah a diangdianglou in in pindan ah thumang tah in Jesu kengbul ah um theilou I Mangpan Mary akipapi bang in hing kipapi ding hi.
A chang ah i gennop na etsahna khu lamkai post i lah ut lou, i ki kaang koi, i ham tam lou bang hi ding hi. I kipil sah a egen lou thu lou, ei ipan lou leh hattuam leh khawvel bei ding bang a iki ngai tua khu i motna ahi jaw!
Gingtu piangtha kep hah, jen hah, kol hah, sep khom pi hah, ki houpi hah, anuai a sep hah leader leh even thum khawmpi hah gingtu ihi lam ki thei lei maw neu khat beh! Miten eitung tawn a Pasian mu deu ding hive aw!
Mi ten ahing nin lam, ahing kham lam ki thei lei maw??? Kei jong gen hah kisa thou ing. Ka ji in hing thei pen va. Pasian in ang bang chi gel diai maw? Ei te Pasian in ang bang chi jat ding lah hibang a gen hah, sai hah, sawi hah, kol hah gingtu ihi leh.
Ei upa khat or pastor khat or lamkai khat hi in I lom te, i hattuam te, i belam te i sep khompi te: ei nuah ding, ei lungthah ding , ei pohjah ding mit mei veng a um den chi lom lom!
Nam toh kisai ah jong a gennop society hivai. Thil hoi thil tha khat masawn na ding ahileh gennop a jui pai pai society te khang tou jel ding a. Luhlul leh ki thei sah, ki dih sah hattuam te khu hing gawta ding hi.
A gennop a thumang te ading agam ga neh seng lou um hi. Hinanleh a ga law ding dan, neh ding dan, a hun amun rule um hi. Tua pen full a jar jou thei na ding in gennop na leh thumanna ngai hi.
Mangpa Hagau Siang in i gen hahna uh lungtang suangbang a tah khu i lahkhia sah in sa bang nem dil del willing spirit hing restore sah ta hen!
Topa Thupha!
No comments